Tɔmbun dɑɑ kɔ̃sɑ
6
1 Sɑnɑm mɛ tɔmbɑ kɔwɑrɑbu toruɑ hɑnduniɑ sɔɔ mɑ bɑ bii tɔn kurɔbu mɑrumɔ, 2 Wɔllun tɔmbu\f |b6:2 wɔllun tɔmbu|d - Kɑ Heberum bɑ yoruɑ, Gusunɔn bii tɔn durɔbu. Gɑbɑ tɑmɑɑ yen tubusiɑnɑ wɔllun tɔmbu. Gɑbɑ mɑɑ tɑmɑɑ bɑ sɑ̃ɑ Sɛtin bweseru. Gɑbɑ mɑɑ tɑmɑɑ bɑ sɑ̃ɑwɑ sinɑ bibu.\F gɑbɑ nɑ bɑ wɑ mɑ tɔmbun bii tɔn kurɔbu bɑ wɑ̃ mɑ bɑ tii kurɔbu gɔsiɑ. 3-4 Mɑ bɑ kɑ bu mɛnnɑ bɑ bibu mɑrɑ. Bii beyɑ bɑ kuɑ durɔ gbebunu hɑnduniɑ sɔɔ, ni nu rɑɑ yĩsiru yɑrɑ yellu. Mɑ Yinni Gusunɔ u nɛɛ, nɛn hunde kun ko n wɑ̃ɑ tɔmbu sɔɔ kɑ bɑɑdommɑɔ domi bɑ sɑ̃ɑwɑ be bɑ koo gbi. Kɑ mɛ, kon de bɑ n ginɑ wɑ̃ɑ wɔ̃ɔ wunɑɑ teeru.
5 Domi u wɑ tɔmbun dɑɑ kɔ̃sɑ kpɛ̃ɑ hɑnduniɑ sɔɔ. Ben gɔ̃run bwisikunu nu rɑ n wɑ̃ɑwɑ kɔ̃sɑ sɔɔ bɑɑdommɑ. 6 Mɑ win gɔ̃ru gɑ sɑnkirɑ yèn sɔ̃ u tɔmbu tɑkɑ kuɑ hɑnduniɑɔ. Yɑ nùn duɑ too sere win nukurɔ. 7 Mɑ u nɛɛ, wi, u koo kpuro kpeerɑsiɑwɑ hɑnduniɑ sɔɔn di, sɑɑ tɔnun min di n kɑ girɑri yɛɛyɔ yi yi rɑ sĩ kɑ yi yi rɑ kɑbiri kɑ gunɔsu. Domi win nukurɑ sɑnkirɑ yèn sɔ̃ u yebɑ kpuro tɑkɑ kuɑ.
Ye Gusunɔ u Nɔwɛ yiire
8 Adɑmɑ Gusunɔ u kɑ Nɔwɛ nɔnu geu mɛɛrɑ 9-10 domi u win woodɑbɑ mɛm nɔɔwɑ. U ǹ tɑɑrɛ mɔ win wɑɑti ye sɔɔ, mɑ u kɑ Gusunɔ swĩinɑ. Bii tɔn durɔbu itɑwɑ u mɑrɑ. Ben yĩsɑ wee, Sɛmu kɑ Kɑmu kɑ Yɑfɛti.
11 Sɑɑ ye sɔɔ, hɑnduniɑn kɔ̃sɑ kpɛ̃ɑ Gusunɔn wuswɑɑɔ mɑ yɑ gɔbɑ bɑndɑ. 12 Yerɑ u hɑnduniɑ mɛɛrimɑ u wɑ yen kɔ̃sɑ kpɛ̃ɑ domi hunde koni bɑɑyere yɑ yen dɑɑ sɑnkɑ. 13 Mɑ u Nɔwɛ sɔ̃ɔwɑ u nɛɛ, nɑ gɔ̃ru doke n hunde konibɑ kpuro kpeerɑsiɑ, domi bɑ derɑ hɑnduniɑn gɔbɑ bɑndɑ. Kon bu kpeerɑsiɑ, be kɑ tem sɑnnu. 14 Adɑmɑ wunɛ Nɔwɛ, ɑ tii kpɑkoro bɑkɑru kuo kɑ dɑ̃ɑ dɑmgiɑ, tɑ n dii sɔsu mɔ, kpɑ ɑ tu dɑ̃ɑ fĩifĩinu tɛɛni ten sɔɔwɔ kɑ tɔɔwɔ. 15 Amɛniwɑ kɑɑ tu koosinɑ. A de ten dɛ̃ɛbu bu n sɑ̃ɑ gɔm soonu goobɑ wunɔbu (300) kpɑ ten yɑsum mu n sɑ̃ɑ gɔm soonu weerɑɑkuru, kpɑ ten gunum mu n sɑ̃ɑ gɔm soonu tɛnɑ. 16 A de tɑ n kpɛɛru mɔ wɔllɔ. Kpɛɛ te sɔɔ, kpɑ ɑ fɛnɛnti ko yen dɛ̃ɛbu kɑ yɑsum mu n sɑ̃ɑ gɔm soo teeru. Kpɑ ɑ kɔnnɔ yɑbɑ ten yɛ̃sɑɔ, ɑ kɛnutiru doke. A de tɑ n sɑ̃ɑ gidɑmbisɑ itɑ. 17 Wee, kon de nim yibu bɑkɑru tu nɑ tem sɔɔ, tu hunde koni bɑɑyere kpeerɑsiɑ hɑnduniɑ sɔɔ. Ye yɑ wɑ̃ɑ tem sɔɔ kpuro yɑ koo gbiwɑ. 18 Adɑmɑ wunɑ kon wure n kɑ nɛn ɑrukɑwɑni bɔke. Kɑɑ du kpɑkoro te sɔɔ, wunɛ kɑ wunɛn kurɔ kɑ wunɛn bibu kɑ ben kurɔbu sɑnnu. 19 Hunde koni bɑɑyere, yen yiruwɑ kɑɑ mɑɑ duusiɑ dwɑɑ kɑ niɑ kpɑkoro te sɔɔ kɑ wunɛ sɑnnu. 20 Gunɔsu kɑ yɛɛ yi yi rɑ kɑbiri, ye kpuron bwese bwesekɑ sɔɔ, yiru yiruwɑ yɑ koo nɑ wunɛn mi, ɑ kɑ ye fɑɑbɑ ko. 21 A mɑɑ dĩɑ ni bɑ rɑ di kpuro mɛnnɔ ɑ yi kpɑ nu ko wunɛ kɑ yɛɛ yin dĩɑnu.
22 Mɑ Nɔwɛ u kuɑ kpuro ye Gusunɔ u nùn yiire.