सार्दिस्दाओ साम्भुङ्ओ निम्पाङ य़ङ्खान
३
सार्दिस्दाओ साम्भुङ्ओ निनाम्हाङ काफा खाना ओ य़ङ छाप्तु।
ओ य़ङ्खान निनाम्हाङ्ओ सात्कातात लावा खोन्कि सात्कातात साङ्केन्मा कातोक म़य़ङ्याङ।
आम्काचिचि अ़ङ्का सिन्तुङ्योङ्च़ङ।
खानानिन अ़ह़ङ त़युङियेन निकिना आम्नुओ ऩङ ओन्ङा ऱङायुङ्सा,
मेन खानानिन त़स़न्वा त़लिसिन्युङ्सिन।
२ थिन्तानिन,
खोन्कि स़मादामा म़मुयाङ्ओ म़हेनाओ य़ङ्चि म़छोलो मुवानुम्च़म,
देकिनालो आम्नुओ काचिचि अ़ङ्निनाम्हाङ्ओ अ़चुखाङ्मादा मान्तालाम़युक्ओ अ़ङ्का धिरुङ्च़ङ।
३ खोन्ओसा खानानिन दियाको चिन्माय़ङ त़तोक्तुम खोन्कि त़एनुम,
मो मान्लेत्दानुम खोन्कि हेवाचिदाङ्का लासानिन।
खानानिन त़थिन्तिमिन्नालो अ़ङ्का काख़पावा ताङा,
खोन्कि खाउग़रि ताङा ओ,
मोछाङ खानानिन त़सिन्तिमिन।
४ मेन सार्दिस्दा थोरेत म़नाचि म़युङ्याङ,
मोचिआ अ़चुहेवाआ अ़चुतित्चि मान्पोप्म़युक्तुचि।
मोचि अ़ङ्काएनान ओम्याङ्ओ तित म़हुम्कि म़कोन,
देकिनालो मोचि अ़ङ्काएनान कोन्मा खान्तुचिओ म़मुयाङ।
५ साङ छो,
खो ओवात्नि ओम्याङ्ओ तित हुम्मेत।
अ़ङ्का देम्खाछाङ मोसोओ अ़ऩङ ह़ङ्म़ङ्ओ छाप्लाखादाङ्काa अ़सोप्ऩङ्खान्ऩङ।
अ़ङ्का मोसोओ अ़ऩङ अ़ङ्पापाओ अ़चुबुदा खोन्कि खोक्को काफाचिओ अ़चुबुदा मो अ़ङ्को ओ निकिना लोउङ।
६ साङ्को अ़एन्खा नाबाक याक्याङ,
मोसाआ एनुने,
सेङ्लावाआ साम्भुङ्चि दे म़लोङुचि।
फिलादेल्फियादाओ साम्भुङ्ओ निम्पाङ य़ङ्खान
७ फिलादेल्फियादाओ साम्भुङ्ओ निनाम्हाङ काफा खाना ओ य़ङ छाप्तु।
साङ सेङ्याङ,
साङ अ़छ़ङ मुयाङ,
साङ्एदा दाउद्ओ अ़हाङ्होन्ओ अ़होत्खा युङ्याङ,
ओ य़ङ्चि खोक्कोएदाङ्का ओ।
देम्खा खोक्कोसाआ लाप्तिखोप अ़होत,
साङ्आछाङ मो छेक्मा अ़ऱन।
खोन्कि खोक्कोसाआ अ़छेक्ओ साङ्आछाङ होत्मा अ़ऱन।
८ अ़ङ्का आम्नुओ काचिचि सिन्तुङ्योङ्च़ङ।
खानुम,
अ़ङ्का आम्नुओ बुदा लाप्तिखोप होत्नाप़नायुङ्नानिन,
मो साङ्आछाङ छेक्मा अ़ऱन।
खानानिन्एदा उन्नि सावा याक्याङ,
खोन्नुछाङ खानानिन अ़ङ्य़ङ त़काङ्सिन्युङ्सिन खोन्कि अ़ङ्ऩङ ऩङामान्छित्त़युक्तुम निकिना अ़ङ्का सिन्तुङ्योङ।
९ खानुम!
सैतानाओ अ़रुहुप्दाओ अ़तुक्वादा अ़ङ्का दे मुङ्च़ङ,
खानानिन त़खाम।
मोचिआ खोचि यहुदिनि ना म़लोनानान्चिन,
मेन मोचि यहुदिचि माआङ,
मोचि काम़प्चि ओ।
अ़ङ्का मोचि तासुङ्च़ङ खोन्कि आम्लाङ्दा बोम्मेत्तुङ्च़ङ,
मोलाम्पा खानानिन सोमातुक्नानिन निकिना मोचि तुप्मेत्तुङ्च़ङ।
१० हान चिन्माय़ङ ओ हेन्खामादा कायुङ म़नाचि चिन्खाङ्सि झारा हेन्खामादा तामा मुयाङ।
खानानिन्आ दुखा आङ्तानुम्निओ अ़ङ्लोमाय़ङ्वा त़च़न्ओसा चिन्माखाङ्माओ ग़रिदाङ्का अ़ङ्का खानानिन लेन्नानिन।
११ अ़ङ्का च़क्नि ताङाङा।
खानानिन्एदा याक्याङ्ओ आम्नुओ साकोङ्छ़ङ नुलोक क़क्तायुङ्सानुम,
खोन्ओसा खानानिन त़छोसिन्ओ आम्नुओ सिरिफा साङ्आछाङ अ़खात्तुन।
१२ साङ्चि म़छो,
अ़ङ्निनाम्हाङ्ओ अ़चुब़क्खाखिम्दाओ अ़खाबो अ़ङ्का मोचि मुङ्च़ङ।
खोचि मोदाङ्का देम्खाछाङ बुङ्खादा ऩलानिन्लोन्निन।
अ़ङ्का मोचिएदा अ़ङ्निनाम्हाङ्ओ अ़चुओ ऩङ छाप्तुङ,
खोन्कि अ़ङ्निनाम्हाङ्ओ अ़चुसहराओ अ़ऩङ,
अ़ऩङ्वा यरुसलेमb छाप्तुङ।
मो अ़ङ्निनाम्हाङ्दाङ्का निनाम्मादुङ्का ह्युना य़,
खोन्कि आप्पि अ़ऩङ्वा अ़ङ्ऩङ्छाङ मोचिएदा छाप्तुङ।
१३ साङ्को अ़एन्खा नाबाक याक्याङ,
मोसाआ एनुने,
सेङ्लावाआ साम्भुङ्चि दे म़लोङुचि।
लाउदिकियादाओ साम्भुङ्ओ निम्पाङ य़ङ्खान
१४ लाउदिकियादाओ साम्भुङ्ओ निनाम्हाङ काफा खाना ओ य़ङ छाप्तु।
ओ य़ङ्खान आमेनc निओदाङ्का ओ,
साङ सोम्कुवा मुमा खान्तुओ अ़छ़ङ सालुम्स़ङ काप़पा खोन्कि निनाम्हाङ्ओ अ़चुमुन्माय़ङ्चिदाओ हाङ्काचि कामुदाङ्का ओ।
१५ अ़ङ्का आम्नुओ काचिचि सिन्तुङ्योङ्च़ङ,
खानानिन ना त़केङ्सिन्येन ना त़कुसिन्येन।
त़केङ्सिन्येन्ओ माङ्लो त़कुसिन्येन्ओदे नुवाओनि अ़ङ्का मिन्ङा।
१६ देकिनालो खाना अ़लोमोङ्वा त़मुयाङ,
ना त़केङ्याङ ना त़कुयाङ,
खोन्ओसा अ़ङ्का खाना अ़ङ्दोदाङ्का पेम्नालोन्ना।
१७ ‘अ़ङ्का कातोक मुङाङा,
अ़ङ्काएदा चासुम्छेन्बि युङ्याङ,
खोन्कि अ़ङ्का दित्छाङ अ़दोत्निन’नि खाना त़य़ङ्याङ।
मेन खाना त़सिन्तुन्योन,
चाअ़त्लो दुखा खाना त़तोक्याङ्ओ,
मान्तोक्कादा,
दोप्म़क खोन्कि कालाङ्द़क त़मुयाङ।
१८ खोन्ओसा कातोक लिमा मिआ हेङ्माय़ङ हाराक्वा,
खोन्कि आम्कालाङ्द़क्ओ लेजो दिप्मा निम्पाङ ओम्याङ्ओ तित खोन्कि खाना खाङ्मा त़ऱने निकिना आम्म़क्दा पाक्मा ओक्तो,
अ़ङ्काएदाङ्का खित्माछाङ खाना यायोक प़ना।
१९ साङ-साङ सोमातुक्तुङ्च़ङ,
अ़ङ्का मोचि रेन्तुङ्च़ङ,
खोन्कि दन्दा प़ङ्च़ङ।
खोन्ओसा आम्नुओ राक पोइसानुम,
खोन्कि आम्नुओ हेवाचिदाङ्का लासानिन।
२० खानुम!
अ़ङ्का लाप्तिखोप्दा एप्माकि मोउङ।
साङ्आ अ़ङ्य़ङ एनुकि लाप्तिखोप अ़होत्ङाप़ङानालो अ़ङ्का मो हुत्दा वाङ्ङा खोन्कि खोएनान चा चाङा,
खोन्कि खो अ़ङ्काएनान चा।
२१ साङ छो,
खो अ़ङ्का अ़ङ्हाङ्मुखादा अ़ङ्काएनान युङ्मा प़ङ,
देत्नि अ़ङ्का आप्पिछाङ छोसाङ खोन्कि अ़ङ्पापाएनान खोक्कोसोओ अ़चुहाङ्युङ्खादा युङ्ङाङा।
२२ साङ्को अ़एन्खा नाबाक याक्याङ,
मोसाआ एनुने,
सेङ्लावाआ साम्भुङ्चि दे म़लोङुचि।