SAMUƐLIN TIRERU YIRUSE
Dɑfidi u Sɔɔlun gɔɔ nuɑ
1
1 Ye Dɑfidi u Amɑlɛkibɑ go u wee, yerɑ u yɔ̃rɑ Sikilɑgiɔ sɔ̃ɔ yiru. N deemɑ Sɔɔlu u gu kɔ. 2 Sɔ̃ɔ itɑseru, yerɑ durɔ goo u yɑrimɑ sɑɑ tɑbu gberun di mi Sɔɔlu u rɑɑ wɑ̃ɑ. Durɔ win yɑberɑ gɛ̃ɛkire mɑ win wirɑ tuɑ sɑ̃ɑ nuku sɑnkirɑnun sɔ̃. Sɑɑ ye u tunumɑ Dɑfidin mi, u yiirɑ kurɛ u wiru tem girɑri. 3 Mɑ Dɑfidi u nùn bikiɑ u nɛɛ, mɑn diyɑ ɑ wee.
Mɑ u nɛɛ, sɑɑ Isirelibɑn tɑbun sɑnsɑnin diyɑ nɑ dukɑ suumɑ.
4 Dɑfidi u kpɑm nùn bikiɑ u nɛɛ, ɑmɔnɑ gberɑ sɑ̃ɑ. A suuru koowo ɑ mɑn sɔ̃ɔwɔ nge mɛ n koosinɑ kpuro.
Mɑ durɔ wi, u nɛɛ, tɑbu Isirelibɑ swĩiyɛ bɑ duki. Ben dɑbirɑ mɑɑ wɔrukɑ bɑ gu. Mɛyɑ Sɔɔlun tii kɑ win bii Yonɑtɑm bɑ gu.
5 Mɑ Dɑfidi u nɛɛ, ɑmɔnɑ ɑ kuɑ ɑ kɑ yɛ̃ mɑ Sɔɔlu kɑ win bii Yonɑtɑm bɑ gu.
6 Mɑ u nɛɛ, nɑ nɛn wɑ̃ɑru wɑ̃ɑwɑ Giliboɑn guuru wɔllɔ nɑ kɑ Sɔɔlu mɛɛrɑ u kɑ tii win yɑɑsɑ tɑ̃sɑ. Mɑ yibɛrɛbɑn tɑbu kɛkɛ dumigii kɑ mɑɑsɔbu bɑ nùn sɔndi mɑm mɑm bɑ gire. 7 Sɑɑ ye u sĩirɑ u mɛɛrimɑ biruɔ u mɑn wɑ, yerɑ u mɑn sokɑ mɑ nɑ wurɑ nɑ dɑ win mi. 8 Mɑ u mɑn bikiɑ u nɛɛ, nɛ wɑrɑ. Nɑ nùn wisɑ nɑ nɛɛ, nɛ Amɑlɛkiwɑ. 9 Mɑ u nɛɛ, n susimɑ win bɔkuɔ kpɑ n nùn go bɑɑ mɛ u dɑm tie u tirekirɑmɔ. 10 Mɑ nɑ susi win bɔkuɔ nɑ nùn go. Domi nɑ yɛ̃ mɑ u ǹ mɑɑ seemɔ, mi u wɔrɑ mi. Mɑ nɑ win sinɑ furɔ potɑ kɑ win sumɑ ye u doke nɔmɑɔ. Yerɑ nɑ kɑ nun nɑɑwɑ mini, nɛn yinni.
11 Ye Dɑfidi u nuɑ mɛ, yerɑ u win yɑberu nɛnuɑ u kɑrɑnɑ. Mɑ be bɑ wɑ̃ɑ kɑ wi, ben tii bɑ mɑɑ kuɑ mɛ bu kɑ ben nuku sɑnkirɑnu sɔ̃ɔsi. 12 Mɑ bɑ gɔɔ wooru sinɑ bɑ swĩ bɑ nɔɔ bɔkuɑ sere sɔ̃ɔ u kɑ kpɑ Sɔɔlu kɑ win bii Yonɑtɑm sɔ̃, kɑ sere mɑɑ Isirelibɑn sɔ̃, be, Yinni Gusunɔn tɔn be bɑ go tɑbu gberɔ. 13 Mɑ Dɑfidi u durɔ wi bikiɑ u nɛɛ, wuu mɑn diyɑ ɑ nɑ.
U wisɑ u nɛɛ, nɛn bɑɑ u yɑrimɑwɑ sɑɑ Amɑlɛkibɑn tem di sɑ kɑ wɑ̃ɑ mini.
14-16 Dɑfidi kpɑm nùn bikiɑ u nɛɛ, ɑmɔnɑ ɑ kɑ kɑ̃kɑ ɑ wi Yinni Gusunɔ gɔsɑ nɔmɑ doke ɑ go. Yen sɔ̃, wunɛn yɛm mu yɔ̃rɑ wunɛn wiru wɔllɔ. Domi wunɛn tiin nɔɔwɑ gɑ seedɑ di mɑ ɑ wi Yinni Gusunɔ gɔsɑ go.
Sɑɑ yerɑ Dɑfidi u win ɑluwɑɑsibɑn turo sokɑ u nɛɛ, ɑ susio ɑ nùn sɛ̃re ɑ go.
Mɑ ɑluwɑɑsi wi, u Amɑlɛki wi sɛ̃re u so u go.
Dɑfidi u Sɔɔlu kɑ Yonɑtɑm gɔɔ swĩ
17 Mɑ Dɑfidi u womu geni kuɑ win gɔɔ swĩi sɔɔ Sɔɔlu kɑ win bii Yonɑtɑm sɔ̃. 18 Mɛyɑ u mɑɑ yiire bu Yudɑbɑn bibu womu ge sɔ̃ɔsi. Tɛndɑ gɑ tɔmɑmɔ. Mɑ bɑ ge yoruɑ Yɑsɑrin tireru sɔɔ. Womu ge wee.
19 Isireli, wunɛn yiikogibɑ wɔrumɑ,
wunɛn dɑmgibɑ kpunɑ guuru wɔllɔ.
20 I ku de bu lɑbɑɑri ye nɔ Gɑtiɔ.
I ku de bu ye kpɑrɑ Asikɑlonin wuuɔ.
Kpɑ Filisiti bɑngo sɑri ben kurɔbu bu ku yɛ̃ɛri.
Kpɑ ben wɔndiɑbɑ bu ku nuku dobu ko.
21 Bɛɛ Giliboɑn guunu,
Gusunɔ u ku de gurɑ yu nɛ bɛɛn wɔllɔ.
Gusunɔ u ku de kɑkoru tu wɔrumɑ bɛɛn wii kpiirɔ.
Gusunɔ u ku de bɛɛn tem mu dĩɑ geenu mɑ.
Domi miyɑ bɑ tɑbu durɔbu funɛ wĩɑ.
Miyɑ bɑ ben tɛrɛnu kɑsi kuɑ.
Miyɑ Sɔɔlun tɛrɛrɑ gum tɛɛnibu nɔru kuɑ.
22 Bɑɑ mɛ bɑ yibɛrɛbɑ wɑɑmɔ,
bɑɑ mɛ bɑ tɑbu durɔbun wɔrugɔru wɑɑmɔ,
Yonɑtɑm nɔm wĩirɑ kun dwiiyɑre kɑ tɛn tobu.
Sɔɔlun tɑkobi kun mɑɑ kɑm wɔrire.
23 Sɔɔlu kɑ Yonɑtɑm bɑ kĩɑnɑwɑ
ben wɑ̃ɑrun tɔ̃ru kpuro sɔɔ.
Bɑ ǹ kɑrɑnɛ bɑɑ kɑ gɔɔ sɔɔ.
Bɑ sɑ̃u tɑbu sɔɔ n kere gunɔ bɑkenu.
Bɑ gbee sinɑnsu dɑm kere.
24 Bɛɛ Isirelin tɔn kurɔbu,
Sɔɔlu u rɑ rɑɑ de i beku nɔni swɑ̃ɑ burɛginu dewe.
Wiyɑ u rɑ rɑɑ de i wurɑn burɑnu doke bɛɛn yɑ̃nu sɔɔ.
I swĩiyɔ win sɔ̃.
25 Dɑmgibɑ wɔrukɑ tɑbu gberɔ.
Yonɑtɑm u kpunɑ Isirelin guunu wɔllɔ.
26 Yonɑtɑm nɛn kĩnɑsi,
nɑ nuku sɑnkirɑ bɑkɑnu mɔ wunɛn sɔ̃.
A rɑ n sɑ̃ɑwɑ gɑ̃ɑ bɑkɑnu nɛn nɔni sɔɔ.
Wunɛn kĩi te ɑ mɑn kĩɑ tɑ tɔn kurɔgiru kere.
27 Dɑmgibɑ wɔrukɑ tɑbu gberɔ.
Tɑbu yɑ̃nu nu kɑm kuɑ.