20
Ka Poglibong woy ni Pablo dio to Masidonia woy to Girisia
1 Poghagtong on to samuk to mgo otow, nigpalimud on ni Pablo ka mgo nigtuu ki Hisus no nig-os-osonan din sikandan. Pogkaponga, nighipanow on si Pablo no oghondio to Probinsia to Masidonia. 2 No nanagpitsagpit sikandin dio to mgo lunsud dio to ogkabayaan din. No dakol ka ingkabulig din to igpohogot to pogtuu to mgo otow no nigtuu ki Hisus. Pogkalugoy, nokouma on si Pablo dio to Probinsia to Girisia. 3 Tatolu no bulan ka igpougpo din dio to Girisia, no nakaroromdom sikandin to og-untud to barku no oghondio to Probinsia to Siria. Dokad di, su nanangonan on sikandin to duon tuud to mgo Hudiu to ogbantaanan to oghimatoy kandin, nigtuud si Pablo to oglibong no dio ogbayo to Probinsia to Masidonia. 4 Duon mgo otow no nanduma ki Pablo no oghondio to lunsud to Hirusalim. Ka ngaran dan, si Sopatir no taga Biria no anak ni Piru, si Aristarku woy si Sigundu no mgo taga Tisalonika, si Gayo no taga Dirbi, woy si Timoteo. Duon dod si Tikiku woy si Tropimu no mgo taga Asia. 5 Sikandan, nigsakoy on to barku no nighun-a on dio to lunsud to Troas. No ko diad on, nigtagad kanak no si Lukas woy ki Pablo. 6 No sikanami woy si Pablo, nighipanow koy on no nokouma koy on dio to lunsud to Pilipus. Woy nig-amut koy pad to Pagkoonan to Harina no waro Ig-amut to Igpatulin. a Pogkaponga to sikan, nigsakoy koy to barku ligkat to Pilipus b no nigsundul koy dio to lunsud to Troas. Lalima no allow noy woy koy nigdatong dio to Troas no nakaamut koy on to duma noy. No papitu no allow ka ig-ugpo noy dio to Troas.
Ka Mohuri no Ighondio ni Pablo to Troas
7 Ko dominggu on, nalimud on ka mgo otow no nigtuu ki Hisus su oyow ogkokoon koy to harina no waro amuti ka igpatulin. c No si Pablo, nignangonnangon kanami tongod ki Hisus su pogkapawò, oghipanow on. Sikan ian to nigparagas to pognangonnangon din taman to liwaro on to kausiloman. 8 Moon-ing ka mgo ilawan duon to sikan no sinabong no piglimuran noy dio to ampow to sikan no baloy. 9 No duon balubato no nigpinpinnuu dio to bintana. Si Eutiku ka ngaran din. Pogkagi pad ni Pablo, ogdungdunggayon on no nokohirogo on. Nakolid no noulug on dio to tano ligkat to igkatolu no handana. Poghonat dan ka lawa rin no namatoy on. 10 Di namanuug on si Pablo, no niglangkoban woy pigbakus din on ka namatoy. No kagi ni Pablo to, “Kono kow on ogsasasow su duon on goinawa rin.” 11 Pogpamanoik man do woy si Pablo, nanlotiblotib on to paan woy nigkokoon on. Pogkaponga, napawaan on ka mgo otow woy ki Pablo no nigpanangnangonoy. Pogkapawò, nighipanow on si Pablo. d 12 No si Eutiku no ka balubato no noulug, nigduma to mgo otow no pog-uli dan. No nigmaawang on ka goinawa ran su nouyag on sikandin.
13 Nò, to pogligat ni Pablo, noiniat din to ogbot-os no oghondio to lunsud to Asun. e Sikan ian to nighun-a koy on nigligkat. No nigsakoy koy on to barku no nigpanag-ilis koy ro to poghondio noy to Asun. Ian tuud noy to ogtuluyon noy si Pablo dio to lunsud to Asun.
14 Pogduung noy dio to Asun, nigtagbu koy ni Pablo. No nigpasakoy noy on sikandin no nigparagas koy on ka nighondio to lunsud to Mitilini. 15 Nigsakoy koy man do ligkat to Mitilini, no pogkapawò, nakaligad koy ro to pulu to Kiu. f Mapawò, nigsagpit koy dio to pulu to Samu. Mapawo man do no nokouma koy on dio to lunsud to Militu. 16 Ian to dio koy mogdatong to Militu su pigtuud ni Pablo to ogligaran do ka lunsud to Episu su waro din noiniati to ogkalugoy dio to Probinsia to Asia. Naragusu su og-awoson din to oyow ogpokouma dio to lunsud to Hirusalim litos to og-amut to allow to Pagkoonan to mgo Hudiu no ogkohingaranan to Pintikustis. g
Ka Igtuguntugun ni Pablo to mgo Pogbuyagon to mgo Nigtuu no mgo taga Episu
17 Nò, to dio dod si Pablo to lunsud to Militu, nigpatugunan din ka mgo pogbuyagon to mgo nigtuu no taga Episu oyow oghondio to kandin dio to Militu. 18 Pogkouma ran on, kagi ni Pablo kandan to, “Sikaniu, nataga kow to tibo no batasan ku ka dio a pad to kaniu nokani no nigligkat to allow to pogdatong ku dio to Probinsia to Asia, taman kuntoon. 19 Woy nigkita kow to nigpoobos a to ogpaagad-agad a to Lagboy no Igbuyag ta no si Hisus. Nataga kow rod to malasi a makasinogow tongod to mgo igkabaybayari ku no nigligkat to mgo Hudiu no waro nigtuu no nigbayadbayad kanak. 20 No agad hondoi a nignangonnangon woy ko nig-anad, ko dio to mgo baloy now woy ko dio to mohon-ing no mgo otow, nataga kow to waro ku iholos to agad nokoy no ogpakabulig kaniu. 21 Agad Hudiu woy ka kono no Hudiu, nigbohog ku sikandan to og-awoson to ogsonditan woy og-ongkoran dan on ka mgo maroot no oghimuon dan woy to oghalinon dan so goinawa ran dio to Magboboot no ogtuu on ki Hisu Kristu no Lagboy no Igbuyag ta. 22 No kuntoon, ogpaagad-agad a to Gimukud to Magboboot no oghipanow ad on no oghondio to Hirusalim. Waro a mataga ko ogkoumonu ad diò, 23 di soini ro ka natagaan kud su, dio to agad hondoi no lunsud no ogkasagpitan ku, duon igpohitaga to Gimukud to Magboboot kanak to ogkapirisu ad on dio to Hirusalim woy to duon ogkabayaan ku no mgo igkabaybayari. 24 Di,” kagi ni Pablo, “kono ku ogkannugunan ka lawa ku. Balagad ko ogkamatoy ad oyow ogkapongaan kud on ka katondanan ku woy to sikan no igpohimu to Lagboy no Igbuyag ta no si Hisus -- no ian to oyow ignangonnangon kud on ka Maroyow no Nangnangonon to sikan no igkohoy-u to Magboboot to mgo otow.
25 No kuntoon, duon ignangon ku kaniu tibo no malasi ku nanangoni tongod to pandatuan to Magboboot, to natagaan kud on to kono kid on ogpokogkita su kono ad ogpakalibong kai. 26 Sikan ian, indani now ka soini no ignangon ku kaniu kuntoon to, ko duon ka agad hontow kaniu no ogkalogparan to waro katamanan, waro salo ku, 27 su waro ku iholos ka agad nokoy no imboot to Magboboot no igpohitaga rin kaniu.
28 Nò, sikaniu no mgo pogbuyagon, tantanuri now ka pogtuu now woy ka pogtuu to mgo sakup to Magboboot, su ka Gimukud din ka nighimu kaniu no mgo talagbantoy to mgo otow no nohimu on no sakup din no ian napurut din su ligkat to langosa to Anak din lagboy no si Hisus. 29 Nataga a to uromo no waro ad kai, duon oglopow kai to kaniu su oyow ogpasuwayon kow to pogtuu now. No ian dan ogkounawaan ka mgo magintalunan no asu no kono man ogkohoy-u to ogdawion dan. 30 Woy,” kagi, “duon pad mgo otow no ogligkat lagboy to kaniu no ogbalowbalow to kinagian to Magboboot oyow duon mgo otow no ogpasakup kandan. 31 Sikan ian to ogbohog a kaniu to oyow ogngilam kow woy ogdoromdomon now ka soini no tatolu no tuid ku kai to kaniu, su agad marusilom woy ko maallow, malasi a ogpanluwoi ka nig-anad a kaniu.
32 Nò, kuntoon,” kagi ni Pablo, “ogpabuligan ku sikaniu to Magboboot woy to sikan no kinagian din no igpohitaga to sikan no dakol no igkohoy-u din kanta su ian ka ogpokohogot to pogtuu now woy ogpakabogoy kaniu to mgo karoyawon no igtagad to Magboboot to tibo no mgo otow no ogpasakup kandin.
33 Ka dio a nokani to kaniu, nataga kow to waro a noiniat to salapi now, ko bulawan now woy ko manggad now. 34 Di ka soini no mgo bolad ku ka nigtalabau to oyow duon ka igboli ku to mgo og-awoson ku woy ka og-awoson to mgo duma ku to pog-ugpo noy.” 35 No to tibo no batasan ku, impohitaga ku kaniu to og-awoson ta no ogtalabau ki oyow duon igkabulig ta to mgo otow no duon og-awoson dan. Ian su ogdoromdomon ta ka kagi to Lagboy no Igbuyag ta no si Hisus to, ‘Ka igkarago ta ko ogpakabogoy ki, dakoldakol to igkarago ta ko ogkabogayan ki,’” kagi ni Pablo.
36 Pogkaponga rin to innangon din, nanluhud sikandan tibo woy nig-ampu si Pablo. 37 No nakasinogow sikandan tibo no nambakus ki Pablo woy nigharokan dan sikandin. 38 No ian to dakol ka masakit to goinawa ran su intagataga ni Pablo kandan to ogpokohipanow on sikandin no konad on ogpokogkitakita sikandan. Pogkaponga, nan-alagad pad ki Pablo dio to barku.