7
1 Elisee u bu wisɑ u nɛɛ, i Yinni Gusunɔn gɑri swɑɑ dɑkio i nɔ. U nɛɛ, siɑ ɑmɑdɑɑre som kɑ ɑlikɑmɑ yɑ ko n wɑ̃ɑ Sɑmɑrin gbɑ̃rɑ kɔnnɔwɔ bɑ n dɔrɑmɔ. Bɑ koo som mɛn kilo wɔkurɑ yiru dwe kɑ sii geesun gobi tiɑ kpɑ bu ɔɔsun kilo yɛndɑ nnɛ dwe kɑ sii geesun gobi tiɑ.
2 Sinɑ bokon kɔ̃sobun wirugii u Elisee wisɑ u nɛɛ, bɑɑ Yinni Gusunɔ ù n fɛnɛntibɑ yɑburɑ wɔllɔ yɑ koo koorɑ mɛ?
Elisee u nùn wisɑ u nɛɛ, kɑɑ ye wɑ kɑ wunɛn nɔni. Adɑmɑ ɑ ǹ ye dimɔ.
Sirigibɑ duki suɑ
bɑ ben sɑnsɑni deri
3 N deemɑ tɔmbu nnɛ gɑbu be bɑ bɑrɑ disigiru mɔ bɑ rɑ n wɑ̃ɑ wuu gen kɔnnɔwɔ bɑ sɔ̃ɔnɑ bɑ nɛɛ, mbɑn sɔ̃nɑ sɑ ko n wɑ̃ɑ mini sere su kɑ gbi. 4 Sɑ̀ n mɑɑ sɔ̃ mini, gɔɔ turo wiyɑ mi. Ǹ n mɛn nɑ, su dɑ su tii Sirigibu nɔmu bɛriɑ. Bɑ̀ n sun deri sɑ n wɑ̃ɑ, bɑ̀ n mɑɑ sun go su gbi.
5 Yerɑ bɑ seewɑ yoki yɑm bere berebu bɑ dɑ mi Sirigibu bɑ ben sɑnsɑni gire. Ye bɑ turɑ mi, bɑ deemɑ goo sɑri.
6 N deemɑ Yinni Gusunɔ u derɑ Sirigibu bɑ tɑbu kɛkɛ yi dumi gɑwen wurenu nuɑ, kɑ mɑɑ mɑɑsɔbu, kɑ tɑbu kowobu dɑbi dɑbinu. Yerɑ bɑ nɛɛ, Isirelibɑn sinɑ boko u Hɛtibɑ kɑ Egibitigibu gobi kɑ̃ bu kɑ nɑ bu sun tɑbu wɔri. 7 Yerɑ bɑ seewɑ yoki yɑm bere berebu ge, bɑ duki suɑ bɑ ben kuu bekunuginu deri kɑ ben dumi kɑ kɛtɛkunu kɑ ben sɑnsɑni nge mɛ bɑ kɑ ye girɑ. Bɑ duki yɑkikirɑwɑ nɔm dirɑ, bu gesi wɑ bu ben hunde fɑɑbɑ ko.
8 Sɑɑ ye tɔn be, bɑ turɑ sɑnsɑni yen mi, yerɑ bɑ duɑ kuu bekurugiru gɑru sɔɔ. Miyɑ bɑ dĩɑnu wɑ bɑ di bɑ nɔrɑ. Mɑ bɑ sii geesu gurɑ kɑ wurɑbɑ kɑ yɑ̃nu, bɑ dɑ bɑ ye kpuro beruɑ. Yen biru bɑ wurɑmɑ bɑ duɑ gɑrun mi, mɑ bɑ gɑ̃ɑ dɑbinu wɑ bɑ gurɑ bɑ beruɑ.
Gɔ̃ɔrɑ kpɑ Sɑmɑriɔ
9 Yen biru bɑ gerunɑ bɑ nɛɛ, n ǹ geɑ sɑ mɔ̀ mini. Domi gisɔn tɔ̃ɔ te, lɑbɑɑri geɑn tɔ̃rɑ. Sɑ̀ n mɑɑri sere yɑm mu kɑ sɑ̃rɑ, sɑ ko nɔni swɑ̃ɑru wɑ. Ǹ n mɛn nɑ, su dɑ wuuɔ tɛ̃ su sinɑ boko nɔɔsiɑ.
10 Ye bɑ turɑ wuun duu yerɔ, bɑ wuun kɔ̃so turo sokɑ, bɑ nùn sɑɑriɑ ye bɑ wɑ. Bɑ nɛɛ, sɑ duɑ Sirigibun sɑnsɑniɔ. Mɛyɑ sɑ ǹ mɑɑ goon nɔɔ nuɑ gɑm. Dumi kɑ kɛtɛkunu tɔnɑwɑ sɑ wɑ mi, ni bɑ sɔri, kɑ sere mɑɑ ben kuu bekunuginu nu yɔ̃ nge mɛ bɑ kɑ nu girɑ.
11 Mɑ wuun kɔ̃sobu bɑ mɛnnɑ bɑ dɑ sinɑ bokon mi, bɑ nùn gɑri yi sɑɑriɑ.
12 Yerɑ sinɑ boko u seewɑ wɔ̃kuru u win bwɑ̃ɑbu sɔ̃ɔwɑ u nɛɛ, kon bɛɛ sɔ̃ bwisi yi Sirigibu bɑ sun kuɑ. Bɑ yɛ̃ mɑ sɑ wɑ̃ɑ gɔ̃ɔru sɔɔ, yen sɔ̃nɑ bɑ ben sɑnsɑni deri bɑ dɑ bɑ kukuɑ yɑkɑsɔ, mɑ bɑ nɛɛ, bɛsɛ Isirelibɑ sɑ̀ n yɑrɑ bɛsɛn wuun di, kpɑ bu sun mwɛɛri wɑsiru. Yen biru bu du bɛsɛn wuuɔ.
13 Yerɑ win bɔ̃ɔ turo u nɛɛ, tɔn be bɑ gu kɔ wuu geni sɔɔ kɑ be bɑ tie, tiɑ yerɑ. Yen sɔ̃, ɑ de su dumi nɔɔbu wunɑ dumi yi yi tie sɔɔ, su kɑ gɑbu gɔri kpɑ su wɑ ye n koo bu deemɑ.
14 Yen sɔ̃nɑ bɑ tɑbu kɛkɛ ye dumi gɑwe wunɑ yiru kɑ sere mɑɑsɔ dumigibu. Mɑ sinɑ boko u nɛɛ, bu Sirigii be nɑɑ swĩiyɔ bu wɑ. 15 Yerɑ bɑ bu nɑɑ swĩi sere dɑɑ te bɑ mɔ̀ Yuudɛniɔ. Mɑ bɑ Sirigii ben yirɑ ye sɔɔ yɑ̃nu wɑ ni bɑ kɔ̃ kɔ̃ sɛndɑrun sɔ̃. Yen biru sɔmɔ be, bɑ gɔsirɑmɑ bɑ nɑ bɑ sinɑ boko ye kpuro sɔ̃ɔwɑ.
16 Yerɑ Isirelibɑ bɑ yɑrɑ bɑ dɑ bɑ Sirigibun sɑnsɑni wɔri bɑ yen yɑ̃nu gurɑ. Mɑ som kɑ ɔɔsu yɑ koorɑ. Mɑ bɑ som mɛn kilo wɔkurɑ yiru dɔrɑmɔ kɑ sii geesun gobi tiɑ. Mɑ bɑ mɑɑ ɔɔsu kilo yɛndɑ nnɛ dɔrɑmɔ kɑ sii geesun gobi tiɑ nge mɛ Yinni Gusunɔ u rɑɑ geruɑ. 17 Sinɑ boko u win kɔ̃sobun wirugii wi yi gbɑ̃rɑ kɔnnɔwɔ. Adɑmɑ tɔmbɑ nùn tɑɑkɑ bɑ go, nge mɛ Elisee u rɑɑ geruɑ sɑɑ ye sinɑ boko u dɑ win mi.
18 U nɛɛ, som kɑ ɔɔsu yɑ ko n wɑ̃ɑ Sɑmɑrin gbɑ̃rɑ kɔnnɔwɔ. Kpɑ bu som mɛn kilo wɔkurɑ yiru dwe kɑ sii geesun gobi tiɑ. Kpɑ bu ɔɔsun kilo yɛndɑ nnɛ dwe kɑ sii geesun gobi tiɑ.
19 Adɑmɑ sinɑ bokon kɔ̃sobun wirugii wi, u nɛɛ, bɑɑ Yinni Gusunɔ ù n fɛnɛntibɑ yɑburɑ wɔllɔ, yeni yɑ koo koorɑ mɛ?
Mɑ Elisee u nùn wisɑ u nɛɛ, kɑɑ ye wɑ kɑ wunɛn nɔni. Adɑmɑ ɑ ǹ ye dimɔ.
20 Mɛyɑ n mɑɑ nùn kuɑ. Domi tɔmbɑ nùn tɑɑkɑ bɑ go.