Yinni Gusunɔ u Isirelibɑ
durom kuɑ
9
1 Bɛɛ Isirelibɑ, i swɑɑ dɑkio i nɔ. Wee gisɔ, i ko i Yuudɛni tɔburɑ kpɑ i bwese bɑkɑnu girɑ ni nu bɛɛ dɑm kere, kpɑ i ben wuu bɑkɑsu mwɑ si bɑ gbɑ̃rɑnu toosi nu gunu too. 2 I Anɑkibɑ yɛ̃. Bɑ dɑm mɔ, mɑ bɑ gunu. I mɑɑ nɔɔre bɑ ben gɑri gerumɔ bɑ mɔ̀, wɑrɑ u koo kpĩ u yɔ̃rɑ ben bweserun wuswɑɑɔ. 3 Wee i ko bu girɑ. Gisɔ i ko i giɑ mɑ Gusunɔ bɛsɛn Yinnin tiiwɑ u ko n bɛɛ gbiiye nge dɔ̃ɔ wi u rɑ kpuro kɑm koosie. U koo de bu yɑrinɑ bɛɛn wuswɑɑn di u bu kpeerɑsiɑ. I ko i bu girɑ kpɑ i bu kɑm koosiɑ fuuku nge mɛ Yinni Gusunɔ u bɛɛ sɔ̃ɔwɑ.
4 Sɑnɑm mɛ Gusunɔ bɛsɛn Yinni u koo bɛɛ bu girɑ bɛɛn wuswɑɑn di, i ku rɑ tii suɑ i nɛɛ, bɛɛn geɑn kobun sɔ̃nɑ Yinni Gusunɔ u bɛɛ duusiɑ tem mɛ sɔɔ. Domi bwese nin kɔ̃sɑn kobun sɔ̃nɑ u koo nu girɑ bɛɛn wuswɑɑn di. 5 N ǹ mɔ geɑ ye i mɔ̀n sɔ̃nɑ i ko i ben tem mɛ mwɑ. Ben kɔ̃sɑn kobun sɔ̃nɑ Gusunɔ bɛsɛn Yinni u koo bu girɑ bɛɛn wuswɑɑn di, kpɑ win nɔɔ mwɛɛru tu kɑ sirerɑ te u bɛsɛn bɑɑbɑbɑ, Aburɑhɑmu kɑ Isɑki kɑ Yɑkɔbu kuɑ kɑ bɔ̃ri. 6 I n yɛ̃ mɑ n ǹ mɔ bɛɛn geɑn kobun sɔ̃nɑ Gusunɔ bɛsɛn Yinni u bɛɛ tem gem mɛ wɛ̃ɛmɔ i n mɔ. Domi i sɑ̃ɑwɑ bwese te tɑ ku rɑ mɛm nɔ.
Isirelibɑ bɑ torɑ
7 I yɑɑyo nge mɛ i Gusunɔ bɛsɛn Yinnin mɔru seeyɑ gbɑburɔ. Sɑɑ dɔmɑ tèn di i yɑrimɑ Egibitin di sere i kɑ tunumɑ mini, i rɑ n nùn seesimɔwɑ.
8 I win mɔru seeyɑ guu te bɑ mɔ̀ Horɛbuɔ, mɑ u kɑ bɛɛ mɔru kuɑ u gɔ̃ru doke u bɛɛ kpeerɑsiɑ. 9 Sɑnɑm mɛyɑ nɑ yɔɔwɑ guuru wɔllɔ n kɑ woodɑn kpee bɛsi mwɑ yì sɔɔ ɑrukɑwɑni ye Yinni Gusunɔ u kɑ bɛɛ bɔkuɑ yɑ yoruɑ. Nɑ sinɑwɑ migum sɔ̃ɔ sɔɔ weeru kɑ wɔ̃kuru weeru, nɑ#ǹ di, nɑ#ǹ mɑɑ nɔrɑ.
10-11 Sɔ̃ɔ sɔɔ weeru kɑ wɔ̃kuru wee ten biru, yerɑ Yinni Gusunɔ u mɑn kpee bɛsi yiru ye wɛ̃, yì sɔɔ win tii u woodɑbɑ kpuro yoruɑ, be u bɛɛ sɔ̃ɔwɑ dɔ̃ɔ yɑrɑ sɔɔn di sɑnɑm mɛ i mɛnnɛ guurun nuurɔ. Kpee bɛsi yiyɑ yì sɔɔ bɑ ɑrukɑwɑni yen woodɑ yoruɑ. 12 Mɑ u mɑn sɔ̃ɔwɑ u nɛɛ, n seewo kpɑ n sɑrɑ fuuku fuuku. Domi bɛɛ nɛn tɔn be nɑ yɑrɑmɑ Egibitin di, i kɔ̃sɑ kuɑ. I gɛrɑ fuuku win swɑɑn di ye u bɛɛ sɔ̃ɔsi. I sisu yɑniɑ i kɑ tii bwɑ̃ɑroku kuɑ. 13 Mɑ u mɑɑ nɛɛ, u wɑ mɑ i sɑ̃ɑwɑ bwese te tɑ degɑngɑm mɔ. 14 N be de u bɛɛ kpeerɑsiɑ, kpɑ u bɛɛn yĩsiru go hɑnduniɑ sɔɔ, kpɑ u mɑn ko bwese dɑmgiru te tɑ koo bɛɛ dɑbiru kerɑ. 15 Mɑ nɑ gɔsirɑmɑ nɑ sɑrɑmɑ guu ten min di, tèn wɔllɔ dɔ̃ɔ u wɑ̃ɑ. Nɑ kpee bɛsi yiru ye nɛni yì sɔɔ ɑrukɑwɑnin woodɑ yɑ yoruɑ. 16 Mɑ nɑ mɛɛrɑ nɑ deemɑ wee, i Gusunɔ bɛsɛn Yinni torɑriwɑ kɑ gem. I sisu yɑniɑ i kɑ tii bwɑ̃ɑroku kuɑ gɑ kɑ nɑɑ buu weenɛ. Geemɑ, i gɛrɑwɑ fuuku fuuku win swɑɑn di ye u bɛɛ sɔ̃ɔsi. 17 Mɑ nɑ kpee bɛsi yiru ye nɑ nɛni mi mɛnnɑ nɑ surɑ nɑ kɔsukɑ bɛɛn wuswɑɑɔ.
Mɔwisi u Yinni Gusunɔ
somiru kɑnɑ Isirelibɑn sɔ̃
18 Yen biru, nɑ kpunɑ Yinni Gusunɔn wuswɑɑɔ sɔ̃ɔ sɔɔ weeru kɑ wɔ̃kuru weeru nge yellu, nɑ#ǹ di, nɑ#ǹ mɑɑ nɔrɑ bɛɛn torɑrun sɔ̃ te i kuɑ Yinni Gusunɔn nɔni sɔɔ mɑ tɑ win mɔru seeyɑ. 19 Mɑ bɛrum mɑn mwɑ win mɔru yen kpɑ̃ɑrun sɔ̃ ye yɑ derɑ u kĩ u bɛɛ kpeerɑsiɑ. Adɑmɑ dɔmɑ te, u kpɑm nɛn kɑnɑru mwɑ. 20 Yinni Gusunɔ u mɑɑ kɑ Aroni mɔru kuɑ too, mɑ u kĩ u nùn go. Adɑmɑ nɑ mɑɑ kɑnɑru kuɑ win sɔ̃ tɔ̃ɔ te sɔɔ. 21 Mɑ nɑ bwɑ̃ɑroku ge suɑ ge i kuɑ gɑ kɑ nɑɑ buu weenɛ mi, gèn sɔ̃ i torɑ, mɑ nɑ gu kpɛ̃ɛ dɔ̃ɔ sɔɔ. Nɑ gu muniɑ gɑ buuru kuɑ nge tuɑ mɑ nɑ ye wisi nim bwerɔ tèn nim mu sɑrɑmɑmɔ guurun di.
22 I mɑɑ Yinni Gusunɔn mɔru seeyɑ Tɑberɑɔ kɑ Mɑsɑɔ kɑ Kiburɔti Hɑtɑfɑɔ. 23 Sɑnɑm mɛ u bɛɛ gɔrɑ Kɑdɛsi Bɑɑnɛɑɔ u nɛɛ, i doo i tem mɛ mwɑ mɛ u bɛɛ wɛ̃ɛmɔ, i nùn seesiwɑ wi, wi u sɑ̃ɑ Gusunɔ bɛɛn Yinni. I yinɑ i bɛɛn nɑɑnɛ doke wi sɔɔ. I#ǹ mɑɑ win gere mɛm nɔɔwɛ. 24 I rɑ n Yinni Gusunɔ seesimɔwɑ sɑɑ mìn di nɑ bɛɛ yɛ̃.
25 Mɑ nɑ kpunɑ Yinni Gusunɔn wuswɑɑɔ nɑ nùn kɑnɑ sɔ̃ɔ sɔɔ weeru kɑ wɔ̃kuru weeru yèn sɔ̃ u nɛɛ, u koo bɛɛ kpeerɑsiɑ. 26 Mɑ nɑ nùn kɑnɑ nɑ nɛɛ, Gusunɔ nɛn Yinni, ɑ ku wunɛn tɔmbu kpeerɑsiɑ be bɑ sɑ̃ɑ wunɛn ɑrumɑni, be, be ɑ yɑkiɑ wunɛn kpɑ̃ɑrun sɑɑbu, mɑ ɑ bu yɑrɑmɑ Egibitin di kɑ wunɛn dɑm bɑkɑm. 27 A wunɛn sɔm kowobu, Aburɑhɑmu kɑ Isɑki kɑ Yɑkɔbu yɑɑyo. A ku wunɛn tɔmbun degɑngɑm kɑ ben nuku kɔ̃suru kɑ ben torɑnu mɛɛri, 28 kpɑ tɔn bèn tem di ɑ bu yɑrɑmɑ bu ku rɑɑ gere bu nɛɛ, wunɛ Yinni Gusunɔ ɑ#ǹ kpɛ̃ ɑ kɑ bu dɑwɑ tem mɛ ɑ bu nɔɔ mwɛɛru kuɑ sɔɔ. A#ǹ bu kĩwɑ. Yen sɔ̃nɑ ɑ bu yɑrɑmɑ ɑ kɑ de bu gbi gbɑburɔ. 29 N sere deemɑ bɑ sɑ̃ɑwɑ wunɛn tɔmbu kɑ wunɛn ɑrumɑni mɑ ɑ bu yɑrɑmɑ Egibitin di kɑ wunɛn dɑm bɑkɑm.