Yoɑbu u kĩ
Abusɑlɔmu u gɔsirɑmɑ yɛnuɔ
14
1 Yoɑbu Seruyɑn bii u giɑ mɑ Dɑfidi sinɑ bokon gɔ̃ru gɑ woowɑ win bii Abusɑlɔmun mi giɑ. 2 Yerɑ u gɔrɑ Tekoɑɔ bu dɑ bu kurɔ bwisigii goo kɑsumɑ. Ye kurɔ wi, u tunumɑ yerɑ Yoɑbu u nùn sɔ̃ɔwɑ u nɛɛ, ɑ gɔɔ woorun yɑ̃nu dokeo kpɑ ɑ n sɑ̃ɑ nge ɑ nuki sɑnkire. A ku turɑre gɑɑ doke. A n gesi sɑ̃ɑ nge wi u gɔɔ sɔ̃ n tɛ. 3 À n kuɑ mɛ, kpɑ ɑ dɑ sinɑ bokon mi, ɑ nùn sɔ̃ ye kon nun sɔ̃ kpuro.
Mɑ u nùn sɔ̃ɔwɑ ye u koo gere. 4 Mɑ kurɔ wi, u seewɑ u dɑ u kɑ sinɑ boko gɑri yi ko. Ye u turɑ mi, yerɑ u yiirɑ u wiru tem girɑri u nɛɛ, yinni, ɑ mɑn fɑɑbɑ koowo.
5 Yerɑ sinɑ boko u nùn bikiɑ u nɛɛ, mbɑ n kuɑ.
Mɑ u wisɑ u nɛɛ, yinni, wee, nɛ gɔminiwɑ. Nɛn durɔ u gu, 6 u mɑn bibu yiru deriɑ. Bii berɑ bɑ sɑnnɑ gberɔ. Sɑɑ ye sɔɔ, goo sɑri ben turuku u sere bu yɑkiɑnɑ. Mɑ turo u win winsim so u go. 7 Tɛ̃ wee, nɛn bweseru tɑ mɑn seesi tɑ nɛɛ, n bu wi u win winsim go mi nɔmu sɔndio bu mɑɑ nùn go, yèn sɔ̃ u win winsim yɛm yɑri. Wee, nɑ̀ n bu bii wi nɔmu sɔndiɑ, nɑ ǹ mɑɑ bii goo mɔ wi u koo nɛn durɔn tubi di, kpɑ win bweseru tu gbi.
8 Mɑ sinɑ boko u kurɔ wi sɔ̃ɔwɑ u nɛɛ, ɑ ginɑ wio. Kon nɛn bwɑ̃ɑbu sɔ̃ bu dɑ bu nun wunɛn gɑri yi wunɑnɑ.
9 Mɑ kurɔ wi, u nùn wisɑ u nɛɛ, yinni, bɑɑ bɑ̀ n koo goo tɑɑrɛ wɛ̃, nɛ kɑ nɛn tundon yɛnugibɑ bɑ koo tɑɑrɛ wɛ̃, n ǹ wunɛ kɑ wunɛn bwɑ̃ɑbu.
10 Sinɑ boko u nùn sɔ̃ɔwɑ u nɛɛ, goo ù n wunɛn kɔ̃sɑ geruɑ, ɑ kɑ nùn nɑ mini. Sɑɑ yerɑ yɛ̃ro kun mɑɑ nun bɑbɑmɔ.
11 Mɑ kurɔ wi, u nɛɛ, ɑ mɑn nɔɔ mwɛɛru kuo kɑ Yinni Gusunɔn yĩsiru, mɑ ɑ ǹ derimɔ be bɑ bii win mɔru kɔsiɑmɔ bu mɑɑ kɔ̃sɑ sosi bu nɛn bii wi u tie go.
Yerɑ sinɑ boko u nùn wisɑ u nɛɛ, sere kɑ Yinni Gusunɔn wɑ̃ɑru, wunɛn bii wi, bɑɑ win wirun seri tiɑ kun wɔrimɔ.
12 Mɑ kurɔ wi, u nɛɛ, yinni, ɑ de n mɑɑ gɑri fiiko gere.
Yerɑ sinɑ boko u nɛɛ, ɑ geruo.
13 Mɑ u nɛɛ, yinni, mbɑn sɔ̃nɑ ɑ kɔ̃sɑ yeni mɔ̀ ye yɑ Gusunɔn tɔmbu wɑɑmɔ. A derɑ wunɛn tiin bii u kpikiru woo wunɛn sɔ̃. Tɛ̃, wunɛn gɑri yi ɑ geruɑ mi, wunɑ yi kɑ yɑ̃. 14 Tilɑsiwɑ bɛsɛn bɑɑwure u kɑ gbi sɔ̃ɔ teeru kpɑ sɑ n sɑ̃ɑ nge nim mɛ mu yɑri tem sɔɔ, mɛ bɑ ǹ kpɛ̃ bu mɑɑ gurɑ. Adɑmɑ Gusunɔ kun kĩ Abusɑlɔmu u gbi tɛ̃. U kĩwɑ u gɔsirɑmɑ kpikirun di u n wɑ̃ɑ win bɔkuɔ. 15 Yinni, ye nɑ kɑ nɑ wunɛn mi, nɑ nun gɑri yini kpuro sɔ̃ɔwɑ, nɛn tɔmbɑ bɑ mɑn bɛrum tiɑ. Yerɑ nɑ nɛɛ, kon nɑ n nun yi sɔ̃. Sɔrɔkudo kɑɑ nɛn gere wurɑ. 16 Kpɑ ɑ sun wɔrɑ nɛ kɑ nɛn bii be bɑ kɑsu bu sun gon nɔmɑn di, be, be bɑ ǹ kĩ sɑ n mɑɑ bɑɑ mɔ tem mɛ Gusunɔ u sun wɛ̃ sɔɔ. 17 Nɑ tii sɔ̃ɔwɑ nɑ nɛɛ, wunɛn gɑri yi koo mɑn nukuru yɛmiɑsiɑ. Domi nɑ nun mɛɛrɑwɑ nge Gusunɔn gɔrɑdo wi u kɔ̃sɑ kɑ geɑn wunɑnɔ yɛ̃. Kpɑ Gusunɔ wunɛn Yinni u n wɑ̃ɑ kɑ wunɛ.
18 Mɑ sinɑ boko u kurɔ wi sɔ̃ɔwɑ u nɛɛ, nɑ kĩ n nun gɑ̃ɑnu bikiɑ. A ku mɑn weesu kuɑ ɑ yen gɑɑ bere.
Mɑ kurɔ wi, u nɛɛ, yinni, ɑ geruo.
19 Yerɑ sinɑ boko u nɛɛ, n ǹ Yoɑbuwɑ u nun yenibɑ sɔ̃ɔwɑ?
Kurɔ wi, u nùn wisɑ u nɛɛ, yinni, sere kɑ wunɛn wɑ̃ɑru, ye ɑ geruɑ mi, yɑ sɑ̃ɑwɑ gem. Wunɛn bɔ̃ɔ Yoɑbuwɑ u mɑn gɑri yi sɔ̃ɔwɑ u nɛɛ, n nɑ n nun sɔ̃. 20 U ye kuɑwɑ n wɑ gɑri yi kpuro yi kɑ wɛ̃rɑ. Wee, ɑ mɑɑ bwisi mɔ nge Gusunɔn gɔrɑdo ɑ n kɑ yɛ̃ ye yɑ koorɑmɔ hɑnduniɑɔ.
21 Yen biru Dɑfidi sinɑ boko u dɑ u Yoɑbu sɔ̃ɔwɑ u nɛɛ, to, kon ko nge mɛ ɑ kĩ. A doo ɑ nɛn bii Abusɑlɔmu wi gɔsiɑmɑ.
22 Yerɑ Yoɑbu u nùn kpunɑ kɑ bɛɛrɛ u nùn siɑrɑ. Mɑ u geruɑ u nɛɛ, yinni, gisɔrɑ nɑ wɑ mɑ ɑ kɑ mɑn nɔnu geu mɛɛrɑ. Domi ɑ nɛɛ, kɑɑ ko ye nɑ nun kɑnɑ.
23 Mɑ Yoɑbu u seewɑ u dɑ Gesuriɔ Abusɑlɔmun mi, u kɑ nùn wurɑmɑ Yerusɑlɛmuɔ. 24 Ye bɑ tunumɑ, sinɑ boko u nɛɛ, ɑ de u dɑ u sinɑ win yɛnuɔ. A ku de u nɑ nɛn mi.
Mɑ Abusɑlɔmu u dɑ win yɛnuɔ, u ǹ de sinɑ bokon mi.
Abusɑlɔmu kɑ Dɑfidi bɑ dorɑ
25 Abusɑlɔmu wi, durɔ burɔn tiiwɑ. Goo sɑri Isirelibɑ sɔɔ wi u yĩsiru yɑrɑ burɑm mɛn sɑɑbu. Sɑɑ win nɑɑ tɑrɑrun di sere kɑ win wirɔ, gɑm sɑri mi kɑɑ kpɑkɑ wɑ. 26 Wɔ̃ɔ kɑ wɔ̃ɔwɑ u rɑ win seri kɔni. Domi sɑɑ yerɑ yi rɑ nùn buniɛ too. Win seri yi bɑ kɔnɑ mi, yin bunum mu rɑ kilo yiru kere. 27 Bii tɔn durɔbu itɑwɑ u mɑrɑ kɑ bii tɔn kurɔ turo. Win yĩsirɑ Tɑmɑɑ. U sɑ̃ɑwɑ kurɔ burɔn tii.
28 Abusɑlɔmu wi, u kuɑwɑ wɔ̃ɔ yiru Yerusɑlɛmuɔ, u ǹ sinɑ boko wɑɑre. 29 Yerɑ u Yoɑbu sokusiɑ u nɑ u nùn gɔri sinɑ bokon mi. Adɑmɑ Yoɑbu u yinɑ u nɑ. Mɑ u kpɑm wure u nùn sokusiɑ. Kɑ mɛ, u yinɑ u nɑ. 30 Mɑ Abusɑlɔmu u win bwɑ̃ɑbu sɔ̃ɔwɑ u nɛɛ, Yoɑbun gberu wee nɛgirun bɔkuɔ. U mɑɑ dĩɑnu mɔ mi. I doo i win gbee te dɔ̃ɔ mɛni.
Mɑ bɑ dɑ bɑ tu dɔ̃ɔ mɛni. 31 Yerɑ Yoɑbu u seewɑ u dɑ Abusɑlɔmun mi, u nùn bikiɑ u nɛɛ, mbɑ n kuɑ wunɛn bwɑ̃ɑbu bɑ kɑ dɑ bɑ nɛn gberu dɔ̃ɔ mɛni.
32 Abusɑlɔmu u nùn wisɑ u nɛɛ, domi nɑ nun sokusiɑ nɑ nɛɛ, ɑ nɑ n nun gɔri sinɑ bokon mi, kpɑ ɑ nùn bikiɑ mbɑn sɔ̃nɑ u derɑ nɑ wurɑmɑ Gesurin di. Domi n dɑɑ sɑnɔ nɑ n woo mi giɑ. Tɛ̃ nɑ kĩ su wɑɑnɑ nɛ kɑ sinɑ boko. Tɑɑrɛ gɑɑ yɑ̀ n mɑn wɑ̃ɑsi, kpɑ u mɑn go.
33 Mɑ Yoɑbu u dɑ sinɑ bokon mi, u nùn gɑri yi tusiɑ. Yerɑ sinɑ boko u Abusɑlɔmu sokusiɑ. Ye u tunumɑ win mi, u kpunɑ kɑ bɛɛrɛ. Mɑ sinɑ boko u nùn tɔburɑ u bɔkɑsi.