Ka sulat ni Pablo ki
Pilimun
1
1 Kanak no si Pablo, napirisu ad su nigtuu a ki Hisu Kristu. No sikanak woy si Timoteo no sulod ta to pogtuu ta, ogsulat koy koykow, Pilimun, no talagbulig kanami no indakoloy noy to goinawa. 2 Woy ogsulatan noy rod si Apia no ataboy ta to pogtuu ta woy si Arkipu no duma noy no sundalu ni Hisu Kristu, woy ka mgo otow no ogtuu ki Hisus no ogkalimudlimud to baloy nu to og-ampu.
3 Pilimon, ogbuyu a to oyow ogkohoy-uan ka to Magboboot no Amoy ta woy si Hisu Kristu no Lagboy no Igbuyag ta, woy ogbuyu a to oyow ogbogayan ka ran to maawang no goinawa.
Ka pogsayo-sayo ni Pablo tongod ki Pilimon
4 Ko og-ampu a to Magboboot, ungod ku ogsayoon sikandin tongod koykow, 5 su nigdinog a to nangnangonon tongod to masalig ka pogtuu nu to Lagboy no Igbuyag ta no si Hisus woy to dakol ka goinawa nu to tibo no mgo otow no ogtuu kandin. 6 No ogbuyu a to Magboboot to oyow ligkat to maroyow no pogdumaruma tanow no ogligkat to pogtuu ta ki Hisus, ogkatimulan on ka pogkasabuti ta to tibo no karoyawon no imbogoy to Magboboot kanta no ogligkat to nasalungpung kinow on ki Kristu. 7 Ian to ogsayoon ku ka Magboboot su narago a lagboy woy su nabuligan ka goinawa ku su dakol so goinawa nu to mgo otow no nigtuu ki Hisus, woy su ligkat koykow, sulod ku, songo nabuligan on ian ka kandan no goinawa.
Ka Igbuyu ni Pablo tongod ki Unisimu
8 Sikan ian, sulod, oglangob a poron no ogsugu koykow oyow ogpakatuman ka to ignangon ku su duon katondanan ku ligkat ki Kristu to ogsugu poron. 9 Dokad di su dakol so goinawa ku koykow, igbuyu ku ro duon. No agad to sikanak, no si Pablo, suguonon a ni Hisu Kristu, no kuntoon, napirisu a su ligkat to pogtuman ku kandin. 10 Di ogbuyu a ro koykow to oyow ogmaawanga nu ro bag ka goinawa nu ki Onisimu. Sikandin, ogkounawa to anak ku su ko kai a napirisu, nohimu ad on no amoy rin no nigtuu on sikandin ki Hisus. 11 Nokani, waro pulus nu kandin. Di kuntoon, dakol on ka pulus ta kandin.
12 No kuntoon, Pilimon, ogsuguon ku si Unisimu to ogpoulion kud dio to koykow. Di ko oghipanow on sikandin, inat to ogpakaruma ka goinawa ku kandin. 13 Oggalaton ku pad poron kai to kanak oyow ogkabuligan a pad no ogliwan poron koykow ko makatood ka poron no ogbulig kanak tagood to napirisu ad su nigligkat to pog-alap-alap ku to soini no Maroyow no Nangnangonon tongod ki Hisus. 14 Dokad di, woy ku ro oghohonduon ko igbogoy nu pad ian kanak su kono a ogkoiniat no ogkapogos ka no ogkohoy-u kanak su ian maroyow ku ko ka igkohoy-u nu kanak, dio ian lagboy ogligkat to goinawa nu to ogbulig.
15 Soini buwa ka tuud to Magboboot to nalonusan ka pad ni Unisimu to malopot do su oyow, ko og-uli on koykow, diad on og-ugpo koykow taman to taman. 16 Di kuntoon, konad on no uripon nu ro si Unisimu ko kono no sulod nud on. Dakol ka goinawa ku kandin di dakoldakol man ka koykow no goinawa kandin su nohimu on ian no patalasulod ta su ligkat to nigtuu on to Lagboy no Igbuyag ta. 17 Nò, ko nigtokoran a nu no duma nu songo ogtokoron nu rod si Unisimu, no tagibaloy to nasagman a nu ro ko oghinguma on dio to koykow. 18 Ko duon salo din koykow, woy ko duon mgo utang din, ian a nu sukuti. 19 Kanak no si Pablo, nigsulat a to kanak lagboy no bolad to, Kanak ka ogbayad. Di nataga ka to duon igbalos nu poron kanak su ligkat to in-anad ku koykow, nigtuu kad on no nabogayan kad on to kouyagan no waro katamanan. 20 Sikan ian, sulod, kohoy-ui a nu su patalasulod ki to pogtuu ta to Lagboy no Igbuyag ta no si Kristu, no tumani a nu bag ka intugun ku tongod ki Unisimu su nasalupung ka goinawa ta ki Hisu Kristu. Ian oyow ogmaawang on ka goinawa ku. 21 No to soini no pogsulat ku koykow, dakol ka pogsalig ku su nataga a to ogpaagad-agad ka kanak. Woy songo nataga a to dakoldakol pad ka oghimuon nu to soini no ogbuyuon ku.
22 Woy duon pad dangob no ogbuyuon ku koykow. Igpanagana now pa kanak to oghibatan ku su og-iman-iman a to ogtabakan to Magboboot ka in-ampu now kanak to oyow ogpakalibuwas a kai to pirisuan no ogpakatood a no ogpanumbaloy dio to kaniu.
Ka igtuguntugun ni Pablo
23 Si Ipaparas no duma ku no songo napirisu su ligkat to pogtuu rin ki Hisu Kristu, ogpanangon to ogdoromdomon din sikoykow, Pilimun. 24 Woy songo ogdoromdomon ka ni Markos, woy si Aristarku, woy si Dimas, woy si Lukas. Mgo duma ku sikandan to ognangonnangon to mgo otow tongod ki Hisus. 25 Ogbuyu a to oyow ogkohoy-uan kow to Lagboy no Igbuyag ta no si Hisu Kristu.