Dâng Wún É Chyúmding
5
Ngò dum wú kat le, dâng wún é chyúmding lé myang ri.2 Yhang gi, ngo lé, “Nàng haî myang ri lhú?” ga myî ri.
Ngò gi, “Dâng wún é chyúmding lé myang ri; haû gi, hîng hpyang í xê dúng, làm hpyang raxê dúng bo ri.” nghû tû taî é nghut lhê.
3 Haú hkûn, yhang gi, ngo lé, “Haú má gi, myìdàm gón má byo myín tô é nhinghkun bo tô ri. Hkâsu mù gâ le, hkaû é byù bànshoq gi, chyúmding rahkyam shut kâ tô é eq rajung za, lhoqhtûm pyâm é hui kôrâ nghut lhê; mhaû dâkam é byù bànshoq gi, chyúmding hau é góhkyam shut kâ tô é eq rajung za, lhoqhtûm pyâm é hui kôrâ nghut lhê. 4 Haû Wum-o a-tsam dìk shoq bò Sû Yhûmsîng Garai gi, ‘Chyúmding haú lé Ngò nhang htoq hkat râ nghut mù, haû gi, hkaú su é yhûm eq Ngá é myìng lang luî mhaû dakâm su é yhûm má wàng mù, yhúmhkaû haú má jâng jòq to luî, yhûm hau é sik pé eq lùqgòk pé le mù, yhûm haú lé chyut lhoqhtên pyám râ nghut lhê.’ ga taî pyo ri.” ga taî ri.
Kyáng Hkaû Má Lúng Tô É Myiwe Myhí
5 Haú hkûn, ngò eq dáng nyo nyi é maumang lagyo gi, hí shut lé lô mù, ngo lé, “Ahkuî htoq lo é lé wú wú aq.” ga taî ri.
6 Ngò gi, “Haû haî nghut lhê lhú?” nghû myî é nghut lhê.
Yhang gi, “Haû htoq lo é gi, kyáng nghut ri.” ga tû taí mù, “Mîngdán gón mâ é byu pê é yubàk mara nghut ri.” ga le xoq taî ri.
7 Haú hkûn, chuî kyángmyhi lé hpông kat jáng, kyáng hkaû má myiwe myhí rayùq zung tô é lé myang ri. 8 Maumang lagyo haû gi, “Shî gi, agè ashop hkyô nghut lhê.” ga taí mù, myiwe myhí haú lé kyáng má dûn hâng kat luî, kyáng nhut má chuî kyángmyhi lé dûn myhî pyâm ri.
9 Ngò dum wú kat le, laì su yang é dùng dap é myiwe myhí í yùq htoq lo é lé myang ri! Yhángnhik gi, hkyî kyang nghoq é dùng sû é dùng dap kômù, kyáng haú lé mauhkûng eq myigùng gyoro má wàq toq akô nghut ri.
10 Ngò gi, ngò eq dáng nyo nyi é maumang lagyo lé, “Yhángnhik gi, kyáng lé hká shut wàq ló akô lhâ?” nghû myî é nghut lhê.
11 Haû jáng, yhang gi, “Kyáng hau é matú, yhûm saî to râ dông Babeloni-a mau má wàq ló akô nghut ri; yhûm haû ban saí jáng, kyáng haú lé yhâng é jowò má tsung to râ nghut lhê.” ga tû taî ri.