Yosue 2

Yosue u sɔmɔbu gɔrɑ

bu kɑ Yerikon sɑriɑ mɛɛri

¹ Yosue Nunin bii, u durɔbu yiru gɑbu gɔrɑ ɑsiri sɔɔ sɑɑ Sitimun di u nɛɛ, i doo i tem mɛn sɑriɑ mɛɛri, n mɑm nɛɛre wuu ge bɑ mɔ̀ Yeriko. Ye bɑ turɑ mi, bɑ duɑ kurɔ tɑnɔ goon yɛnuɔ wi bɑ sokumɔ Rɑhɑbu bu kɑ kpunɑ mi. ² Yerɑ bɑ Yerikon sunɔ sɔ̃ɔwɑ bɑ nɛɛ, wee, Isireli gɑbɑ nɑ mini yokɑ ye, bu kɑ sĩ sĩ bu bɛsɛn tem sɑriɑ mɛɛri. ³ Mɑ Yerikon sunɔ wi, u Rɑhɑbu gɔriɑ u nɛɛ, ɑ durɔ be yɑrɑmɑ be bɑ nɑ bɑ duɑ wunɛn yɛnuɔ mi, domi bɑ nɑwɑ bu kɑ sĩ sĩ bu bɛsɛn tem mɛ kpuron sɑriɑ mɛɛri.

^4-6 N deemɑ gɔro be, bu sere tunumɑ, kurɔ wi, u durɔbu yiru ye beruɑ dii tɛɛrɑn wɔllɔ, mɑ u bu dɑ̃ɑ wɛ̃ɛ dɑmgiru gɑrun dɛki wukiri yi yi keewɑ. Mɑ u nɛɛ, geemɑ, durɔ be, bɑ nɑ nɛn mi, ɑdɑmɑ nɑ ǹ yɛ̃ mìn di bɑ nɑ. Ye sɔ̃ɔ u kpɑ bu sere gbɑ̃rɑ kɔnnɔ kɛnɛ, sɑɑ yerɑ bɑ yɑrɑ nɛn min di. Nɑ ǹ mɑɑ yɛ̃ gee bɑ dɑ. I bu kɑsuo fuuku, i ko i bu wɑ.

⁷ Ye bɑ nuɑ mɛ, bɑ bu kɑso wɔri bɑ dɑ kɑ swɑɑ ye yɑ dɔɔ Yuudɛnin dɑɑrun tɔburɑ yerɔ. Mɑ bɑ gbɑ̃rɑ kɔnnɔ kɛnuɑ ben biru. ⁸ Yen biruwɑ Rɑhɑbu u yɔɔwɑ dii tɛɛrɑ yen wɔllɔ Yosuen gɔro ben mi, bu sere kpunɑ, ⁹ u bu sɔ̃ɔwɑ u nɛɛ, nɑ yɛ̃ mɑ Yinni Gusunɔ u bɛɛ tem mɛ wɛ̃, yeyɑ n derɑ bɛɛn bɛrum sun mwɑ. Tem mɛn tɔmbu kpuro bɑ diirimɔwɑ bɛɛn sɔ̃. ¹⁰ Domi sɑ nuɑ nge mɛ Yinni Gusunɔ u nim wɔ̃ku ge bɑ mɔ̀ Nɑɑ yɑri gberɑsiɑ i kɑ tɔburɑ sɑnɑm mɛ i yɑrimɑ Egibitin tem di. Sɑ mɑɑ nuɑ nge mɛ i Amɔrebɑn sinɑmbu yiru Sihoni kɑ Ogu go Yuudɛnin guru giɔ mɑ i ben ye bɑ mɔ kpuro munkɑ muku muku. ¹¹ Yɑnde ye sɑ yeni nuɑ, sɑ nɑndɑ. Mɑ bɛsɛ kpuron toronu kɑrɑ bɛɛn sɑɑbu. Domi Gusunɔ bɛɛn Yinni wiyɑ u sɑ̃ɑ wɔllu kɑ tem yɛ̃ro. ¹² Ǹ n mɛn nɑ, nɑ bɛɛ kɑnɑmɔ tɛ̃, i bɔ̃ruo kɑ Yinni Gusunɔn yĩsiru mɑ i ko i nɛn bɑɑn yɛnugibu tɔn geeru kuɑ nge mɛ nɑ bɛɛ kuɑ. I mɑn yĩreru gɑru kuo te tɑ sɔ̃ɔsimɔ kɑ gem, ¹³ mɑ i ko nɛn bɑɑ kɑ nɛn mɛro kɑ nɛn sesubu kɑ nɛn wɔnɔbu kɑ bɛsɛn bweseru kpuro fɑɑbɑ ko sɑ kun kɑ gu.

¹⁴ Durɔ be, bɑ nùn wisɑ bɑ nɛɛ, sere kɑ bɛsɛn wɑ̃ɑru, ɑ̀ kun bu bɛsɛn ɑsiri dɔmɛyɛ, sɑ ko nun tɔn geeru kɑ bɔrɔkiniru sɔ̃ɔsi sɑnɑm mɛ Yinni Gusunɔ u sun tem mɛ nɔmu bɛriɑ u kpɑ.

¹⁵ N deemɑ Rɑhɑbun diru tɑ girɑriwɑ wuun gbɑ̃rɑru sɔɔ, mɑ u bu sɑrɑsiɑ wuun biruɔ win fɛnɛntin di kɑ wɛ̃ɛ wɔbɑ. ¹⁶ U nɛɛ, i sɑro i dɑ guunun berɑ giɑ, be bɑ bɛɛ kɑsu mi, bu ku rɑɑ kɑ bɛɛ wɑ. Kpɑ i kuke mi nge sɔ̃ɔ itɑ sere bɑ̀ n wurɑmɑ. Yen biru kpɑ i bɛɛn swɑɑ wɔri i doonɑ.

¹⁷ Durɔ be, bɑ nùn sɔ̃ɔwɑ bɑ nɛɛ, yèn nɔɔ mwɛɛru sɑ kuɑ kɑ bɔ̃ri mi, sɑ ko ye ko. Adɑmɑ wee ye wunɛn tii kɑɑ ko. ¹⁸ Sɑ̀ n duɑ tem mɛ sɔɔ, kɑɑ wɛ̃ɛ wunɔmgii yini gbinisiwɑ wunɛn fɛnɛnti mini mìn di kɑɑ sun sɑrɑsiɑ, kpɑ ɑ wunɛn bɑɑ kɑ wunɛn mɛro, kɑ wunɛn sesubu mɛnnɑ wunɛn diru mini, be bɑ sɑ̃ɑ wunɛn yɛnugibu kpuro gesi. ¹⁹ Ben goo ù n yɑrɑ wunɛn dirun di u dɑ tɔɔwɔ, win tii sɔɔrɑ win yɛm mu koo wɔri, bɛsɛ sɑ ǹ ko sɑ n torɑru mɔ wi sɔɔ. Adɑmɑ wi u wɑ̃ɑ kɑ wunɛ sɑnnu wunɛn dirɔ, goo ù n nùn go, win yɛm mu wɔri bɛsɛn wirɔ. ²⁰ Adɑmɑ ɑ̀ n bu bɛsɛn ɑsiri ye dɔmɛyɑ, bɔ̃ri yi ɑ sun koosiɑ mi, yi ǹ mɑɑ sun dimɔ.

²¹ U bu wisɑ u nɛɛ, nɑ wurɑ n koorɑ nge mɛ i geruɑ.

Nge mɛyɑ u kɑ bu nɔɔ kɑnɑ mɑ bɑ doonɑ. Mɑ u wɛ̃ɛ wunɔmgii yi sɔri fɛnɛnti yen mi. ²² Bɑ doonɑ bɑ turɑ guunun berɑ giɑ. Bɑ sinɑ mi sɔ̃ɔ itɑ sere be bɑ bu kɑsu mi, bɑ kɑ gɔsirɑmɑ domi bɑ bu mɛɛrɑ swɑɑ yen bɑɑmɑ kpuro bɑ ǹ bu wɑ. ²³ Yen biru Yosuen gɔro be, bɑ sɑrɑmɑ guunun berɑn di bɑ Yuudɛni tɔburɑ bɑ wurɑ win mi. Mɑ bɑ nùn sɑɑriɑ kpuro ye n bu deemɑ mi giɑ. ²⁴ Bɑ nùn sɔ̃ɔwɑ bɑ nɛɛ, geemɑ, Yinni Gusunɔ u sun tem mɛ kpuro nɔmu sɔndiɑwɑ. Mɛn tɔmbu kpuro bɑ nɑndewɑ bɑ diirimɔ bɛsɛn sɔ̃.