Yohan 5

Wuìhtum Yàm Má, Nòhpyo Lhoqgê Byî É Hkyô

Hau htâng a myáng má, Yudaq byu pê é poî ralhum jòq é yánmai, Yesuq gi, Yerusalem wà mó má dòq ló ri.

Yohan 5:1-18

2 Ahkuî, haû Yerusalem wà mó é Sau Hkúmdong nàm má, Hebre myíng dông gi, Betzahta ga myhîng é wuìhtum ralhum jòq ri; hau é lhînghkyùq má, jiròp ngo lhum jòq tô ri. 3 Jiròp haú pé má, myòqjìt bang, hkyî hten bang, gùngjum shî bang ajùm ayò lèq tô bum akô. (Haú bang gi, wuì dui nún râ lé láng tô é bang nghut akô. 4 Hkâsu mù gâ le, haû Yhûmsing é maumang lagyo gyó lé lé kut mù, wuì lé, lé lhu nhún jáng, wuìhtum haú má hí wó wang é sû gi, haí jung nòlì wá dàp to kôlhang, ge byùq é huî é yánmai nghut ri.) 5 Súm xe shit zân yhang no nyi é byù rayùq le, haú má bo tô ri. 6 Yesuq gi, haú yùq no lèq tô é lé myàng mù, haû su no nyi é gyai myáng bê nghut é hkyô lé sé jáng, yhang lé, “Nàng, gè nau ri lhú?” ga myî ri.

7 Nò sû haú yùq gi, “Yhûmsîng ê, wuì dui nún lo é hkûn, wuìhtum má wàng râ matú, ngo lé garúm râ byù ó a nyì; ngò wàng râ nghû jáng, góyùq hí, ngá hí má wàng wàng dùt ri.” ga tû taî ri.

8 Hau htâng, Yesuq gi, yhang lé, “Toq àq! Náng é taphkang yu chûng luî, sô ló àq.” ga taî ri. 9 Haú yùq gi, radá dâm nò ge byùq bê nghut luî, yhâng é taphkang yù mù, sô ló bê nghut ri.

Haú nyí gi, Bánno Buìnyì nghut ri. 10 Haû mù, Yudaq byu pé gi, haû nò ge byùq é hui sû lé, “Hkû-nyí gi, Bánno Buìnyì nyí nghut é yánmai, nàng, taphkang wàq é gi, târâ lu lai bê nghut ri.” ga taî akô.

11 Nghut kôlhang, yhang tû taî é gi, “Haû ngo lé lhoqgê byi sû gi, ngo lé, ‘Náng é taphkang yu chûng mù, sô ló àq.’ ga taî é nghut lhê.” gâ ri.

12 Haû mù, yhángmòq gi, “‘Náng é taphkang yu chûng mù sô ló àq.’ ga, nang lé taî é sû gi, ó yùq wá nghut ri lhú?” ga myî akô.

13 Nghut kôlhang, haû ó yùq nghut é lé, nò ge byùq é hui sû gi, a châng sê kat nghut ri; hkâsu mù gâ le, Yesuq gi, haú mâ é byù mòqmó má wang nyó ló byùq é yánmai nghut ri.

14 Htâng má, Yesuq gi, haú yùq lé noqkuq yhûm má myàng jáng, “Wú aq, nàng wángzán bê nghut ri; hí lhê htoq má je wuîhkê é hkyô a hui zo sháng gàq, mara hkâkut shut lo.” ga luî, yhang lé taî ri. 15 Haú yùq gi, htoq ló mù, yhang lé lhoqgê byî é sû gi, Yesuq nghut ri ga, Yudaq byu pé lé taî kyô ri.

Chyungxe Wó Yû Râ Hkyô

16 Haû mù, Yudaq byu pé gi, Bánno Buìnyì nyí má, Yesuq, haú hkyô kut é yánmai, Yhang lé gunjâng lo akô nghut ri. 17 Haú hkûn, Yesuq gi, yhángmòq lé, “Ngá wa gi, hkû-nyí jé shoq, hkâ-nhám le mû zuî nyi é nghut mù, Ngò le mû zuî nyi lhê.” ga taî ri. 18 Haû mù luî, Yesuq gi, Bánno Buìnyì lé lhoqhtên é htoq agó, Garai Gasang lé lháng, Yhâng Wa ga wùt é dông, yhûmsing gùng lé, Garai Gasang eq lhoqwhuî é yánmai, Yudaq byu pé gi, Yhang lé sat pyám râ matú, je riyhang shi-kùt lo akô nghut ri.

19 Yesuq, yhángmòq lé tû taî é gi, “Ngò, núngmòq lé teng za taí kôlé, haû Zo gi, yhûmsing é myìt dông haî le a wó kut; Yhâng Wa kut é hkyô lé myang é gù za wó kut é nghut lhê; hkâsu mù gâ le, haû Îwa kut é hkyô lé za, haû Zo châng kut é yánmai nghut lhê.

Yohan 5:19-47

20 Hkâsu mù gâ le, haû Îwa gi, Zo lé chyitdàp é nghut luî, Yhang kut é hkyô lhúnglháng, haû Zo lé tûn shit ri; núngmòq maú hông shoq, shí pé htoq je kô é hkyô pé lé lháng, haû Zo lé tûn shit shirâ nghut lhê. 21 Haû Îwa gi, shî bê bang lé lhoqdui toq mù, yhángmòq lé chyungxe byî é eq rajung za, haû Zo le, Yhang byí nau é bang lé, chyungxe byi râ nghut lhê. 22 Hau htoq agó, haû Îwa lé hkúnggâ é eq rajung za, haû Zo lé le, lhúnglhâng bang hkúngga kó sháng gàq ga, haû Îwa gi, ó yùq lé le a jéyáng é za, jéyáng é hkyô lhúnglháng, haû Zo lé lum to bê nghut ri. 23 Haû Zo lé a hkúnggâ é sû gi, haû Yhang lé nhang kat é sû Îwa lé le, a hkúnggâ é sû nghut ri.

24 Ngò, núngmòq lé teng za taí kôlé, Ngá dang lé gyo luî, Ngo lé nhang kat é Sû lé lùmjíng é sû, ó yùq nghut kôle, mara byî é a huî é za, ahtum abyùq é chyungxe wó é nghut lhê; haú yùq gi, shi é mai lùt luî, chyungxe duì bê sû nghut ri. 25 Ngò, núngmòq lé teng za taí kôlé, haû Garai Gasâng é Yhang zô é htê lé, shi byùq bê bang wó gyo râ ahkyíng gi, jé lo nyì bê nghut ri; ahkuî lháng jé to bê nghut ri. Htê haú lé gyô é bang gi, chyungxe duì kôrâ nghut lhê. 26 Hkâsu mù gâ le, Garai Gasang gi, Yhânggùng má yhang, chyungxe bo é eq rajung za, Yhang Zo lé le, Yhânggùng má yhang, chyungxe bò nhang é yánmai nghut ri. 27 Hau htoq agó, Yhang gi, haû Byu Yhangzo nghut é yánmai, Garai Gasang gi, târâ jéyáng râ ahko ahkáng, Yhang lé byi bê nghut ri.

28 Shí hkyô lé hkâ-maú hong nyì kó: lùp pé má lúng tô é bang bànshoq gi, Yhâng é htê lé wó gyo kôluî, htoq lò râ ahkyíng jé lò râ nghut lhê. 29 Ge é hkyô kut é bang gi, chyungxe duì râ matú, dui toq kôrâ nghut lhê; agè ashop hkyô kut é bang gi, mara byî é hui zo râ matú, dui toq kôrâ nghut lhê. 30 Ngò gi, Ngá myìt dông mai haî le a wó kut é nghut lhê; Ngò wó gyô yu é eq rajung za shèq, jéyáng é nghut luî, Ngò jéyáng é hkyô gi, tengmán lhê; hkâsu mù gâ le, Ngò gi, Ngò ô nau é dông châng é a nghut é za, Ngo lé nhang kat é Sû ô nau é dông châng é shèq ru nghut lhê.

Yesuq Eq Séng Luî, Sàksé Hkâm É Hkyô

31 Ngá gûng lé ngò sàksé hkâm é nghut jáng, ngò za sàksé hkâm é hkyô gi, teng râ a nghut. 32 Ngá é hkyô lé sàksé hkám byî é Sû (Ngá Wa) góyùq nyi lhê; Ngò eq séng luî, haú yùq hkâm é sàksé gi, têng é hkyô lé, Ngò sê lhê.

33 Núngmòq gi, Yohan chyáng byù nhang kat wú bekô nghut ri; yhang gi, haû tengmán hkyô lé sàksé hkám byi bê nghut lhê. 34 Ngò gi, xângzo byu pé mai sàksé hkám byi râ lé, ra luî a nghut, nghut kôlhang, núngmòq hkyi yu é wó hui râ matú shèq, haû su nghû taî é ru nghut lhê. 35 Yohan gi, dùq nyi é myibung su dùq bó byî é nghut mù luî, núngmòq gi, haû dùq bó é hkaû má, rayòq zo ngón nau nyi akô nghut ri.

36 Nghut kôlhang, Ngò wó é sàksé gi, Yohan byî é sàksé htoq je kô lhê; hkâsu mù gâ le, ahkuî Ngò zui saî nyi é múzó gi, Ngò lhoqpán râ matú, haû Îwa, Ngo lé àp byî tô é nghut luî, haû Îwa, Ngo lé nhang kat é hkyô lé, sàksé hkám byî nyi ri. 37 Hau htoq agó, haû Ngo lé nhang kat é sû Îwa le, Ngò eq séng luî sàksé hkám byî ri; núngmòq gi, Yhâng é htê lé le, a wó gyô wú kó; Yhâng é gùnghkyâng lé le, a myang wú kó; 38 haû Yhâng é mungdang le, núngmòq chyáng a bò kó nghut ri; hkâsu mù gâ le, núngmòq gi, Yhang nhang kat é Sû lé a lùmjíng kô é yánmai nghut ri. 39 Núngmòq gi, haû Chyúmdang mai ahtum abyùq é chyungxe wó yû râ nghut lhê ga myìt yù kô é yánmai, haû Chyúmdang má ho wú akô nghut ri; nghut kôlhang, Chyúmdang haû gi, Ngò eq séng luî sàksé hkám byî ri; 40 nghut kôlhang, chyungxe wó yû râ matú, núngmòq gi, Ngá chyáng a kâm lé kó nghut ri.

41 Ngò gi, byu èq hkya-ôn é lé a lhom yu é nghut lhê. 42 Nghut kôlhang, núngmòq lé gi, Ngò sê lhê; núngmòq é i‑myìt hkaû má, Garai Gasang lé chyitdàp é myìt a bò kó nghut ri. 43 Ngò gi, Ngá wâ é myìng mai jé lé é sû nghut kôlhang, núngmòq gi, Ngo lé a lhom hàp yù kó; yhâng myìng yhang lâng é byù, gótû rayùq jé lé é ru nghut le gi, haú yùq lé, núngmòq lhom hàp yù kôrâ nghut lhê. 44 Núngmòq gi, rayùq eq rayùq hkya-ôn lhûm é lé za hàp yù luî, rayùq za nghut é Garai Gasâng chyáng mai lo é hkya-on hkyô lé gi, a hô kô é bang nhîng, hkâsu kut wó lùmjíng kôrâ lhú?

45 Nghut kôlhang, haû Îwâ é hí má, Ngò, núngmòq lé mara hûn nhô hkâ-ngâm kó; núngmòq lé mara hun é sû gi, haû núngmòq mai myìt myòqbyu tô é Mosheq ru nghut lhê. 46 Mosheq lé núngmòq gè gè yhang lùmjíng kô é ru nghut le gi, Ngo lé le lùmjíng kôrâ nghut lhê; hkâsu mù gâ le, Mosheq gi, Ngá é hkyô lé kâ tô é sû nghut ri. 47 Nghut kôlhang, núngmòq gi, yhang kâ tô é pé lé lháng a lùmjíng kô é nhîng, Ngá dang lé, hkâsu kut wó lùmjíng kôrâ lhú?” gâ ri.