11
Logpad to Pog-aaras
1 No kuntoon, nig-aaras ka mgo otow tongod to mgo koirapan dan woy nigdinog ka Magboboot. To pogdinog to Magboboot kandan, napukow ka kabou din. Pigpa-aap sikandan to Magboboot to niglogdog no hapuy woy nasilaban ka duma no mgo tukbung to ilis to pig-ugpaan to mgo otow. 2 To pogpannanoy to mgo otow ki Mosis, nigpanubad sikandin duon to Magboboot woy no-obukan ka hapuy. 3 No pighingaranan dan ka sikan no ugpaan to Tabira no to kanta pad ‘Poglogdog’, hoo su niglogdog ka hapuy to Magboboot taliwaro kandan.
4 Duon mgo duma ran no konon kapunganan ni Israil, woy nanasablok soini no mgo otow, woy agad ka mgo otow to Israil nigbunsud to poglaangot no kagi ran “Agad ko duon ogkakoon ta no sapu poron! 5 Nakadoromdom koy to mgo isda no nakoon noy dio to Ehiptu no waro badyad, woy ka mgo pipinu, mgo baabowan, mgo gulay, mgo sibuyas woy ahos no duon. 6 Di kuntoon napowahan ki; waro loin no ogkitoon ta ko konon soini no manna!”
7 Ka manna un-unawa to kabkab to balanghoy woy unawa to saong pitawon. 8 Nigpamurut ka mgo otow to manna, woy piggagaling dan woy ko pigbinadyu ran. Pigsugba ran ka duma woy pighimu ran no pan ka duma. Ka nanam un-unawa to pan no pig-amutan to lana to olibu. 9 To poglogsad to domhug to pig-ugpaan to mgo otow kara maukilom, songo niglogsad ka manna.
10 Nigdinog si Mosis to mgo otow to kara lunggunan no nigsinogow, kara sagboka to gomawan to tukbung din. Nabou lagboy ka Magboboot, woy nasasow si Mosis. 11 Nig-inso sikandin to Magboboot to “Manio to pigpa-aapan a nu to soini no igkasasow? Nokoy ka igkabou nu koddi no inpatiang nu ka soini no koot-otawan koddi? 12 Sikoddi buwa ka nigboot no ogko-otow ka soini no mgo otow? Sikoddi buwa ka nig-anak kandan? Manio naan no inpasakopu nu sikandan to koddi unawa to pogsakopu to taagtamong to bato, odyow no og-aapon ku sikandan to tano no inpangulibot nu to mgo kabuybudyagan dan? 13 Hondoi a ogpakakita to sapu no litos to soini tibon mgo otow? Ungud nigsisinogow sikandan no kagi ran to ‘Bogadyi koy to sapu!’ 14 Kono a ogpakatiang to soini no koot-otawan to sagsagboka ku ro; kono kud ogkagoon ka kabogati ran. 15 Ko soini ian ka oghimuon nu koddi, madmarodyow pad nasi ko oghimatadyan a nu kuntoon, ko narago ka koddi, no kono a nu ogbaybadyaran.”
16 Nigkagi ka Magboboot ki Mosis to “Aapi a nu to kapituan to mgo budyag to Israil no noilaan nu no mgo igbudyag no og-aap to mgo otow. Aapa nu sikandan to Tukbung to Pogtangko, odyow no ogsasindog sikandan dio duma koikow. 17 Oglogsad a no ogkagian ku sikoikow dio, woy ogpuruton ku ka Gimukud ku no duon to koikow woy songo ogbogadyan ku sikandan to sikan dod no Gimukud. Ogbulig sikandan koikow to pogtiang to tarabau nu to koot-otawan odyow no kono ka ogpasagsagboka to pogtiang. 18 Nangoni nu ka koot-otawan to ‘Himpod kow no i-oog now koddi ka mgo lawa now tongod to asoom no allow no ogpakakoon kow to sapu. Nakarinog ka Magboboot kaniu to pog-aaras to nigkagi kow to “Agad ko duon sapu no ogkoonon ta poron! Madmarodyow ka pog-ugpo ta dio to Ehiptu atag!” No kuntoon ogbogadyan kow to Magboboot to sapu woy ogkoonon now ian. 19 Kono now ro ogkoonon ka sapu to sagboka ro no allow, woy ko daruwa no allow, woy ko lalima, ko sampuu, ko kawaan no allow, 20 ko konon taman to songo buwan pad! Ian ogkoonon now ka sapu taman to ogpowahan kow to sapu woy ogsun-ipan kow! Hoo su pig-iniugan now ka Magboboot no duon to taliwaro kaniu to pogkagi now to “Manio to no-ongkoran ta ka Ehiptu?”’”
21 Di nigtabak si Mosis duon to Magboboot to “Pitow ka no nigsasindog a no piglingutan a to hon-om no gatus no libu no otow woy nignangon ka to ‘Ogbogadyan ku sikandan to sapu no litos to sagboka no buwan!’ 22 Kono buwa ogpakalitos kandan agad ko ogpang-iowon ka pila no puntuk no karniru woy baka? Kono buwa ogpakalitos kandan agad ko ogko-utol ka tibon mgo isda no duon to dagat?”
23 Nigtabak ka Magboboot ki Mosis to “Maupot buwa ka boad to Magboboot, naan nu? Pitow ka ro kuntoon ko ogpakatood ka innangon ku woy ko kono.”
24 No sikan ian niglibuwas si Mosis woy pignangonan din ka mgo otow ko nokoy ka innangon to Magboboot. Piglimud din ka kapituan no mgo igbudyag to koot-otawan woy pigpasasindog din sikandan no niglingut to Tukbung. 25 No niglogsad ka Magboboot pinabadyo to gapun no nig-aukoy ki Mosis, woy pigpurut to Magboboot ka Gimukud din no duon on ki Mosis woy songo pigsabukan din ka kapituan no mgo igbudyag to sikan dod no Gimukud. To poglogsad to Gimukud kandan, nigtatagna sikandan, di waro dan hutuka to duma no mgo allow. 26 Di, daruwa to kapituan no ian si Ildad woy si Midad nigpalinggaat do to mgo pig-ugpaan dan. Nalagkos sikandan poron to kapituan no mgo igbudyag, di waro sikandan nakalibuwas pohondio to Tukbung. Di agad to sikan, pigsabukan sikandan to Gimukud to Magboboot, woy songo nigtatagna sikandan duon to pig-ugpaan to mgo otow. 27 Duon sagboka no baubato no nigpallaguy no pignangonan din si Mosis to “Nigtatagna si Ildad woy si Midad dio to pig-ugpaan to mgo otow.” 28 Nigkagi si Josue no anak ni Nun no ian ka taagbulig ni Mosis ligkat to baubato pad sikandin no kagi “Mosis, igbudyag ku, pahagtonga nu sikandan!” 29 Di nigtabak si Mosis to “No-ima ka tongod koddi? Ogkoiniat a poron atag no ogkoubus ogtatagna ka koot-otawan to Magboboot, woy no ogpansabukan din sikandan tibo to Gimukud din!” 30 No takas to sikan nigman-uli si Mosis woy ka mgo igbudyag to Israil dio to pig-ugpaan to mgo otow.
31 No kuntoon nigpa-aap ka Magboboot to kaamag no nigpaladyap to mgo pugu ligkat to dagat. Nono-uug ka mgo pugu no niglingut to pig-ugpaan to mgo otow no nokog-akob-akob taman to mgo daruwa no maniku ka karaoman ligkat to pig-ugpaan to mgo otow taman to ogkohipanowan ta to sagboka no allow no poghipanow to palibut. 32 To tibo to sikan no allow woy maukilom woy to pogkapawo pad nigpamurut ka mgo otow to mgo pugu. Waro otow no maintok pad to 25 no saku ka noutol din. Pigpandampil dan ka mgo pugu no niglingut to pig-ugpaan dan. 33 Di to waro pad na-awo ka kulisap dan to pogkoon to sapu, woy to waro pad noubus ka sapu, nabou lagboy ka Magboboot kandan, woy piglogparan din sikandan to mokohinhinaat no dau. 34 No pighingaranan dan ka sikan no ugpaan to Kibrot Hataaba, no to kanta pad ‘lobong to ko-ima’, hoo su dio piglobong dan ka mgo otow no no-ima to loin no koonon. 35 Ligkat to Kibrot Hataaba nighipanow ka koot-otawan pohondio to Hasirot, woy dio sikandan nig-ugpo.