YOSUE
Yosue u kuɑ Mɔwisin kɔsire
1
1 Mɔwisi, Yinni Gusunɔn sɔm kowon gɔɔn biru, Yinni Gusunɔ u kɑ Yosue, Mɔwisin ɑsɑkpɔ gbiikoo wi u sɑ̃ɑ Nunin bii gɑri kuɑ. 2 U nɛɛ, wee, nɛn sɔm kowo Mɔwisi u gu. Ǹ n mɛn nɑ, ɑ seewo ɑ Yuudɛni ye tɔburɑ, wunɛ kɑ Isirelibɑ kpuro i dɑ tem mɛ nɑ bu wɛ̃ɛmɔ sɔɔ. 3 Tem mi i duɑ kpuro, mu koo kowɑ bɛɛgim. Nɛnɑ nɑ bɛɛ mu wɛ̃ɛmɔ, nge mɛ nɑ Mɔwisi nɔɔ mwɛɛru kuɑ. 4 Sɑɑ Nɛgɛbun tem di n kɑ dɑ Libɑnin temɔ, sɑɑ mɑɑ dɑɑ bɑkɑ ten min di te bɑ mɔ̀ Efɑrɑti, kɑ Hɛtibɑn tem kpuro, n kɑ dɑ nim wɔ̃ku bɔkɔ gen mi, ge bɑ mɔ̀ Mɛditerɑnɛ, ge gɑ wɑ̃ɑ sɔ̃ɔ duu yerɔ, mi kpurowɑ mu ko n sɑ̃ɑ bɛɛn tem. 5 Yibɛrɛ goo kun kpɛ̃ u yɔ̃rɑ u nun mɑ wunɛn wɑ̃ɑru kpuro sɔɔ. Nge mɛ nɑ rɑɑ kɑ Mɔwisi wɑ̃ɑ, nge mɛyɑ ko nɑ n mɑɑ kɑ nun wɑ̃ɑ. Nɑ ǹ nun derimɔ pɑi. Mɛyɑ nɑ ǹ mɑɑ nun kɔ̃ɔmɔ. 6 A de ɑ n wɔrugɔru mɔ. Domi wunɑ kɑɑ tɔn be gbiiyɑ bu kɑ tem mɛ mwɑ, mɛ nɑ geruɑ kɑ bɔ̃ri nɑ nɛɛ, kon ben bɑɑbɑbɑ wɛ̃. 7 A n gesi wɔrugɔru mɔ. Kpɑ ɑ lɑɑkɑri doke ɑ kɑ woodɑ kpuro mɛm nɔɔwɑ ye nɛn sɔm kowo Mɔwisi u nun wɛ̃. A ku rɑ yen gɑɑ gɛɛrɑri bɑɑ fiiko, kpɑ n nun wɛ̃rɑ mi ɑ dɑ kpuro. 8 A de woodɑn tire ten gɑri yi n dɑ n wɑ̃ɑ wunɛn nɔɔ sɔɔ, kpɑ ɑ n yi bwisikumɔ sɑɑ bɑɑyere, sɔ̃ɔ sɔɔ kɑ wɔ̃kuru. Kpɑ ɑ lɑɑkɑri doke ɑ kɑ ye kpuro mɛm nɔɔwɑ mɑm mɑm ye bɑ yoruɑ mi. Domi ɑ̀ n kuɑ mɛ, ye ɑ mɔ̀ kpuro yɑ koo ɑrufɑɑni ko. 9 A yɑɑyo mɑ nɑ nun yiire nɑ nɛɛ, ɑ n wɔrugɔru mɔ. A ku de wunɛn tororu tu kɑrɑ, domi nɛ Gusunɔ wunɛn Yinni ko nɑ n wɑ̃ɑ kɑ wunɛ bɑɑmɑ mi ɑ dɔɔ.
Yosue u Isirelibɑ woodɑ wɛ̃
10 Yen biru Yosue u win tɔmbu Isirelibɑn wirugibu woodɑ wɛ̃, 11 u nɛɛ, i sɑnsɑni bukiɑnɔ, kpɑ i tɔmbu sɔ̃ bu dĩɑnun sɔɔru ko, domi mìn di kɑ sɔ̃ɔ itɑ, sɑ ko Yuudɛni ye tɔburɑ su dɑ su tem mɛ mwɑ, mɛ Gusunɔ bɛsɛn Yinni u sun wɛ̃ɛmɔ sɑ n mɔ. 12 Mɑ u Rubɛnibɑ kɑ Gɑdibɑ kɑ sere Mɑnɑsebɑn sukum sɔ̃ɔwɑ u nɛɛ, 13 i yɑɑyo ye Mɔwisi, Yinni Gusunɔn sɔm kowo u bɛɛ yiire. U nɛɛ, Gusunɔ bɛɛn Yinni u koo bɛɛ tem mɛ wɛ̃ mi i ko i n bɔri yɛndu mɔ. 14 Yen sɔ̃ tɛ̃, bɛɛn kurɔbu kɑ bɛɛn bii piiminu kɑ bɛɛn sɑbenu koo sinɑ tem mɛ sɔɔ Yuudɛnin berɑ mini, ɑdɑmɑ bɛɛ tɑbu durɔbu kpuro i ko i tɔburɑ i n tɑbu yɑ̃nu nɛni, i kɑ bɛɛn mɛro bisibu somi, 15 sere bu kɑ tem mɛ mwɑ mɛ Gusunɔ bɛɛn Yinni u koo bu wɛ̃ kpɑ u ben tii bɔri yɛndu wɛ̃ nge mɛ u bɛɛ wɛ̃. Sɑnɑm mɛyɑ i ko i wurɑmɑ i bɛɛn tem mwɑ mɛ Mɔwisi, Yinni Gusunɔn sɔm kowo u bɛɛ wɛ̃ Yuudɛnin sɔ̃ɔ yɑri yerun berɑ giɑ.
16 Bɑ Yosue wisɑ bɑ nɛɛ, ye ɑ sun yiire kpuro, yeyɑ sɑ ko ko. Mi ɑ mɑɑ sun gɔrɑ kpuro, sɑ ko dɑwɑ. 17 Nge mɛ sɑ Mɔwisin gɑri mɛm nɔɔwɑ mɑm mɑm, nge mɛyɑ sɑ ko mɑɑ wunɛgii mɛm nɔɔwɑ. Yinni Gusunɔ u n gesi kɑ nun wɑ̃ɑ nge mɛ u rɑɑ kɑ Mɔwisi wɑ̃ɑ. 18 Bɑɑ ǹ n weren nɑ, mɑ u wunɛn woodɑ sɔɔ degɑngɑm mɔ̀, mɑ u ǹ wunɛn gere mɛm nɔɔwɛ, sɑ ko yɛ̃ro gowɑ. Adɑmɑ wunɛn tii, ɑ n gesi wɔrugɔru mɔ.