Ngozo Wó Chyup Yu É Maúhpo Alhô Agàn
21
Hau htâng má, Yesuq gi, Tiberi nhông yàm má, Yhâng é chángzô pé lé dum htoq shit ri. Yhang htoq shit é hkyô gi, a‑ô mâ é dông nghut ri.
Yohan 21:1-25
2 Simun Petiruq, Zozûm le gâ é Htomaq, Galile mau Hkanaq wà mó mâ é Nahtanelaq, Zebedi é yhang zô nhik eq gótû chángzo í yùq pé gi, rahá nyi tô bum akô. 3 Haú hkûn, Simun Petiruq gi, yhángmòq lé, “Ngò gi, ngozo kóng ê râ.” ga taí jáng, yhángmòq gi, “Ngá-mòq le châng lé râ.” ga taî akô. Haû mù luî, yhángmòq gi, htoq ê mù, haû lhaî má wàng bekô nghut ri; nghut kôlhang, haú myîn, radu lháng a wó kóng kó nghut ri.
4 Htang nàpkyó maubó lo é hkûn, Yesuq gi, wuì yàm má yàp tô ri; nghut kôlhang, haû chángzô pé gi, Yesuq nghut é lé a wú sé kó nghut ri.
5 Yesuq gi, yhángmòq lé, “Luzúm wuì ê, núngmòq, ngozo wó akô lhú?” ga, wùt myî kat jáng, yhángmòq gi, “A wó.” ga tû taî akô.
6 Haú hkûn, Yhang gi, “Núngmòq é gùn lé, haû lhai é lòqyo hkyam shut dú hkyô kat keq; haû jáng, núngmòq wó kông yù kôrâ nghut lhê.” ga taî ri. Haû mù, yhángmòq gi, gùn dú hkyô kat é hkûn, ngozo lûm myô é yánmai, haû gùn lé lháng a wó lâng yù lo kó nghut ri.
7 Haû mù luî, haû Yesuq chyitdàp é chángzo gi, Petiruq lé, “Yhûmsîng ru nghut ri.” ga taî ri. Simun Petiruq gi, “Yhûmsîng ru nghut ri.” gâ é lé wó gyo eq yhang, yhang gi, mèbu hkyut pyâm tô é yánmai, buhîng mó lé, yhâng é gùng má baíyùp yù mù, wuì hkaû má byam wang ló bê nghut ri. 8 Haû chángzo góbang gi, wuì yàm eq ngo xê làm kô za wê é yánmai, ngozo byíng tô é gùn lé, wuì yàm shut lhaî mai she jé lo akô nghut ri. 9 Yhángmòq gi, wuì yàm má jé dàp ló kô é hkûn, myigye gyúng é myihkyóm htoq má ngozo nyhîn tô é lé le, mùk ra-tsuí jòq tô é lé le, myang akô.
10 Yesuq gi, yhángmòq lé, “Haû, ahkuî za núngmòq wó kông yu é ngozo, ra-am yù lé keq.” ga taî ri.
11 Haû mù, Simun Petiruq gi, lhaî má dòq ji luî, kô é ngozo rasho ngó xe sûm du yhang bo é gùn lé, dùng shoq má she htoq tô ri. Ngozo haú myhó myo kôlhang, gùn gi, a jèq nghut ri. 12 Yesuq gi, yhángmòq lé, “Nàpzang lé zo keq.” ga taî ri. Chángzô pé gi, Yhang, haû Yhûmsîng nghut é lé sé kô é yánmai, ó yùq lháng, “Nàng, ó yùq nghut lhê?” ga, a wám myi kó nghut ri. 13 Yesuq gi, lé mù, mùk lé ê yù luî, yhángmòq lé byî ri; ngozo lé le, haû su kut ri. 14 Yesuq gi, shi é mai lhoqdui toq yû huî é htâng, Yhâng é chángzô pé lé htoq shit é má, shî gi, sum dâm nghû râ dàm nghut ri.
Yesuq Eq Petiruq
15 Yhángmòq bàn zô bùm kô é htâng má, Yesuq gi, Simun Petiruq lé, “Yohan é yhang zo Simun ê, nàng gi, shí bâng htoq má, Ngo lé teng za je chyitdàp lhê lhú?” ga myi jáng, yhang gi, “Nghut lhê; Yhûmsîng ê, ngò, Nàng lé chyitdàp é hkyô lé, Nàng sê lhê.” ga tû taî ri. Haú hkûn, Yesuq gi, “Ngá é sau zô pé lé, baú aq.” ga, yhang lé taî ri.
16 Hau htâng, Yesuq gi, “Yohan é yhang zo Simun ê, nàng gi, Ngo lé teng za chyitdàp lhê lhú?” ga dum myi jáng, yhang gi, “Nghut lhê; Yhûmsîng ê, ngò, Nàng lé chyitdàp é hkyô lé, Nàng sê lhê.” ga tû taî ri. Haú hkûn, Yesuq gi, “Ngá é sau pé lé, zúng aq.” ga taî ri.
17 Dum radàm, Yesuq gi, yhang lé, “Yohan é yhang zo Simun ê, nàng gi, Ngo lé chyit lhê lhú?” ga myî ri.
Haú hkûn, Petiruq gi, “Nàng gi, ngo lé chyitdàp lhê lhú?” ga, yhang lé Yesuq èq súm dam dàm taî é yánmai, yhang myìt nò luî, “Yhûmsîng ê, Nàng gi, lhúnglháng lé sê lhê; ngò, Nàng lé chyitdàp é hkyô lé, Nàng sê lhê.” ga taî ri.
Haú hkûn, Yesuq gi, “Ngá é sau pé lé, baú aq. 18 Ngò, nàng lé teng za taí lé, nàng, zorâm nghut é hkûn gi, yhûmsing gùng yhûmsîng hpyihit baíyùpa yù mù, ê nau é jowò hkangmó má wó e é nghut lhê; nghut kôlhang, nàng mang jáng gi, lòq í lòq lham luî, nang lé góyùq èq hpyihit baíyùp byi mù, nàng a ê nau é jowò shut shuî ê râ nghut lhê.” ga taî ri. 19 (Yesuq haû su ga taî é gi, haû Petiruq, hkâsu kut shi é dông mai, Garai Gasâng é hpungwup shingkang lé dan hu nhâng râ nghut é lé, taí nau é nghut ri.) Hau htâng, Yesuq gi, yhang lé, “Ngá htâng cháng aq.” ga taî ri.
20 Haú hkûn, Petiruq gi, lhing wú kat le, haû Yesuq chyitdàp é chángzo, yhángmòq htâng châng wún é lé myang ri. Chángzo haû gi, hí hkûn, myínzang zô é u lé, Yesuq chyáng lèq ngè mù, “Yhûmsîng ê, Nang lé àp pyám râ sû gi, ó yùq lhú?” ga, myî wú é sû nghut ri. 21 Petiruq gi, haú yùq lé myàng jáng, Yesuq lé, “Yhûmsîng ê, shí yùq gi, hkâsu dùt râ lhú?” ga myî ri.
22 Yesuq gi, “Ngò jé lé é hkûn jé shoq, Ngò, yhang lé dui nyì nhâng nau é nghut le gi, nàng eq haî sêng lhê lhú? Nàng gi, Ngá htâng cháng aq.” ga tû taî ri. 23 Dang hau é yánmai, chángzo haú yùq a shî râ nghut lhê gâ é danglám gi, haû gu-mang wui chyáng byo myín to bê nghut ri. Nghut kôlhang, Yesuq gi, haú yùq a shî râ hkyô lé taî é a nghut, “Ngò jé lé é hkûn jé shoq, Ngò, yhang lé dui nyì nhâng nau é nghut le gi, nàng eq haî sêng lhê lhú?” ga, taî é ru nghut lhê.
24 Shí pé lé sàksé hkám mù, shí pé lé kâ tô é sû gi, chángzo haú yùq nghut lhê. Yhâng é sàksé gi, têng é lé, ngá-mòq sê lhê.
25 Yesuq gi, gótû múzó myo myo le kut ashî nghut ri. Múzó haú pé lhum jùp lé, kâ htoq yu é ru nghut le gi, kâ tô é laiká bùk haú pé gi, mingkan gón má lháng ngo râ a nghut nghû, ngò wó myìt ri.
Yohan 21:26-26