13
1 Mɑ Aburɑmu u seewɑ Egibitin di u wurɑ Nɛgɛbu giɑ wi kɑ win kurɔ kɑ ye u mɔ kpuro kɑ Lɔtu sɑnnu.
Aburɑmu kɑ Lɔtu bɑ kɑrɑnɑ
2 Aburɑmu u sɑ̃ɑwɑ dukiɑgii. U yɑɑ sɑbenu mɔ kɑ sii geesu kɑ wurɑ. 3 Mɑ u sɑnum so Nɛgɛbun di u dɑ Betɛli giɑ u turɑ mi u rɑɑ win dii bekuruginu girɑ Betɛli kɑ Ayin bɑɑ sɔɔ. 4 Miyɑ u Yinni Gusunɔ sɑ̃wɑ mi u rɑɑ yɑ̃ku yeru bɑnɑ.
5 N deemɑ Lɔtu u mɑɑ yɑ̃ɑnu mɔ kɑ nɛɛ kɑ dii bekuruginu u kɑ Aburɑmu swĩi. 6 Ben ɑrumɑni ye, yɑ kpɑ̃ sere yɑm mi bɑ wɑ̃ɑ mu ǹ turɑ bɑ n kɑ wɑ̃ɑ mi sɑnnu. 7 Yen sɔ̃nɑ sɑnnɔ gɑ duɑ Aburɑmun kpɑrobu kɑ Lɔtugibun suunu sɔɔ. N deemɑ Kɑnɑnibɑ kɑ Feresibɑ bɑ wɑ̃ɑ tem mɛ sɔɔ sɑnɑm mɛ. 8 Yerɑ Aburɑmu u Lɔtu sɔ̃ɔwɑ u nɛɛ, nɑ nun kɑnɑmɔ, ɑ ku de sikirinɔ gɑ n wɑ̃ɑ nɛ kɑ wunɛn suunu sɔɔ, ǹ kun mɛ nɛn kpɑrobu kɑ wunɛgibun suunu sɔɔ. Domi bɛsɛ dusinɑ. 9 A ǹ tem wɑɑmɔ kpuro wunɛn wuswɑɑɔ? A de su kɑbɑnɑ. À n dɑ nɔm dwɑrɔ, kon dɑ nɔm geuɔ, ǹ n mɑɑ nɔm geu giɑn nɑ ɑ dɑ, kon dɑ nɔm dwɑrɔ.
10 Mɑ Lɔtu u nɔni seeyɑ u Yuudɛnin dɑɑrun berɑ mɛɛrɑ sere n kɑ dɑ wuu ge bɑ mɔ̀ Soɑri. U wɑ tem mu geɑ sɑ̃ɑ mu nike nikeru mɔ nge gbɑɑ te Yinni Gusunɔ u kuɑ Edɛniɔ, ǹ kun mɛ Egibitin tem. N deemɑ Yinni Gusunɔ kun ginɑ Sodomu kɑ Gomɔrɑ kpeerɑsie. 11 Yerɑ Lɔtu u Yuudɛnin wɔwɑ ye kpuro tii gɔsiɑ mɑ u dɑ sɔ̃ɔ yɑri yeru giɑ. Mɛyɑ n kuɑ bɑ kɑ kɑrɑnɑ. 12 Aburɑmu u sinɑ Kɑnɑnin temɔ, Lɔtu u mɑɑ dɑ u sinɑ wɔwɑ yen wusun bɔkuɔ mɑ u kɑ win dii bekuruginu susimɔ sere kɑ Sodomuɔ. 13 Sodomugibu wee, tɔn kɔ̃sobɑ. Bɑ sɑ̃ɑwɑ durumgibu mɑm mɑm Gusunɔn wuswɑɑɔ.
14 Ye Lɔtu kɑ Aburɑmu bɑ kɑrɑnɑ bɑ kpɑ, yerɑ Yinni Gusunɔ u Aburɑmu sɔ̃ɔwɑ u nɛɛ, ɑ nɔni seeyo kpɑ ɑ sɔ̃ɔ yɑri yeru kɑ duu yeru mɛɛri n tomɑ kɑ sɔ̃ɔ yɛ̃si yɛ̃sikɑ. 15 Domi tem mɛ ɑ wɑɑmɔ mi kpuro, wunɛ kɑ wunɛn bibun bweserɑ kon mu wɛ̃ kɑ bɑɑdommɑɔ. 16 Kon wunɛn bibun bweseru dɑbiɑsiɑ nge yɑnim. Wi u koo kpĩ u yɑnim gɑri wiyɑ u koo mɑɑ kpĩ u wunɛn bibun bweseru gɑri. 17 A seewo ɑ tem mɛ bɔsu kpɑ ɑ mɛn kpɑ̃ɑru wɑ nge mɛ mu nɛ. Domi wunɑ kon mu wɛ̃.
18 Mɑ Aburɑmu u win dii bekuruginu kpɑrenu kuɑ u dɑ u sinɑ Mɑnden sɔ̃ɔwɔ, wuu ge bɑ mɔ̀ Heboronin bɔkuɔ. Mɑ u yɑ̃ku yeru bɑnɑ u kɑ Yinni Gusunɔ sɑ̃ mi.