Kpee bɛsi yiru yen kɔsire
34
1 Yinni Gusunɔ u Mɔwisi sɔ̃ɔwɑ u nɛɛ, ɑ kpee bɛsi yiru mɛnɔ ɑ dɑ̃ku nge yiɔnɔ. Kon kpɑm gɑri yi yore mi, yi yi rɑɑ wɑ̃ɑ kpee bɛsi yi sɔɔ, yi ɑ kɔsukɑ. 2 A sɔɔru koowo siɑ bururu yellu, ɑ yɔɔmɑ Sinɑin guuru mi, kpɑ ɑ yɔ̃rɑ nɛn wuswɑɑɔ ten wɔllɔ. 3 A ku de goo u kɑ nun yɔɔmɑ mi. A ku rɑ mɑɑ de n goo wɑ guu ten gɑm gum. Mɛyɑ ɑ ku mɑɑ de kɛtɛbɑ kɑ yɑ̃ɑnu, yen gɑɑ yu yɑkɑsu di guu ten turuku.
4 Mɑ Mɔwisi u kpee bɛsi yiru mɛnɑ u dɑ̃kɑ nge yiɔnɔ. U seewɑ buru buru yellu u yɔɔwɑ Sinɑin guurɔ u kpee bɛsi yiru ye nɛni nge mɛ Yinni Gusunɔ u nùn sɔ̃ɔwɑ. 5 Yerɑ Yinni Gusunɔ u sɑrɑmɑ guru wii wuroru sɔɔ u yɔ̃rɑ win bɔkuɔ. Mɑ u win tiin yĩsiru geruɑ u nɛɛ, nɛnɑ nɑ Yinni Gusunɔ. 6 Mɑ u sɑrɑ Mɔwisin wuswɑɑɔ u nɔɔgiru suɑ u nɛɛ, nɛnɑ Yinni Gusunɔ durom kɑ wɔnwɔndugii. Nɑ rɑ sɑku n sere mɔru ko. Nɛn tɔn geeru kɑ nɛn bɔrɔkiniru tɑ kpɑ̃. 7 Nɑ rɑ tɔmbu nɛn kĩru sɔ̃ɔsi sere kɑ bɑɑdommɑɔ. Nɑ rɑ tɔn be bɑ kɔ̃sɑ kuɑ bu ben durum suuru kue, ɑdɑmɑ nɑ ku rɑ tɑɑrɛgii gɑrisi dɛɛro. Nɑ rɑ bɑɑbɑbɑn durum mɔɔru mwɛ ben bibun mi sere kɑ ben sikɑdominun bibɔ.
8 Yerɑ Mɔwisi u yiirɑ fuuku u nùn sɑ̃wɑ. 9 Mɑ u nɛɛ, Yinni, ɑ̀ n kɑ mɑn nɔnu geu mɛɛrɑ, nɑ nun kɑnɑmɔ, ɑ de ɑ kɑ sun dɑ. Wee, tɔn be, swɑɑ tɑobɑ. Adɑmɑ ɑ sun bɛsɛn dɑɑ kɔ̃sɑ kɑ bɛsɛn durum suuru kuo kpɑ ɑ sun ko wunɛgibu.
Gusunɔ u wure u kɑ Isirelibɑ
ɑrukɑwɑni bɔkuɑ
10 Mɑ Yinni Gusunɔ u nɛɛ, wee, nɑ kɑ bɛɛ ɑrukɑwɑni bɔkumɔ. Kon sɔm mɑɑmɑɑkigiɑ ko wunɛn tɔn be kpuron wuswɑɑɔ, yèn bweseru goo kun koore tem gɑm. Tɔn be kpuro bèn suunu sɔɔ i wɑ̃ɑ, bɑ koo nɛ, Yinni Gusunɔn sɔmburu wɑ. Domi gɑ̃ɑ nɑnumginɑ kon bɛɛ kuɑ.
11 Woodɑ ye nɑ bɛɛ wɛ̃ɛmɔ mi gisɔ, i ye mɛm nɔɔwɔ. Wee, kon Amɔrebɑ kɑ Kɑnɑnibɑ kɑ Hɛtibɑ kɑ Feresibɑ kɑ Hefibɑ kɑ Yebusibɑ girɑ bɛɛn wuswɑɑn di. 12 Wunɛ, Mɔwisi, ɑ n tii sɛ, kpɑ ɑ ku rɑ kɑ tem min tɔmbu ɑrukɑwɑni bɔke, mi i ko i du kpɑ bu ku rɑɑ ko bɛɛn yinɑ. 13 Adɑmɑ i ko ben yɑ̃ku yenu surɑ kpɑ i ben bũu wi bɑ mɔ̀ Asitɑɑten sɑ̃ɑ yerun dɑ̃nu wukiri, kpɑ i win bwɑ̃ɑrokunu kɔsuku. 14 I ku rɑ bũu goo sɑ̃ domi nɛn yĩsirɑ nisinugii. Nɑ ku rɑ wure bu mɑɑ yinni goo sɑ̃. 15 A n tii sɛ kpɑ ɑ ku rɑ kɑ tem min tɔmbu ɑrukɑwɑni bɔke. Domi bɑ̀ n ben bũnu gɑsirimɔ bɑ sɑ̃ɑmɔ bɑ yɑ̃kunu mɔ̀, bɑ koo bɛɛ soku i kɑ bu ko. Kpɑ ben yɑ̃ku yɑɑ yu bɛɛ binɛ ko i di. 16 Sɔrɔkudo i ko bɛɛn bii tɔn durɔbu kurɔbu suɑ ben bii wɔndiɑbɑ sɔɔ, kpɑ kurɔ be, bu de bɛɛn bii be, bu nɛn sɑ̃ɑru deri bu tɔn ben bũnu sɑ̃.
17 I ku rɑ sisu suɑ i kɑ tii bwɑ̃ɑroku kuɑ i sɑ̃.
18 I n dɑ pɛ̃ɛ ye bɑ ǹ seeyɑtiɑ doken tɔ̃ɔ bɑkɑru ko sɑɑ ye nɑ yi, suru wi bɑ mɔ̀ Abibu sɔɔ. Kpɑ i pɛ̃ɛ ye di sɔ̃ɔ nɔɔbɑ yiru nge mɛ nɑ bɛɛ yiire. Domi suru wi sɔɔrɑ i yɑrimɑ Egibitin di.
19 Bii gbiikoo tɔn durɔ bɑɑwure u ko n sɑ̃ɑwɑ nɛgii, mɛyɑ mɑɑ yɑɑ sɑbenu kpuron bii gbiikii dwɑnu, ǹ n kɛtɛn nɑ, ǹ n mɑɑ yɑ̃ɑrun nɑ, ǹ kun mɛ boo. 20 Ǹ n kɛtɛkun nɑ, i kɑ gen buu gbiikuu yɑ̃ɑ buu kɔsinɔ kpɑ gu ko yɑ̃ku yɑ̃ɑru. Ì kun mɑɑ kue mɛ, i gen wĩi sumɑ buo i go. I ko bii gbiikoo tɔn durɔ bɑɑwure yɑkiɑwɑ kɑ gobi.
I ku de goo u nɑ nɛn wuswɑɑɔ u kun kɛ̃ru nɛni.
21 Alusumɑ sɔɔ, sɔ̃ɔ nɔɔbɑ tiɑ i ko sɔmburu ko, kpɑ i wɛ̃rɑ sɔ̃ɔ nɔɔbɑ yiruse, bɑɑ ǹ n duurubun sɑɑn nɑ, ǹ kun mɛ gɛ̃ɛbun sɑɑ.
22 I n dɑ gɛ̃ɛbun tɔ̃ɔ bɑkɑru ko sɑnɑm mɛ i ɑlikɑmɑ yè yɑ gbiɑ yɑ ye gɛ̃ɛbu toruɑ, kpɑ i Kunun tɔ̃ɔ bɑkɑru ko sɑnɑm mɛ i bɛɛn dɑ̃ɑ binu sɔrimɔ, wɔ̃ɔ gɑ̀ n kpeeyɔ.
23 Wɔ̃ɔ tiɑ sɔɔ, nɔn itɑwɑ tɔn durɔ bɑɑwure u koo nɑ nɛ Gusunɔ, Isirelibɑ Yinnin sɑ̃ɑ yerɔ. 24 I ku bɛrum ko. Kon bwese ni girɑ bɛɛn wuswɑɑn di, kpɑ n bɛɛn tem yɑsiɑsiɑ. Goo kun kɑ̃kɔ u mu binɛ ko sɑnɑm mɛ i mɑn tɔ̃ɔ bɑkɑru diiyɑmmɛ nɔn itɑ ye, wɔ̃ɔ kɑ wɔ̃ɔ.
25 I ku mɑn yɑ̃ku yɑɑn yɛm wɛ̃ kɑ pɛ̃ɛ ye bɑ seeyɑtiɑ doke sɑnnu. Ì n Gɔɔ sɑrɑribun tɔ̃ɔ bɑkɑru mɔ̀, i ku de ten yɑɑ yu tiɑrɑ sere sisiru bururu. 26 Wɔ̃ɔ kɑ wɔ̃ɔ i n dɑ kɑ bɛɛn gbeɑn dĩɑ gbiikinu nɛ, nɛ, Yinni Gusunɔn sɑ̃ɑ yerɔ.
I ku rɑ boo buu yike kɑ gen mɛron bom.
27 Mɑ Yinni Gusunɔ u Mɔwisi sɔ̃ɔwɑ u nɛɛ, ɑ gɑri yi yoruo domi yiyɑ nɛn ɑrukɑwɑnin wiru ye nɑ kɑ bɛɛ bɔkumɔ, wunɛ kɑ Isirelibɑ.
28 Mɔwisi u wɑ̃ɑ mi kɑ Yinni Gusunɔ sɔ̃ɔ sɔɔ weeru kɑ wɔ̃kuru weeru. U ǹ dĩɑnu di, u ǹ mɑɑ nim nɔrɑ. Mɑ Yinni Gusunɔ u ɑrukɑwɑni yen gɑri yoruɑ kpee bɛsi yi sɔɔ, yiyɑ woodɑ wɔku te.
Mɔwisi u sɑrɑmɑ
Sinɑin guurun di
29 Ye Mɔwisi u kɑ Yinni Gusunɔ gɑri kuɑ u kpɑ, u sɑrɑmɑ Sinɑin guurun di u woodɑn kpee bɛsi yiru ye nɛni, win wuswɑɑ yɑ bɑllimɔ. Adɑmɑ win tii u ǹ yɛ̃ mɛ. 30 Aroni kɑ Isirelibɑ kpuro bɑ nùn mɛɛrɑ bɑ wɑ wee, win wuswɑɑ bɑllimɔ mɑ bɑ bɛrum bɑrɑ bu nùn susi. 31 Adɑmɑ u bu sokɑ, mɑ Aroni kɑ Isirelibɑn guro gurobu bɑ nɑ win mi, u kɑ bu gɑri kuɑ. 32 Yen biru Isirelibɑ kpuro bɑ nùn susi, mɑ u bu woodɑ ye kpuro sɑɑriɑ ye Yinni Gusunɔ u nùn wɛ̃ Sinɑin guuru wɔllu mi.
33 Ye u kɑ bu gɑri kuɑ u kpɑ, u win wuswɑɑ sɔnditiɑ wukiri. 34 Ù n dɑ Yinni Gusunɔn kuu ten mi u kɑ nùn gɑri ko, u rɑ sɔnditiɑ ye wunɛwɑ sere ù n kpɑm yɑrimɑ. Ù n yɑrimɑ min di, yerɑ u rɑ Isirelibɑ sɔ̃ ye Yinni Gusunɔ u nùn sɔ̃ɔwɑ. 35 Kpɑ bu win wuswɑɑ wɑ yɑ bɑllimɔ. Yen biruwɑ u rɑ ye sɔnditiɑ wukiri sere ù n kpɑm duɔ u kɑ Yinni Gusunɔ gɑri ko.YINNI GUSUNƆN KURUN SƆMBURU