Tsibyiq Nuî Eq Akoq Pê É Hkyô
15
Ngò gi, haû tsibyiq nuî a-kyîng nghut lhê; Ngá wa gi, tsibyiq hkyâm yhûmsîng nghut lhê.
Yohan 15:1-17
2 Yhang gi, ashi a zuî é akoq hkangmó lé, Ngá chyáng mai kyik pyám luî, ashi zuî é akoq hkangmó lé kúm gi, ashi je myo zui sháng gàq ga, shang pyám byî ri. 3 Núngmòq gi, Ngò, núngmòq lé taî é mungdang hau é yánmai, sanséng gû nghut bekô nghut ri. 4 Ngò má nyi nyì keq; Ngò le, núngmòq má nyi nyì râ nghut lhê. Akoq hkangmó gi, tsibyiq nuî má nui nyi é za a nghut jáng, yhang baú ashi wó zuî é a nghut. Haû eq rajung za, núngmòq le, Ngò má nyi nyi é za a nghut jáng, ashi wó zui kôrâ a nghut.
5 Ngò gi, tsibyiq nuî nghut lhê; núngmòq gi, akoq pé nghut akô. Byù rayùq yùq, Ngò má nyi nyi é nghut luî, Ngò gi, yhang má nyi nyi é nghut jáng, haú yùq gi, ashi myo myo zui râ nghut lhê; hkâsu mù gâ le, Ngò mai gang jáng, núngmòq gi, haî le a wó kut kô é nghut lhê. 6 Ngò má a nyi nyi é sû gi, haû dú pyâm é hui luî, kyuq shi byùq é akoq eq wuí ri; haû sû é akoq pé gi, byu pê èq gùq yù mù, myihkyóm má dú kat pyâm é hui luî, nyé gyó byùq râ nghut lhê. 7 Núngmòq gi, Ngò má nyi nyì luî, Ngá é dang pé gi, núngmòq má bo nyi é nghut le gi, núngmòq ô nau é haî nghut kôlhang, dung keq; haú hkûn, núngmòq lé byi râ nghut lhê. 8 Núngmòq gi, haû ashi ga-myhó zuî é dông, Ngá wâ é hpungwup shingkang lé lhoqhtoq shit é nghut luî, Ngá é chángzô pé nghut é hkyô lé tûn shit nyî bekô nghut ri.
9 Haû Îwa gi, Ngo lé chyitdàp é su, Ngò gi, núngmòq lé chyitdàp é nghut lhê. Ahkuî, Ngá é chyitdàp myìt má gîng nyì keq. 10 Ngò gi, Ngá wâ é hkunmó lé châng é nghut luî, Yhâng é chyitdàp myìt má gîng nyi é su, Ngá é hkunmó lé, núngmòq châng nyì kô é nghut jáng, núngmòq gi, Ngá é chyitdàp myìt má gîng nyì kôrâ nghut lhê. 11 Núngmòq má Ngá é gabú hkyô jòq nyì râ eq, núngmòq é gabú hkyô wó byíng jùp râ matú, Ngò, núngmòq lé, dang shí pé taî é nghut lhê. 12 Ngò, núngmòq lé chyitdàp é su, núngmòq yhangchang chyitdàp lhum keq; haû gi, Ngá é hkunmó nghut lhê. 13 Haû yhûmsing é luzúm wui é matú, yhûmsing é chyungxe àp byî pyâm é chyitdàp myìt htoq kô é, chyitdàp myìt gi, ó yùq chyáng le a bò nghut ri. 14 Ngò hkyô tô é hkunmó pé lé, núngmòq châng kut é nghut jáng, núngmòq gi, Ngá é luzúm wuî nghut bekô. 15 Ngò gi, Ngá wâ chyáng mai Ngò wó gyô yu é hkyô lhúnglháng, núngmòq lé sé nhâng bê nghut é yánmai, núngmòq lé, duìnhâng zoshâng wuì nghû, a wùt lô é za, luzúm wuî nghû wùt é nghut lhê; hkâsu mù gâ le, duìnhâng zoshâng gi, yhâng yhûmsîng hpô é múzó lé a châng sé nghut ri. 16 Núngmòq, Ngo lé hkyin yu é a nghut, Ngò shèq, núngmòq lé, htoq e ló mù, gîng nyi é ashi zui râ matú hkyin masàt tô é ru nghut lhê. Haú hkûn shèq, Ngá é myìng lé lang mù, haû Îwâ chyáng núngmòq haí jung dung kôle, Yhang byi râ nghut lhê. 17 Núngmòq yhangchang chyitdàp lhum keq; haû gi, Ngá é hkunmó nghut lhê.
Haû Mingkan Gi, Chángzô Pé Lé A Jú É Hkyô
18 Haû mingkan, núngmòq lé a naù a wôm é nghut jáng, Ngo lé hí a naù a wom kut bê nghut é lé, sê nyì keq.
Yohan 15:18-27
19 Núngmòq gi, haû mingkan eq sêng é bang nghut é nghut jáng, haû mingkan gi, yhang eq sêng é bang núngmòq lé chyitdàp râ nghut lhê. Nghut kôlhang, núngmòq lé gi, Ngò, haû mingkan mai hkyin htoq yû bê nghut luî, núngmòq gi, haû mingkan eq a séng lo kô é yánmai, mingkan gi, núngmòq lé a naù a wom nghut ri. 20 ‘Duìnhâng zoshâng gi, yhâng é yhûmsing htoq je kô é a nghut.’ nghû, Ngò, núngmòq lé taî é dang pé lé bûn nyì keq. Ngo lé lháng, yhángmòq zing-rî yù bekô nghut le gi, núngmòq lé le, zing-ri kôrâ nghut lhê. Ngò mhoqshit é hkyô lé, yhángmòq cháng kô é nghut le gi, núngmòq mhoqshit é lé le, cháng kôrâ nghut lhê. 21 Nghut kôlhang, yhángmòq gi, Ngá é mying é yánmai, núngmòq lé haû su kut kôrâ nghut lhê; hkâsu mù gâ le, haû Ngo lé nhang kat é Sû lé, yhángmòq a sé kôluî nghut ri. 22 Yhángmòq lé, Ngò a lé nyo wú é nghut le gi, yhángmòq mara bò kôrâ a nghut; nghut kôlhang, ahkuî gi, yhángmòq mara wó taî hkyut râ a nghut lo. 23 Ngo lé a naù a wôm é sû gi, Ngá wa lé le a naù a wôm é sû nghut ri. 24 Haû ó yùq lháng a wó kut é múzó lé, Ngò, yhángmòq chyáng a kut é nghut le gi, yhángmòq mara bò kôrâ a nghut; ahkuî kúm gi, làklaí alhô agàn haú pé lé yhángmòq myang nyì kôlhang, Ngò eq Ngá wa lé a naù a wom kô é nghut ri. 25 Haû gi, ‘Yhángmòq gi, jumgúyô má Ngo lé a naù a wom kut akô nghut ri.’a ga, yhángmòq é târâ má kâ tô é dang lé lhoqdìk é nghut ri.