Hibriu 10

Madmaroyow ka intubad ni Hisus

¹ Nò, ka sikan no Balaod ni Moisis dongan, noiling do to alung su tigbal do nokog-iling to sikan no ogpokouma no madmaroyow no ian tu-tuu uromo. Sikan ian, agad to tag sagboka no tuid, ka sikan no ogsimba, oghutukhutuk to igtubad dan to ayam no igtuman to sikan no tahan no Balaod, di waro agad sagboka kandan no nakatood to ogkaayun ka goinawa ran to Magboboot. ² Ian su ko naawo pa ka mgo salo dan ligkat to ingkatubad dan, warad on porom igmasakit to goinawa ran to sikan no mgo salo dan. No konad on porom og-awoson no oghutukhutuk to duon igtubad. ³ Dokad di, su ogpokohutuk to oghimatoy to mgo ayam no igtubad dan to tag sagboka no tuid, ogpakaroromdom sikandan to waro naawo ka mgo salo dan. ⁴ Ian su kono ogkohimu ko ka langosa to mgo lukosan no baka woy ko kambing, ogpakaawo to salo.

⁵ Sikan ian, ko magaan on oghondini si Kristu to soini no tano, nigkagian din ka Magboboot to:

“Waro nu noiniati ka mgo ayam no igtubad to mgo otow woy ka duma no igsundu dan,

di duon lawa no impanagana nu kanak.

⁶ Waro nu karagoi ka mgo ayam no ogkohimatayan, woy ko ogtutungon no igpanubad, woy ko duon duma no igsundu no ogpaawo poron to mgo salo.

⁷ Soini dod ka ignangon ku to, ‘Soini ad on, Magboboot, to oyow ogpakatuman a to ogkoiniatan nu. No ka sikan, ogkounawa ro to sikan no impasulat nud dongan tongod kanak dio to sikan no ingkasulat to Balaod nu.’”

⁸ Agad to sikan no oghimuon dan, ogpakatuman to sikan no tahan no Balaod, di nigkagi ka sulat to sikan ganna to, “Waro nu noiniati woy waro nu karagoi ka sikan no mgo ayam no ingkatubad woy ka mgo ayam no impatutung dan woy ko ka duma no insundu to mgo otow no igpaawo poron to salo dan,” kagi. ⁹ No pogkaponga to sikan, nigkagi man do to, “Soini ad on, Magboboot, to oyow ogpakatuman a to ogkoiniatan nu.” No ligkat to sikan no innangon din, nataga kid on to warad on pulus dio to Magboboot ka sikan no mgo tahan no igkatubad dan woy songo nataga kid to, ka kamatayon ni Hisu Kristu ka ingkaliwan to sikan no mgo ayam no igkatubad dan. ¹⁰ Nò, su nigtuman on ni Hisu Kristu ka sikan noiniatan to Magboboot, naawo on ka mgo salo ta woy naayun on ka goinawa ta to Magboboot su ligkat to lawa ni Hisu Kristu no ingkatubad din to sikan no sagboka ro no pogkamatoy rin no igliwan kanta. No kono og-awoson no ogkohutuk.

¹¹ Ka tibo no mgo talagpanubad to mgo Hudiu, allow-allow ogtuman to katondanan dan no ogkohutukhutuk ka sikan dod no pogtubad dan to mgo ayam. Di kono man ogpakaawo to mgo salo.+11 Ka nigsulat to sikan, duon dod ka sikan no batasan to mgo Hudiu to oghutukhutuk no ogpanubad to mgo ayam. Di kuntoon, konad ogkohimu su warad ka sikan no Dakol no Ampuanan dan no kono oglitos to Balaod dan ko duon igpanubad no ayam ko kono no dio do to sikan no Dakol no Ampuanan dan. ¹² Di si Kristu atag, kasagboka ro ka ingkatubad din no oglitos to ig-awo to salo ta taman to waro katamanan. Ko napongaan on ka sikan, nigpinpinnuu on dio to kawanan to Magboboot. ¹³ No dio dod ogtagad taman to ogdoogon on to Magboboot ka tibo no mgo usig din. ¹⁴ Ian su ligkat to sikan no kasagboka ro no ingkatubad din, napongaan din on ka nighimu rin no ig-awo to salo to mgo otow oyow ogkohimu no ogkaayun on ka goinawa ran to Magboboot taman to waro katamanan.

¹⁵ No ka Gimukud to Magboboot, songo ogpamalogot kanta to sikan su kagi rin to,

¹⁶ “Kagi to Lagboy no Igbuyag to, ‘Soini ka oghimuon ku kandan no sabut, to uromo dio kud on igsabuk ka Balaod ku to taliwaro to goinawa ran woy dio ku igsulat to doromdom dan.’”

¹⁷ Woy kagi rin pad to, “Kono kud on ogdoromdomon ka mgo salo dan woy ka mgo maroot no nighimu ran.” ¹⁸ Nò, su nigpasaylu rin on ka mgo salo ta, konad on og-awoson to duon pad oghimatayan ta no igpanubad no ig-awo poron to mgo salo. (no title)

Ogdanian ta ka Magboboot

¹⁹ Sikan ian mgo sulod to pogtuu ta, su ligkat to langosa to ni Hisus to pogpakimatoy rin kanta, waro igduwaruwa ta ko ogsolod kinow to sikan no Kinaroyawon no Ampuanan no dio to Magboboot. ²⁰ Pighimu rin ka iam no dalan no dio to kandin oyow ogkabogayan ki to kouyagan ta no waro katamanan. No naawo on ka nakaatang kanta oyow ogpakarani kid on to Magboboot. Ian su ka lawa ni Hisus ko namatoy on ka ingkaawo to sikan no nokoolot kanta to Magboboot. ²¹ No kuntoon, duon on mabogbog no talagpanubad tanow no og-alap kanta no mgo sakup to Magboboot. ²² Sikan ian, mgo sulod, ogdani kinow on to Magboboot su ligkat to tu-tuu ian no goinawa ta kandin woy ka hogot no pogtuu ta. Lagkos to og-awoson to ogmaawangon on ka goinawa ta woy ka mgo doromdom ta su ligkat to naawo on ka mgo maroot no nokoholos. No ka sikan, ogkounawa to naramulasan on ka goinawa ta to langosa ni Hisus woy nakasonob kid on to mating-ow no woig. ²³ Kono ta oglokaan ka im-imanan ta no og-abinon ta woy kono ki ogduaruwa su ogkasaligan ta ka Magboboot to ogtuman to tibo no insabut din. ²⁴ Agad pad, ogdoromdomon ta ko ogmonuon ta to ogmoos-osonoy oyow ogparakdakoloy ki to goinawa ta woy ogmabulbuligoy kinow. ²⁵ Kono ki ogkoiling to duma no oghagtonghatong to poglimudlimud dan no og-ampu. Di sikanta atag, oglimudlimud ki nasi to oyow ogmoos-osonoy ki su nataga ki to magaan on ogtuman ka allow to poglibong ni Hisus to soini no tano.

²⁶ Ian su ko nigtokod kid on to tu-tuu ian ka impakimatoy ni Hisus kanta, di ko ogparagason ta ro duon no ogtuuran to ogpakasalo, warad dangob no igkatubad ta no ogpakaawo to salo ta dio to Magboboot. ²⁷ Di ian naan do atag kanta to ogkahallokan ta ka ogpokouma no logpad to Magboboot no ogkoiling to hapuy no ogliabliab no og-ubus to mgo otow no nig-atu kandin. ²⁸ Dongan, ko duon daruwa woy ko tatolu no ogpakamalogot to duon otow no niglop-ang on to Balaod ni Moisis, oghimatayan do duon to waro igkohoy-u. ²⁹ Nò, ko sikan ka ogkoumaan to mgo otow no waro nigpaagad-agad to Balaod ni Moisis, ogkoomonu on buwa ka sikan no otow no og-iniug to Anak to Magboboot? Dakoldakol lagboy ka kandin no iglogpad su dio to goinawa rin, nigdoisokan din ka pulus to langosa ni Hisus. Di ka sikan no langosa ka ig-ayun poron to goinawa to sikan no otow dio to Magboboot, woy sikan dod ka igpatokod to sikan no iam no sabut to duon on dalan ta dio to Magboboot. No ka sikan, songo ogkounawa to niglomotan din ka Gimukud to Magboboot no ogkohoy-u kanta.

³⁰ Nataga ki to tu-tuu ian ka soini su kinagian to Magboboot to, “Kanak ka oglogpad. Kanak ka ogsuli.” Woy songo innangon din to, “Ka Lagboy no Igbuyag ka ogpakaboboot to mgo otow no impasakup din ko oglogparan woy ko kono.”+30 Ogkabasa to Deuteronomio 32:35,36 woy dio to Ruma 12:19. ³¹ Nò, dakol lagboy ka igkaallok ta ko ogkoumaan kid on to iglogpad to Magboboot no kono ogkamatoy.

³² Di, doromdoma now ka nokani ko iam kow mabat-awi to pogtuu now to tu-tuu ian. Moon-ing ka nig-aguantoon now no igkabaybayari now, no agad mohirap, waro kow maroog. ³³ Duon allow no nigpasiporan kow woy nigbaybayaran kow to tangkaan to mgo otow. Woy duon mgo allow no nigbulig kow rod to duma now no nigbaybayaran. ³⁴ Ian su nohoy-uan now on ka sikan no mgo duma now no napirisu su ligkat to pogtuu ran. Agad ko naagow ka mgo kalaglagan now, nig-aguantoon now no narago kow nasi su nataga kow to duon karoyawon now no dio to Langit no kono ogkaagow. ³⁵ Sikan ian, kono now ongkori ka pogsalig now to Magboboot, su ko ogparagason now ro duon, ogpakapurut kow uromo to sikan no karoyawon no igbalos kaniu. ³⁶ Ian su og-awoson now to og-aguantoon ka igkabaybayari now to oyow ogpokohimu kow to ogkoiniatan to Magboboot woy to oyow ogkapurut now ka sikan no innangon din kaniu. ³⁷ Ian su soini ka impasulat to Magboboot dongan. Kagi rin to,

“Magaan on ogdatong ka kaniu no ogtagaran.

Kono sikandin ogkatalantan.

³⁸ Woy ka sakup ku no nohimu on no maroyow dio to tangkaan ku ligkat to pogtuu rin kanak, ogkabogayan sikandin to kouyagan din no waro katamanan.

Di ko duon otow no og-iniug kanak, kono a ogkarago kandin.”

³⁹ Di sikanta atag, kono kid ogkoiling to sikan no mgo otow no og-ituos no ogkalagak to dalan no oghondio to Magboboot. Ian su kono ki ogloko to pogtuu ta no ogkapangabangan ki rod.