Dɑfidi u Amɑlɛkibɑ nɑɑ gire
30
1 Ye n kuɑ sɔ̃ɔ itɑ Dɑfidi kɑ win tɔmbu bɑ Sikilɑgi turɑ. N deemɑ Amɑlɛkibɑ bɑ rɑɑ tem mɛn sɔ̃ɔ yɛ̃sɑn nɔm dwɑru giɑ wɔrɑɑ dɑ. Sɑɑ ye sɔɔrɑ bɑ mɑɑ nɑ bɑ Sikilɑgi wɔri, bɑ ye kɔsukɑ bɑ dɔ̃ɔ mɛni. 2 Bɑ yen tɔmbu mwɛɛrɑ tɔn kurɔbu kɑ tɔn durɔbu, sɑɑ bukurobun di sere kɑ bibɔ. Adɑmɑ bɑ ǹ ben goo go. Bɑ bu gurɑ bɑ kɑ doonɑwɑ. 3 Ye Dɑfidi kɑ win tɔmbu bɑ turɑ mi, bɑ deemɑ wee, bɑ wuu ge dɔ̃ɔ mɛni mɑ bɑ ben kurɔbu kɑ bibu gurɑ bɑ kɑ doonɑ. 4-5 Bɑ kɑ Dɑfidin tiin kurɔbu yiru ye doonɑ, Akinɔɑmu Yisirɛɛligii, kɑ Abigɑli, wi u rɑɑ sɑ̃ɑ Nɑbɑlin kurɔ Kɑɑmɛliɔ. Yerɑ Dɑfidi kɑ win tɔmbu bɑ wuri kuɑ sere bɑ ǹ mɑɑ dɑm tie.
6 Mɑ Dɑfidin nuki sɑnkirɑ too domi win tɔmbu bɑ gerunɑmɔ bɑ mɔ̀ bu nùn kpenu kɑsuku bu go, yèn sɔ̃ bɑ ben kurɔbu kɑ bibu biɑ. Yerɑ n derɑ bɑ nuki sɑnkire. Adɑmɑ Dɑfidi u tii deri Yinni Gusunɔn nɔmuɔ. Mɑ u nùn dɑm kɑ̃.
7 Yerɑ Dɑfidi u yɑ̃ku kowo Abiɑtɑɑ, Akimɛlɛkin bii sɔ̃ɔwɑ u nɛɛ, ɑ kɑ mɑn yɑbe tɑrɑkpe ye nɑɑwɑ ye bɑ rɑ kɑ bikiɑru ko Yinni Gusunɔn mi.
Mɑ Abiɑtɑɑ u kɑ ye nɑ. 8 Mɑ Dɑfidi u bikiɑru kuɑ Yinni Gusunɔn mi, u nɛɛ, Yinni, nɑ̀ n Amɑlɛkibɑn tɑbu kowo be nɑɑ girɑ, kon bu nɑɑmwɛ?
Yerɑ Yinni Gusunɔ u nùn wisɑ u nɛɛ, mɛyɑ, kɑɑ bu nɑɑmwɛ, kpɑ ɑ wunɛn tɔmbu yɑkiɑmɑ.
9-10 Mɑ Dɑfidi u seewɑ kɑ tɑbu kowobu nɑtɑ (600) ye. Ye bɑ turɑ Besorin dɑɑrɔ miyɑ ben goobu (200) be bɑ wɑ̃ɑ biruɔ bɑ yɔ̃rɑ domi bɑ wɑsire too. Mɑ wi kɑ tɔmbu nɛɛru (400) te tɑ tie bɑ tɔburɑ bɑ Amɑlɛki be nɑɑ swĩi. 11 Yerɑ bɑ Egibitigii goo wɑ gbɑbu te sɔɔ, mɑ bɑ kɑ nùn dɑ Dɑfidin mi, bɑ nùn pɛ̃ɛ wɛ̃ u di. Mɑ u nim nɔrɑ. 12 Yerɑ bɑ mɑɑ nùn dɑ̃ɑ mɑrum mɛ bɑ rɑ soku figien gbebi kɑ mɑɑ resɛm gbebin kurenu yiru wɛ̃. Ye u yebɑ kpuro di u kpɑ, mɑ win hunde yɑ wurɑmɑ. Domi u rɑɑ kuɑwɑ sɔ̃ɔ sɔɔ itɑ kɑ wɔ̃kunu itɑ u ǹ di u ǹ nɔrɑ. 13 Dɑfidi u nùn bikiɑ u nɛɛ, wɑrɑ u sɑ̃ɑ wunɛn yinni. Bwese terɑ̀ wunɛn tii ɑ sɑ̃ɑ.
Yerɑ u Dɑfidi wisɑ u nɛɛ, nɑ sɑ̃ɑwɑ Egibitigii, nɑ kɑ sere sɑ̃ɑ Amɑlɛki goon yoo. Yen sɔ̃ɔ itɑwɑ mini ye nɛn yinni u kɑ mɑn deri yèn sɔ̃ nɑ bɑrɔ. 14 Sɑ wɔrɑɑ dɑwɑ Keretibɑ kɑ Yudɑbɑ kɑ Kɑlɛbubɑn tem sɔ̃ɔ yɛ̃sɑn nɔm dwɑru giɑ. Mɛyɑ sɑ mɑɑ dɑ Sikilɑgiɔ sɑ ye dɔ̃ɔ mɛni.
15 Mɑ Dɑfidi u nùn bikiɑ u nɛɛ, ɑ kĩ ɑ kɑ mɑn dɑ tɔn ben mi?
Yerɑ durɔ wi, u Dɑfidi sɔ̃ɔwɑ u nɛɛ, ɑ bɔ̃ruo kɑ Gusunɔn yĩsiru mɑ ɑ ǹ mɑn goomɔ, ɑ ǹ mɑɑ mɑn nɛn yinni nɔmu sɔndiɑmmɛ, nɑ̀ n kɑ nun dɑ mi.
Dɑfidi u Amɑlɛkibɑ kɑmiɑ
16 Mɑ bɑ nɔɔsinɑ nge mɛ. Mɑ u kɑ Dɑfidi dɑ. Ye bɑ turɑ mi, yerɑ bɑ wɑ wee, Amɑlɛkibɑ bɑ tɛrie bɑɑmɑ bɑ tɔ̃ɔ bɑkɑnu mɔ̀ bɑ dimɔ bɑ nɔrumɔ dukiɑ ye bɑ gurɑ Filisitibɑ kɑ Yudɑbɑn min din sɔ̃. 17 Yerɑ Dɑfidi u bu wɔri u goomɔ sɑɑ bururun di n kɑ kuɑ sisirun yokɑ. Bɑɑ ben goo kun kisire mɑ n kun mɔ ɑluwɑɑsi tɔnu nɛɛru (400) be bɑ yooyoosu sɔni. Berɑ bɑ duki. 18 Dɑfidi u ye kpuro yɑkiɑ ye Amɑlɛki be, bɑ rɑɑ mwɛɛrɑ kɑ sere mɑɑ win kurɔbu yiru ye. 19 Mɑ Yudɑ ben bɑɑwure u win tɔmbu wɑ, bukurobu kɑ bibu. Ye yibɛrɛbɑ bɑ rɑɑ gesi mwɑ mi kpuro, yen gɑɑ kun kɑm kue. Bɑ ye kpuro mwɛɛrimɑwɑ bɑ kɑ wɔmɑ yɛnuɔ. 20 U mɑɑ yɑɑ sɑbenu kpuro mwɛɛrɑ, mɑ win tɔn be bɑ nu kpɑre bɑ gerumɔ bɑ mɔ̀, wee, ye Dɑfidi u tɑbu diimɑ.
21 Ye u gɔsirɑmɑ u wee, u turɑ Besorin dɑɑrɔ, mi u rɑɑ win tɔmbu goobu (200) deri be bɑ wɑsirɑ, yerɑ bɑ seewɑ bɑ nùn sennɔ nɑ. Mɑ u susi u bu tɔburɑ. 22 Yerɑ tɔn kɔ̃so be bɑ kɑ nùn tɑɑ bi dɑ, bɑ seewɑ bɑ wɔki bɑ nɛɛ, sɑ ǹ kɑ tɔn be bɑ wɑsirɑ mi dukiɑ ye sɑ wɑɑmɑ bɔnu mɔ̀. Adɑmɑ sɑ ko bu ben kurɔbu kɑ ben bibu wesiɑ. Domi bɑ ǹ kɑ sun tɑɑ bi de.
23 Yerɑ Dɑfidi u bu sɔ̃ɔwɑ u nɛɛ, nɛgibu i ku ko mɛ ye Yinni Gusunɔ u sun kɑ̃ sɔɔ. Wee, u sun kɔ̃su bɛsɛn yibɛrɛbɑn suunu sɔɔ, mɑ u sun bu nɔmu bɛriɑ. 24 Ye i mɑn bikiɑmɔ mini, goo kun ye wurɑmɔ.
Be bɑ tɑɑ bi dɑ
kɑ be bɑ sinɑ bɑ bɛsɛn yɑ̃nu kɔ̃su,
be kpuron bɔnu yɑ ko n nɛwɑ.
25 Nge mɛyɑ bɑ kuɑ dɔmɑ te, mɑ yɑ kuɑ woodɑ Isireliɔ sere kɑ gisɔ.
26 Ye Dɑfidi u tunumɑ Sikilɑgiɔ, yerɑ u dukiɑ yen sukum Yudɑbɑn guro gurobu kɑ win bɔrɔbɑ mɔrisiɑ, u nɛɛ, dukiɑ ye sɑ mwɛɛrimɑ Gusunɔn yibɛrɛbɑn min di, ye sɔɔ, ye sɑ bɛɛ kɑ̃wɑ mi. 27 Mɑ u Betɛligibu begiɑ mɔrisiɑ kɑ Rɑmɔtigibu be bɑ sɔ̃ sɔ̃ɔ yɛ̃sɑn nɔm dwɑru giɑ, kɑ Yɑtirigibu, 28 kɑ Aroɛɛgibu kɑ Sifumɔtugibu, kɑ Ɛsitemɔɑgibu, 29 kɑ Rɑkɑligibu kɑ Yerɑmɛɛlibɑ kɑ sere be bɑ wɑ̃ɑ Kenibɑn wusɔ, 30 kɑ Hɔɔmɑgibu kɑ Korɑsɑnigibu kɑ Atɑkigibu 31 kɑ Heboronigibu kɑ sere mɑɑ bèn mi wi Dɑfidi kɑ win tɔmbu bɑ rɑɑ dɑ dɑ.