Bɑ Aburɑhɑmu
biin nɔɔ mwɛɛru kuɑ
18
1 Sɔ̃ɔ teeru Yinni Gusunɔ u Aburɑhɑmu kure Mɑnden sɔ̃ɔwɔ ye u sɔ̃ win dii bekurugirun kɔnnɔwɔ sɔ̃ɔ sɔɔ gbɑ̃ɑrɑ. 2 U nɔni seeyɑ u mɛɛrɑ. Wee tɔn durɔbu itɑ bɑ yɔ̃ sɑruɔ. Ye u bu wɑ yerɑ u seewɑ u dukɑ dɑ ben mi, u yiirɑ ben wuswɑɑɔ. 3 Mɑ u ben tɔnwero sɔ̃ɔwɑ u nɛɛ, Yinni, ɑ̀ n wurɑ, ɑ yɔ̃ro, ɑ ku mɑn sɑrɑri ɑ doonɑ. 4 I de bu nim tɑmɑ i kɑ bɛɛn kɔ̃ri kpɑkiɑ kpɑ i wɛ̃rɑ dɑ̃ɑ sɑɑru mini. 5 Kon dɑ n dĩɑnu tɑmɑ fiiko kpɑ i di i kɑ dɑm wɑ. Yen biru kpɑ i sere swɑɑ wɔri i doonɑ. Bɛɛn nɑɑ te, tɑ bɛɛrɛ kuɑ. Yen sɔ̃, i de i nɛn yɑɑrɛ di.
Mɑ bɑ nɛɛ, ɑ koowo nge mɛ ɑ geruɑ.
6 Yerɑ Aburɑhɑmu u gɔsirɑ kɑ sɛndɑru win dii bekurugirɔ Sɑɑrɑɑn mi. U nùn sɔ̃ɔwɑ u nɛɛ, ɑ wɑsi suo ɑ som sɑkɑkun nɔɔ itɑ suɑ ɑ buri kpɑ ɑ kirɑru sɔmɛ.
7 Mɑ Aburɑhɑmu u dukɑ dɑ win nɑɑ gɔ̃ɔwɔ u nɑɑ kinɛ kpɛmbu ge gɑ wɑ̃ mwɑ u win sɔm kowo turo wɛ̃. Mɑ u gu go u sɑwɑ fuuku. 8 Aburɑhɑmu u nɑɑ bogum suɑ kɑ bom kɑ yɑɑ sɑɑrɑ ye, u kɑ dɑ u yi tɔn ben wuswɑɑɔ. Win tii u dɑ u sinɑ bee tiɑ dɑ̃ɑ ten sɑɑrɔ sɑnɑm mɛ bɑ dimɔ nge mɛ ben komɑru. 9 Yerɑ bɑ nùn bikiɑ bɑ nɛɛ, mɑnɑ wunɛn kurɔ Sɑɑrɑɑ u wɑ̃ɑ.
Mɑ u nɛɛ, u wɑ̃ɑ dirɔ.
10 Mɑ ben turon min di Gusunɔ u nɛɛ, gɑsɔku ɑmɑdɑɑre kon wurɑmɑ wunɛn mi. Sɑɑ ye sɔɔ, wee, wunɛn kurɔ Sɑɑrɑɑ u koo bii tɔn durɔ mɑ.
N deemɑ Sɑɑrɑɑ u yɔ̃ u gɑri yi swɑɑ dɑki dii kɔnnɔwɔ ge gɑ wɑ̃ɑ sɔɔ win biruɔ. 11 Aburɑhɑmu kɑ Sɑɑrɑɑ bɑ mɑɑ bukurɑ gem gem. Sɑɑrɑɑ kun sɑ̃ɑ wi u koo bii mɑ. 12 Mɑ u tii yɛ̃ɛ u nɛɛ, tɛ̃ ye nɑ tɔkɔ kuɑ nɑ kpɑ, nɛn durɔn tii mɑɑ tɔkɔ kuɑ, yerɑ sɑ ko mɑɑ kpĩ su mɛnnɑbun nuku dobu wɑ?
13 Mɑ Yinni Gusunɔ u Aburɑhɑmu sɔ̃ɔwɑ u nɛɛ, mbɑn sɔ̃nɑ Sɑɑrɑɑ u yɛ̃ɛ u nɛɛ, u koo bii mɑwɑ mi kɑ gem? Wi, wi u tɔkɔ kuɑ u kpɑ? 14 Gɑ̃ɑnu gɑnu wɑ̃ɑ ni nu kɑ mɑn sɛ̃? Nge mɛ nɑ yi, suru nɔɔbɑ nnɛn biru kon wurɑmɑ kpɑ Sɑɑrɑɑ u bii tɔn durɔ mɑ.
15 Mɑ Sɑɑrɑɑ u siki u nɛɛ, nɑ ǹ yɛ̃ɛ. Domi bɛrum nùn mwɑ.
Adɑmɑ Yinni Gusunɔ u nɛɛ, weesɑ, ɑ yɛ̃ɛ.
Aburɑhɑmu u Gusunɔ
suuru kɑnɑ Sodomun sɔ̃
16 Mɑ tɔn be, bɑ seewɑ bɑ doonɔ. Bɑ wuswɑɑ tĩi Sodomun berɑ giɑ. Mɑ Aburɑhɑmu u bu swɑɑ yɔ̃rɑ. 17 Yerɑ Yinni Gusunɔ u nɛɛ, ye kon ko, n weenɛ n ye Aburɑhɑmu beruɑ? 18 N ǹ gɑ̃ɑnun sɔ̃, Aburɑhɑmun bweserɑ koo kpɛ̃ɑ kpɑ tɑ n dɑm mɔ. Win min diyɑ hɑnduniɑn bwesenu kpuro nu koo domɑru wɑ. 19 Domi wiyɑ nɑ gɔsɑ u kɑ win bibu kɑ ben bweseru woodɑ wɛ̃ bu nɛn swɑɑ swĩi kpɑ bɑ n sĩimɔ dee dee bɑ n nɛn kĩru mɔ̀, kpɑ n nɛn nɔɔ mwɛɛnu yibiɑ ni nɑ nùn kuɑ.
20 Mɑ u nɛɛ, tɔmbun weeweenu kpɛ̃ɑ Sodomu kɑ Gomɔrɑgibun dɑɑ kɔ̃sɑn sɔ̃. Ben durum yɑ bɑndɑ. 21 Yen sɔ̃nɑ kon sɑrɑ kpɑ n wɑ bɑ̀ n mɔ̀ kɑ gem nge mɛ nɑ nɔɔmɔ. Ǹ kun mɛ, kpɑ nɑ n yɛ̃.
22 Tɔn ben yiru bɑ ben swɑɑ wɔri bɑ doonɔ Sodomun berɑ giɑ. Adɑmɑ Yinni Gusunɔ u ginɑ yɔ̃rɑ kɑ Aburɑhɑmu. 23 Mɑ Aburɑhɑmu u nùn susi u nɛɛ, kɑ gem kɑɑ tɔn geobu kɑ tɔn kɔ̃sobu go sɑnnu? 24 Sɔrɔkudo tɔn geobu weerɑɑkuru bɑ ko n wɑ̃ɑ wuu ge sɔɔ, be bɑ wunɛn kĩru mɔ̀. Ǹ n mɑn nɑ, kɑɑ mɑɑ bu gowɑ? A ǹ wuu gen tɔmbu suuru kuɑmmɛ tɔmbu weerɑɑku ten sɔ̃? 25 N ǹ weenɛ ɑ tɔn geobu kɑ tɔn kɔ̃sobu kpeerɑsiɑ sɑnnu kpɑ be kpuro bu ɑre tee wɑ. Yen bweserɑ kun kɑ nun weenɛ. Wunɛ wi kɑɑ hɑnduniɑ kpuro siri, ɑ ǹ kɑɑ ko ye n wɑ̃?
26 Mɑ Yinni Gusunɔ u nɛɛ, nɑ̀ n tɔn geobu weerɑɑkuru wɑ Sodomun nukuru sɔɔ, kon wuu ge kpuro suuru kuɑ ben sɔ̃.
27 Aburɑhɑmu u kpɑm gɑri suɑ u nɛɛ, wee, nɑ kɑ̃kɑ nɑ kɑ nɛn Yinni gɑri kuɑ, nɛ wi nɑ sɑ̃ɑ tuɑ kɑ torom dirum. 28 Sɔrɔkudo tɔnu weerɑɑku te sɔɔ, nɔɔbu koo kɑɑrɑ. Nɔɔbu yen sɑrirun sɔ̃ kɑɑ wuu ge kpeerɑsiɑ?
Mɑ Yinni Gusunɔ u nɛɛ, nɑ ǹ gu kpeerɑsiɑmɔ nɑ̀ n tɔn geobu weeru kɑ nɔɔbu wɑ ge sɔɔ.
29 Aburɑhɑmu u kpɑm nùn sɔ̃ɔwɑ u nɛɛ, sɔrɔkudo tɔn geobu weeruwɑ bɑ ko n wɑ̃ɑ mi.
Mɑ Yinni Gusunɔ u nɛɛ, kon wuu ge deri gen tɔnu weeru yen sɔ̃.
30 Aburɑhɑmu u nɛɛ, ɑ ku kɑ mɑn wɑsirɑ. Kon kpɑm gɑri gere. Ǹ n tɔn geobu tɛnɑn nɑ yɑ wɑ̃ɑ mi mɑɑ ni?
Mɑ Yinni Gusunɔ u nɛɛ, nɑ ǹ gu kɑm koosiɑmɔ nɑ̀ n tɛnɑ ye wɑ mi.
31 Mɑ Aburɑhɑmu u nɛɛ, Yinni, wee nɑ kɑ̃kɑ nɑ kɑ nun gɑri mɔ̀. Ǹ n tɔn geobu yɛndun nɑ tɑ mɑɑ wɑ̃ɑ mi ni?
Mɑ Yinni Gusunɔ u nɛɛ, nɑ ǹ gu kpeerɑsiɑmɔ nɑ̀ n yɛn te wɑ.
32 Aburɑhɑmu u kpɑm nɛɛ, ɑ suuru koowo, nɔn tee teniwɑ kon gɑri gere. Bɑɑ ǹ n wɔkurun nɑ tɑ wɑ̃ɑ mi ni?
Mɑ Yinni Gusunɔ u nɛɛ, nɑ ǹ gu kpeerɑsiɑmɔ nɑ̀ n wɔku te wɑ.
33 Yen biru Yinni Gusunɔ u doonɑ ye u kɑ Aburɑhɑmu gɑri kuɑ u kpɑ. Aburɑhɑmu u mɑɑ gɔsirɑ u dɑ win yɛnuɔ.