Dɑfidin gɑri dɑ̃ɑki
23
1 Dɑfidi, Isɑin bii, wi Gusunɔ Yɑkɔbun Yinni u gɔsɑ u wɔlle suɑ, win womusɑ Isirelibɑ bɑ rɑ n kĩ bu nɔ. Win gɑri dɑ̃ɑki wee. U nɛɛ,
2 Gusunɔn Hunde u gɑri kuɑ sɑɑ nɛn nɔɔn di.
Win gɑriyɑ yi wɑ̃ɑ nɛn yɑrɑ sɔɔ.
3 Gusunɔ, Isirelibɑn Yinni wi u rɑ bu kɔ̃su,
u mɑn sɔ̃ɔwɑ u nɛɛ,
sunɔ wi u tɔmbu kpɑrɑmɔ gem swɑɑ sɔɔ,
mɑ win tii u Gusunɔ nɑsie,
4 u sɑ̃ɑwɑ nge sɔ̃ɔ yɑnɑn yɑm bururɑm guru wiru sɑri.
Sɔ̃ɔ yɑnɑ yerɑ yɑ rɑ de yɑkɑ bekusu su bɑlli,
gurɑ yɑ̀ n nɑ yɑ kpɑ.
5 Nge mɛyɑ nɛn bweseru tɑ sɑ̃ɑ Gusunɔn wuswɑɑɔ.
Domi u kɑ mɑn ɑrukɑwɑni bɔkuɑ ye yɑ ǹ nɔru mɔ.
U ye kpuron kpunɑɑ yi.
Goo kun mɑɑ kpɛ̃ u ye kɔsi.
Sɑɑ kpuro u rɑ mɑn nɑsɑrɑ wɛ̃.
Ye nɑ kĩ kpuro u rɑ mɑn kuewɑ.
6 Adɑmɑ be bɑ Gusunɔ gɛmɑ bɑ sɑ̃ɑwɑ nge sɑ̃ki
yi bɑ rɑ bure bu kɔ̃.
Bɑ ku rɑ yi bɑbe kɑ nɔm dirɑ.
7 Wi u kĩ u yi bɑbɑ,
sisu kɑ yɑɑsɑn burɑ u koo kɑ yi sɔ̃re,
kpɑ u yi dɔ̃ɔ mɛni yɑm tem mi sɔɔ.
Dɑfidin tɑbu durɔbu
(I mɑɑ mɛɛrio Bɑndun Gɑri I, 11:10-47)
8 Dɑfidin tɑbu durɔbun yĩsɑ wee. Ben itɑ bɑ yĩsiru yɑrɑ.
Yosɛbu Bɑsebɛti, Tɑkemɔnigii, u sɑ̃ɑwɑ ben turo. Wiyɑ u tɔmbu nɛnɛ (800) go kɑ yɑɑsɑ nɔn teerun tɑbu sɔɔ.
9 Yirusen yĩsirɑ Eleɑsɑɑ, Dodon bii, Akosin sikɑdobu. Sɑnɑm mɛ Filisitibɑ bɑ yɑrɑ bu kɑ Isirelibɑ tɑbu ko, wi kɑ Dɑfidiwɑ bɑ yɔ̃rɑ bɑ bu mɑrɑ. N deemɑ sɑɑ ye, Isirelibɑ bɑ wɑ̃ɑ guunɔ. 10 Yen dɔmɑ te, Eleɑsɑɑ wi, u Filisitibɑ gowɑ sere win nɔmɑ mɔnyɑ u kpɑnɑ u tɑkobi yɔ̃su. Mɑ Yinni Gusunɔ u nùn nɑsɑrɑ bɑkɑ wɛ̃. Yen biru Isirelibɑ bɑ nɑ bɑ nùn deemɑ bu kɑ Filisiti ben yɑ̃nu gurɑ.
11 Ben itɑsen yĩsirɑ Sɑmɑ, Agen bii, Hɑrɑrigii. Sɑɑ ye sɔɔ, Filisitibɑ bɑ mɑɑ mɛnnɑ Lekiɔ bu kɑ Isirelibɑ tɑbu wɔri. N deemɑ gberu gɑrɑ wɑ̃ɑ mi, tè sɔɔ bɑ dɑ̃si duurɑ. Ye Isirelibɑ bɑ duki mɔ̀ Filisiti ben sɔ̃, 12 yerɑ Sɑmɑ u yɔ̃rɑ mi, u kɑ tu yinɑ. Mɑ u kɑ Filisitibɑ tɑbu kuɑ u bu go. Gusunɔ u nùn nɑsɑrɑ bɑkɑ wɛ̃ dɔmɑ te.
13 Gɛ̃ɛbun sɑɑ sɔɔ, Dɑfidin tɑbu sinɑmbu tɛnɑ sɔɔ ben itɑ bɑ dɑ bɑ nùn deemɑ Adulɑmun kpee wɔruɔ sɑnɑm mɛ Filisitibɑn tɑbu kowobun wuuru gɑru tɑ nɑ tɑ ten sɑnsɑni girɑ Refɑbɑn wɔwɑɔ. 14 Sɑɑ ye sɔɔ, Dɑfidi u wɑ̃ɑ kpee wɔru ge sɔɔ. Mɑ Filisitibɑn sɑnsɑni yɑ mɑɑ gire Bɛtelehɛmuɔ. 15 Mɑ Dɑfidi u Bɛtelehɛmun bɛkɛ kuɑ u nɛɛ, wɑrɑ u koo kɑ mɑn Bɛtelehɛmun gbɑ̃rɑ kɔnnɔn dɔkɔn nim nɑɑwɑ n nɔ.
16 Yerɑ win tɑbu durɔbu itɑ be, bɑ dɑ bɑ Filisitibɑn sɑnsɑni ye wɔri kɑ dɑm bɑ Dɑfidi nim mɛ tɑkɑmɑ. Adɑmɑ u ǹ mu nɔrɑ. U kɑ mu yɑ̃kuru kuɑwɑ, u Yinni Gusunɔ yɑriɑ. 17 U nɛɛ, Gusunɔ u mɑn gbɑrɑ bu nɛɛ, nɛnɑ nɑ nim mɛ nɔrɑ. Domi mɛn sɔ̃nɑ tɔn beni bɑ ben wɑ̃ɑru kɑri bɔrie. Nim mɛ, mu sɑ̃ɑwɑ nge ben yɛm mɛ mu koo rɑɑ yɑri.
Yen sɔ̃nɑ u yinɑ u mu nɔ.
Yenibɑ kpurowɑ Dɑfidin tɑbu durɔbu itɑ be, bɑ kuɑ.
18 Abisɑi Seruyɑn bii, Yoɑbun wɔnɔ, wiyɑ u sɑ̃ɑ tɔmbu tɛnɑ yen wirugii. Tɔmbu goobɑ wunɔbuwɑ (300) u go kɑ win yɑɑsɑ. Mɑ u yĩsiru yɑrɑ tɔmbu tɛnɑ yen suunu sɔɔ. 19 Bɑ nùn bɛɛrɛ wɛ̃ too. Adɑmɑ u ǹ tɑbu durɔ gbiikobu itɑ be turɑ.
20 Bɛnɑyɑ, Kɑbisɛɛligii, Yehoyɑdɑn bii, u sɑ̃ɑwɑ tɑbu durɔ wɔrugɔ. Mɑ u yĩsiru yɑrɑ nɑsɑrɑ dɑbi ni u wɑn sɔ̃. Wiyɑ u Mɔɑbun tɔmbu yiru gɑbu go be bɑ sɛ̃ nge gbee sinɑnsu. Wiyɑ u mɑɑ duɑ dɔkɔ kpiriru sɔɔ u gbee sunɔ kɑ̃ɑsi mi, u go purɑn sɑɑ sɔɔ. 21 Mɑ u Egibitin tɑbu durɔ dɑmgii goo go. Sɑɑ yè sɔɔ u nùn wɔrim dɔɔ, bokurɑ u nɛni. Ye u turɑ mi, mɑ u durɔ win yɑɑsɑ ye u nɛni wɔrɑ u kɑ nùn sɔkɑ u go. 22 Yeniwɑ Bɛnɑyɑ Yehoyɑdɑn bii u kuɑ. Mɑ u mɑɑ yĩsiru yɑrɑ Dɑfidin tɑbu durɔbu tɛnɑ ye sɔɔ. 23 U bɛɛrɛ bɑkɑ wɑ be sɔɔ, ɑdɑmɑ yɑ ǹ tɑbu durɔ gbiikobu itɑ begiɑ turɑ. Mɑ Dɑfidi u nùn kuɑ win kɔ̃sobun wirugii.
24 Dɑfidin tɑbu durɔbu tɛnɑ yen gɑbun yĩsɑ wee. Asɑɛli, Yoɑbun wɔnɔ, kɑ Ɛlikɑnɑni, Dodon bii, Bɛtelehɛmugii, 25 kɑ Sɑmɑ, kɑ Elikɑ, Hɑrodugibu, 26 kɑ Helɛsi, Pelɛti kɑ Irɑ Ikɛsin bii, Tekoɑgii, 27 kɑ Abiesɛɛ, Anɑtɔtugii, kɑ Mɛbunɑi, Husɑgii, 28 kɑ Sɑɑmɔɔ, Akoɑsigii, kɑ Mɑhɑrɑi, Nɛtofɑgii, 29 kɑ Helɛbu, Bɑɑnɑn bii, wi u mɑɑ sɑ̃ɑ Nɛtofɑgii, kɑ Itɑi, Ribɑin bii, Gibeɑgii. Gibeɑ ye, yɑ wɑ̃ɑ Bɛnyɑmɛɛn temɔ. 30 Kɑ Bɛnɑyɑ, Pirɑtonigii, kɑ Hidɑi, Nɑkɑle Gɑɑsigii, 31 kɑ Abi Aliboni, Arɑbɑgii, kɑ Asimɑfɛti, Bɑɑkumugii, 32 kɑ Eliɑbɑ, Sɑɑbonigii, kɑ Bɛnɛ Yɑsɛni, kɑ Yonɑtɑm, 33 kɑ Sɑmɑ, Hɑrɑrigii, kɑ Akiɑmu, Sɑrɑɑn bii, Hɑrɑrigii, 34 kɑ Elifelɛti, Akɑsibɑin bii. Akɑsibɑin tundo u sɑ̃ɑ Mɑɑkɑgii. Kɑ Eliɑmu, Ahitofɛlin bii, Gilogii, 35 kɑ Hɛsirɑi, Kɑɑmɛligii, kɑ Pɑɑrɑi, Arɑbugii, 36 kɑ Yigeɑli, Nɑtɑnin bii, Sobɑgii, kɑ Bɑni, Gɑdigii, 37 kɑ Selɛki, wi u sɑ̃ɑ Amɔnin bweseru, kɑ Nɑhɑrɑi, Beerɔtugii wi u rɑ Yoɑbu, Seruyɑn biin tɑbu yɑ̃nu sɔbe, 38 kɑ Irɑ, kɑ Gɑrɛbu, Yetɛɛgibu, 39 kɑ Uri, Hɛti. Dɑfidin tɑbu durɔ dɑmgibu bɑ sɑ̃ɑwɑ tɔnu tɛnɑ kɑ nɔɔbɑ yiru.