ƐSIDARASI
Sirusi u Yudɑbɑ woodɑ wɛ̃
bu wurɑ ben temɔ
1
1 Sirusi Pɛɛsin sinɑ bokon bɑndun wɔ̃ɔ gbiikuu sɔɔ, Yinni Gusunɔ u gɔ̃ru doke u win gɑri yibiɑ yi u rɑɑ geruɑ sɑɑ win sɔmɔ Yeremin nɔɔn di. Mɑ u doke Sirusin gɔ̃ruɔ bu kɑ gɑri yini yore. Mɑ bɑ yi kpɑrɑ win tem kpuro sɔɔ. 2 Yi nɛɛ, ɑmɛniwɑ Sirusi Pɛɛsin sinɑ boko u geruɑ. U nɛɛ, Wɔrukoo u mɑn hɑnduniɑn bɑnnu kpuro wɛ̃. Mɑ u mɑn yiire n nùn sɑ̃ɑ yeru bɑniɑ Yerusɑlɛmuɔ Yudɑbɑn temɔ. 3 Yen sɔ̃, be bɑ sɑ̃ɑ Isirelibɑ kpuro bu doo Yerusɑlɛmuɔ kpɑ bu Gusunɔ ben Yinni sɑ̃ɑ yeru bɑniɑ mi, domi miyɑ bɑ rɑ nùn yɑ̃kuru kue. Kpɑ u n kɑ bu wɑ̃ɑ. 4 Bèn mi Isireli be bɑ tie bɑ wɑ̃ɑ kpuro bɑ koo bu somiwɑ kɑ sii geesu kɑ wurɑ kɑ yɑɑ sɑbenu kɑ gɑ̃ɑ nìn bukɑtɑ bɑ ko n mɔ kɑ sere mɑɑ kɛ̃ɛ ni bɑ koo wɛ̃ kɑ kĩru sɑ̃ɑ yee ten bɑnɑn sɔ̃.
5 Sɑɑ ye sɔɔrɑ Yudɑbɑ kɑ Bɛnyɑmɛɛbɑn yɛnu yɛ̃robu kɑ yɑ̃ku kowobu kɑ Lefibɑ bɑ sɔɔru kuɑ, be kpuro gesi, be Yinni Gusunɔ u seeyɑ bu kɑ dɑ bu win sɑ̃ɑ yeru bɑni Yerusɑlɛmuɔ. 6 Bèn mi bɑ rɑɑ wɑ̃ɑ, mɑ bɑ bu somi kɑ dendi yɑ̃ɑ wurɑginu kɑ sii geesuginu kɑ yɑɑ sɑbenu kɑ gɑ̃ɑ nìn bukɑtɑ bɑ ko n mɔ mɔ kɑ gɑ̃ɑ geenu kpuro gesi kɑ sere kɛ̃ɛ ni bɑ wɛ̃ kɑ kĩru.
7 Mɑ sinɑ boko Sirusi u bu Yinni Gusunɔn sɑ̃ɑ yerun dendi yɑ̃nu kpuro wesiɑ ni Nɛbukɑnɛsɑɑ u rɑɑ gurɑmɑ Yerusɑlɛmun di u kɑ dɑ u yii win bũu dirɔ. 8 Sirusi wi, u derɑ win ɑrumɑni bero Miteredɑti u ye kpuro gurɑmɑ mɑ u ye gɑrɑ u Sesibɑsɑɑ wɛ̃ wi u sɑ̃ɑ Yudɑbɑn sinɑ bii turo. 9 Ye u bu wesiɑ mi, yerɑ gbɛ̃ɛ wurɑginu tɛnɑ kɑ gbɛ̃ɛ sii geesuginu nɔrɔbu (1.000) kɑ wobunu tɛnɑ tiɑ sɑri 10 kɑ nɔri wurɑgii tɛnɑ kɑ nɔri sii geesugii nɛɛru kɑ wɔkuru (410) kɑ sere dendi yɑ̃nu gɑnu nɔrɔbu (1.000). 11 Dendi yɑ̃ɑ ni kpuro ni bɑ kuɑ kɑ wurɑ kɑ sii geesu, yen geerɑ kuɑwɑ nɔrɔbun subɑ nɔɔbu kɑ nɛɛru (5.400). Sesibɑsɑɑ u kɑ ye kpuro dɑ sɑnɑm mɛ be, Isireli be bɑ yoru mwɛɛrɑ bɑ wurɔ Yerusɑlɛmuɔ.