Dɑfidin nɑsɑrɑn womu
(I mɑɑ mɛɛrio Womu 18)
22
1 Womu geniwɑ Dɑfidi u Yinni Gusunɔ kuɑ sɑnɑm mɛ u nùn wɔrɑ sɑɑ win yibɛrɛbɑn nɔmɑn di, n mɑm nɛɛre Sɔɔlu. 2 U nɛɛ,
Yinni Gusunɔ, wunɑ ɑ sɑ̃ɑ nɛn dɑm.
Wunɑ nɑ kĩ.
3 A sɑ̃ɑwɑ nge kpee bɑɑ yè sɔɔ kon kuke.
A sɑ̃ɑwɑ nɛn kuku yee nɑɑnɛgiru.
Wunɑ ɑ sɑ̃ɑ nɛn Yinni wi u mɑn yɑkiɑ.
Wunɑ ɑ sɑ̃ɑ nɛn tɛrɛru.
Wunɛn dɑmɑ mu mɑn wɔrɑ.
Wunɑ ɑ sɑ̃ɑ nɛn kɑri.
4 I Yinni Gusunɔ siɑro.
Nɑ̀ n nùn nɔɔgiru sue
nɑ fɑɑbɑ kɑnɑ,
u rɑ mɑn wɔrewɑ
nɛn yibɛrɛbɑn nɔmɑn di.
5 Gɔɔ rɑɑ mɑn bɔkuɑ,
u kɑ mɑn doonɔ nge nim tori bɑkɑ.
6 Gɔribun wɑ̃ɑ yerɑ mɑn tɛ̃kuɑ.
Gɔɔ mɑn tɑɑ bɛrie.
7 Mɑ nɑ nɔɔgiru suɑ nɛn nuku sɑnkirɑru sɔɔ,
nɑ Yinni Gusunɔ sokɑ.
Mɑ u nɛn nɔɔ nuɑ sɑɑ win wɑ̃ɑ yerun di.
Mɛyɑ mɑɑ nɛn weeweenu wɔri win swɑɑ sɔɔ.
8 Tem mu yĩirɑ,
mɑ guunu diirɑ,
yèn sɔ̃ Yinni Gusunɔ u mɔru bɛsirɑ.
9 Mɑ win mɔru seewɑ nge wiisu,
mɑ yɑ yɑburɑ nge dɔ̃ɔ yɑrɑ,
mɑ yɑ yɑrimɔ win nɔɔn di nge dɔ̃ɔ buri.
10 U derɑ wɔllɑ kɑ tem dɛbɛ dɛbɛ kuɑ.
Mɑ u sɑrɑmɑ u guru wii bɑkɑru tɑɑkumɔ.
11 U wɔllun kɔ̃so sɔni nge dumɑ.
Mɑ u bɛllimɔ woo sɔɔ.
12 U kukuɑ yɑm wɔ̃kuru sɔɔ,
mɑ guru wii sinumginu nùn wukiri.
13 Win wuswɑɑɔ yɑm bururɑm mu wɑ̃ɑ.
Min diyɑ gurɑ nɛmɔ kɑ guru kpenu kɑ dɔ̃ɔ buri.
14 Win nɔɔ gɑ nɔɔrɑ wɔllun di nge guru gbɑ̃sukubu.
Mɑ guru kpenu nɛmɔ kɑ dɔ̃ɔ buri.
15 U nɛn yibɛrɛbɑ yɑrinɑsiɑ kɑ guru kpenu
ni nu sɑ̃ɑ nge sɛ̃ɛnu.
U bu girɑ bɑɑmɑ kɑ guru mɑɑkinu.
16 U wɛ̃ru wurɑ, yibɛrɛbɑ bɑ nɑndɑ.
Mɑ guru woo bɔkɔ gɑ dɑɑnu gberɑsiɑ.
Mɑ duniɑn kpɛɛkpɛɛku gɑ sɔ̃ɔsirɑ.
17 Mɑ u win nɔmu dɛmiɑmɑ wɔllun di
u mɑn nɛnuɑ u yɑrɑ nim bwee bɑkɑrun di.
18 U mɑn wɔrɑ yibɛrɛbɑn nɔmɑn di.
Yibɛrɛ be, bɑ mɑn dɑm kere.
Yibɛrɛ be, bɑ mɑn tusɑ.
19 Yibɛrɛ be, bɑ mɑn wɔriwɑ nɔni swɑ̃ɑrun sɑɑ sɔɔ.
Adɑmɑ Yinni Gusunɔ u kuɑ nɛn tɑ̃si yeru.
20 U mɑn wɔrɑ ben nɔmɑn di,
nɑ n kɑ tii mɔ,
domi u mɑn kĩ.
21 U mɑn domɑru kuɑ yèn sɔ̃ nɑ dɛɛre.
U mɑn domɑru kuɑ yèn sɔ̃ nɑ gem swĩi.
22 Nɑ win woodɑ mɛm nɔɔwɑ.
Nɑ ǹ nùn seesi.
23 Nɑ win woodɑ kpuro swĩi.
Nɑ ǹ win gere yinɛ.
24 Nɑ nɛn tii nɛnuɑ,
kpɑ n ku rɑ kɑ durum ko.
Nɑ sɑ̃ɑwɑ dee dee win wuswɑɑɔ.
25 Yen sɔ̃nɑ u mɑn kɔsiɑ nge mɛ nɛn dɑɑ geɑ nɛ.
U mɑn kɔsiɑ nge mɛ nɛn gɔ̃ru gɑ dɛɛrɑm nɛ.
26 Sɑ̀ n sɑ̃ɑ nɑɑnɛgibu, kɑɑ n sun sɑ̃ɑwɛwɑ nɑɑnɛgii.
Sɑ̀ n sɑ̃ɑ gemgibu, kɑɑ n sun sɑ̃ɑwɛwɑ gemgii.
27 Sɑ̀ n sɑ̃ɑ dɛɛrobu, kɑɑ n sun sɑ̃ɑwɛwɑ dɛɛro.
Sɑ̀ n mɑɑ sɑ̃ɑ keetɑgibu, kɑɑ n sun sɑ̃ɑwɛwɑ keetɑgii.
28 Yinni Gusunɔ, wunɛn tiiwɑ
ɑ rɑ tɔn be bɑ tii kɑwe fɑɑbɑ ko,
kpɑ ɑ be bɑ tii sue kɑwɑ.
29 Yinni Gusunɔ, ɑ sɑ̃ɑwɑ nɛn fitilɑ.
A rɑ mɑn yɑm bururɑsie.
30 A rɑ mɑn dɑm kɛ̃
n kɑ kpĩ n yibɛrɛ be bɑ tɑbu yɑ̃nu mɔ wɔri,
kpɑ n yɔ̃ n ben gbɑ̃rɑru sure.
31 Ye Yinni Gusunɔ u mɔ̀, yɑ rɑ n dɛndewɑ.
Bwisi geeyɑ u rɑ tɔnu kɛ̃.
U sɑ̃ɑwɑ be bɑ nùn nɑɑnɛ sɑ̃ɑn tɛrɛru.
32 Gusunɔ turowɑ u wɑ̃ɑ.
Wi turowɑ u sɑ̃ɑ bɛsɛn Yinni.
Wi turowɑ u koo sun kɔ̃su.
33 Wiyɑ u sɑ̃ɑ nɛn kuku yee dɑmgiru.
Wiyɑ u rɑ mɑn swɑɑ geɑ sure,
34 kpɑ u de nɛn nɑɑsu su n sɑ̃u nge nɛmu,
nɑ n kɑ yɔ̃ dim dim guuru wɔllɔ.
35 Wiyɑ u rɑ mɑn tɑbu sɔ̃ɔsi.
Wiyɑ u rɑ mɑn dɑm kɛ̃, n kɑ tɛndu gɑwɑ te tɑ bɔ.
36 Yinni Gusunɔ, wunɑ ɑ rɑ mɑn fɑɑbɑ ko nge tɛrɛru.
Wunɑ ɑ rɑ mɑn bere kɑ wunɛn dɑm bɑkɑm.
Wunɛn durom sɑɑbuwɑ nɑ kɑ kuɑ dɑmgii.
37 Nɑ̀ n dukɑ mɔ̀, ɑ rɑ de nɑ n sɑ̃u.
Nɑ̀ n dukɑ mɔ̀, nɑ ku rɑ mɑɑ sokure.
38 Nɑ̀ n nɛn yibɛrɛbɑ nɑɑ gire,
wunɑ ɑ rɑ de n bu nɑɑmwɛ.
Wunɑ ɑ rɑ de nɑ kun gɔsirɑmɛ,
mɑ n kun mɔ nɑ bu kpeerɑsiɑ.
39 Nɑ rɑ bu suririwɑ temɔ n kɔsuku
kpɑ bu kpɑnɑ bu se.
40 Yinni, wunɑ ɑ rɑ mɑn dɑm kɛ̃ n kɑ tɑbu ko.
Wunɑ ɑ rɑ mɑn nɑsɑrɑ wɛ̃ nɛn yibɛrɛbɑn wɔllɔ.
41 Wunɑ ɑ rɑ de nɛn yibɛrɛbɑ bu mɑn biru kisi.
Wunɑ ɑ rɑ de n be bɑ mɑn tusɑ kpeerɑsiɑ.
42-43 Nɑ rɑ bu munkuwɑ kpɑ bu ko nge tuɑ.
Nɑ rɑ bu tɑɑkuwɑ kpɑ bu ko nge pɔtɔkɔ.
Yinni Gusunɔ, bɑ̀ n nɔɔgiru suɑ bɑ fɑɑbɑ kɑnɑ,
ɑ ku bu fɑɑbɑ ko.
Bɑ̀ n somiru kɑnɑ,
ɑ ku bu wisi.
44 Yinni Gusunɔ, wunɑ ɑ mɑn wɔrɑ
be bɑ mɑn seesin nɔmɑn di.
Wunɑ ɑ mɑn kuɑ bwese tukunun wirugii.
Wunɑ ɑ derɑ bɑ mɑn yoru diiyɑmmɛ.
45 Bɑ̀ n yɑnde nɛn gɑri nuɑ,
bɑ rɑ n mɑn mɛm nɔɔwɑmmɛwɑ.
Bɑ̀ n mɑn wɑ, bɑ rɑ n mɑn sɑ̃ɑmɔwɑ.
Bɑ̀ n mɑn wɑ, bɑ rɑ nɑndewɑ.
46 Bɑ̀ n mɑn wɑ, bɑ rɑ yɑrimɛwɑ
ben kuku yerun di bɑ n diirumɔ.
47 Yinni Gusunɔ u wɑ̃ɑ.
I nùn siɑro. Wiyɑ u sɑ̃ɑ nge kperu mi nɑ rɑ kuke.
I nùn bɛɛrɛ wɛ̃ɛyɔ. Wiyɑ u mɑn fɑɑbɑ kuɑ.
48 Wiyɑ u rɑ mɑn mɔru kɔsie nɛn yibɛrɛbɑn mi.
Wiyɑ u rɑ de bwesenu nu mɑn yiirɑ.
49 Wiyɑ u rɑ de n kisirɑ yibɛrɛbɑn nɔmɑn di.
Yinni, ɑ mɑn wɔlle suɑ ben wuswɑɑɔ.
Wunɑ ɑ mɑn fɑɑbɑ kuɑ tɔn kɔ̃sobun nɔmɑn di.
50 Yen sɔ̃nɑ kon womusu ko kɑ wunɛn yĩsiru.
Wunɑ kon siɑrɑ bwesenun suunu sɔɔ.
51 Yinni Gusunɔ, ɑ mɑn gɔsɑ ɑ kuɑ sunɔ.
Wunɑ ɑ mɑn nɑsɑrɑ bɑkɑ wɛ̃.
Nɑ yɛ̃ mɑ kɑɑ n mɑn durom sɔ̃ɔsimɔ,
nɛ kɑ nɛn bweseru sere kɑ bɑɑdommɑɔ.