YOHAN
Ló Htâng Dàm Hun Kat é Laiká
(3 John)
1
Ngò sûwún hpó gi,
haû tengmán hkyô má ngò chyitdàp é,
ngá é chyitdàp luzúm Ge‑u lé dang kyô kat lhê.
2 Chyitdàp é luzúm hpó ê,
ngò gi,
haû náng é i-myìt sô nyì ngón yùqyo nyi é eq rajung za,
nàng nguì ngón wángzán râ eq hkyô hkat hkangmó má,
nyì ngón yùqyo nyì sháng gàq nghû,
kyûdung byî kat lhê.
3 Hkâsu mù gâ le,
ngò gi,
gu-mang wuì ra-am,
ngá chyáng lé jé mù,
haû tengmán hkyô má nàng lhumzuî é hkyô lé le,
haû tengmán hkyô má nàng hkâsu kut xoq châng nyi é hkyô lé le,
lé taî kyo kô é hkûn,
gyai yhang gabú é yánmai nghut lhê.
4 Haû tengmán hkyô má,
ngá zô pé châng nyi é hkyô lé,
ngò wó gyô é hkûn gabú é í,
gótû gabú hkyô a wó lo nghut ri.
5 Chyitdàp é luzúm hpó ê,
haû gu-mang wuì gi,
mau we bíng pé nghut to kôlhang,
nàng yhángmòq lé lhom garúm yu é hkyô má,
nàng gi,
lhumzuî nyi ri.
6 Yhángmòq gi,
haû noqkuq hpúng mâ é bang lé,
náng é chyitdàp myìt eq séng luî taî kyo bekô nghut ri.
Nàng gi,
Garai Gasâng hí má gíngdán é dông,
yhángmòq é hkyôwui é matú garúm luî,
dé kat é nghut jáng,
ge é múzó jizó kut é nghut bê.
7 Hkâsu mù gâ le,
yhángmòq gi,
Hkrisidùq é myìng hau é matú htoq ló kôluî,
a lùmjíng bâng chyáng mai haî lháng a hàp yù kó nghut ri.
8 Haû mù luî,
ngá-nhúng gi,
haû tengmán hkyo é matú rahá za wó chôm zui saí sháng gàq,
haû sû é byu pé lé lhom hkûlum yù râ lhê.
9 Ngò gi,
haû noqkuq hpúng lé laiká ká byî kat bê nghut lhê;
nghut kôlhang,
haû ushuq kut nau é sû Di‑otrehpi gi,
ngá-mòq lé a lhom hàp yù nghut ri.
10 Haû mù luî,
ngò lé jé jáng gi,
ngá-mòq lé a jo a âng é dang taî é eq lùmù gànsang é,
yhang kut é múzó hkyô lé,
taî hpyi kyo râ nghut lhê;
yhang gi,
haú hkyô lé myìt a dik shî é nghut mù luî,
yhang yhang le gu-mang wuì lé a lhom hkûlum yù,
lhom hkûlum yù naù bang lé le,
yhang mai hkûm zing pyám luî,
yhángmòq lé haû noqkuq hpúng mai hkat htoq pyâm ri.
11 Chyitdàp é luzúm hpó ê,
agè ashop hkyô lé alìk a yu é za,
ge é hkyô lé yù àq;
ge é hkyô kut é sû gi,
Garai Gasâng chyáng mâ é nghut bê;
agè ashop é hkyô kut é sû gi,
Garai Gasang lé a myàng shî é sû nghut ri.
12 Demetri ge é hkyô lé,
yùq hkangmó mai le,
haû tengmán hkyo èq le,
sàksé hkám byî akô nghut ri;
ngá-mòq le,
yhang ge é hkyô lé sàksé hkám byî lhê;
haû ngá-mòq hkâm é sàksé gi,
têng é hkyô nghut é lé,
nàng sê lhê.
13 Ngò gi,
nang lé ká byî kat râ hkyô myo myo jòq kôlhang,
kâ jung eq kâ jung chi dông a kâ kat naù lo.
14 Ngò gi,
a myáng má,
nàng eq myang huî lhum râ lé myìt myòqbyu tô lhê.
Haú hkûn shèq,
ngá-nhik myòqdong hkyúm myang nyo lhum râ nghut lhê.
15 Nàng nguì ngón yùqyo nyì sháng gàq;
shî mâ é luzúm wuî gi,
nang lé shi-kyâm kat akô nghut ri.
Nàng le,
haû mâ é luzúm wuî lé,
myìng du htau luî bo shi-kyám byi laq.