अ़क लाखा चवालिस हजारा इस्राएलि म़नाचि
७
खोन्किना हेन्खामा,
धियाङ्वामा माङ्लो खाक्कोछाङ स़ङ्ताङ्ओ अ़देङ्सालाप्पादा ह़क्आ अ़वेरुन्ने निकिना चारकालिप्पा ह़क अ़थेम्ताकि चारकापाङ निनाम्हाङ काफाचि हेन्खामाओ चारकातात्माङ अ़चोम्दा म़एवाङाओ अ़ङ्का खाङ्च़ङ।
२ खोन्कि अ़ह़ङ निनाम्हाङ्ओ अ़चुसेप्माएनान नि निनाम्हाङ काफा बुसुहोन्याङ्का बानाङाओ अ़ङ्का खाङ।
हेन्खामा खोन्कि धियाङ्वामा लुक्मा सावा निनाम्हाङ्आ म़प़युङ्सुचिओ मो चारकातात निनाम्हाङ काफाचि अ़धिवा य़ङ्आ खोक्कोसाआ म़लोचि।
३ “आन्कान्का आन्काओ निनाम्हाङ्ओ अ़चुहारुक्चिओ अ़चुत़ऱबुप्दा सेप्खा मान्पाक्युक्तुम्च़म्कातारि हेन्खामा,
धियाङ्वामा माङ्लो स़ङ्ताङ्चि देत्छाङ मान्मुदानुम्च़म।”
४ खोन्किना सेप्खा म़पाक्तुचिओ अ़चुखिप्चि खा-खाक्कोसाआ अ़लोवाङ्ओ य़ङ अ़ङ्का एनुङ।
मोचि अ़क लाखा चवालिस हजारा म़याआङा।
मोचि इस्राएल्ओ बारकाभुङ्दाओ अ़चुछाचि म़याआङा।
५ यहुदाओ अ़भुङ्दाङ्का बार हजारा,
खोन्कि रुबेन्ओ अ़भुङ्दाङ्का बार हजारा,
गाद्ओ अ़भुङ्दाङ्का बार हजारा,
६ आसेरओ अ़भुङ्दाङ्का बार हजारा,
नप्तालिओ अ़भुङ्दाङ्का बार हजारा,
मनस्सेओ अ़भुङ्दाङ्का बार हजारा,
७ सिमियोन्ओ अ़भुङ्दाङ्का बार हजारा,
लेबिओ अ़भुङ्दाङ्का बार हजारा,
इस्साखारओ अ़भुङ्दाङ्का बार हजारा,
८ जबुलुन्ओ अ़भुङ्दाङ्का बार हजारा,
योसेफ्ओ अ़भुङ्दाङ्का बार हजारा,
बेन्यामिन्ओ अ़भुङ्दाङ्का बार हजारा सेप्खा म़पाक्तुचि।
अ़धिवा मुक्ला
९ खोन्किना साङ्आछाङ खिप्मा अ़ऱन्चिन्ओ अ़क्तात अ़धिवाङ म़ना मुक्ला अ़ङ्का खाङ।
मोचि झारा हेन्कोप्चि झारा रावाचि झारा भुङ्चि खोन्कि य़ङ्काचेप्चिदाङ्का म़तायुङ्सा।
मोचि ओम्प़चिवा तित म़हुम्साङा खोन्कि अ़चुछुक्दा खजुराताङ्ओ अ़खेक्चि म़क़क्ताकि हाङ्युङ्खा खोन्कि थुबाछाओ अ़चुबुदा म़एवाङाओ अ़ङ्का खाङ्च़ङ।
१० मोचि अ़धिवाङ य़ङ्आ म़पारा,
“हाङ्युङ्खादा कायुङ,
आन्निनाम्हाङ खोन्कि थुबाछाएदा लेन्मा सावा याक्याङ।”
११ हाङ्युङ्खादा,
साम्योक ताङ्पाचि खोन्कि चारकातात अ़ह़ङ साक्स़चिओ अ़चुऱङ्कोप्नि झारा निनाम्हाङ काफाचि म़एवाङा।
खोन्किना मोचिआ हाङ्युङ्खाओ अ़बुदा म़बोम्सान्चिन्कि निनाम्हाङ अ़ब़क्ता।
मोचि म़य़ङा,
१२ “मोवात्निङा लिने!
चोन्मा,
साम,
खारु,
आलाङ,
साया,
सावा खोन्कि छोमा अ़धुन-अ़धुन्तारि आन्निनाम्हाङ्एदा युङ्युङ्ने।
मोवात्निङा लिने!”
१३ साम्योक ताङ्पाचिएदाङ्का अ़क्छाआ अ़ङ्का अ़सेनाङ,
“ओ ओम्प़चिवा तित काहुम म़नाचि साङ्चि ओ,
खोन्कि खादाङ्का मोचि म़ताओ?”
१४ खोन्कि अ़ङ्का मो लासुङ्लोङ,
“उवा,
खानानिन्ङा त़सिन्तिन।”
खोन्कि खोसाआ अ़ङ्का अ़लोवाङ,
“ओचि तोक्पो ल़क्माचिदा निनाम्हाङ्एदा सोम्कुवा कामु म़लिसाओ म़नाचि ओ।
मोचिआ अ़चुतित्चि थुबाछाओ अ़चुह़दा वाअ़सुवाकि ओम्पुवाचिचिओ अ़मुवायुङ्सा।
१५ खोन्ओसा मोचि निनाम्हाङ्ओ अ़चुहाङ्युङ्खाओ अ़बुदा म़युङ्याङ,
खोन्कि अ़खोलेन,
अ़खाखुत खोक्कोसोओ अ़चुब़क्खाखिम्दा खोक्को अ़ब़क।
साङ हाङ्युङ्खादा म़युङ्याङ खोक्कोसाआ मोचि म़रात्तुचि खोन्कि म़खाचि।
१६ मोचि देम्खाछाङ साऩलानिन्स़निन खोन्कि वामित्माऩस़निन।
ना नाम्आ ना खाक्को कुमाआङा राङ्तुचि।
१७ देकिनालो हाङ्युङ्खाओ अ़रादा कायुङ थुबाछा मोचिओ अ़चुकाखाङ म़लिकि म़रात्तुचि।
खोक्कोसाआ मोचि अ़ह़ङ बोन्वा चाक्वादा म़तित्तुखात्तुचि।
खोन्कि निनाम्हाङ्आ मोचिओ अ़चुम़क्चिदाङ्का झारा अ़चुम़क्वाचि म़त़क्तुप़चि।”