Hɑnɑn siɑrɑbu
2
1 Hɑnɑ u Gusunɔ siɑrɑ u nɛɛ,
nɛn gɔ̃ru gɑ dorɑ ye Yinni Gusunɔ u mɑn kuɑn sɔ̃.
Nɛn nukurɑ do win fɑɑbɑn sɔ̃.
Wee nɑ dɑm kuɑ.
Nɑ nùn siɑrɑmɔ nɛn yibɛrɛbɑn wuswɑɑɔ.
2 Yinni Gusunɔ turowɑ u dɛɛre.
U sɑ̃ɑwɑ nge kpee bɑɑ mi nɑ rɑ kuke.
Wi turowɑ u sɑ̃ɑ Gusunɔ.
3 I kun dɑ n mɑɑ tii siɑrɑmɔ.
I ku de tii suɑ gɑri yi yɑri bɛɛn nɔsun di.
Domi Gusunɔ u sɑ̃ɑwɑ Yinni wi u kpuro yɛ̃.
Wiyɑ u rɑ tɔnun dɑɑ wɛ̃ɛri.
4 Wiyɑ u derɑ tɑbu kowo dɑmgibun tɛmɑ bɔɔkirɑ.
Mɑ dɑm sɑrirugibɑ dɑm kuɑ.
5 Be bɑ rɑɑ deburu mɔ,
berɑ bɑ tɛ̃ sɔmburu kɑsu
bu kɑ dĩɑnu wɑ.
Be gɔ̃ɔrɑ rɑɑ mɔ̀,
beyɑ bɑ tɛ̃ wɛ̃re.
Wĩro u mɑrɑ bibu nɔɔbɑ yiru.
Adɑmɑ wi u rɑɑ bii dɑbinu mɑrɑ
u tiɑ wi turo.
6 Yinni Gusunɔwɑ u rɑ de tɔnu u gbi.
Wiyɑ u rɑ mɑɑ de u n wɑ̃ɑ.
Wiyɑ u rɑ de u dɑ gɔriɔ.
Wi turo wiyɑ u rɑ mɑɑ nùn yɑre min di.
7 Yinni Gusunɔn min diyɑ
yɑ̃ɑru kɑ ɑrumɑni yɑ rɑ nɛ.
U rɑ goo tɑɑre temɔ,
kpɑ u goo wɔlle suɑ.
8 U rɑ wɔnwɔndo seeye tem di.
Kpɑ u wi bɑ gɛmɑ wɔlle suɑ.
U rɑ bu sinɑsie kɑ sinɑ bibu sɑnnu
kpɑ bu ko bɛɛrɛgibu.
Wiyɑ u hɑnduniɑn kpɛɛkpɛɛku swĩi.
Gen wɔllɔwɑ u ye sɔndi.
9 U koo win bɔrɔkinibɑn sɑnu sɑnusu kɔ̃su.
Adɑmɑ u koo de tɔn kɔ̃sobu
bu kɑm ko yɑm wɔ̃kurɔ.
Domi goo sɑri wi u koo nɑsɑrɑ wɑ
kɑ win tiin dɑm.
10 Yinni Gusunɔ u koo win yibɛrɛbɑ kɔsuku
muku muku kɑ guru kpenu.
U koo hɑnduniɑ kpuro siri.
U koo wi u gɔsɑ ko sunɔ,
kpɑ u nùn dɑm wɛ̃.
11 Yen biru Ɛlikɑnɑ u wurɑ win wuuɔ Rɑmɑɔ. Adɑmɑ Sɑmuɛli u sinɑ yɑ̃ku kowo Elin mi, u kɑ Yinni Gusunɔn sɔmburu mɔ̀.
Elin bii tɔn durɔbu
12 Elin bii tɔn durɔbu bɑ sɑ̃ɑwɑ bii kɑmbɑ. Bɑ ǹ Yinni Gusunɔ nɑsie. 13 Bɑɑ mɛ bɑ sɑ̃ɑ yɑ̃ku kowobu, wee ye bɑ rɑ ko. Goo ù n yɑ̃kuru nɑ, mɑ bɑ ten yɑɑ yikumɔ, yɑ̃ku kowon sɔm kowo u rɑ kɑ win sii kɑɑto donnu itɑguu nɛwɑ, 14 kpɑ u gu kpɛ̃ɛ wekerɔ. Ye gɑ sɔkɑ kpuro, yerɑ yɑ rɑ ko yɑ̃ku kowogiɑ. Mɛsumɑ bɑ rɑ Isirelibɑ kpuro kue be bɑ yɑ̃kuru nɑ Siloɔ.
15 Gɑsɔ, bu sere yɑɑ gum dɔ̃ɔ doke Yinni Gusunɔn sɔ̃, yɑ̃ku kowon sɔm kowo u rɑ nɛwɑ u durɔ wi u kɑ yɑ̃ku te nɑ sɔ̃ u nɛɛ, ɑ mɑn yɑ̃ku kowon yɑɑ wɛ̃ɛmɑ u winyɑm wɔ̃. Domi u ǹ yɑɑ yikurɑ mwɑɑmɔ wunɛn nɔmɑn di. Yɑɑ gɔmɑ u kĩ.
16 Durɔ wi, ù n nùn sɔ̃ɔwɑ u nɛɛ, ɑ de bu yɑɑ gum dɔ̃ɔ doke ginɑ nge mɛ woodɑ yɑ geruɑ, bɑ̀ n kpɑ, kpɑ ɑ suɑ mɛ̀n nɔɔ ɑ kĩ, sɑnɑm mɛyɑ yɑ̃ku kowon sɔm kowo wi, u rɑ nɛɛ, ɑɑwo, ɑ mɑn ye wɛ̃ɛyɔ tɛ̃n tɛ̃, ǹ kun mɛ, kon mwɑ kɑ dɑm.
17 Nge mɛyɑ bɑ yɑ̃ku ni bɑ rɑ Yinni Gusunɔ kuen bɛɛrɛ kɑwɑ. Mɑ yɑ kuɑ durum bɑkɑ win wuswɑɑɔ.
18 Sɑmuɛli u sɔmburu mɔ̀ Yinni Gusunɔn sɑ̃ɑ yerɔ. U sɑ̃ɑwɑ bii piibu mɑ bɑ nùn yɑ̃ku kowon yɑberu kuɑ kɑ wɛ̃ɛ dɑmgii u sebuɑ.
Yinni Gusunɔ u Ɛlikɑnɑ
kɑ Hɑnɑ domɑru kuɑ
19 Mɛyɑ mɑɑ wɔ̃ɔ bɑɑgere Sɑmuɛlin mɛro u rɑ n nùn yɑbe piibu kuɑmmɛ u kɑ nɑ bɑ̀ n yɑ̃kuru sisi kɑ win durɔ. 20 Kpɑ Eli u Ɛlikɑnɑ kɑ win kurɔ Hɑnɑ domɑru kuɑ u nɛɛ, Yinni Gusunɔ u de kurɔ wi, u kɑ nun bii dɑbinu mɑ, kpɑ bu ko Sɑmuɛli wi i Yinni Gusunɔ wɛ̃n kɔsire.
Yen biru kpɑ Ɛlikɑnɑ kɑ Hɑnɑ bu gɔsirɑ ben wuuɔ. 21 Mɑ Yinni Gusunɔ u Hɑnɑ domɑru kuɑ. U mɑɑ bibu mɑrɑ tɔn durɔbu itɑ, tɔn kurɔbu yiru.
Sɑmuɛli u mɑɑ kpɛ̃ɑmɔ Yinni Gusunɔn wuswɑɑɔ.
Eli kɑ win bii tɔn durɔbu
22 Eli u tɔkɔ kuɑ gem gem mɑ u nuɑ ye win bii tɔn durɔbu bɑ Isirelibɑ kuɑmmɛ kpuro kɑ nge mɛ bɑ rɑ kɑ kurɔbu kpunɛ be bɑ sɔmburu mɔ̀ Yinni Gusunɔn sɑ̃ɑ yerun kɔnnɔwɔ. 23 Mɑ u bu bikiɑ u nɛɛ, ɑmɔnɑ i kɑ dɑɑ yenin bweseru mɔ̀, domi tɔmbu kpurowɑ bɑ mɑn bɛɛn dɑɑ kɔ̃sɑn gɑri sɔ̃ɔmɔ. 24 I ku mɑɑ ko mɛ, bɛɛ nɛn bibu. Bɛɛn lɑbɑɑri ye nɑ nɔɔmɔ yɑ ǹ wɑ̃. Domi i derɑ Yinni Gusunɔn tɔmbɑ durum mɔ̀. 25 Goo ù n win winsim torɑri, Gusunɔwɑ u koo nùn yen suuru kɑnɑ, ɑdɑmɑ goo ù n Yinni Gusunɔ torɑri, wɑrɑ u koo nùn suuru kɑnɑ.
Kɑ mɛ, bɑ ǹ ben tundon gere ye nuɑ, domi Yinni Gusunɔ u sɔɔru kpɑ kɔ u kɑ bu go.
26 Adɑmɑ Sɑmuɛli u kpɛ̃ɑmɔ mɑ Yinni Gusunɔ u kɑ nùn nɔnu geu mɛɛrɑ. Mɛyɑ mɑɑ tɔmbun tii.
Gɑri yi Gusunɔ u geruɑ
Elin bweserun sɔ̃
27 Gusunɔn sɔmɔ goo u nɑ Elin mi, u nɛɛ, ɑmɛniwɑ Yinni Gusunɔ u geruɑ u nɛɛ, sɑɑ ye wunɛn bɑɑbɑbɑ bɑ wɑ̃ɑ Egibitiɔ bɑ yoru dimɔ Egibiti sunɔn mi, u bu win tii sɔ̃ɔsi kpɑsɑsɑ. 28 Mɑ u wunɛn bɑɑbɑ Aroni gɔsɑ Isirelibɑn bweseru kpuro sɔɔ u kɑ ko win yɑ̃ku kowo kpɑ u n dɑ nùn yɑ̃kunu kue, u turɑre dɔ̃ɔ doke, kpɑ u n dɑ Isirelibɑ bikiɑru kue wi Yinni Gusunɔn mi. U mɑm wi kɑ win yɛnugibu Isirelibɑn yɑ̃ku yɑɑn sukum yɔllɑ kuɑ bu di. 29 Mbɑ n kuɑ i kɑ win yɑ̃kunu kɑm mɛɛrɑ mɛ, kɑ kɛ̃ɛ ni u yiire bu kɑ nɑ win sɑ̃ɑ yerɔ. Mbɑn sɔ̃nɑ i win tɔmbu Isirelibɑn yɑ̃kunun yɑɑ gumgiɑ dimɔ i bɔriɑmɔ. Amɔnɑ ɑ kɑ wunɛn bibu bɛɛrɛ wɛ̃ɛmɔ n kere wi. 30 Yen sɔ̃, u nɛɛ, wiyɑ u rɑɑ geruɑ mɑ wunɛn yɛnu kɑ wunɛn bɑɑbɑn yɛnugibu bɑ koo ko win yɑ̃ku kowobu sere kɑ bɑɑdommɑɔ. Adɑmɑ tɛ̃ u geruɑ u nɛɛ, yɑ ǹ mɑɑ koorɔ mɛ, domi be bɑ nùn bɛɛrɛ wɛ̃ɛmɔ, beyɑ u koo bɛɛrɛ wɛ̃. Be bɑ kun nùn gɑrɑ, beyɑ u ǹ gɑrisimɔ. 31 Wee, sɑnɑm sisi mɛ̀ sɔɔ u koo wunɛn dɑm surɑ kɑ mɑɑ wunɛn bɑɑbɑn yɛnun dɑm, kpɑ goo u ku mɑɑ tɔkɔ ko wunɛn bweserɔ. 32 Goo koo ko wunɛn kɔsire win sɑ̃ɑ yerɔ. Isireli be bɑ tie bɑ koo durom wɑ ɑdɑmɑ wunɛn bweseru sɔɔ goo kun mɑɑ tɔkɔ mɔ̀. 33 Bɑ koo gbiwɑ tɑbu sɔɔ. Bɑɑ ù n goo deri u wɑɑmɔ ye bɑ mɔ̀ win sɑ̃ɑ yerɔ, u ko n nisinu mɔwɑ kpɑ u n nuki sɑnkire.
34 Yeniwɑ yɑ koo ko nɛn gɑrin yĩreru wunɛ sɔɔ. Wunɛn bibu yiru ye, Hofini kɑ Finɛɛsi, bɑ koo gbi sɑnnu sɔ̃ɔ teerun sɔ̃ɔ. 35 Nɑ kon yɑ̃ku kowo nɑɑnɛgii goo seeyɑ wi u koo nɛn kĩru ko nge mɛ nɑ gɔ̃ru doke, kpɑ win bweseru tu ko yɑ̃ku kowobu sere kɑ bɑɑdommɑɔ sunɔ wi nɑ gɔsɑn wuswɑɑɔ. 36 Goo ù n tiɑrɑ wunɛn bweserɔ u koo dɑ u yɛ̃ro wiru kpĩiyɑwɑ gobi fiikon sɔ̃, ǹ kun mɛ dĩɑnun sɔ̃, kpɑ u gere u nɛɛ, ɑ suuru koowo, ɑ de n ko yɑ̃ku kowo goon sɔm kowo kpɑ nɑ n dɑ dĩɑnu fiiko wɑ n di.