Sɔɔlu u win bɑɑn kɛtɛkunu
kɑsu
9
1 Durɔ goo u wɑ̃ɑ Bɛnyɑmɛɛn bweseru sɔɔ, win yĩsirɑ Kisi. Win bɑɑbɑbɑrɑ Abiɛli kɑ Serori kɑ Bekorɑti kɑ Afiɑ. Be kpuro bɑ sɑ̃ɑwɑ Bɛnyɑmɛɛn bweseru. Kisi wi, u sɑ̃ɑwɑ tɔn boko, u mɑɑ gobi mɔ. 2 Wiyɑ u bii tɔn durɔ goo mɔ wi bɑ sokumɔ Sɔɔlu. U sɑ̃ɑ ɑluwɑɑsi durɔ burɔ. Isirelibɑ kpuro sɔɔ, goo sɑri wi u nùn geɑ turɑ. Mɛyɑ be kpuron gunum mu rɑ yɔ̃rewɑ win serɔ.
3 Yerɑ Kisi win kɛtɛkunu nu kɔ̃ɔrɑ. Mɑ u win bii Sɔɔlu wi sɔ̃ɔwɑ u nɛɛ, u seewo u sɔm kowo turo suɑ bu dɑ bu nùn kɛtɛku ni kɑsuɑmɑ. 4 Mɑ bɑ sɑrɑ bɑ dɑ Efɑrɑimun guunun berɑ giɑ, kɑ Sɑlisɑn temɔ, ɑdɑmɑ bɑ ǹ nu wɑ. Min di, bɑ mɑɑ dɑ Sɑlimun temɔ kɑ Bɛnyɑmɛɛn tem mɛ kpuro sɔɔ, ɑdɑmɑ bɑ ǹ nu wɑ. 5 Sɑɑ ye bɑ turɑ Sufuɔ, yerɑ Sɔɔlu u sɔm kowo wi sɔ̃ɔwɑ u nɛɛ, ɑ nɑ su wurɑ yɛnuɔ, domi ɑ̀ n dɑ, nɛn bɑɑbɑ u kɛtɛku nin gɑri duɑri u bɛsɛn weeweenu mɔ̀.
6 Mɑ sɔm kowo wi, u nùn sɔ̃ɔwɑ u nɛɛ, wee, Gusunɔn tɔnu goo u wɑ̃ɑ wuu ge sɔɔ, u bɛɛrɛ mɔ. Ye u mɑɑ geruɑ kpuro yɑ rɑ koorewɑ. A nɑ su dɑ win mi. Sɔrɔkudo u koo sun sɔ̃ swɑɑ ye sɑ ko kpe su kɑ kɛtɛku ni wɑ.
7 Mɑ Sɔɔlu u sɔm kowo wi wisɑ u nɛɛ, sɑ̀ n dɑ durɔ win mi, mbɑ sɑ ko sii kɛ̃. Wee, sɑ ǹ mɑɑ dĩɑnu tie bɛsɛn bɔɔrɔ. Mɛyɑ gɑ̃ɑnu gɑnu mɑɑ sɑri ni sɑ ko nùn kɛ̃. Nge mbɑ sɑ mɔ.
8 Mɑ sɔm kowo wi, u Sɔɔlu wisɑ u nɛɛ, nɑ sii geesun gobi piibu gɑgu mɔ mini, kon yi Gusunɔn tɔnu wi kɛ̃ kpɑ u sun bɛsɛn swɑɑ sɔ̃ɔsi ye sɑ ko kpe su kɑ kɛtɛku ni wɑ.
9-11 Sɑɑ yerɑ Sɔɔlu u sɔm kowo wi sɔ̃ɔwɑ u nɛɛ, geemɑ ɑ geruɑ. A nɑ su dɑ. Mɑ bɑ dɑ wuu mi, mi Gusunɔn tɔnu wi, u wɑ̃ɑ. Ye bɑ wuu gen tureru yɔɔmɔ, yerɑ bɑ kɑ wɔndiɑ gɑbu yinnɑ bɑ yɑrimɑ bɑ nim tɑkɑm dɔɔ. Bɑ bu bikiɑ bɑ nɛɛ, yɑm wɑo wi, u wɑ̃ɑ mini?
N deemɑ yellu Isirelibɑn goo ù n kĩ u gɑ̃ɑnu bikiɑ Gusunɔn mi, bɑ rɑ nɛɛwɑ, ɑ nɑ su dɑ yɑm wɑon mi. Wi sɑ tɛ̃ sokumɔ Gusunɔn sɔmɔ, wiyɑ bɑ rɑ sɑnɑm mɛ soku yɑm wɑo.
12 Wɔndiɑ be, bɑ bu wurɑri bɑ nɛɛ, oo, tɛ̃n tɛ̃ gerɑ u doonɑ mini. I bɔbio, u bɛɛ gbiiye wuuɔ, domi tɔmbɑ yɑ̃kuru gɑru kobu nɑ gunguru mi gisɔ. 13 Ì n wuu duɑ i ko nùn wɑ u sere yɔ gunguru mi, u di. Domi goo kun dimɔ mɑ n kun mɔ u turɑ mi, yèn sɔ̃ wiyɑ u koo yɑ̃kuru domɑru koosi, yen biru be bɑ sokɑ bu sere di. I doo fuuku, i ko i nùn wɑ.
Sɔɔlu kɑ Sɑmuɛli bɑ yinnɑ
14 Mɑ bɑ doonɑ. Ye bɑ duɔ wuuɔ, yerɑ bɑ kɑ Sɑmuɛli yinnɑ u yɑriɔ u dɔɔ gunguru mi.
15 N deemɑ Sɔɔlu u sere nɑ wuu mi, Yinni Gusunɔ u Sɑmuɛli sɔ̃ɔwɑ u nɛɛ, 16 siɑ ɑmɑdɑɑre kon Bɛnyɑmɛɛbɑn turo gɔrimɑ wunɛn mi, kpɑ ɑ nùn gum tɑ̃re wirɔ domi nɑ nùn gɔsɑ u kɑ ko nɛn tɔmbu Isirelibɑn sunɔ. Wiyɑ u koo bu wɔrɑ Filisitibɑn nɔmɑn di. Domi nɑ ben wuri nuɑ mɑ nɑ bu mɛɛrimɑ nɑ ben wɑhɑlɑ wɑ.
17 Sɑɑ ye Sɑmuɛli u Sɔɔlu wɑ, Yinni Gusunɔ u nùn sɔ̃ɔwɑ u nɛɛ, durɔ wiyɑ mi, wìn gɑri nɑ rɑɑ nun sɔ̃ɔwɑ. Wiyɑ u koo bɑndu di nɛn tɔmbun suunu sɔɔ.
18 Yerɑ Sɔɔlu u susi Sɑmuɛlin bɔkuɔ wuu duu yerɔ u nɛɛ, ɑ gem mɔ, ɑ mɑn sɔ̃ɔwɔ mi yɑm wɑo wi, u wɑ̃ɑ.
19 Sɑmuɛli u Sɔɔlu wisɑ u nɛɛ, nɛnɑ yɑm wɑo wi. A nɑ su dɑ gunguru mi. Sɑnnɑ sɑ ko di gisɔ. Ǹ n kuɑ bururu, ye ɑ bwisikumɔ wunɛn gɔ̃ruɔ ɑ bikiɑ, kon nun ye kpuro wisi, kpɑ n de ɑ doonɑ. 20 Kɛtɛku ni nu kɔ̃ɔrɑ yen sɔ̃ɔ itɑ gisɔ, ɑ ku mɑɑ nin gɑri ko, domi sibɑ nu wɑ. Adɑmɑ ɑ n yɛ̃ mɑ Isirelibɑn siɑ yɑ ko n wɑ̃ɑ wunɛ kɑ wunɛn bɑɑn yɛnugibun nɔmɑɔ.
21 Mɑ Sɔɔlu u nùn wisɑ u nɛɛ, nɛ Bɛnyɑmɛɛn bweserɑ. N ǹ beyɑ bɑ piiburu bo Isirelibɑ sɔɔ? Bɛnyɑmɛɛn bwese te sɔɔ kpɑm, n ǹ nɛn dusibɑ bɑ bwɛ̃ɛbwɛ̃ɛru bo? Mbɑ n kuɑ ɑ kɑ mɑn gɑri yinin bweseru mɔ̀.
22 Sɑmuɛli u kɑ Sɔɔlu kɑ sɔm kowo wi dɑ gunguru mi, u bu duusiɑ dii bɑkɑrɔ u bu ɑye bɛɛrɛgiru wɛ̃ tɔmbu tɛnɑn suunu sɔɔ be bɑ dim sokɑ mi. 23 Mɑ Sɑmuɛli u dĩɑ kowo sɔ̃ɔwɑ u nɛɛ, ɑ dĩɑ ni tɑmɑ ni nɑ nɛɛ, ɑ ginɑ yiiyo bee tiɑ wunɛn mi. 24 Dĩɑ kowo u kɑ yɑɑ tɑɑru nɑ u yi Sɔɔlun wuswɑɑɔ. Mɑ Sɑmuɛli u nɛɛ, wee ye bɑ nun yiiyɑ, ɑ tii ye gɑweo ɑ di. Domi nɑ ye beruɑwɑ wunɛn gisɔn nɑɑ ten sɔ̃ n sere tɔmbu dim soku mini.
Mɑ Sɔɔlu kɑ Sɑmuɛli bɑ di sɑnnu dɔmɑ te. 25 Ye bɑ sɑrɑmɑ gunguru min di, bɑ wurɑ wuuɔ, mɑ Sɑmuɛli u kɑ Sɔɔlu gɑri kuɑ win dii tɛɛrɑ wɔllɔ, mɑ Sɔɔlu kɑ win sɔm kowo bɑ kpunɑ mi.
Sɑmuɛli u Sɔɔlu gum tɑ̃re
u kɑ ko sunɔ
26 Buru buru yellu, Sɑmuɛli u Sɔɔlu sokɑ dii tɛɛrɑ wɔllu mi, u nɛɛ, ɑ seewo, kon nun kɑrɑ ɑ doonɑ.
Sɔɔlu u seewɑ, mɑ wi kɑ Sɑmuɛli bɑ yɑrɑ sɑnnu yɛnun di. 27 Sɑnɑm mɛ bɑ wuu yɑrimɑm dɔɔ, Sɑmuɛli u Sɔɔlu sɔ̃ɔwɑ u nɛɛ, ɑ de wunɛn sɔm kowo u sun gbiiyɑ u doonɑ.
Mɑ sɔm kowo wi, u gbiɑ u doonɑ. Yerɑ Sɑmuɛli u nɛɛ, ɑ yɔ̃ro, kpɑ n nun sɔ̃ ye Gusunɔ u geruɑ.