Eli u suɑrɑ wɔllɔ
2
1 Ye sɑɑ yɑ turɑ Yinni Gusunɔ u kɑ Eli suɑ wɔllɔ kɑ woo gunɑ, yerɑ wi kɑ Elisee bɑ seewɑ bɑ yɑrɑ Giligɑlin di. 2 Swɑɑ sɔɔ, yerɑ Eli u Elisee sɔ̃ɔwɑ u nɛɛ, ɑ yɔ̃ro mini, domi Yinni Gusunɔ u mɑn gɔriɔ sere Betɛliɔ.
Mɑ Elisee u nùn wisɑ u nɛɛ, sere kɑ Yinni Gusunɔn wɑ̃ɑru kɑ mɑɑ wunɛn tiigiru nɑ ǹ nun derimɔ.
Mɑ bɑ dɑ Betɛliɔ sɑnnu. 3 Yerɑ Gusunɔn sɔmɔn bwɑ̃ɑbu gɑbu, bɑ yɑrimɑ bɑ Elisee sɔ̃ɔwɑ bɑ nɛɛ, ɑ yɛ̃ mɑ gisɔrɑ bɑ koo nun wunɛn yinni suɑri?
Mɑ u bu wisɑ u nɛɛ, oo, nɑ yɛ̃. I bɛɛn nɔsu mɑrio.
4 Ye bɑ mɑɑ swɑɑ wɔri bɑ doonɔ, yerɑ Eli u kpɑm Elisee sɔ̃ɔwɑ u nɛɛ, ɑ yɔ̃ro mini. Domi bɑ mɑn gɔriɔ Yerikoɔ.
Elisee u nùn wisɑ u nɛɛ, sere kɑ Yinni Gusunɔn wɑ̃ɑru kɑ mɑɑ wunɛn tiigiru nɑ ǹ nun derimɔ.
Mɑ bɑ dɑ Yeriko mi sɑnnu. 5 Mɑ Gusunɔn sɔmɔn bwɑ̃ɑ be bɑ wɑ̃ɑ Yerikoɔ, bɑ Elisee sɔ̃ɔwɑ bɑ nɛɛ, ɑ yɛ̃ mɑ gisɔrɑ bɑ koo nun wunɛn yinni suɑri?
Mɑ u bu wisɑ u nɛɛ, oo, nɑ yɛ̃. I bɛɛn nɔsu mɑrio.
6 Ye bɑ mɑɑ swɑɑ wɔri bɑ doonɔ, yerɑ Eli u mɑɑ nùn sɔ̃ɔwɑ u nɛɛ, ɑ yɔ̃ro mini, domi Yinni Gusunɔ u mɑn gɔriɔ Yuudɛniɔ.
Elisee u nùn wisɑ u nɛɛ, sere kɑ Yinni Gusunɔn wɑ̃ɑru kɑ mɑɑ wunɛn tiigiru, nɑ ǹ nun derimɔ.
Mɑ bɑ swɑɑ wɔri bɑ n doonɔ. 7 Gusunɔn sɔmɔn bwɑ̃ɑ ben tɔnu weerɑɑkuru bɑ nɑ bɑ yɔ̃rɑ Yuudɛnin dɑɑrun deedeeru, bɑ dɛsire fiiko. Mɑ Eli kɑ Elisee bɑ dɑ bɑ yɔ̃rɑ dɑɑ ten goorɔ. 8 Yerɑ Eli u win kumbooro potɑ u gu kuruɑ u kɑ dɑɑ ten nim so. Mɑ nim mɛ, mu burɑnɑ mu kuɑ tem dirɑ. Mɑ be yiru ye, bɑ tɔburɑ bɑ doonɑ.
9 Sɑɑ ye bɑ sɑrɑ bɑ kpɑ, Eli u Elisee sɔ̃ɔwɑ u nɛɛ, mbɑ ɑ kĩ n nun kuɑ bu sere mɑn nun suɑri.
Elisee u nɛɛ, ye nɑ nun kɑnɑmɔ yerɑ ɑ de nɑ n wunɛn dɑm mɛ Gusunɔn Hunde u nun wɛ̃n nɔn yiru mɔ.
10 Eli u nùn wisɑ u nɛɛ, gɑ̃ɑ sɛ̃sɔginɑ ɑ bikiɑ. Adɑmɑ ɑ̀ n mɑn wɑɑmɔ sɑnɑm mɛ nɑ suɑrɑmɔ wɔllɔ, yɑ koo koorɑ nge mɛ ɑ kĩ. À kun mɑɑ mɑn wɑ yɑ ǹ koorɔ.
11 Nge mɛ bɑ fɑɑgi mɔ̀ bɑ kɑ dɔɔ, yerɑ gɑ̃ɑnu gɑnu nɑ kɑ dɔ̃ɔ nge tɑbu kɛkɛ ye dumi gɑwe kɑ yen mɑɑsɔbu, mɑ yɑ bu kɑrɑnɑ. Mɑ Eli u suɑrɑ wɔllɔ kɑ woo gunɑ. Mɑ u win kumbooro kɔ̃ temɔ. 12 Sɑɑ ye Elisee u wɑ bɑ kɑ Eli doonɑ, yerɑ u nɔɔgiru suɑ wɔllɔ u nɛɛ, nɛn bɑɑbɑ, nɛn bɑɑbɑ, wunɛ wi ɑ sɑ̃ɑ Isirelibɑn dɑm mɛ mu bu kɔ̃su nge ben tɑbu kɛkɛ dumigii kɑ yen mɑɑsɔbu.
Yen biru u ǹ mɑɑ nùn wɑ. Mɑ Elisee u win tiin yɑberu nɛnuɑ u gĩɑ wɑsi yiru, nuku sɑnkirɑnun sɔ̃. 13 Mɑ u kumbooro ge suɑ ge Eli u kɔ̃ temɔ. Yen biru u gɔsirɑmɑ u nɑ u yɔ̃rɑ Yuudɛnin dɑɑrun tɔbuɔ.
14 Yerɑ u kumbooro ge suɑ u kɑ nim mɛ so u nɛɛ, mɑnɑ ɑ wɑ̃ɑ, Gusunɔ, Elin Yinni. Mɑnɑ ɑ wɑ̃ɑ!
Mɑ nim mɛ, mu burɑnɑ mu kuɑ tem dirɑ. Sɑɑ yerɑ u tɔburɑ. 15 Yerɑ Gusunɔn sɔmɔn bwɑ̃ɑ be bɑ nɑ Yerikon di mi, bɑ nùn wɑ. Mɑ bɑ nɛɛ, Elin dɑm mu wɑ̃ɑ Elisee sɔɔ.
Mɑ bɑ nùn sennɔ dɑ, bɑ yiirɑ win wuswɑɑɔ bɑ wiru tem girɑri. 16 Yerɑ bɑ nùn sɔ̃ɔwɑ bɑ nɛɛ, bɛsɛ wunɛn bwɑ̃ɑbu sɔɔ, tɑbu durɔbu weerɑɑkuru bɑ wɑ̃ɑ. A de bu dɑ bu nun wunɛn yinni kɑsuɑmɑ. Sɔrɔkudo, Yinni Gusunɔ u ko n nùn deri guuru gɑrun wɔllɔ, ǹ kun mɛ wɔwɑ gɑɑ sɔɔ.
Mɑ Elisee u bu wisɑ u nɛɛ, i ku de bu dɑ.
17 Adɑmɑ bɑ nùn bikiɑ bɑ bɑɑsi. Mɑ u wurɑ u nɛɛ, bu doo.
Yerɑ tɔn be, bɑ dɑ bɑ Eli kɑsu sere sɔ̃ɔ itɑ bɑ ǹ nùn wɑ. 18 Yen biru bɑ gɔsirɑmɑ bɑ Elisee deemɑ Yerikoɔ. Mɑ u bu sɔ̃ɔwɑ u nɛɛ, nɑ ǹ dɑɑ bɛɛ sɔ̃ɔwɑ nɑ nɛɛ, i ku dɑ?
Elisee u nim dorɑsiɑ
19 Sɔ̃ɔ teeru Yerikogibu bɑ nɑ Eliseen mi, bɑ nɛɛ, bɛsɛn wuu ge, gɑ wɑ̃ nge mɛ wunɛ bɛsɛn yinni ɑ wɑɑmɔ. Adɑmɑ gen nim kun geɑ sɑ̃ɑ. Mɛyɑ mu ku rɑ de gɑ̃ɑnu nu mɑ, sɑɑ tɔmbu sere kɑ yɑɑ sɑbenɔ kɑ dɑ̃ɑɔ.
20 Yerɑ u bu sɔ̃ɔwɑ u nɛɛ, bu gbɛ̃ɛ kpɑɑru tɑmɑ bu bɔru doke te sɔɔ.
Mɑ bɑ kɑ nùn tu nɑɑwɑ. 21 Mɑ u dɑ dɑɑ ten wirɔ, u bɔɔ te doke mi. Yerɑ u nɛɛ, ɑmɛniwɑ Yinni Gusunɔ u geruɑ. U nɛɛ, u koo nim mɛ dorɑsiɑ, mu ǹ mɑɑ goo goomɔ, mu ǹ mɑɑ yinɑmɔ gɑ̃ɑnu nu mɑ.
22 Mɑ nim mɛ, mu dorɑ sere kɑ gisɔn gisɔ nge mɛ Elisee u geruɑ.
Yɛɛ kɔ̃si yi bibu go
be bɑ Elisee yɛ̃ɛmɔ
23 Sɑɑ Yerikon di Elisee u mɑɑ dɑ Betɛliɔ. Yerɑ swɑɑ sɔɔ, bibɑ nùn wuremɔ bɑ mɔ̀, wii kpɑrɑrugii, ɑ yɑrio minin di.