8
Nig-os-os Ka Woig
1 Di nigdoromdom ka Magboboot ki Noi woy to mgo magintaunan woy mgo adyam no duma rin to arca, woy pigpakaamagan to Magboboot ka ampow to tano woy nig-os-os on ka woig. 2 No kuntoon pigsagpongan on ka mgo sobsob dio to diraom, woy pigpanongsong ka mgo badyaanan to woig to langit, woy nighagtong ka uran. 3 Nigparagas nig-os-os ka woig dio to ampow to tano sood to 150 no allow, 4 taman to igkasampuu woy papitu no allow to igkapitu no buwan noko-untud ka arca dio to bubungan to Ararat. 5 Nigparagas nig-os-os ka woig taman to nakagimow on ka mgo igdus to mgo bubungan to an-anadyan no allow to igkasampuu no buwan.
6 Takas to 40 no allow pigpuwasan ni Noi ka bintana no nohimu rin duon to arca, 7 woy nigpalibuwas sikandin to sagboka no uwak, woy nigladyang-ladyang do sikan taman to nig-os-os on ka woig to ampow to tano. 8 Songo nigpalibuwas sikandin to sagboka no salapati odyow to pogpitow ko nig-os-os on ka woig to ampow to tano. 9 Di waro makakita ka salapati to latunan su duon pad woig to ampow to tibon tano; no niglibong sikan dio ki Noi to arca. Inpalibuwas ni Noi ka boad din odyow to pogpurut to salapati woy inlibong din sikan to sood to arca. 10 Nigtagad si Noi to papitu no allow woy nigpalibuwas man do sikandin to salapati ligkat to arca. 11 To magaan on ogkatangkob ka allow niglibong ka salapati no duon pigbango no moilow no doun to olibu dio to tuktuk din. No pinabadyo to sikan, nataga on si Noi no nig-os-os on ka woig to tano. 12 Nigtagad pad man do si Noi to papitu no allow woy inpalibuwas din man do ka salapati, di warad on makalibong sikan.
13 To an-anadyan no allow to an-anadyan no buwan to nigpanuigon on si Noi to 601, no-otian on ka woig to tano. No pig-awo ni Noi ka tol-ob to arca woy nakapantow sikandin no mammara on naan ka tano. 14 To igko-27 no allow to igkaruwa no buwan, mammara on ian ka tano.
15 No, nignangon ka Magboboot ki Noi, no kagi 16 “Libuwas kad on to arca duma to asawa nu woy to mgo anak nu woy to mgo amboy nu. 17 Songo palibuwasa nu ka tibo no nigkaloinloin no mgo nohimu no duon duma koikow, ian ka mgo manuk-manuk, mgo adyam, mgo magintaunan woy mgo ogpananap odyow no ogpanganak sikandan woy ogmarasig sikandan to kalibutan.”
18 Sikan ian niglibuwas si Noi duma to mgo anak din, to asawa rin woy to mgo amboy rin. 19 Songo pinogsundul-sundul niglibuwas to arca ka kara adyam, manuk-manuk, magintaunan woy mananap.
20 Nighimu si Noi to tubarananato Magboboot, woy nigpurut sikandin ligkat to kara malinis no adyam woy kara malinis no manuk-manuk woy pigtutung din sikandan dio to tubaranan. 21 Narago ka Magboboot to nangarog din ka moumut no pigtutung no intubad, woy nignangon to kandin no goinawa to “Kono ku ogtungadyawan oghutuk ka tano tongod to otow agad no maroot ka tibo no sumsumanon to goinawa rin ligkat to maintok pad. Kono ku oghutukon og-awoon ka tibo no duon goinawa unawa to soini no pighimu ku.
22 Tagood no duon dod ka kalibutan
kono ian oghagtong no
duon tig-orok
woy duon tig-gaani,
duon maagsil
woy duon moinit,
duon tiglongdong
woy duon guabung,
duon allow
woy duon marusilom.”