32
1 Wɔllu, ɑ swɑɑ dɑkio ɑ nɛn gɑri nɔ.
Tem, ɑ swɑɑ tem kpĩiyɔ ɑ nɛn nɔɔ nɔ.
2 Nɛn yɛ̃ru tɑ kokumɔ nge guru nim
mɑ nɛn gɑri nɛmɔ nge kɑkoru
mɑ yi dɑ̃ɑkumɔ nge dirum yɑkɑ bekusu sɔɔ.
3 Kon Yinni Gusunɔn yĩsiru kpɑrɑ.
Bɛɛ Isirelibɑ, i Gusunɔ bɛsɛn Yinnin yĩsirun kpɑ̃ɑru kpɑro.
4 Yinni Gusunɔ u sɑ̃ɑwɑ nge kperu.
U rɑ kowɑ dee dee.
Win siribu bu rɑ n dɛɛrewɑ.
U sɑ̃ɑwɑ nɑɑnɛgii, murɑfitiru sɑri win mi.
U sɑ̃ɑwɑ gemgii.
5 Adɑmɑ bɛɛ, i sɑ̃ɑwɑ tɔn kɔ̃sobu be bɑ#ǹ dee dee swĩi.
I nùn torɑri.
Yɑ kuɑ bɛɛn sekuru.
I#ǹ mɑɑ sɑ̃ɑ win bibu.
6 Gɑri bɑkɑsu bɛɛ,
nge mɛyɑ bɑ rɑ Yinni Gusunɔ kue?
U#ǹ sɑ̃ɑ bɛɛn bɑɑbɑ kɑ bɛɛn tɑkɑ kowo?
N ǹ wi, u bɛɛ tɑ̃sisiɑ u kuɑ win tɔmbu?
7 I yellu yɑɑyo.
I bwisikuo ye n koorɑ yellu.
I bɛɛn bɑɑbɑbɑ kɑ bukurobu bikio, bɑ koo bɛɛ sɔ̃.
8 Sɑnɑm mɛ u tɔmbu tem bɔnu kuɑ,
kɑ sɑɑ ye u bweseru bɑɑtere ten tem nɔɔ burɑ yeru kuɑ,
u nin bɑɑtere goo wɛ̃ wɔllun di wi u ko n tu kpɑre.
9 Adɑmɑ u tii Isirelibɑ yiiyɑ,
be bɑ sɑ̃ɑ Yɑkɔbun bweseru.
10 Yinni Gusunɔ u bu deemɑ gbɑburɔ mi gbeeku bɔ̃nu nu gberi.
Mɑ u bu suɑ u nɔɔri u keu sɔ̃ɔsi.
U ben lɑɑkɑri mɔ nge win tiin nɔni.
11 U bu kɔ̃su nge kɑsɑ
ye yɑ yɔ̃ɔwɑ yen sokuru wɔllɔ
yɑ kɑ yen binu yɔ̃ɔsiɑmɔ.
Mɑ yɑ kɑsɑ dɛrie yu kɑ nu gɑbɑ.
12 Yinni Gusunɔ turowɑ u bu kpɑrɑ.
Bũu goo kun nùn somi.
13 U derɑ bɑ dɑ bɑ sinɑ gunguru wɔllɔ.
Mɑ u bu gberun dĩɑnu diisiɑ.
U derɑ bɑ kperun tim di.
U derɑ ben dɑ̃ɑ gbɑɑnu geɑ kuɑ kpenu wɔllɔ bu kɑ gum wɑ.
14 Bɑ kɛtɛbɑ kɑ yɑ̃ɑnun bom nɔrumɔ.
Bɑ yɑ̃ɑ kpɛmminu kɑ yɑ̃ɑ kinɛnu kɑ boo kinɛnun yɑɑ gumgiɑ temmɔ.
Som gem dĩɑnɑ bɑ rɑ n dimɔ.
Mɛyɑ bɑ rɑ mɑɑ resɛm tɑm gem nɔ.
15 Ye bɑ debɑ bɑ kpɑ mɑ bɑ Gusunɔ seesi.
Ye bɑ bɔriɑ bɑ kpɑ, yerɑ bɑ wi, Gusunɔ ben tɑkɑ kowo deri.
Mɑ bɑ nùn gɛmɑ wi, wi u sɑ̃ɑ ben fɑɑbɑ kowo.
16 Bɑ win nisinu seeyɑ bɑ dɑ bɑ bũnu sɑ̃ɑmɔ.
Bɑ win mɔru seeyɑ bɑ dɑ bɑ bũnu yiire
17 mɑ bɑ nu yɑ̃kuru koosimɔ ni,
ni nu#ǹ sɑ̃ɑ gem.
Bɑ#ǹ dɑɑ nu yɛ̃,
ben bɑɑbɑbɑ bɑ#ǹ nu sɑ̃ɑre.
18 Bɑ Gusunɔ duɑri wi u sɑ̃ɑ nge ben kpee bɑɑ mi bɑ rɑ kuke,
wi, wi u bu wɑ̃ɑru wɛ̃.
19 Sɑnɑm mɛ Gusunɔ u wɑ mɛ,
yerɑ win mɔru seewɑ mɑ u bu gɛmɑ
be, be bɑ sɑ̃ɑ win bibu.
20 U nɛɛ, u#ǹ mɑɑ bu somimɔ kpɑ u wɑ ye yɑ koo bu deemɑ.
Domi bɑ sɑ̃ɑwɑ mɛm nɔɔ sɑrirugibu kɑ nɑɑnɛ sɑribɑ.
21 Bɑ win mɔru kɑ win nisinu seeyɑ
ben bũu ni bɑ sokumɔ Gusunɔn sɔ̃,
ni nu#ǹ sɑ̃ɑ gɑ̃ɑnu.
Yen sɔ̃nɑ u nɛɛ,
wi, u koo mɑɑ bwese wiirɑrugiru sokusiɑ
u kɑ ben mɔru seeyɑ,
kpɑ u ben nisinu seeyɑ kɑ bwese te,
te bɑ#ǹ gɑrisi gɑ̃ɑnu.
22 Win mɔru koo se nge dɔ̃ɔ yɑrɑ
kpɑ yi gɑ̃ɑnu kpuro dɔ̃ɔ mɛni tem sɔɔ,
kpɑ yu mɑɑ dɑ sere tem sɔɔ sɔɔwɔ.
Kpɑ yu guunun kpɛɛkpɛɛkunu dɔ̃ɔ mɛni.
23 U koo bu nɔni swɑ̃ɑru sure.
Kpɑ u bu twee.
24 Bɑ koo gbi gɔ̃ɔru kɑ bɑrɑrun sɔ̃.
Bɑrɑ bɑkɑnu koo bu go.
U nɛɛ, u koo bu gbeeku yɛɛ sure yi bu mwɛɛri.
Kpɑ u mɑɑ de wɛɛ dɛ̃ɛgii yi bu dwɛ̃ɛ.
25 Tɑbu koo bu go swɛɛ sɔɔ kpɑ be bɑ wɑ̃ɑ yɛnusɔ bu bɛrum soorɑ.
Aluwɑɑsibɑ kɑ wɔndiɑbɑ bɑ koo gbisuku,
bɑɑ kɑ bii wɛ̃ɛnɔ kɑ tɔkɔnɔ bɑ#ǹ derimɔ.
26 U koo bu kɑm koosiɑwɑ mɑm mɑm sere goo kun mɑɑ bu yɑɑyɑmɔ.
27 Adɑmɑ u#ǹ wurɑmɔ yibɛrɛbɑ bu nùn yɛ̃ɛ
yèn sɔ̃ bɑ win tɔmbu kɑmiɑ,
kpɑ bu nɛɛ, n ǹ wi, Yinni Gusunɔ u ye kuɑ.
28 Isirelibɑ bɑ sɑ̃ɑwɑ bwese te tɑ#ǹ bwisi mɔ,
tɑ#ǹ mɑɑ lɑɑkɑri mɔ.
29 Bɑ̀ n dɑɑ bwisi mɔn nɑ,
bɑ koo rɑɑ giɑ ye yɑ koo bu deemɑ.
30 Kpɑ bu tii bikiɑ bu nɛɛ,
tɔn turo u koo kpĩ u tɔmbu nɔrɔbu (1.000) yɑrinɑsiɑ?
Ǹ kun mɛ tɔmbu yiru bu tɔmbu nɔrɔbun subɑ wɔkuru (10.000) yɑrinɑsiɑ?
Geemɑ Gusunɔ bɛsɛn Yinni dɑmgii u sun deriwɑ,
u sun yibɛrɛbɑ nɔmu bɛriɑwɑ.
31 Adɑmɑ yibɛrɛ ben tii bɑ yɛ̃
mɑ ben bũu wi u bu kɔ̃su
u#ǹ wi, Gusunɔ Isirelibɑn Yinni dɑm turɑ.
32 Ben yibɛrɛ be, bɑ sɑnkirewɑ nge Sodomu kɑ Gomɔrɑgibu.
Bɑ sɑ̃ɑwɑ nge tɑm mɛ mu sosu, mɑ mu dɛ̃ɛ mɔ.
33 Bɑ sosuwɑ nge wɑɑn dɛ̃ɛ.
Bɑ sɑ̃ɑwɑ nge wɑɑ gɔsɔrun dɛ̃ɛ.
34 Yinni Gusunɔ u yɛ̃ ye yibɛrɛ be, bɑ kuɑ.
U mɑɑ yɛ̃ ye u koo bu kɔsie.
35 Wiyɑ u koo bu mɔru kɔsie u bu sɛɛyɑsiɑ.
Tɔ̃ru gɑrɑ sisi tè sɔɔ bɑ koo wɔrumɑ.
Tɔ̃ɔ te, nɔni swɑ̃ɑrugirɑ, tɑ#ǹ mɑɑ tɛɛmɔ.
36 Yinni Gusunɔ ù n deemɑ
win tɔmbu bɑ#ǹ dɑm mɔ,
bɑ#ǹ mɑɑ tɑ̃si yeru gɑru mɔ,
u koo bu siriɑ,
kpɑ u be, win sɔm kowobun wɔnwɔndu wɑ.
37 Sɑɑ ye sɔɔ, u koo bikiɑ u nɛɛ,
mɑnɑ bɛɛn bũu dɑmgii ni, nu wɑ̃ɑ,
nìn mi i kuku yeru kɑsu,
38 ni i rɑ yɑɑ gumgiɑ goowe,
kpɑ i nu tɑm wɛ̃ nu nɔ.
I nu sokuo nu nɑ nu bɛɛ somi tɛ̃.
I de nu duki nɑ nu bɛɛ fɑɑbɑ ko.
39 Yinni Gusunɔ u nɛɛ, nɛnɑ nɑ wɑ̃ɑ.
Goo mɑɑ sɑri wi u sɑ̃ɑ Gusunɔ.
Nɛnɑ nɑ rɑ go,
nɛnɑ nɑ rɑ mɑɑ seeye.
Nɛnɑ nɑ rɑ mɛɛrɑ ko
kpɑ n wure n bɛkiɑ.
Goo sɑri wi u koo kpĩ u tɔnu wɔrɑ nɛn nɔmun di.
40 Sere kɑ nɛn wɑ̃ɑru, nɑ nɔmu suɑ wɔllɔ nɑ bɔ̃ruɑ nɑ nɛɛ,
41 kon nɛn tɑkobi nɔɔ dɛ̃ɛri,
kpɑ n tɔmbu siri.
Kon nɛn yibɛrɛbɑ mɔru kɔsie
kpɑ n bu sɛɛyɑsiɑ
be, be bɑ mɑn tusɑ.
42 Nɛn sɛ̃ɛnu koo yɛm debu
kpɑ nɛn tɑkobi yu be bɑ mɑn seesimɔ go.
Nɑ#ǹ goo derimɔ
wi u kɑ mɑn tɑbu mɔ̀.
Be, be bɑ mɛɛrɑ kuɑ kɑ be bɑ yoru mwɛɛrɑ
bɑ koo gbiwɑ.
43 Bɛɛ bwese tukunu, i Yinni Gusunɔn tɔmbu tɔmɔ,
domi u koo bu mɔru bɑrɑ,
kpɑ u bu ben torɑnu suuru kuɑ
u ben tem dɛɛrɑsiɑ.
44 Mɑ Mɔwisi kɑ Yosue, Nunin bii bɑ nɑ Isirelibɑn wuswɑɑɔ bɑ bu womu gen gɑri kpuro sɑɑriɑ.
Mɔwisin kirɔ dɑ̃ɑkɑ
45 Sɑnɑm mɛ Mɔwisi u Isirelibɑ Yinni Gusunɔn sɔ̃ɔsi te sɔ̃ɔwɑ u kpɑ, yerɑ u nɛɛ, 46 woodɑ ye nɑ bɛɛ wɛ̃ɛmɔ mini gisɔ, i ye mɛm nɔɔwɔ. I de i ye bɛɛn bibu sɔ̃ɔsi kpɑ bu wɑ bu ye mɛm nɔɔwɑ kpuro. 47 I n yɛ̃ mɑ woodɑ ye, yɑ#ǹ fɑɑgin gɑri. Domi yeyɑ yɑ koo bɛɛ wɑ̃ɑru wɛ̃ kpɑ yu de tu dɑkɑɑ dɑ tem mɛ sɔɔ, mɛ i ko i mwɑ Yuudɛnin guru giɔ.
Mɔwisi
u win gɔɔn lɑbɑɑri nuɑ
48 Yen tɔ̃ɔ terɑ Yinni Gusunɔ u Mɔwisi sɔ̃ɔwɑ u nɛɛ, 49 ɑ doo guu ni bɑ mɔ̀ Abɑrimuɔ, Mɔɑbun temɔ Yerikon deedeeru, kpɑ ɑ yɔ Nɛbon guurɔ. Sɑɑ min diyɑ kɑɑ Kɑnɑnin tem wɑ mɛ kon Isirelibɑ wɛ̃. 50 Guu ten wɔllɔwɑ kɑɑ gbi nge mɛ wunɛn mɔɔ Aroni u gu Horiɔ, kpɑ ɑ dɑ ɑ wunɛn sikɑdobɑ deemɑ. 51 Domi bɛɛ kpuro i#ǹ mɑn nɑɑnɛ kue Isirelibɑ kpuron wuswɑɑɔ sɑnɑm mɛ i wɑ̃ɑ Mɛribɑn bwiɑɔ, Kɑdɛsiɔ, Sinin gbɑburɔ. A#ǹ mɑn bɛɛrɛ wɛ̃ Isirelibɑn wuswɑɑɔ dɔmɑ te. 52 Yen sɔ̃nɑ kon de ɑ tem mɛ wɑ tontonden di mɛ nɑ nɛɛ, kon Isirelibɑ wɛ̃ mi, ɑdɑmɑ ɑ#ǹ duɔ mɛ sɔɔ.