Isirelibɑ kɑ Amɑlɛkibɑn tɑbu
15
1-2 Sɑmuɛli u Sɔɔlu sɔ̃ɔwɑ u nɛɛ, nɛnɑ Gusunɔ wɔllu kɑ tem Yinni u gɔrimɑ wunɛn mi, n nun gum wisi n kɑ sɔ̃ɔsi mɑ u nun gɔsɑ ɑ ko sunɔ win tɔmbu Isirelibɑn suunu sɔɔ. Yen sɔ̃ tɛ̃, ɑ swɑɑ dɑkio ɑ nɔ ye u geruɑ. U nɛɛ, u koo Amɑlɛkibɑ dibu kɔsiɑ ye bɑ kɑ Isirelibɑ swɑɑ burɑ sɑnɑm mɛ bɑ yɑrɑ Egibitin di. 3 Yen sɔ̃, ɑ doo ɑ bu wɔri kpɑ ɑ ye bɑ mɔ kpuro kpeerɑsiɑ mɑm mɑm. A ku de bu tiɑrɑ. A bu goowo kpuro tɔn durɔbu kɑ tɔn kurɔbu kɑ bibu sere kɑ bii wɛ̃ɛnɔ, kɑ mɑɑ ben yɑɑ sɑbenu.
4 Mɑ Sɔɔlu u win tɔmbu mɛnnɑ u gɑrɑ Telɑimuɔ. Win tɑbu kowobun geerɑ kuɑ nɔrɔbun subɑ goobu (200.000), mɑ Yudɑbɑ bɑ mɑɑ kuɑ tɔmbu nɔrɔbun subɑ wɔkuru (10.000). 5 Sɑnɑm mɛ Sɔɔlu kɑ win tɑbu kowobu bɑ turɑ Amɑlɛkibɑn wuu bɔkɔwɔ, yerɑ bɑ kukuɑ gen wɔwɑ gɑɑ sɔɔ. 6 Mɑ Sɔɔlu u Kenibɑ sɔ̃ɔwɑ u nɛɛ, bu de bu tii wunɑ Amɑlɛkibɑn min di, kpɑ wi, u ku rɑɑ bu mɛnnɑ u go kpuro sɑnnu. Domi be, bɑ Isirelibɑ durom kuɑwɑ sɑɑ ye bɑ wee Egibitin di. Mɑ Keni be, bɑ yɑrɑ sɑɑ Amɑlɛkibɑn min di. 7 Yen biru Sɔɔlu kɑ win tɑbu kowobu bɑ Amɑlɛkibɑ wɔri bɑ bu sunkɑ sɑɑ Hɑfilɑn di sere kɑ Suriɔ ye yɑ wɑ̃ɑ Egibitin sɔ̃ɔ yɑri yeru giɑ. 8 Mɑ bɑ ben sunɔ mwɑ wi bɑ sokumɔ Agɑgi. Be bɑ tie, mɑ bɑ bu go kɑ tɑkobi. 9 Adɑmɑ Sɔɔlu kɑ win tɑbu kowobu, bɑ Agɑgi deri, bɑ ǹ nùn go, kɑ sere mɑɑ yɑɑ sɑbe ni nu geɑ sɑ̃ɑ, yɑ̃ɑnu kɑ kɛtɛbɑ kɑ nɑɑ kpɛmi kɑ yɑ̃ɑ kpɛmminu ni nu gum mɔ kɑ bɑɑyere kpuro ye yɑ geɑ sɑ̃ɑ. Bɑ yinɑ bu ye kpuro kpeerɑsiɑ mɑm mɑm. Adɑmɑ ye yɑ ǹ dɑm mɔ kɑ ye yɑ ǹ wɑɑbu wɑ̃, bɑ ye kpuro gowɑ mɑm mɑm.
10 Sɑɑ ye sɔɔrɑ Yinni Gusunɔ u kɑ Sɑmuɛli gɑri kuɑ u nùn sɔ̃ɔwɑ u nɛɛ, 11 nɛn nukurɑ sɑnkirɑ ye nɑ kɑ Sɔɔlu kuɑ sunɔ. Domi u mɑn biru kisi, u ǹ nɛn gere mɛm nɔɔwɛ.
Ye Sɑmuɛli u gɑri yi nuɑ, yerɑ u mɔru kuɑ gem gem, mɑ u Yinni Gusunɔ nɔɔgiru sue wɔ̃ku giriru.
12 Sisiru bururu u seewɑ yellu u dɔɔ u kɑ Sɔɔlu yinnɑ. Adɑmɑ bɑ nùn sɔ̃ɔwɑ bɑ nɛɛ, Sɔɔlu u dɑ wuu ge bɑ mɔ̀ Kɑɑmɛli giɑ. Miyɑ u kperu gɑru girɑ tɔmbu bu kɑ win nɑsɑrɑ yɑɑyɑ. Min diyɑ u mɑɑ gɔsirɑ u dɑ Giligɑliɔ. 13 Mɑ Sɑmuɛli u dɑ win mi. Ye Sɔɔlu u Sɑmuɛli wɑ, yerɑ u nɛɛ, Gusunɔ u nun domɑru kuɑ. Wee nɑ kpuro kuɑ ye u mɑn yiire.
14 Sɑmuɛli u nɛɛ, ǹ n mɛn nɑ, ɑmɔnɑ nɑ kɑ yɑ̃ɑnu kɑ kɛtɛbɑn wuri nɔɔmɔ.
15 Sɔɔlu u nɛɛ, tɑbu kowobɑ bɑ yɑ̃ɑnu kɑ kɛtɛ geenu gɔsɑ bɑ kɑ wɔmɑ sɑɑ Amɑlɛkibɑn min di kpɑ bu kɑ Gusunɔ wunɛn Yinni yɑ̃kuru kuɑ. Adɑmɑ bɑ ye yɑ ǹ geɑ sɑ̃ɑ kpeerɑsiɑwɑ mɑm mɑm.
16 Mɑ Sɑmuɛli u nɛɛ, ɑ sɑkuo n nun sɔ̃ ye Yinni Gusunɔ u mɑn sɔ̃ɔwɑ gĩɑ wɔ̃kuru.
Sɔɔlu nɛɛ, ɑ geruo.
17 Sɑmuɛli u nɛɛ, yellu ɑ tii gɑrisiwɑ bwɛ̃ɛbwɛ̃ɛ, mɑ Yinni Gusunɔ u nun gɔsɑ ɑ kuɑ Isirelibɑn sunɔ. 18 Mɑ u nun gɔrɑ u nɛɛ, ɑ doo ɑ Amɑlɛki durumgii be tɑbu wɔri ɑ bu go ɑ kpeerɑsiɑ mɑm mɑm. 19 Ǹ n mɛn nɑ, mbɑn sɔ̃nɑ ɑ ǹ Yinni Gusunɔn gere mɛm nɔɔwɛ. Mbɑn sɔ̃nɑ i kuɑ ye yɑ ǹ nùn dore, i ben yɑ̃nu kɑtɑ kuɑ i gurɑ.
20 Sɔɔlu u nɛɛ, nɑ Yinni Gusunɔn gere mɛm nɔɔwɑ fɑ. Nɑ dɑ mi u mɑn gɔrɑ, mɑ nɑ Amɑlɛkibɑn sunɔ Agɑgi mwɑ nɑ kɑ nɑ, mɑ nɑ win tɔmbu go mɑm mɑm. 21 Adɑmɑ nɛn tɑbu kowobɑ bɑ ben yɑ̃ɑnu kɑ ben kɛtɛ geenu mwɑɑmɑ bu kɑ Gusunɔ wunɛn Yinni yɑ̃kuru kuɑ Giligɑliɔ.
22 Sɑmuɛli u nɛɛ, mbɑ Yinni Gusunɔ u kĩru bo. Yɑ̃kunu? Nge mɛm nɔɔbu. Wee mɛm nɔɔbu bu yɑ̃kuru kere. Wii kpĩibu bu mɑɑ yɑ̃ku yɑɑ gum kere. 23 Wi u ku rɑ Gusunɔ mɛm nɔɔwɛ u sɑ̃ɑwɑ tɑɑrɛgii nge sɔro. Wi u ku rɑ nùn wiru kpĩiyɛ, u sɑ̃ɑwɑ nge bũu sɑ̃ɔ. Tɛ̃, yèn sɔ̃ ɑ Yinni Gusunɔn gere yinɑ, win tii u mɑɑ nun yinɑ, u nun bɑndu yɑrɑ.
24 Yerɑ Sɔɔlu u Sɑmuɛli sɔ̃ɔwɑ u nɛɛ, nɑ durum kuɑ, nɑ Yinni Gusunɔn woodɑ sɑrɑ kɑ mɑɑ wunɛn gere. Nɑ nɛn tɔmbun bɛrum kuɑ mɑ nɑ ben gere wurɑ. 25 Adɑmɑ nɑ nun kɑnɑmɔ, ɑ mɑn nɛn durum suuru kuo, kpɑ ɑ kɑ mɑn wurɑ Giligɑliɔ, n kɑ Yinni Gusunɔ sɑ̃.
26 Mɑ Sɑmuɛli u nùn sɔ̃ɔwɑ u nɛɛ, nɑ ǹ mɑɑ kɑ nun wurɔ. Domi ɑ Yinni Gusunɔn gɑri yinɑ. Mɛyɑ u mɑɑ nun yinɑ, u nun bɑndu yɑrɑ.
27 Sɑnɑm mɛ Sɑmuɛli u gɔsirɔ u kɑ doonɑ, yerɑ Sɔɔlu u win yɑberun swɑɑ gɑbɑ, mɑ yɑbe te, tɑ gɛ̃ɛrɑ. 28 Sɑmuɛli u nùn sɔ̃ɔwɑ u nɛɛ, Yinni Gusunɔ u nun Isirelibɑn bɑndu wɔrɑri gisɔ u tu goo wɛ̃ wi u nun sɑnɔ kere. 29 Gusunɔ, Isirelibɑn Yinni yiikogii u ku rɑ weesu ko, u ku rɑ mɑɑ win himbɑ gɔsie, domi u ǹ sɑ̃ɑ nge tɔnu.
30 Sɔɔlu u kpɑm nɛɛ, nɑ durum kuɑ, ɑdɑmɑ tɛ̃ nɑ nun kɑnɑmɔ ɑ mɑn bɛɛrɛ dokeo nɛn tɔmbu Isirelibɑ kɑ ben guro gurobu kpuron wuswɑɑɔ. A kɑ mɑn gɔsiro Giligɑli mi kpɑ n kɑ Gusunɔ wunɛn Yinni sɑ̃.
31 Mɑ Sɑmuɛli u gɔsirɑ u kɑ Sɔɔlu dɑ. Sɔɔlu u Yinni Gusunɔ sɑ̃wɑ.
32 Yerɑ Sɑmuɛli u nɛɛ, i kɑ mɑn Agɑgi, Amɑlɛkibɑn sunɔ wi nɑɑwɑ mini. Mɑ Agɑgi wi, u susi kɑ nuku dobu. Domi u bwisikɑ mɑ gɔɔ nùn sɑrɑri. 33 Adɑmɑ Sɑmuɛli u nɛɛ,
nge mɛ wunɛn tɑkobi yɑ tɔn kurɔbu gɑbun bibu go,
nge mɛyɑ wunɛn mɛro u koo mɑɑ bii biɑ.
Mɑ Sɑmuɛli u Agɑgi go u bɔtirɑ Yinni Gusunɔn sɑ̃ɑ yerɔ Giligɑliɔ.