7
Ka Ugub
1 Nignangon ka Magboboot ki Noi no kagi “Sood ka to arca, koikow woy ka tibo now no songo lunggunan, su nakita ku no sikoikow ro sagboka ka matuarong no otow taliwaro to soini no kapunganan. 2 Aap ka to karapapitu no lukosan woy karapapitu no boian no mgo adyam no malinisa, woy karasagboka no lukosan woy karasagboka no boian no adyam no maligsomb 3 woy songo aap ka to karapapitu no lukosan woy karapapitu no boian no manuk-manuk odyow no ogkoudyag pad sikandan to kalibutan. 4 Papitu no allow ligkat kuntoon ogpa-aap a to uran dio to kalibutan no kono oghagtong sood to 40 no allow woy 40 no karusiloman, woy og-awoon ku to ampow to tano ka tibo no pighimu ku no duon goinawa”
5 Woy pighimu ni Noi ka tibo no insugu to Magboboot kandin.
6 600 ka panuigon ni Noi no pigpauguban ka kalibutan. 7 Nigsood si Noi to arca duma to mgo anak din no lukos woy to asawa rin woy to mgo amboy rin odyow to kono ogkamatoy sikandan to ugubc. 8-9 Nigdani ki Noi ka mgo malinis woy mgo maligsom no mgo adyam, mgo manuk-manuk, mgo magintaunan, woy ka tibo no mgo ogpananap no mgo lukosan woy boian no pinog-akup-akup, woy nigsood sikandan to arca, sumao to sugu to Magboboot ki Noi. 10 Takas to papitu no allow, niglopow ka mgo woig no inpo-ugub to kalibutan.
11 To igkohon-om no gatus no tuid to pogko-udyag ni Noi, to igkaruwa no buwan, to igkasampuu woy papitu no allow, ian to sikan no allow, nig-ugwak ka tibon mgo sobsob dio to diraom, woy napuasan ka mgo badyaanan to woig to langit. 12 Woy nig-uran to kohop-atan no allow woy kohop-atan no karusiloman.
13 To sikan ian no allow, nigsood si Noi to arca duma to mgo anak din no si Sim, si Ham woy si Yapit woy duma to asawa rin woy ka tatou no mgo amboy rin. 14 Duon duma kandan ka kara nigkaloinloin no mgo magintaunan, mgo adyam, mgo ogpananap to tano woy mgo manuk-manuk. 15 Nigdani ki Noi ka tibo no pighimu no duon goinawa no pinog-akup-akup woy nansood sikandan to arca. 16 Woy ka mgo nigsood mgo lukos woy mgo boi to tibo no duon goinawa sumao to sugu to Magboboot ki Noi. Woy piglokoban sikandin to Magboboot.
17 Woy nigparagas nigdatong ka ugub to kohop-atan no allow, woy nigmaraom ka woig, woy niglothow ka arca dio to ampow. 18 Nigmaraom ka woig woy nigdakol lagboy to ampow to tano, woy niglothow ka arca dio to ampow to woig. 19 Nigdakol lagboy ka ugub to tano, woy nanaop-lop ka tibon mgo mamatikang no bubungan diraom to langit. 20 Nigtulin ka woig woy nanaop-lop on ka mgo mamatikang no bubungan woy niglapow pad to hop-at no dopad. 21 Woy nammatoy ka tibo no duon goinawa; ian ka mgo manuk-manuk, mgo adyam, mgo magintaunan, mgo ogpananap to ampow to tano, woy ka tibon otow. 22 Noubus nammatoy ka tibo no duon goinawa no nig-ugpo to ampow to mammara no tano. 23 Pig-awo to Magboboot ka tibo no noudyag to tano; mgo otow, mgo adyam, mgo ogpananap woy mgo manuk-manuk. Si Noi woy ka mgo duma rin to arca naan do ian ka nagaat no manokal.
24 Nigpalinggaat ka ugub to ampow to tano sood to 150 no allow.