Mɔwisin gɔɔ
34
1 Yenibɑn biru, Mɔwisi u seewɑ u dɑ Mɔɑbun guunu giɑ. Mɑ u yɔɔwɑ guu te bɑ mɔ̀ Nɛboɔ sere Pisigɑn wii kpiirɔ Yerikon deedeeru. Mɑ Yinni Gusunɔ u nùn tem mɛ kpuro sɔ̃ɔsi sɑɑ Gɑlɑdin di sere n kɑ dɑ Dɑnuɔ, 2 kɑ Nɛfitɑlin tem kɑ Efɑrɑimugim kɑ Mɑnɑsegim sɑɑ Yudɑn tem di n kɑ dɑ nim wɔ̃kuɔ ge gɑ wɑ̃ɑ sɔ̃ɔ duu yeru giɑ, 3 kɑ sɔ̃ɔ yɛ̃sɑn nɔm dwɑru giɑ Nɛgɛbuɔ kɑ Yuudɛnin berɑ giɑ kɑ wɔwɑɔ ye yɑ wɑ̃ɑ Yeriko ye bɑ mɑɑ mɔ̀ Kpɑkpɑ bɛ̃ɛn wuun berɑ giɑ n kɑ girɑri Soɑriɔ. 4 Mɑ Yinni Gusunɔ u nùn sɔ̃ɔwɑ u nɛɛ, tem mɛ nɑ Aburɑhɑmu kɑ Isɑki kɑ Yɑkɔbu nɔɔ mwɛɛru kuɑ mɛyɑ mi, mɛyɑ nɑ mɑɑ derɑ ɑ wɑ mi. Tɛ̃, kon mu ben bibun bweseru wɛ̃. Adɑmɑ wunɛ, nɑ#ǹ derimɔ ɑ tɑɑrɑ mi.
5 Yenibɑn biru, Mɔwisi Yinni Gusunɔn sɔm kowo u kpunɑ u gu Mɔɑbun tem mi nge mɛ wi, Yinni Gusunɔ u geruɑ. 6 Mɑ Yinni Gusunɔ u nùn sikuɑ Mɔɑbun wɔwɑ mi, Bɛti Peorin deedeeru. Adɑmɑ sere kɑ gisɔ goo kun win sikiru wɑɑre.
7 Sɑnɑm mɛ Mɔwisi u gu, u mɔwɑ wɔ̃ɔ wunɑɑ teeru. Adɑmɑ win dɑm tie. Mɛyɑ win nɔni kun mɑɑ dɑm dwiiye. 8 Mɑ Isirelibɑ kpuro bɑ win gɔɔ wooru sinɑ sɔ̃ɔ tɛnɑ bɑ wuri mɔ̀, Mɔɑbun wɔwɑ mi.
9 Mɔwisi u Yosue, Nunin bii nɔmɑ sɔndi u kɑ ko win kɔsire. Yosue wi, u bwisi yibɑ. Mɑ Isirelibɑ bɑ nùn mɛm nɔɔwɑ bɑ Gusunɔn woodɑ ye u Mɔwisi wɛ̃ swĩi dee dee.
10 Isirelibɑ sɔɔ, Gusunɔn sɔmɔ goo kun mɑɑ yĩsiru yɑrire nge Mɔwisi. Domi Yinni Gusunɔ u rɑ kɑ nùn gɑri kowɑ nɔɔ kɑ nɔɔ. 11 Goo sɑri wi bɑ koo kɑ nùn weesinɑ win sɔm mɑɑmɑɑkigiɑ ye u kuɑn sɔ̃ sɑnɑm mɛ Yinni Gusunɔ u nùn gɔrɑ Egibitin sunɔ kɑ win sinɑ bwɑ̃ɑbu kɑ win tem tɔmbu kpuron mi. 12 Gusunɔn sɔmɔ goo sɑri wi u koo kpĩ u mɑɑmɑɑki ye, kɑ gɑ̃ɑ nɑnumgii ni ko, ni Mɔwisi u kuɑ Isirelibɑ kpuron wuswɑɑɔ._