Isirelibɑ bɑ sinɑ boko bikiɑ
8
1 Sɑɑ ye Sɑmuɛli u tɔkɔ kuɑ, u derɑ win bibɑ kuɑ Isirelibɑn kpɑrobu. 2 Win bii gbiikoon yĩsirɑ Yoɛli, yirusegirɑ mɑɑ Abiɑ. Berɑ bɑ kuɑ kpɑrobu Beri Sebɑɔ. 3 Adɑmɑ win bii be, bɑ ǹ win yirɑ swĩi. Bɑ ye gɛrɑriwɑ gobin binɛn sɔ̃. Bɑ nɔm birɑn kɛ̃nu mwɑɑmɔ. Bɑ ku rɑ tɔmbu sirie dee dee. 4 Mɑ Isirelibɑn guro gurobu kpuro bɑ mɛnnɑ bɑ dɑ Sɑmuɛlin mi Rɑmɑɔ. 5 Bɑ nùn sɔ̃ɔwɑ bɑ nɛɛ, wee, ɑ tɔkɔ kuɑ, wunɛn bibɑ kun mɑɑ wunɛn yirɑ swĩi. Ǹ n mɛn nɑ, ɑ sun goo kɑsuo u ko bɛsɛn sinɑ boko u n sun kpɑre nge mɛ bwesenu kpuro nu mɔ.
6 Adɑmɑ gɑri yi, yi ǹ Sɑmuɛli dore, ye bɑ nɛɛ, u bu sinɑ boko kɑsuo wi u ko n bu kpɑre. Mɑ u kɑnɑru kuɑ. 7 Yerɑ Yinni Gusunɔ u nùn sɔ̃ɔwɑ u nɛɛ, ye tɔn be, bɑ nun sɔ̃ɔwɑ kpuro, ɑ wuro. A ku yinɑ. Domi n ǹ wunɛ bɑ yinɑmɔ, nɛnɑ bɑ yinɑ nɑ n sɑ̃ɑ ben sunɔ. 8 Sɑɑ mìn di nɑ bu yɑrɑmɑ Egibitin di sere kɑ gisɔ bɑ mɑn yinɑwɑ bɑ bũnu sɑ̃ɑmɔ. Nge mɛyɑ bɑ mɑɑ nun kuɑmmɛ. 9 Yen sɔ̃, ɑ ben gere wuro, ɑdɑmɑ ɑ bu sɔ̃ɔwɔ ye sinɑ boko wi, u koo rɑ bu kuɑ, kpɑ bɑ n yɛ̃.
Sinɑ bokon sɑriɑ
10 Mɑ Sɑmuɛli u Yinni Gusunɔn gɑri yi kpuro tɔn be tusiɑ. 11 U nɛɛ, sinɑ boko wi u koo bɑndu di mi, ɑmɛniwɑ u koo ko. U koo bɛɛn bii tɔn durɔbu mwɛɛri bɑ n sɑ̃ɑ win tɑbu kowobu, gɑbu bu win tɑbu kɛkɛbɑn sɔmburu ko, kpɑ gɑbu bɑ n sɑ̃ɑ mɑɑsɔbu, kpɑ gɑbu bɑ n sɑ̃ɑ win kirukubɑ bɑ n duku dukubu mɔ̀ win tɑbu kɛkɛn wuswɑɑɔ. 12 U koo gɑbu gɔsi bɑ n sɑ̃ɑ tɑbu kowo wuunun wirugibu, kpɑ u gɑbu wunɑ bɑ n win gbee sɔmɑ mɔ̀ kpɑ gɑbu bɑ n tɑbu yɑ̃nu kɑ tɑbu kɛkɛbɑn yɑ̃nu sekumɔ. 13 U koo mɑɑ bɛɛn bii wɔndiɑbɑ mwɛɛri bɑ n dɑ nùn turɑre kue kpɑ bɑ n sɑ̃ɑ dĩɑ kowobu kɑ pɛ̃ɛ kowobu. 14 U koo bɛɛn gbee geenu mwɛɛri kɑ mɑɑ bɛɛn gbɑɑ geenu mi i dɑ̃ɑ binu duurɑ ni bɑ sokumɔ resɛm kɑ olifi, kpɑ u win bwɑ̃ɑbu wɛ̃. 15 Ì n bɛɛn gberun dĩɑnu kɑ bɛɛn resɛm mɑrum kpuro subɑ subɑ wɔkuru, sube teerɑ ko n sɑ̃ɑwɑ wigiru, kpɑ u tu suɑ u win sɔm kowobu kɑ ben wirugibu wɛ̃. 16 U koo bɛɛn sɔm kowo tɔn durɔbu kɑ tɔn kurɔbu be bɑ dɑm mɔ mwɛɛri, kɑ bɛɛn kɛtɛkunu kɑ bɛɛn nɑɑ kinɛ geenu kpɑ u kɑ win tii tiin sɔmburu ko. 17 U koo bɛɛn yɑɑ sɑbenu mɛnnɑ kpɑ nin wɔkuru bɑɑteren wɔllɔ u teeru suɑ, kpɑ bɛɛn tii i n sɑ̃ɑ win yobu. 18 Dɔmɑ te ye kpuro yɑ koorɑ, i ko weeweenu ko sinɑ boko wi i gɔsɑn sɔ̃, ɑdɑmɑ Yinni Gusunɔ u ǹ bɛɛ wurɑrimɔ dɔmɑ te.
19 Kɑ mɛ, tɔn be, bɑ ǹ Sɑmuɛlin gere wure. Bɑ nɛɛ, sinɑ bokowɑ sɑ kĩ. 20 Kpɑ bɛsɛn tii sɑ n sɑ̃ɑ nge bwesenu kpuro. Sinɑ boko wi, u ko n dɑ bɛsɛn siribu ko kpɑ u n dɑ sun kpɑre tɑbu sɔɔ.
21 Ye Sɑmuɛli u tɔn ben gɑri yi kpuro nuɑ u kpɑ, yerɑ u yi Yinni Gusunɔ sɑɑriɑ. 22 Yinni Gusunɔ u Sɑmuɛli sɔ̃ɔwɑ u nɛɛ, ɑ tɔn ben gere wuro, kpɑ ɑ bu sinɑ boko wi kuɑ.
Yen biru Sɑmuɛli u Isirelibɑ sɔ̃ɔwɑ u nɛɛ, ben bɑɑwure u ginɑ doo win wuuɔ.