Tem mɛ mu tie bu bɔnu ko
18
1 Sɑnɑm mɛ Isirelibɑ bɑ Kɑnɑnibɑ kɑmiɑ, yerɑ bɑ mɛnnɑ Siloɔ. Mɑ bɑ kuu bekurugii te girɑ tèn mi bɑ rɑ Yinni Gusunɔ sɑ̃. 2 N deemɑ Isirelibɑn bwese kɛrɑ nɔɔbɑ yiruwɑ yɑ ǹ ginɑ tem wɑ. 3 Mɑ Yosue u bu sɔ̃ɔwɑ u nɛɛ, sɑɑ yerɑ̀ i mɑrɑ i sere dɑ i tem mɛ mwɑ mɛ Gusunɔ bɛɛn bɑɑbɑbɑn Yinni u bɛɛ wɛ̃. 4 Yen sɔ̃, bwese kɛrɑ bɑɑyere sɔɔ, i tɔmbu itɑ itɑ gɔsio n bu gɔri bu tem mɛ mɛɛrim dɑ, kpɑ bu wɑ nge mɛ bɑ koo mu burɑnɑ burɑnɑ kpɑ bu wurɑmɑ bu mɑn sɔ̃ nge mɛ n sɑ̃ɑ. 5 Bɑ koo mu bɔnu kowɑ wɑsi nɔɔbɑ yiru. Adɑmɑ Yudɑbɑ bɑ ko n wɑ̃ɑwɑ mi bɑ wɑ̃ɑ mi, sɔ̃ɔ yɛ̃sɑn nɔm dwɑru giɑ, Yosɛfun bwese kɛri mɑɑ sɔ̃ɔ yɛ̃sɑn nɔm geu giɑ. 6 Ǹ n mɛn nɑ, i doo tɛ̃, i tem mɛ bɔnu ko wɑsi nɔɔbɑ yiru ye, kpɑ i nɑ i mɑn sɔ̃. Kpɑ su mu tɛtɛ toosi Gusunɔ bɛsɛn Yinnin wuswɑɑɔ su kɑ wɑ mɛ mu sɑ̃ɑ bɛɛn bɑɑwuregim. 7 Adɑmɑ Lefibɑ bɑ ǹ ko bɑ n tem mɔ. Domi bɑ kon sɑ̃ɑ Yinni Gusunɔn yɑ̃ku kowobu. N deemɑ Gɑdi kɑ Rubɛnin bwese kɛri kɑ Mɑnɑsen bwese kɛrɑn sukum bɑ tem wɑ kɔ Yuudɛnin sɔ̃ɔ yɑri yeru giɑ mɛ Mɔwisi, Yinni Gusunɔn sɔm kowo u bu bɔnu kuɑ.
8 Yen biru tɔn be, bɑ dɑ bɑ tem mɛ bukiɑnɑ bɑ kuɑ ye Yosue u bu sɔ̃ɔwɑ.
9 Mɑ bɑ ye kpuro yoruɑ ye bɑ wɑ mi, kɑ nge mɛ bɑ tem mɛ kɑ mɛn wusu burɑnɑ burɑnɑ mɑ bɑ wurɑmɑ Yosuen mi Siloɔ. 10 Yen biru Yosue u bu tem mɛ bɔnu kuɑ kɑ tɛtɛ Yinni Gusunɔn wuswɑɑɔ, u bwese kɛrɑ bɑɑyere yen tem wɛ̃.
Tem mɛ bɑ Bɛnyɑmɛɛn
bwese kɛrɑ wɛ̃
11 Tem mɛ bɑ gbiɑ bɑ tɛtɛ toosi, Bɛnyɑmɛɛn bwese kɛrɑ yɑ mu di. Ben tem mɛ, mu wɑ̃ɑwɑ Yudɑn bwese kɛrɑgim kɑ Yosɛfun bwese kɛrigim bɑɑ sɔɔ. 12 Sɔ̃ɔ yɛ̃sɑn nɔm geu giɑ, tem mɛn nɔɔ burɑ yeru tɑ wɑ̃ɑwɑ sɑɑ Yuudɛnin di n kɑ girɑri Yerikon sɔ̃ɔ yɛ̃sɑn nɔm geu giɑ, mɑ tɑ dɑ guunun berɑ giɑ sɔ̃ɔ duu yerɔ sere Bɛti Afɛniɔ mi gɑ̃ɑnu ku rɑ kpi. 13 Sɑɑ min diyɑ tɑ dɑ tɑ yɔ̃rɑ Lusiɔ ye bɑ rɑ mɑɑ soku Betɛli, sɔ̃ɔ yɛ̃sɑn nɔm dwɑru giɑ. Min diyɑ tɑ mɑɑ dɑ tɑ girɑri Atɑrɔtu Adɑriɔ. Mɑ tɑ guu te bɛwɑ te tɑ wɑ̃ɑ Bɛti Horonin sɔ̃ɔ yɛ̃sɑn nɔm dwɑrɔ. Bɛti Horoni ye, yɑ wɑ̃ɑwɑ wɔwɑ sɔɔ. 14 Sɔ̃ɔ duu yeru giɑ mɑɑ, tɑ dɑwɑ sɔ̃ɔ yɛ̃sɑn nɔm dwɑru giɑ sɑɑ guu ten di n kɑ girɑri Bɑɑlin wuuɔ ge bɑ mɑɑ sokumɔ Yɑrimun wuu. Wuu ge, gɑ sɑ̃ɑwɑ Yudɑbɑn wuu.
15 Sɔ̃ɔ yɛ̃sɑn nɔm dwɑru giɑ mɑɑ, tɑ dɑwɑ sɔ̃ɔ duu yeru giɑ sɑɑ Yɑrimun wuun di sere Nɛfitoɑn bwiiyɔ. 16 Sɑɑ mɑɑ min di, tɑ dɑwɑ guu te tɑ wɑ̃ɑ Bɛni Hinɔmun wɔwɑn deedeeru, Refɑbɑn wɔwɑn sɔ̃ɔ yɛ̃sɑn nɔm geu giɑ. Mɑ tɑ dɑ Yebusibɑn guunun sɔ̃ɔ yɛ̃sɑn nɔm dwɑru giɑ n kɑ girɑri Eni Rogɛliɔ. 17 Sɑɑ mɑɑ min di, tɑ dɑwɑ Eni Semɛsiɔ sɔ̃ɔ yɛ̃sɑn nɔm geu giɑ kɑ Gelilɔtuɔ, gunguu te bɑ mɔ̀ Adumimun deedeeru. Min di tɑ mɑɑ dɑ sere Bohɑnin kperɔ. Rubɛnin biin yĩsirɑ bɑ kɑ kpee te sokumɔ. 18 Mɑ tɑ dɑ Yuudɛnin wɔwɑɔ guunun sɔ̃ɔ yɛ̃sɑn nɔm geu giɑ 19 sere kɑ Bɛti Hogulɑɔ sɔ̃ɔ yɛ̃sɑn nɔm geu giɑ mi Yuudɛnin dɑɑrɑ suremɔ nim wɔ̃ku bɔruguuɔ, sɔ̃ɔ yɛ̃sɑn nɔm dwɑrɔ. 20 Yuudɛnin dɑɑrɑ tɑ sɑ̃ɑ tem mɛn nɔɔ burɑ yeru sɔ̃ɔ yɑri yeru giɑ.
Mɛn nɔrɑ Bɛnyɑmɛɛn bwese kɛrɑn tem mu yɑsum nɛ.
21 Wuu si su wɑ̃ɑ tem mɛ sɔɔ, siyɑ Yeriko kɑ Bɛti Hogulɑ kɑ Emɛki Kesisi, 22 kɑ Bɛti Arɑbɑ kɑ Semɑrɑimu kɑ Betɛli, 23 kɑ Afimu, kɑ Pɑrɑ, kɑ Ofɑrɑ, 24 kɑ Kefɑɑ Amɔnɑi, kɑ Ofini, kɑ Gebɑ. Wuu si kpuro su sɑ̃ɑwɑ wɔkurɑ yiru, gen bɑɑgere kɑ gen bɑru kpɑɑnu. 25 Sin gɑsɑ, Gɑbɑoni, kɑ Rɑmɑ kɑ Berɔtu, 26 kɑ Misipe, kɑ Kefirɑ, kɑ Mɔsɑ, 27 kɑ Rekɛmu kɑ Yiipɛɛli, kɑ Tɑreɑlɑ, 28 kɑ Selɑ, kɑ Elɛfu, kɑ Yebusi ye bɑ mɑɑ mɔ̀ Yerusɑlɛmu, kɑ Gibeɑ kɑ Kiriɑti. Si kpuro su sɑ̃ɑwɑ wusu wɔkurɑ nnɛ, gen bɑɑgere kɑ gen bɑru kpɑɑnu.
Yeni kpurowɑ n kuɑ Bɛnyɑmɛɛn bwese kɛrɑn tubi.