3
1 Sɑmuɛli, bii ɑluwɑɑsi wi, u wɑ̃ɑ u Yinni Gusunɔn sɔmburu mɔ̀ Elin wuswɑɑɔ.
Yinni Gusunɔ u Sɑmuɛli kure
Sɑɑ ye sɔɔ, dɑɑ dɑɑkɑwɑ Yinni Gusunɔ u rɑ kɑ tɔnu gɑri ko, kpɑ u bu kure kɑ̃siru sɔɔ gɑsɔ kɑ gɑsɔ tɔnɑ.
2 N deemɑ sɑɑ ye sɔɔ, Elin nɔni dɑm dwiiyɑmɑ. U ku rɑ mɑɑ yɑm wɑ sɑ̃ɑ sɑ̃ɑ. Sɔ̃ɔ teeru, u kpĩ win kpin yerɔ sɑ̃ɑ yerɔ, 3 Sɑmuɛli u mɑɑ kpĩ Gusunɔn woodɑn kpɑkororun bɔkuɔ. Sɑɑ ye, fitilɑ gɑ ginɑ sɔ̃re. 4 Yerɑ Yinni Gusunɔ u Sɑmuɛli sokɑ mɑ u wurɑ. 5 Mɑ u dukɑ dɑ Elin mi, u nɛɛ, nɛ wee.
Eli u nɛɛ, ɑmɔnɑ.
U nɛɛ, nɑ nuɑ ɑ mɑn sokɑwɑ.
Mɑ Eli u nɛɛ, nɑ ǹ nun sokɑ, ɑ wuro wunɛn kpin yerɔ.
Mɑ u seewɑ u dɑ Elin mi, u nɛɛ, nɛ wee. Nɑ nuɑ ɑ mɑn sokuwɑ.
Eli u nɛɛ, nɑ ǹ nun sokɑ, nɛn bii. A doo ɑ kpunɑ.
7 N deemɑ Sɑmuɛli u ǹ Yinni Gusunɔn nɔɔ tubɑ domi u ǹ gu nɔɔre.
8 Yinni Gusunɔ u mɑɑ nùn sokɑ nɔn itɑse. Mɑ u seewɑ u dɑ Elin mi, u nɛɛ, nɛ wee, domi nɑ nuɑ ɑ mɑn sokɑ.
Mɑ Eli u tubɑ mɑ Yinni Gusunɔwɑ u bii wi soku. 9 Yen sɔ̃nɑ u nùn sɔ̃ɔwɑ u nɛɛ, ɑ doo ɑ kpunɑ. Bɑ̀ n kpɑm nun sokɑ ɑ geruo ɑ nɛɛ, wunɛ win sɔm kowo ɑ nɔɔmɔ, u geruo.
Mɑ Sɑmuɛli u dɑ u kpunɑ win kpin yerɔ.
10 Yinni Gusunɔ u nùn susi mɑ u nùn sokɑ nge mɛ u rɑɑ kuɑ. U nɛɛ, Sɑmuɛli, Sɑmuɛli.
Sɑɑ yerɑ Sɑmuɛli u wurɑ u nɛɛ, nɛ wunɛn sɔm kowo, nɑ nɔɔmɔ, ɑ geruo.
11 Mɑ Yinni Gusunɔ u nùn sɔ̃ɔwɑ u nɛɛ, wee, kon gɑ̃ɑ kɔ̃sunu ko Isirelibɑn suunu sɔɔ. Tɔn be bɑ ye nuɑ kpuro bɑ koo gɔmɑ dwiiyɑ. 12 Tɔ̃ɔ te sɔɔrɑ kon de ye kpuro yu koorɑ mɑm mɑm ye nɑ geruɑ Elin yɛnun sɔ̃. 13 Domi Eli u yɛ̃ mɑ win bibɑ bɔ̃rin kookoosu mɔ̀, u ǹ mɑɑ bu gerusi. Yen sɔ̃nɑ nɑ bɔ̃ruɑ nɑ nɛɛ, kon win yɛnugibu sɛɛyɑsiɑ sere kɑ bɑɑdommɑɔ ben dɑɑ kɔ̃sɑn sɔ̃. 14 Yɑ̃kuru gɑru sɑri te bɑ koo mɑɑ ko n kɑ bu suuru kuɑ.
15 Sɑmuɛli u kpunɑ sere n kɑ kuɑ sisiru. Mɑ u sɑ̃ɑ yerun gɑmbobɑ kɛniɑ. Adɑmɑ u ǹ kɑ̃kɑ u Eli kɑ̃si ten gɑri yi sɔ̃. 16 Sɑɑ ye sɔɔrɑ Eli u nùn sokɑ u nɛɛ, Sɑmuɛli, nɛn bii.
Mɑ Sɑmuɛli u wurɑ u nɛɛ, nɛ wee.
17 Eli u geruɑ u nɛɛ, mbɑ Yinni Gusunɔ u nun sɔ̃ɔwɑ. A suuru koowo, ɑ ku mɑn yi beruɑ. Gusunɔwɑ u koo nun sɛɛyɑsiɑ ɑ̀ kun mɑn ye kpuro sɔ̃ɔwɑ.
18 Mɑ Sɑmuɛli u nùn gɑri yi kpuro sɑɑriɑ. U ǹ nùn yin gɛɛ berue. Mɑ Eli u nɛɛ, Gusunɔ wiyɑ Yinni. U koowo nge mɛ n weenɛ win nɔni sɔɔ.
19 Mɑ Sɑmuɛli u kpɛ̃ɑmɔ. Yinni Gusunɔ u wɑ̃ɑ kɑ wi. U ǹ mɑɑ dere Sɑmuɛlin gɑri yi kɑm wɔri, bɑɑ yin tiɑ. 20 Isirelibɑ kpuro sɑɑ Dɑnun di sɔ̃ɔ yɛ̃sɑn nɔm geu giɑ sere n kɑ dɑ Beri Sebɑɔ sɔ̃ɔ yɛ̃sɑn nɔm dwɑru giɑ bɑ giɑ mɑ Gusunɔwɑ u Sɑmuɛli kuɑ win sɔmɔ kɑ gem. 21 Yinni Gusunɔ u rɑ n tii sɔ̃ɔsimɔ Siloɔ mi u Sɑmuɛli kure u kɑ nùn gɑri kuɑ.