Sɔɔlu kɑ win bibun gɔɔ
31
1 Filisitibɑ bɑ Isirelibɑ tɑbu wɔri. Mɑ Isirelibɑn tɑbu kowobu bɑ duki suɑ. Filisiti be, bɑ bu nɑɑ girɑ bɑ go go Giliboɑn guurɔ. 2 Bɑ mɑɑ Sɔɔlun tii kɑ win bibu itɑ Yonɑtɑm kɑ Abinɑdɑbu kɑ Mɑɑkisuɑ nɑɑmwɛ. Mɑ bɑ bii be go. 3 Sɑnnɔ ge, gɑ Sɔɔlu swĩiyɛ. Tɛn towobu bɑ nùn sɛ̃ɛnu twee bɑ mɛɛrɑ kuɑ gem gem. 4 Yerɑ u win tɑbu yɑ̃ɑ sɔɔwo sɔ̃ɔwɑ u nɛɛ, ɑ wunɛn tɑkobi womɔ ɑ mɑn ye sɔku kpɑ bɑngo sɑrirugii be, bu ku rɑɑ mɑn sɔku bu yɑɑ kɑsiki.
Adɑmɑ durɔ wi, u yinɑ u ko mɛ, domi bɛrum nùn mwɑ gem gem. Mɑ Sɔɔlu u tɑkobi ye mwɑ u kɑ tii sɔkɑ u kibɑrisi u tɑɑre. 5 Ye win tɑbu yɑ̃ɑ sɔɔwo wi, u wɑ mɑ u gu, yerɑ u mɑɑ win tɑkobi suɑ u tii sɔkɑ nge mɛ Sɔɔlu u kuɑ. Mɑ bɑ gu yɑ̃ɑtem mi.
6 Nge mɛyɑ Sɔɔlu u kɑ gu kɑ win bibu itɑ be, kɑ win tɑbu yɑ̃ɑ sɔɔwo kɑ sere mɑɑ win tɑbu kowobu kpuro sɑnnu sɔ̃ɔ tee te.
7 Ye Isireli be bɑ wɑ̃ɑ wɔwɑn guruɔ kɑ be bɑ wɑ̃ɑ Yuudɛnin dɑɑrun guruɔ bɑ nuɑ mɑ ben tɑbu kowobɑ duki suɑ, Sɔɔlu kɑ win bii tɔn durɔbu bɑ mɑɑ gu, yerɑ bɑ ben wusu deri bɑ duki suɑ. Mɑ Filisitibɑ bɑ nɑ bɑ sinɑ wuu si sɔɔ.
8 Ye n kuɑ sisiru Filisitibɑ bɑ nɑ bɑ goo nin yɑ̃nu potirimɔ. Yerɑ bɑ Sɔɔlu kɑ win bibu itɑn gonu wɑ Giliboɑn guurɔ. 9 Mɑ bɑ Sɔɔlun wiru burɑ bɑ win tɑbu yɑ̃nu kpuro potirɑ. Yerɑ bɑ sɔmɔbu gɔrɑ bu yen lɑbɑɑri kpɑrɑ ben bũu diɑɔ kɑ ben tɔmbun mi, ben tem sɔɔ kpuro gesi. 10 Yerɑ bɑ win tɑbu yɑ̃nu suɑ bɑ doke ben bũu wi bɑ mɔ̀ Asitɑɑten dirɔ, mɑ bɑ win goru suɑ bɑ bwɛ̃ Bɛti Sɑnin gbɑ̃rɑru wɔllɔ.
11 Sɑnɑm mɛ Gɑlɑdin wuu ge bɑ mɔ̀ Yɑbɛsin tɔmbɑ nuɑ ye Filisitibɑ bɑ Sɔɔlu kuɑ, 12 yerɑ be bɑ sɑ̃ɑ tɑbu durɔbu bɑ seewɑ bɑ sɑnum so wɔ̃ku giriru. Ye bɑ turɑ Bɛti Sɑni mi, yerɑ bɑ Sɔɔlu kɑ win bibun gonu bwɛ̃ɛyɑ gbɑ̃rɑ ten min di, bɑ kɑ nɑ Yɑbɛsiɔ, bɑ nu dɔ̃ɔ kpɑkurɑ. 13 Mɑ bɑ ben kukunu gurɑ bɑ sikuɑ dɑ̃ru gɑrun nuurɔ Yɑbɛsiɔ. Mɑ bɑ gɔɔ wooru sinɑ, bɑ nɔɔ bɔkuɑ sɔ̃ɔ nɔɔbɑ yiru._