16
Nig-atu si Kora woy mgo Duma rin
1 No kuntoon duon hop-at no otow no si Kora no anak ni Is-har no kapunganan ni Livi, woy si Datan woy si Abiram no mgo anak ni Iliab woy si On no anak ni Pilit no mgo kapunganan ni Riubin. Nigparakol-dakol sikandan 2 woy nig-atu sikandan ki Mosis. Duma kandan hop-at, duon 250 no mgo otow to Israil no mgo na-ngaranan no mgo in-aam no igbudyag to koot-otawan. 3 Nasagboka sikandan to pogdani ki Mosis woy ki Aaron no kagi ran to “Naabanan kow on! In-oog ka tibon koot-otawan, kara sagboka kandan, woy nigduma ka Magboboot kandan. Manio naan no nigparakol-dakol kow no nigpalabow kow to koot-otawan to Magboboot?”
4 To pogdinog ni Mosis to soini niglangkob sikandin to pogpanubad. 5 No nigkagi sikandin duon ki Kora woy to mgo sakup din to “Asoom to masoom ipapitow to Magboboot ko hontow ka kandin no otow woy ko hontow ka in-oog din. Ogparanion din ka sikan no otow. Sikan do no otow no og-aamon din ian ka ogdani kandin. 6 No soini ka oghimuon now; sikoikow, Kora, woy ka tibon mgo sakup nu ogpurut kow to mgo tutunganan to palina 7 woy asoom no allow ogsabukan now to hapuy woy palina duon to tangkaan to Magboboot. Ko hontow ka og-aamon no otow to Magboboot ian ka in-oog din. Sikaniu no mgo kapunganan ni Livi ian ka naabanan on!”
8 Songo pignangonan ni Mosis si Kora to “No pamminog kow no mgo kapunganan ni Livi! 9 Kulang pad buwa to pogdoromdom now no pigsapin-sapin kow to Magboboot ligkat to duma no mgo otow to koot-otawan to Israil, no pigdanian din sikaniu odyow no ogtarabau kow to Tukbung to Magboboot no ogtangko kow to tibon koot-otawan no oggaaton now sikandan? 10 Pigdanian kow to Magboboot duma to tibon mgo duma now no mgo otow ni Livi, di kuntoon og-agawon now pad poron ka pogkataagpanubad. 11 Ka Magboboot ian ka pig-atuan now no nasagboka kow to mgo sakup nu. Hontow si Aaron no sikandin do ka og-aarasan now?”
12 No inpo-umow ni Mosis si Datan woy si Abiram no mgo anak ni Iliab. Di nigtugun sikandan to “Kono koy oghondio! 13 Kulang pad buwa koikow no pig-aap koy nu ligkat to tano no tu-augan to gatas woy tonob odyow to poghimatoy kanami to han-hanawan? No kuntoon ogkoiniat ka pad to pogbootboot kanami? 14 Nokoy pad, no waro koy nu aapa to tano no tu-augan to gatas woy tonob, woy waro koy nu bogadyi to mgo kamot woy pinamua-an to ubas no ogkatagtuun noy. Oglugiton nu pad buwa ka mgo mata to soini mgo otow? Kono koy oghondio ian!”
15 No nabou lagboy si Mosis, woy pignangonan din ka Magboboot to “Dokad ogtinawaa ka igtaruwoy ran koikow. Waro a nigpurut to agad asnu ligkat kandan, woy waro a nakasao to agad hontow kandan.”
16 Nignangon si Mosis ki Kora to “Ogtangko kow to Magboboot asoom no allow, sikoikow woy ka mgo sakup nu woy si Aaron. 17 Kara sagboka kaniu ogpurut to tutunganan din to palina woy ogsooran din pad to palina -250 tibo ka mgo tutunganan to palina - woy ogtangko kow to Magboboot. Songo ogtangko kow ni Aaron to Magboboot no og-aap to tutunganan to palina.”
18 No sikan ian to pogkapawo nigpurut kara otow kandan to tutunganan din to palina, woy pigsooran din to hapuy woy palina no nigludyud ki Mosis woy ki Aaron no nighasindog to gomawan to Tukbung to Pogtangko. 19 To poglimud ni Kora to mgo sakup din no nasagboka to pog-atu ki Mosis woy ki Aaron to gomawan to Tukbung to Pogtangko, niglogsad ka kabantug to Magboboot to tangkaan to tibon koot-otawan. 20 Nigkagi ka Magboboot ki Mosis woy ki Aaron to, 21 “Pamariu kow to soini no koot-otawan odyow no ogpanghimatadyan ku sikandan to kuntoon do ian.”
22 Di niglangkob si Mosis woy si Aaron duon to tano no nigpakoid-u no nig-umow to “Magboboot no Igbudyag to tibon mgo gimukud to mgo otow, ogkabou ka buwa to tibon koot-otawan tongod do to sao to sagboka ro no otow?”
23 No nigkagi ka Magboboot ki Mosis to 24 “Nangoni nu ka koot-otawan to ‘Pamariu kow to mgo tukbung ni Kora, ni Datan woy ni Abiram.’”
25 No nig-onow si Mosis woy nighondio sikandin ki Datan woy ki Abiram woy nigsundul kandin ka tibon mgo igbudyag to Israil. 26 Nigtuaro sikandin to tibon koot-otawan to “Ituos kow ligkat to mgo tukbung to soini no mgo maddoot no mgo otow! Dokow ogsamsam to agad nokoy no kandan odyow kono kow ogpakalagkos to pog-awo ku kandan tongod to mgo sao dan.”
27 No sikan ian nigpamariu ka mgo otow to mgo tukbung ni Kora, ni Datan woy ni Abiram. Niglibuwas sikandan si Datan woy si Abiram no nigpo-onong-onong to mgo gomawan to mgo tukbung dan duma to mgo asawa ran, mgo anak dan no dagdakol woy mallintok pad. 28 No nigkagi si Mosis to “Soini ka indanan now no pigpa-aap a to Magboboot odyow to poghimu to soini tibo no konon sikoddi do ka nigboot: 29 Ko ogkamatoy soini no mgo otow to kamatadyon no ogkabadyaan to tibon duma no mgo otow, no, waro a naan ipa-aap to Magboboot. 30 Di ko igpapitow to Magboboot ka iam no ogkabol-boongan no ogbogtak ka tano no og-aboong kandan ilagkos to tibo no kandan, no manokal pad sikandan ogkalobong, no sikan ian ogkataga kow no nakasamili ka soini no mgo otow to Magboboot.”
31 To iam pad nigtakas si Mosis to pogkagi to soini, nigbogtak ka tano diraom kandan 32 woy pigginganga to tano ka bobo din no nig-aboong kandan, duma to mgo lunggunan dan woy to tibon mgo otow ni Kora duma to mgo kaaglagan dan. 33 Manokal pad sikandan no nighondio to lobong duma to tibo no kandan, woy nigkimut ka tano no nammatoy sikandan no warad on to koot-otawan. 34 To pogngangang dan, nigpanlaguy ka mgo otow to Israil no marani kandan no nigpangiak to “Songo ogka-aboong ki to tano!”
35 Songo niglibuwas ka hapuy ligkat to Magboboot no nighimatoy to 250 no mgo otow no nigtutung to palina.
36 Nigkagi ka Magboboot ki Mosis to 37 “Nangoni nu si Eliasar no anak ni Aaron no taagpanubad no ogpuruton din ka mgo tutunganan to palina ligkat to mgo baga no nagaat, woy idogpak now ka mgo abu to madmariu, su in-oog on ka mgo tutunganan to palina. 38 Puruta nu ian ka mgo tutunganan to palina to mgo otow no nammatoy tongod to sao dan, woy ogsalsalan now sikan odyow to poghimu to akob to panubaranan, hoo su intaruwoy sikan to Magboboot woy no in-oog. Ogkohimu sikan no tuus to mgo otow to Israil.”
39 No sikan ian piglimud ni Eliasar no taagpanubad ka brunsi no mgo tutunganan to palina no pig-aap to mgo otow no nasilaban on, woy pigsalsal din odyow to poghimu to akob to panubaranan, 40 sumao to innangon to Magboboot kandin pinabadyo ki Mosis. Nohimu soini no tuus to mgo otow to Israil no waro otow no kono’n kapunganan ni Aaron ka ogdani to Magboboot no ogtutung to palina odyow kono ogkamatoy sikandin unawa ki Kora woy to mgo sakup din.
41 To pogkapawo nig-aaras ka tibon koot-otawan to Israil tongod ki Mosis woy ki Aaron no kagi ran “Pighimatadyan now ka mgo otow to Magboboot.” 42 Di to poglimudlimud to koot-otawan to pog-atu ran ki Mosis woy ki Aaron, nigpitow sikandan pohondio to Tukbung to Pogtangko woy inogo niglogsad ka saagapun no nigtongos to sikan, woy nigpakita ka Magboboot to kabantug din. 43 No nighondio si Mosis woy si Aaron to tangkaan to Tukbung to Pogtangko, 44 woy nigkagi ka Magboboot ki Mosis to 45 “Pamariu kow to soini no koot-otawan odyow no ogpanghimatadyan ku sikandan to kuntoon do.” Woy niglangkob sikandan to tano. 46 No nigkagi si Mosis ki Aaron to “Puruta nu ka tutunganan nu to palina woy sabuki nu to palina duma to hapuy puun to panubaranan, woy agpas ka oghondio to mgo otow odyow to pogpo-uli kandan to Magboboot. Niglibuwas on ka kabou to Magboboot woy nigbunsud on ka mokohinhinaat no dau.”
47 No pighimu ni Aaron ka innangon ni Mosis, woy nigpallaguy sikandin to taliwaro to koot-otawan no nalimud. Nabunsuran on ka mokohinhinaat no dau to kandan di nigtaruwoy si Aaron to palina duon to Magboboot no nigpo-uli kandan. 48 Nigpo-onong-onong si Aaron no nigpataliwaro to mgo manokal woy to mgo nammatoy on, woy nigsagdok ka mokohinhinaat no dau. 49 Di nammatoy on ka 14,700 no otow tongod to dau, timul pad to mgo nammatoy tongod ki Kora. 50 No niglibong si Aaron ki Mosis to gomawan to Tukbung to Pogtangko su nighagtong on ka mokohinhinaat no dau.