19
Ka Poghondio ni Pablo to Lunsud to Episu
1 Tagood to dio pad si Apulus to lunsud to Kurintu, nighipanow si Pablo no dio mogbayo to kabubunganan to sikan no probinsia ka oghondio to Episu. Pogkouma rin on, duon nigkita rin no mgo otow no nigtuu on ki Hisus. 2 Kagi ni Pablo kandan to, “Og-inso a kaniu, ka nigtuu kow, nigsolod ka Gimukud to Magboboot dio to goinawa now?”
Kagi to mgo otow to, “Waro koy nangoni ko duon Gimukud to Magboboot.” 3 Kagi ni Pablo to, “Nokoy ka nigtuuan now ko nigpabautismuan kow?”
Nigtabak ka mgo otow to, “Ian noy nigtuuan ka in-anad ni Huan nokani ka nigbautismu to mgo otow dio to woig to Hordan.”
4 Kagi ni Pablo to, “Ka pogbautismu ni Huan to mgo otow, ian su oyow igpapitow ran to ogsonditan woy og-ongkoran dan on ka mgo batasan dan no maroot. No innangon ni Huan kandan to og-awoson dan to ogtuuan dan ka Otow no ogsundul kandin no si Hisus.” 5 Pogdinog to mgo otow to kagi ni Pablo, nigpabautismu on man do to ngaran to Lagboy no Igbuyag ta no si Hisus. 6 Pogkaponga, nigtorong ni Pablo sikandan to bolad din to nig-ampu no niglonaan sikandan to Gimukud to Magboboot no nigkakagi on to mgo kinagian no waro dan masabuti woy innangonnangon dan on ka kinagian to Magboboot. 7 Ka sikan no nigtuu ki Hisus, tigbal do no sampulu woy daruwa no mgo otow.
8 No taman to tatolu no bulan, niglibonglibong nigsolod si Pablo to anaranan to mgo Hudiu no waro mog-ul-ulung to pog-al-alukuy din kandan tongod to pogtuman to Magboboot to pandatuan din oyow ogpatuuon din poron. 9 Dokad di duon mgo otow no maligal no waro nigtuu to innangon ni Pablo. Duon do to tangkaan to mgo otow no nalimud, nigdoot dan ka sikan no Dalan to Magboboot. Sikan ian to nig-awo on si Pablo to anaranan to mgo Hudiu no nigduma rin ka mgo otow no nigtuu ki Hisus no nighalin on dio to anaranan ni Tiranu. 10 daruwa no tuid ka pog-anad ni Pablo duon to baloy ni Tiranu, no sikan ian to tibo no mgo taga Asia, agad ka Hudiu woy ka kono no Hudiu, nakarinog to kagi to Lagboy no Igbuyag ta no si Hisus.
Ka Nighimu to mgo Anak ni Siba
11 Nigbobootan si Pablo to Magboboot oyow ogpokohimu to mgo mabogbog no kabolongbolonganan no marulag ogkakitaan. 12 Agad ko duon mgo kogos woy ko dangob no manggad no igparagkot dan to lawa ni Pablo woy songo igparagkot dan pad to lawa to mgo otow no duon masakit, no ogkaawo on ka mgo masakit dan woy ka mgo busow duon to lawa ran.
13 Nò, duon mgo Hudiu dio no ian hulingan dan to ogpanagpitsagpit dio to mgo lunsud no ogdogil to mgo busow no duon lawa to mgo otow. Nig-ol-olog sikandan ko oghingaranan dan ka ngaran to Lagboy no Igbuyag ta no si Hisus no igdogil dan poron ka mgo busow. No kagi ran to, “Su duon katondanan to ngaran ni Hisus no ignangonnangon ni Pablo, ogdogilon noy sikaniu no mgo busow.” 14 No duon papitu no otow no anak ni Isiba no songo nig-ol-olog to sikan. Hudiu ka amoy ran no Labow no Talagpanubad to mgo Hudiu. 15 Di nigtabak ka busow to, “Ogtokoron ku si Hisus woy ogtokod a ki Pablo. Di sikaniu atag, waro a mogtokod kaniu to duon katondanan now,” kagi to busow. 16 Sikan ian no ka otow no pigbusawan, nigtitinagpaan din ka sikan no papitu no otow woy naroog dan on ka tibo to sikan ian no papitu. No nakapallaguy on sikandan to nalobasan on woy napalian on ka mgo lawa ran.
17 Nò, ka mgo Hudiu woy ka kono no Hudiu no mgo taga Episu, tibo nanangonan on to noumonu, woy nanahallok on. Nigsayo dan on ka ngaran to Lagboy no Igbuyag ta no si Hisus.
18 No to sikan no mgo otow no nigtuu on ki Hisus, mohon-ing ka nan-amut to sikan no nalimud no mgo nigtuu, no duon to tangkaan to dan innangon dan ka mgo nohimu ran no kono no litos su og-ongkoran dan on. 19 Woy duon to sikan no mgo nigtuu ka nokani nighimu to mgo pamulinganon no nigligkat to bogbog to mgo busow. Woy duon mgo diblu ran to pog-anad to sikan no mgo pamulinganon. No nan-alap dan on ka sikan no diblu no dio dan silabi ka tibo duon to tangkaan to tibo no mgo otow no nalimud. Pogsool dan pad ka bayad dan to sikan no mgo diblu no nasool to kalimmaan no malan to kandan no salapi. 20 Sikan ian to mohon-ing ka nigdinog to kinagian to Lagboy no Igbuyag ta woy nigmanokal lagboy to sikan no ugpaan.
21 Pogkaponga, duon tuud ni Pablo no nigligkat to Gimukud to Magboboot to oghipanow on no dio ogbayo to mgo Probinsia to Masidonia woy ka Girisia no oghondio to Hirusalim. Kagi ni Pablo to, “Pogkaponga ku to ogpanumbaloy dio to Hirusalim, og-awoson ku to oghondio a to lunsud to Ruma.” 22 Sikan ian to pinohun-a ni Pablo si Timoteo woy si Irastu, daruwa no talagbulig din, dio to Masidonia di nig-ugpo pad si Pablo dio to Asia.
23 Waro do nigbuloy no duon nohimu on no dakol no samuk dio to Episu su tongod to sikan no Dalan to pogtuu ki Hisus. 24 Ian su duon otow no talagsalsal to plata no si Dimitriu ka ngaran din. a Talaghimu sikandin to mgo mallintok no baloybaloy no pig-iling dan to dakol no baloy no simbaanan to mgo taga Episu to inotow no nighingaranan dan ki Diana.b Dakol ka salapi no ogkapurut ni Dimitriu woy ka duma no mgo talagsalsal no ogligkat to igduwad dan to sikan no mgo baloybaloy. 25 Sikan ian no niglimud ni Dimitriu ka mgo talagbulig kandin woy ka duma no mgo talagsalsal. Kagi rin to, “Mgo sulod, natagaan now ka soini no hulingon ta to ian ka igpanalapi ta. 26 Di kuntoon, nakakita kow woy nigdinog now ka oghimuon ni Pablo. Di ka soini no oghimuon din, kono no kai ro to Episu di marani on ogkalogob ni Pablo ka tibo no mgo lunsud to Probinsia to Asia. No kuntoon, mohon-ing on ka mgo otow no ogkoim-imuan din to oyow ogkoongkoran dan on ka pogtuu ran to mgo inotow. Ian su ognangonan din ka mgo otow to kono no magboboot ka og-ampuan to mgo otow no oghimuon ro duon to bolad.” 27 Kagi ni Dimitriu, “Kuntoon, igkasasow ta lagboy ka soini no talabau ta su ko igmaroot on to goinawa to mgo otow ka oghimuon ta, konad on ogboboli. Di kono no sikan dò, di songo kuwo angkuan ko warad bali ka soini no baloy no simbaanan ta ki Diana. Di ian ka mabantug no magboboot ta,” kagi, “Di mangkuan buwa ko ogkaawo on ka bantug din. Kalogon do su si Diana ka ogsimboon to tibo no mgo taga Asia woy to tibo no otow kai to kalibutan.”
28 Pogdinog to mgo talagsalsal to kagi ni Dimitriu, nabolu on ian lagboy. Nigbabansagon sikandan to, “Mabogbog si Diana no ian magboboot to mgo taga Episu.” 29 Nò, naramoy on ka duma no otow dio to Episu su nigtangkap on ka samuk dio to tibo to sikan no lunsud dan. Sikan ian to niggongonan to mgo otow ka daruwa no duma ni Pablo no taga Masidonia no si Gayo woy si Aristarku. No piggaganoy ran on sikandan dio to dakol no limuranan to mgo otow. 30 Ogkoiniatan porom ni Pablo to og-amut dio to sikan no nalimud no mgo otow dio to limuranan dan. Di waro ibogoy to mgo nigtuu. 31 Woy duon dod mgo igbuyag to Probinsia to Asia no alukuy ni Pablo, no impaalap kandin to tugun to kono oghondio to sikan no limuranan.
32 Nò, tagood to sikan, nigmamasamuk on ka tibo no mgo otow no nalimud woy nigmaso-soipoy ka ogbabansagon. Di ogloinloin ka ogkagion dan su ka mohon-ing to sikan no nalimud, waro mataga ko nokoy ka igkalimud dan.
33 Woy duon mgo otow no nahan dan ko si Alihandru buwa ka ogligkatan to samuk su duon mgo Hudiu no impatangko kandin to mgo otow. No nigkamoy on ni Alihandru oyow oghagtong on ka ogkakagi su duon porom ignangon din. 34 Dokad di, nigtokod ka mgo otow to Hudiu si Alihandru c no sikan ian to nigbabansagon dan to nigkagi to, “Mabogbog si Diana no ian magboboot to mgo taga Episu.” No sikan do ian ka imbabansagon dan taman to daruwa on no uras. 35 Woy on nighagtong ko nigsaparan on to kunsial ka mgo otow. Kagi rin kandan to, “Mgo sulod no taga Episu, tibo kinow man nataga to sikanta no taga Episu ka ogpokouyamu to soini no dakol no baloy no simbaanan ta ki Diana no mabogbog no magboboot ta. Woy sikanta rod ka ogpokouyamu to sikan no ogtahuron ta no bato no noulug no nigligkat to langit. 36 Nò, su waro otow ogpakaligal to sikan, og-awoson no oghagtong kow on ka ogsasamuk woy tantanuri now ka goinawa now oyow kono kow ogpakasalo to balaod ta.” kagi. 37 “Ian su pitow kow, nig-alap now kai ka soini daruwa no otow di waro dan takawa to kalaglagan to mgo simbaanan ta woy songo waro dan doota ka inotow ta no boi. 38 Nò, ko duon pa igbayung ni Dimitriu woy ka mgo duma rin no mgo talagsalsal, og-awoson dan no oghondio pad to mgo talaghusoy dio to husayanan woy ko dio to mgo igbuyag ta, no dio dan ognangon ko nokoy ka ig-ogot dan porom to songo otow. 39 Woy ko duon pad dangob no ogkoiniatan now, og-awoson to ogtagad kow to allow no litos to balaod ta no ogpalimud on ka mgo taga lunsud oyow ogkohusayon. 40 Ian su tongod to soini no samuk kai kuntoon, songo kuwo no ogkoogotan kinow su waro man igkatabak ta ko ogkoin-insaan ki ko manio to nasamuk kid,” kagi to kunsial. 41 Pogkaponga to sikan no kagi rin, nigsugu on to kunsial to oyow ogpoulion on ka mgo otow dio to baloy ran.