Yibɛrɛbɑ bɑ Yinni Gusunɔn
sɑ̃ɑ yerun bɑnɑ yɔ̃rɑsiɑ
4
1 Yudɑbɑ kɑ Bɛnyɑmɛɛbɑn yibɛrɛbɑ bɑ nuɑ mɑ be bɑ rɑɑ yoru mwɛɛrɑ bɑ wurɑmɑ bɑ Gusunɔ Isirelibɑn Yinni sɑ̃ɑ yeru bɑniɑmmɛ. 2 Yerɑ yibɛrɛ be, bɑ nɑ Sorobɑbɛli kɑ Yudɑbɑn bukurobun mi bɑ bu sɔ̃ɔwɑ bɑ nɛɛ, sɑ ko kɑ bɛɛ bɑnɑ ye ko, domi bɛsɛn tii sɑ rɑ Gusunɔ bɛɛn Yinni sɑ̃, kpɑ su nùn yɑ̃kuru kuɑ sɑɑ Esɑri Hɑdoni, Asirin sinɑ bokon wɑɑtin di, wi, wi u kɑ sun nɑ mini.
3 Adɑmɑ Sorobɑbɛli kɑ Yosue kɑ Isirelibɑn yɛnu yɛ̃ro be bɑ tie, bɑ bu sɔ̃ɔwɑ bɑ nɛɛ, n ǹ kɑ bɛɛ, bɛsɛ tɔnɑwɑ nge mɛ Sirusi Pɛɛsibɑn sinɑ boko u geruɑ. Domi Gusunɔ bɛsɛ Isirelibɑn Yinnin sɑ̃ɑ yerɑ.
4 Sɑɑ yerɑ tɔn be bɑ wɑ̃ɑ tem mɛ sɔɔ, bɑ Yudɑbɑn dɑm buɑ. Mɑ bɑ bu nɑndɑsiɑ bu ku kɑ bɑnɑ ye ko. 5 Bɑ bwisi kɛ̃ɔbu gɑbu gobi kɑ̃ bu kɑ tɔmbu swɑɑ nim wiɑ bu kɑ sɔmbu te kpɑnɑ. Nge mɛyɑ n koorɑ Sirusin bɑndun wɑɑti kpuro sɔɔ, sere n kɑ girɑri Dɑrusi Pɛɛsibɑn sinɑ bokon bɑndu sɔɔ.
Bɑ Yudɑbɑ kɔrumɔtɔnu kuɑ
6 Asuresin bɑndun tore sɔɔ, bɑ tireru yoruɑ bu kɑ Yudɑbɑ kɑ Yerusɑlɛmugibu tɑɑrɛ wɛ̃.
7 Aɑtɑsɛsi Pɛɛsin sinɑ bokon wɑɑti sɔɔ, Bisilɑmu kɑ Miteredɑti kɑ Tɑbɛɛli kɑ sere ben sɔm kowosibu bɑ Aɑtɑsɛsi wi tireru yoruɑ. Bɑ tu yoruɑwɑ kɑ Arɑmun bɑrum kɑ mɛn yorɑ.
8 Rehumu, berɑ min kpɑro kɑ win tire yoro Simusɑi bɑ sinɑ boko Aɑtɑsɛsi tire te yoruɑ te tɑ kɑ Yerusɑlɛmu yɑ̃.
9-11 Wee ye tire te, tɑ geruɑ. Tɑ nɛɛ, Aɑtɑsɛsi, sinɑ boko, bɛsɛ wunɛn sɔm kowobu, bɛsɛ be sɑ wɑ̃ɑ dɑɑ guru gee, nɛ, Rehumu, berɑ minin kpɑro kɑ Simusɑi nɛn tire yoro kɑ sere bɛsɛn sɔm kowosibu be bɑ wɑ̃ɑ Diniɔ kɑ Aɑfɑsɑtɑkiɔ kɑ Tɑɑpɛliɔ kɑ Afɑrɑsiɔ kɑ Erɛkiɔ kɑ Bɑbiloniɔ kɑ Susiɔ kɑ Dehɑɔ kɑ Elɑmuɔ kɑ sere bwese ni nu tie ni Asinɑpɑri wi u sɑ̃ɑ tɔn boko u swĩi Sɑmɑriɔ kɑ sere wuu si su wɑ̃ɑ Efɑrɑtin guru gee, sɔ̃ɔ duu yeru giɑ, bɛsɛrɑ sɑ nun yoruɑmmɛ. Sɑ nɛɛ, 12 sinɑ boko, ɑ de ɑ n yɛ̃ mɑ Yuu be bɑ nɑ sɑɑ wunɛn min di bɑ tunumɑ bɛsɛn suunu sɔɔ Yerusɑlɛmu mini. Bɑ nɑ bɑ Yerusɑlɛmu ye seeyɑ yèn tɔmbɑ sɑ̃ɑ tɔn kɔ̃sobu bɑ ku rɑ mɛm nɔ mi. Bɑ yen gbɑ̃rɑrun kpɛɛkpɛɛku sɔmmɔ. 13 Yen sɔ̃, ɑ n yɛ̃ mɑ bɑ̀ n wuu gen gbɑ̃rɑru seeyɑ, bɑ ǹ mɑɑ wɔ̃ɔ gobi kɔsiɑmɔ ǹ kun mɛ gbererun gobi. Yen biru wunɛn ɑrumɑni ye ɑ rɑ rɑɑ wɑ yɑ koo kɑɑrɑwɑ. 14 Nge mɛ sɑ mɑɑ wɑɑmɔ sɑ dimɔ wunɛn min di, yerɑ sɑ nɛɛ, n ǹ weenɛ bu nun gɛm. Yen sɔ̃nɑ sɑ nun lɑbɑɑri yeni sɔ̃ɔmɔ. 15 A de ɑ kɑsu wunɛn sikɑdobɑn fɑɑgin tireru sɔɔ, kɑɑ wɑ nge mɛ Yerusɑlɛmu yɑ sɑ̃ɑ. Yɑ sɑ̃ɑwɑ wuu ge gɑ rɑ sinɑmbu seesi kɑ sere berɑ mi yɑ wɑ̃ɑn tɔmbu. Sɑɑ yellun diyɑ yɑ rɑ ko mɛ. Yen sɔ̃nɑ bɑ ye bɑnsu koosiɑ. 16 Yen sɔ̃, wunɛ sinɑ boko, ɑ̀ n wurɑ wuu ge, gɑ bɑnirɑ, mɑ bɑ gen gbɑ̃rɑru seeyɑ, ɑ ǹ kɑɑ mɑɑ Efɑrɑtin dɑɑ guru ge nɔmɑ sikerenɑ ɑ n mɔ.
Sinɑ boko Aɑtɑsɛsin wisibu
17 Sinɑ boko Aɑtɑsɛsi u bu wisɑ u nɛɛ, Rehumu, wunɛ wi ɑ sɑ̃ɑ berɑ yen kpɑro, kɑ wunɛn tire yoro Simusɑi kɑ bɛɛn sɔm kowosibu be bɑ wɑ̃ɑ Sɑmɑriɔ kɑ be bɑ wɑ̃ɑ Efɑrɑtin dɑɑrun guru giɔ, bɛɛ kpurowɑ nɑ tɔburɑ. 18 Tire te i mɑn mɔrisiɑmɑ mi, bɑ mɑn tu gɑriɑ mɑm mɑm. 19 Mɑ nɑ woodɑ wɛ̃ bu kɑsu nɛn sikɑdobɑn fɑɑgin tireru sɔɔ. Mɑ bɑ kɑso ge kuɑ bɑ wɑ mɑ sɑɑ yellun di wuu ge, gɑ rɑ sinɑmbun woodɑ yinɛ kpɑ bɑ n bu seesimɔ. 20 Yerusɑlɛmu mi, sinɑm dɑmgibɑ bɑ bɑndu di mɑ bɑ beri min tem kpuro mɔ. Mɑ sinɑmbu gɑbu bɑ rɑ bu wɔ̃ɔ gobi kɑ gbere gobi kɔsie. 21 Yen sɔ̃, i tɔn ben sɔmburu yɔ̃rɑsio kpɑ bu ku rɑɑ wuu gen bɑnsu seeyɑ mɑ n kun mɔ nɑ bu woodɑ wɛ̃. 22 I ku gɑri yi ɑtɑfiiru ko kpɑ kɔ̃sɑ yu ku rɑɑ sosi yu kɑ sinɑmbu ɑsɔrɔ nɑɑwɑ.
23 Ye bɑ yɑnde Aɑtɑsɛsin tire te wɑ, bɑ gɑrɑ Rehumu kɑ win tire yoro Simusɑi kɑ sere ben sɔm kowosibun wuswɑɑɔ, yerɑ bɑ dɑ fuuku Yerusɑlɛmuɔ Yuubɑn mi, bɑ ben sɔmbu te yɔ̃rɑsiɑ kɑ dɑm.
Bɑ mɑɑ sɑ̃ɑ yerun
bɑnɑn sɔmburu seewɑ
24 Sɑ̃ɑ yee ten sɔmbu te, tɑ yɔ̃rɑ n kɑ kuɑ Dɑrusi Pɛɛsibɑn sinɑ bokon bɑndun wɔ̃ɔ yiruse sɔɔ.