36
1 Bɛsɑlɛli kɑ Oholiɑbu kɑ tɔn be Yinni Gusunɔ u bwisi kɑ yɛ̃ru kɑ lɑɑkɑri wɛ̃ bu kɑ kuu ten sɔmburu kpuro ko, bɑ koo tu kowɑ nge mɛ u geruɑ.
2 Mɑ Mɔwisi u Bɛsɑlɛli kɑ Oholiɑbu sokusiɑ kɑ sere be Yinni Gusunɔ u mɑɑ sɔmbu ten bwisi kɑ yɛ̃ru kɑ̃ mɑ bɑ tii wɛ̃ kɑ nuku tiɑ. 3 Mɑ bɑ kɛ̃ɛ ni mwɛɛrɑ Mɔwisin min di, ni Isirelibɑ bɑ wɛ̃ Yinni Gusunɔn kuu ten sɔ̃. Adɑmɑ bururu bɑɑtere bɑ rɑ n mɑɑ kɑ kɛ̃ɛ ni nɑɑmɔwɑ Mɔwisin mi kɑ kĩru. 4 Mɑ tɔn be bɑ sɔmbu te mɔ̀ mi, ben bɑɑwure u ginɑ win sɔmburu deri, 5 mɑ bɑ nɑ Mɔwisin mi, bɑ nùn sɔ̃ɔwɑ bɑ nɛɛ, tɔmbɑ kɑ kɛ̃nu nɑɑmɔ n kere mɛ̀n bukɑtɑ sɑ mɔ su kɑ sɔmbu te ko te Yinni Gusunɔ u geruɑ.
6 Yerɑ Mɔwisi u derɑ bɑ kpɑrɑ bɑ nɛɛ, goo u ku mɑɑ kɑ kɛ̃nu nɑ kuu ten sɔ̃. Mɛsumɑ u kuɑ u kɑ kɛ̃ɛ ni yɔ̃rɑsiɑ. 7 Domi ni bɑ wɛ̃ kɔ nu koo turi nu tiɑrɑ.
Bɑ kuu ten sɔmɑ mɔ̀
8 Tɔn be bɑ sɔmbu ten yɛ̃ru mɔ mi, bɑ kuu te kuɑ kɑ bekɑ wɔku te bɑ wesɑ kɑ wɛ̃ɛ dɑmgii kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ, kɑ wɛ̃ɛ wunɔmgii. Mɑ bɑ wɔllun kɔ̃sobun weenɑsibu kuɑ yɑ kuɑ burɑru bekɑ ye sɔɔ. 9 Beku nin teerun dɛ̃ɛbu bu sɑ̃ɑwɑ gɔm soonu tɛnɑ yiru sɑri. Ten yɑsum mɑɑ gɔm soonu nnɛ. 10 Yen biru bɑ bekɑ yen nɔɔbu suɑ bɑ swɛɛnɑ. Nge mɛyɑ bɑ mɑɑ kuɑ kɑ nɔɔbu ye yɑ tie. 11 Mɑ bɑ yen bɑɑyeren goo bɑkɑ teerɔ wɛ̃ri doke kɑ wɛ̃ɛ yi bɑ wɔ̃kuɑ kɑ burɑ, yi bɑ koo rɑ kɑ ye sɔrenɑ. 12 Wɛ̃ri weerɑɑkuukuubuwɑ bɑ doke bekɑ ye bɑ swɛɛnɑn bɑɑyeren goo bɑkɑ teerɔ yi n nɔɔ kisinɛ. 13 Yen biru bɑ sɔretinu weerɑɑkuru kuɑ kɑ wurɑ bɑ kɑ bekɑ ye kpuro sɔrenɑ mɑ yɑ kuɑ beku teeru kuu ten sɔ̃.
14 Bɑ mɑɑ bekunu wɔkurɑ tiɑ wesɑ kɑ boo sɑnsu bu kɑ kuu bekurugii te wukiri. 15 Beku nin bɑɑteren dɛ̃ɛbu bu sɑ̃ɑwɑ gɔm soonu tɛnɑ, ten yɑsum gɔm soonu nnɛ. 16 Mɑ bɑ bekɑ yen nɔɔbu suɑ bɑ swɛɛnɑ. Mɑ bɑ mɑɑ nɔɔbɑ tiɑ ye yɑ tie swɛɛnɑ nɛnɛm. 17 Mɑ bɑ wɛ̃ri weerɑɑkuukuubu doke bekɑ ye bɑ swɛɛnɑn bɑɑyeren goo bɑkɑ teerɔ. 18 Mɑ bɑ sɔretii kuɑ weerɑɑkuru kɑ sii gɑndu bu kɑ bekɑ ye kpuro sɔrenɑ, kpɑ bekunu wɔkurɑ tiɑ ye, yu ko beku teeru. 19 Mɑ bɑ yɑ̃ɑ kinɛnun gɔni swɛ̃rɑsiɑ bɑ swɛɛnɑ bu kɑ kuu te wukiri. Mɑ bɑ mɑɑ yɑɑ gɔni sinumgii gɛɛ swɛɛnɑ yi bɑ koo sɔndi ye kpuron wɔllɔ.
20 Yen biru bɑ ɑkɑsiɑn dɑ̃ɑ bɛsi kɑsu yi bɑ koo girɑ yi kɑ ko kuu ten dɑ̃ɑ. 21 Dɑ̃ɑ bɛsi yin dɛ̃ɛbu bu sɑ̃ɑwɑ gɔm soonu wɔkuru, yin yɑsum mɑɑ gɔm soo teeru kɑ bɔnu. 22 Mɑ bɑ yi sɔretii dokeɑ yiru yiru yi biru kisinɛ. 23 Dɑ̃ɑ bɛsi yɛndɑ bɑ kuɑ bu kɑ girɑ kuu ten sɔ̃ɔ yɛ̃sɑn nɔm dwɑru giɑ. 24 Mɑ bɑ yen bɑɑyere yɔ̃rɑtii yiru kuɑ kɑ sii geesu. Mɑ bɑ yi doke mi sɔretii yi, yi wɑ̃ɑ. 25 Mɑ bɑ mɑɑ dɑ̃ɑ bɛsi yɛndu kuɑ bu kɑ girɑ ten sɔ̃ɔ yɛ̃sɑn nɔm geu giɑ. 26 Mɑ bɑ yen bɑɑyere yɔ̃rɑtii yiru dokeɑ yi bɑ kuɑ kɑ sii geesu. 27 Dɑ̃ɑ bɛsi nɔɔbɑ tiɑ bɑ kuɑ bu kɑ girɑ ten biruɔ sɔ̃ɔ duu yeru giɑ. 28 Bɑ mɑɑ dɑ̃ɑ bɛsi yiru kuɑ bu kɑ doke tiɑ tiɑ ten goo gɔmkinɔ biru giɑ, 29 yi n kɑ yiɔnɔ mɑninɛ sɑɑ tem di sere kɑ wɔllɔ mɑ bɑ yi sumi wɑsi wɔllɔ. Mɛsumɑ bɑ goo gɔmkinu yiru ye kpuro kuɑ. 30 Nge mɛyɑ bɑ dɑ̃ɑ bɛsi nɔɔbɑ itɑ kuɑ bu kɑ girɑ kuu ten biru giɑ, yin bɑɑyere kɑ yen yɔ̃rɑtii yiru yi bɑ kuɑ kɑ sii geesu. Mɑ yi kuɑ yɔ̃rɑtii wɔkurɑ nɔɔbu kɑ tiɑ.
31-32 Yen biru bɑ ten yɛ̃si itɑɔ ɑkɑsiɑn dɑ̃ɑ nɔɔbu nɔɔbu kɑre. Mɑ bɑ sɔ̃ɔ yɑri yerugiɑ deri. 33 Dɑ̃ɑ kɑretiɑ ye yɑ wɑ̃ɑ yɛ̃sɑ bɑɑyeren suunu sɔɔ mi, yen nɔɔ gɑ yɔ̃rɑ dɑ̃ɑ gɔmkinɔ. 34 Mɑ bɑ dɑ̃ɑ bɛsi yi kɑ dɑ̃ɑ kɑretii yi wurɑ pote. Mɑ bɑ wurɑn sumi kuɑ yì sɔɔ bɑ koo dɑ̃ɑ kɑretii yi wɑsi wɑsi.
35 Mɑ bɑ beku kɑreru kuɑ kɑ wɛ̃ɛ dɑmgii kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ, kɑ wɛ̃ɛ wunɔmgii. Mɑ bɑ wɔllun kɔ̃sobun weenɑsibu kuɑ beku te sɔɔ, yɑ kuɑ ten burɑru. 36 Yen biru bɑ dɑ̃ɑ bɛsi sinumgii nnɛ kuɑ bɑ wurɑ pote, mɑ bɑ sɔretii wurɑgii doke yi sɔɔ yi kɑ beku kɑre te gɑbɑ. Mɑ bɑ dɑ̃ɑ bɛsi yi yɔ̃rɑtii dokeɑ yi bɑ kuɑ kɑ sii geesu.
37 Mɑ bɑ kuu ten beku kɛnutiru wesɑ kɑ wɛ̃ɛ dɑmgii kɑ wɛ̃ɛ yi bɑ wɔ̃kuɑ kɑ burɑ kɑ mɑɑ gɑɑdurɑ, kɑ wɛ̃ɛ wunɔmgii mɑ bɑ beku te sɔmɑ dokeɑ. 38 Bɑ ɑkɑsiɑn dɑ̃ɑ bɛsi sinumgii nɔɔbu kuɑ bu kɑ beku kɛnutii te bwɛ̃, kɑ sɔretii yi yi koo tu gɑbɑ, mɑ bɑ dɑ̃ɑ bɛsi yi furɔsu kɑ sii dɛki kuɑ bɑ ye kpuro wurɑ pote. Mɑ bɑ yin bɑɑyere yɔ̃rɑtiɑ kuɑ kɑ sii gɑndu.