30
1 Ye Rɑsɛli u deemɑ u ǹ kɑ Yɑkɔbu mɑrumɔ, yerɑ u kɑ win mɔɔ nisinu seewɑ. Mɑ u Yɑkɔbu sɔ̃ɔwɑ u nɛɛ, ɑ de n kɑ nun mɑ. Mɑ n kun mɛ, kon gbi.
2 Yerɑ Yɑkɔbu u kɑ Rɑsɛli mɔru bɛsirɑ u nùn sɔ̃ɔwɑ u nɛɛ, nɛnɑ Gusunɔ n kɑ nun yinɑri ɑ mɑ?
3 Rɑsɛli u nɛɛ, too, yɑ ǹ tɑɑrɛ, nɛn yoo Bilihɑ wee, ɑ kɑ duo kpɑ n bibu wɑ sɑɑ win min di n tɑɑru sɔndi, kpɑ sɑ n wɑ̃ɑsinɛ.
4 Mɑ u win yoo Bilihɑ suɑ u Yɑkɔbu wɛ̃ kurɔ. Yɑkɔbu u kɑ nùn mɛnnɑ, 5 yerɑ u gurɑ suɑ u Yɑkɔbu bii tɔn durɔ mɑruɑ. 6 Rɑsɛli u nɛɛ, Gusunɔ u nɛn kɑnɑru nuɑ mɑ u mɑn siriɑ mɑ u mɑn bii tɔn durɔ kɑ̃.
Yen sɔ̃nɑ u bii wi yĩsiru kɑ̃ Dɑnu. 7 Dɑnun biru Bilihɑ u mɑɑ gurɑ suɑ mɑ u Yɑkɔbu bii tɔn durɔ mɑruɑ. 8 Rɑsɛli u nɛɛ, nɑ kɑ nɛn mɔɔ gɑbirinɑ gem gem nɑ nùn kɑmiɑ.
Mɑ u bii wi yĩsiru kɑ̃ Nɛfitɑli.
9 Sɑɑ ye Leɑ u deemɑ u mɑrubu yɔ̃rɑ, yerɑ u win yoo Silipɑ suɑ u Yɑkɔbu wɛ̃ kurɔ. 10 Mɑ Silipɑ u gurɑ suɑ u Yɑkɔbu bii tɔn durɔ mɑruɑ. 11 Leɑ u nɛɛ, ɑnnɑ ɑ nɛn wii dobu wɑ!
Mɑ u nùn yĩsiru kɑ̃ Gɑdi. 12 Gɑdin biru Silipɑ u kpɑm gurɑ suɑ u Yɑkɔbu bii tɔn durɔ mɑruɑ. 13 Yerɑ Leɑ u nɛɛ, doo nɔɔrugiiwɑ nɑ sɑ̃ɑ, domi tɔn kurɔbu bɑ koo mɑn soku doo nɔɔrugii.
Mɑ u nùn yĩsiru kɑ̃ Asɛɛ.
14 Sɔ̃ɔ teeru doo gɛ̃ɛrun sɑɑ sɔɔ, yerɑ Rubɛni u seewɑ u dɑ yɑkɑsɔ u dɑ̃ɑ te bɑ sokumɔ mɑndɑrɑgoren\f |b30:14 mɑndɑrɑgore|d - Bɑ nɛɛ, dɑ̃ɑ ten binu nu koo kpĩ nu tɔn kurɔ ko bii mɛro.\F binu sɔrimɑ u kɑ win mɛro Leɑ wɔmɑ. Sɑɑ yerɑ Rɑsɛli u Leɑ sɔ̃ɔwɑ u nɛɛ, ɑ suuru koowo, ɑ mɑn wunɛn biin dɑ̃ɑ bii ni sɔko.
15 Leɑ u nùn wisɑ u nɛɛ, ye ɑ mɑn nɛn durɔ mwɑɑri n ǹ nun turɑ? Yerɑ ɑ kpɑm kĩ ɑ mɑn nɛn biin dɑ̃ɑ binu mwɑɑri?
Rɑsɛli nɛɛ, ɑ suuru koowo, kon de bɛsɛn durɔ u kɑ nun du yokɑ ye, wunɛn biin dɑ̃ɑ bii nin sɔ̃.
16 Ye n kuɑ yokɑ Yɑkɔbu u gberun di wee, yerɑ Leɑ u seewɑ u dɑ u kɑ nùn yinnɑ mɑ u nɛɛ, nɛnɑ kɑɑ kɑ du gisɔ, domi nɛn biin mɑndɑrɑgoren binɑ nɑ kɑ nun dwɑ.
Mɑ Yɑkɔbu u kɑ nùn duɑ dɔmɑ te. 17 Mɑ Gusunɔ u Leɑn kɑnɑru mwɑ, u gurɑ suɑ u Yɑkɔbu bii tɔn durɔ nɔɔbuse mɑruɑ. 18 Yerɑ u nɛɛ, Gusunɔ u mɑn nɛn ɑre wɛ̃, yèn sɔ̃ nɑ derɑ nɛn durɔ u nɛn yoo suɑ kurɔ.
Mɑ u bii wi yĩsiru kɑ̃ Isɑkɑri. 19 Isɑkɑrin biru Leɑ u kpɑm gurɑ suɑ u Yɑkɔbu bii tɔn durɔ nɔɔbɑ tiɑse mɑruɑ. 20 Mɑ u nɛɛ, Gusunɔ u mɑn kɛ̃ɛ geeru kɑ̃. Tɛ̃ nɛn durɔ u koo mɑn tii gɑwe u mɑn bɛɛrɛ doke yèn sɔ̃ nɑ nùn bii tɔn durɔbu nɔɔbɑ tiɑ mɑruɑ.
22 Gusunɔ u mɑɑ Rɑsɛlin tii yɑɑye u win kɑnɑru mwɑ mɑ u nùn kuɑ bii mɛro. 23 U gurɑ suɑ u bii tɔn durɔ mɑrɑ mɑ u nɛɛ, Gusunɔ u mɑn sekuru yɑrɑ.
24 Yerɑ u bii wi yĩsiru kɑ̃ Yosɛfu. U nɛɛ, kpɑ Yinni Gusunɔ u kpɑm mɑn bii tɔn durɔ sosiɑ.
Yɑkɔbu u kĩ
Lɑbɑni u nùn kɑrɑ
25 Sɑɑ ye Rɑsɛli u Yosɛfu mɑrɑ, yen biruwɑ Yɑkɔbu u Lɑbɑni sɔ̃ɔwɑ u nɛɛ, ɑ den mɑn kɑro mɛ, n we nɛn temɔ. 26 Kpɑ ɑ de n kɑ nɛn kurɔbu kɑ nɛn bibu dɑ bèn sɔ̃ nɑ nun sɑ̃wɑ. A mɑɑ yɛ̃ kɔ mɛ̀n nɔɔ nɑ nun sɔmburu kuɑ.
27 Mɑ Lɑbɑni u nùn wisɑ u nɛɛ, ɑ suuru koowo, ɑ de ɑ yɔ̃rɑ ginɑ. Domi nɑ wɑ mɑ wunɛn sɔ̃nɑ Gusunɔ u mɑn domɑru kuɑ. 28 Yen sɔ̃, ɑ mɑn sɔ̃ɔwɔ nyen nɑ n weenɛ n nun kɔsiɑ, kpɑ n nun wɛ̃.
29 Yerɑ Yɑkɔbu u nùn wisɑ u nɛɛ, wunɛn tii ɑ yɛ̃ nge mɛ̀n nɔɔ nɑ nun sɑ̃wɑ. A mɑɑ wɑ nge mɛ̀n nɔɔ wunɛn yɑ̃ɑ gɔ̃ɔ gɑ kuurɑ nɛn nɔmɑɔ. 30 Domi yɑ̃ɑ gɔ̃ɔ piibuwɑ ɑ rɑɑ mɔ n sere tunumɑ wunɛn mi. Adɑmɑ ye nɑ tunumɑ, Yinni Gusunɔ u nun domɑru kuɑ mɑ gɑ kpɛ̃ɑ. Ǹ n mɛn nɑ, sɑɑ yerɑ̀ kɑɑ den mɑn yɔ̃su n nɛn tiin sɔmburu ko.
31 Mɑ Lɑbɑni u nùn wisɑ u nɛɛ, mbɑ kon nun wɛ̃.
Yɑkɔbu u nɛɛ, nɑ ǹ kĩ ɑ mɑn gɑ̃ɑnu gɑnu wɛ̃. Ye kon nun sɔ̃ wee. À n wurɑ, ɑ de n kpɑm wunɛn yɑ̃ɑ gɔ̃ɔ ge suɑ n kpɑrɑ. 32 Gisɔ kon du wunɛn sɑbenu sɔɔ n mɛɛri mɛɛri n wɑ yɑ̃ɑnu kɑ bonu ni nu bɑusu mɔ kɑ yɑ̃ɑ nìn sɑnsu tĩri. Niyɑ kon gɔsi nɛnɛm nu n sɑ̃ɑ nɛn kɔsiɑru. 33 Siɑrɑ gem mu koo sɔ̃ɔsirɑ sɑnɑm mɛ ɑ nɑ ɑ kɑ nɛn kɔsiɑru wɑ. Domi boo ni nu ǹ bɑusu mɔ kɑ yɑ̃ɑ ni nu ǹ tĩri nù n wɑ̃ɑ nɛginu sɔɔ, ɑ mɑn gɑrisio gbɛnɔ.
34 Lɑbɑni u nùn wisɑ u nɛɛ, n kooro nge mɛ ɑ geruɑ.
35 Yen tɔ̃ɔ te, Lɑbɑni wi, u bonu kɑ yɑ̃ɑ ni nu bɑusu mɔ kɑ ni nu tĩri wunɑ u yi nɛnɛm mɑ u nu win bibu nɔmu bɛriɑ. 36 Yen biru u derɑ bɑ kɑ sɑbe ni tondɑ sɑɑ Yɑkɔbun min di nge sɔ̃ɔ itɑn sɑnum sɑkɑ.
Mɑ Yɑkɔbu u ni nu tie kpɑrɑmɔ. 37 Sɑnɑm mɛ u nu kpɑrɑmɔ, yerɑ u dɑ̃nu gɑnun kɑ̃ɑsi beki burɑ u yin koro wɔrukisu yoruɑ yoruɑ nge mɛ bɑ rɑ kɑɑru yore. 38 Mɑ u dɑ̃ɑ kɑ̃ɑsi yi suɑ u doke mi sɑbenu rɑ nim nɔ, domi miyɑ nu rɑ n yɔɔnɑmɔ. 39 Sɑnɑm mɛ, nù n yɔɔnɑ dɑ̃ɑ kɑ̃ɑsi yin bɔkuɔ, nu rɑ binu mɑwɑ ni nu bɑusu mɔ.
40 Yen biru Yɑkɔbu u ni nu tĩri kɑ ni nu bɑusu mɔ wunɑmɔ nɛnɛm u yiimɔ bee tiɑ nu ko wiginu. 41 Ù n deemɑ yɑ̃ɑ dɑmginɑ nu yɔɔnɑmɔ, u rɑ dɑ̃ɑ kɑ̃ɑsi yi kɔ̃wɑ nin wuswɑɑɔ. 42 Adɑmɑ ù n wɑ ni nu ǹ geɑ sɑ̃ɑ, niyɑ nu yɔɔnɑmɔ, u rɑ yi suewɑ min di kpɑ ni, nu n sɑ̃ɑ Lɑbɑniginu.
Yɑkɔbu u dukɑ suɑ
sɑɑ Lɑbɑnin min di
43 Mɛyɑ Yɑkɔbu u kuɑ u kɑ dukiɑ wɑ yɑ kpɑ̃. U yɑ̃ɑnu kɑ bonu kɑ yooyoosu kɑ kɛtɛkunu kɑ yoo tɔn durɔbu kɑ tɔn kurɔbu mɔ.