Yerusalem Wà Mó É Yubàk Mara Eq Hkyi Xe Yù Hkyô
3
Haû gumlau toq é, agòt a-û dùt é eqzìk zo zìk shuq bâng é wà gi, dingnyé wó ri!
2 Wà haû gi, ó yùq é jì-no le a gyo;
lhoqjo byî é haî lé le a hàp yù nghut ri.
Yhang gi, haû Yhûmsîng Garai lé a lùmhkaû nghut ri;
yhang gi, yhâng é Garai Gasâng shut a huî chyâng lé nghut ri.
3 Yhâng é zaugun wuì gi,
wà hkaû má mying garû é hkanghkyi pé nghut akô;
yhâng é ùphkâng bang gi, nàpkyó jé shoq haî le a myhit tô é,
myín lé yông wún é wàmhkuî pé nghut bum akô.
4 Yhâng é myìqhtoî pé gi, nghutbun dangsôm taí kômù,
byu pé lé mhaú lô lhik lô kut é bang nghut akô.
Yhâng é hkyangjông pé gi, sân-yúng jowò lé agòt a-û kut pyám kômù,
târâ lé lhoqhpyoq pyâm akô nghut ri.
5 Yhángmòq chyáng nyi é Yhûmsîng Garai gi, díngmán ri;
Yhang gi, shut shai é hkyô a kut.
Yhang gi, nàp wuì Yhâng é târâ ràp-rá hkyô lé lhoqhtoq mù,
nyí hkangmó a nô byùq nghut ri;
nghut kôle, a díngmán bang gi, hoq a sé kó nghut ri.
Yerusalem Wà Mó Bang Myìt A Lhîng Shi Kô É Hkyô
6 “Ngò gi, byù myû wuì lé lhoqhtûm pyám bê nghut lhê;
yhángmòq é gingtíng jowò pé gi, htên byòq byùq bê nghut ri.
Ngò gi, ó le a sô lai loshoq,
yhángmòq é wà hkyô pé lé chamchyuîyuì tô pyâm to bê nghut lhê.
Yhángmòq é wà pé gi, chamchyuîyuì jòq pyâm to mù,
byù le a nyì, wà kôm jòq tô bùm bê nghut ri.
7 Yerusalem wà mó eq séng luî, Ngò gi,
‘Gè gè yhang, nàng gi, Ngo lé gyùq hkúngga mù,
mhoq kyô é lé gyô yù râ nghut lhê.’ nghû myìt yu é nghut lhê.
Haû jáng, yhâng é nghêhkaû jowò gi, lhoqhtên pyâm é hui râ a nghut;
Ngá é mara dàm byi hkyô bànshoq le yhâng chyáng jé râ a nghut.
Nghut kôlhang, yhángmòq gi, yhûmsîng kut é bànshoq má,
mara shut é dông jâng kut nau nyi bum ashi kô nghut ri.
8 Haû mù, Ngò mara toq hun é buìnyì jé shoq,
Ngo lé láng to keq.
Hkâsu mù gâ le, Ngò gi, gótû byù myû wuì eq
hkóhkam ming pê é ahtoq má,
Ngá é nhikmó-yo hkyô bànshoq lé hut hkyô kat râ matú,
yhángmòq lé zùp zing nhâng râ nghû, myìt hpyit to bê nghut lhê.
Mingkan gón gi, Ngò nhikmó-yô é myî èq nyé gyó byùq râ nghut lhê.” ga,
haû Yhûmsîng Garai taî pyo ri.
Nyi Myìt Gyó Tô É Isira-elaq Byu Pé Hkyi Xe Yù Hui Râ Hkyô
9 Hau htoq agó, “Hau htâng, Ngò gi, byu pé mai,
haû Yhûmsîng Garaî é myìng lé lang luî,
i-myìt rahkat zâ èq Yhang lé wó chôm dójaú râ matú,
yhángmòq é nhutwuî lé lhoq chyoiyúng byi râ nghut lhê.
10 Hkusha mau mâ é wuìlàng pê é hé hpoq má nyi é,
Ngá é byo myín tô é, Ngo lé noqkuq é bang gi,
Ngá é matú hkungga pé yu lé byi kôrâ nghut lhê.
11 Yerusalem wà mó ê, haú buìnyì má, nàng gi,
Ngo lé kut shut bê hkyô bànshoq é yánmai, hoq hpû é hui zo râ a nghut;
hkâsu mù gâ le, Ngò gi, haú hkûn, myìt myhâng gyáng dang taî é bang lé,
náng chyáng mai huî sêng pyám râ nghut lhê.
Nàng gi, Ngá é chyoiyúng bùm má,
hkâ-nhám le myìt myhâng nghutbun râ a nghut lo.
12 Ngò gi, myìt nú nhâm é eq myìt lhoqnyhum é bang lé,
náng chyáng nyhi hkyô to râ nghut lhê.
Isira-elaq byu pé mâ é nyi myìt gyó tô é bang gi,
haû Yhûmsîng Garaî é myìng lé lùmhkau nyì kôrâ nghut lhê.
13 Yhángmòq gi, shut shai é hkyô kut kôrâ a nghut;
yhángmòq gi, mhaú dang taí kôrâ a nghut.
Yhángmòq é nhut má,
mhaú lô lhik lô kut é shô lé myàng râ a nghut.
Yhángmòq gi, ô èq kyuq é le a huî é za,
zo shuq mù, myang lèq kôrâ nghut lhê.” le gâ ri.
14 Zi-un Byìzo ê, mahkôn hkôn àq;
Isira-elaq ê, htê mó èq garu aq!
Yerusalem Byìzo ê, náng é i-myìt nhiklhum bànshoq èq myìt nguì luî,
gabú byam chyu aq!
15 Haû Yhûmsîng Garai gi, nang lé mara dam byi râ gâ é dang haú lé wùp yu pyám bê nghut mù,
náng é gye pé lé hkat tâng pyám bê nghut ri.
Isira-elaq é hkóhkâm, haû Yhûmsîng Garai gi, nàng eq rahá nghut nyi ri;
nàng gi, hkâ-nhám le, ihkyùp hui râ lé gyùq râ a nghut lo.
16 Haú buìnyì má, Yerusalem wá mó lé,
“Zi-un ê, hkâgyùq;
náng é lòq lé hkâ-nyhuî lhang nhâng.
17 Náng é Garai Gasang nghut é, haû Yhûmsîng Garai gi, nàng eq rahá nghut nyi ri;
Yhang gi, Wum-o a-tsam mó bo é Sarhê nghut mù, hkyi yù Sû nghut ri.
Yhang gi, nang lé gyai yhang gabú myìt nguì râ nghut lhê;
Yhang gi, Yhâng é chyitdàp myìt mai nang lé asik dùt nhâng mù,
mahkôn hkôn luî, nang lé gabú myìt ngui nyì râ nghut lhê.” ga taí kôrâ nghut lhê.
18 “Ngò gi, nàng eq sêng é, masàt tô é poî pé byùq byùq luî,
yón ngau é bang bànshoq lé huî sêng pyám râ nghut lhê;
haû gi, náng é matú, lùmù gànsâng hkyô eq wò mó nghut ri.
19 Haú ahkyíng má, Ngò gi, nang lé zìk zo zìk shuq é bang bànshoq lé,
mara byi râ nghut lhê.
Ngò gi, hkyî hten bang lé hkyi xe yù râ nghut lhê;
Ngò gi, shúm zung é bang lé shuî tsîng yù râ nghut lhê.
Ngò gi, hoq hpû é hui zo bang lé, mau hkangmó má
hkya-on wàq toq é eq hkúngga huî é byu pé dùt nhâng râ nghut lhê.
20 Haú ahkyíng má, Ngò gi, núngmòq lé shuî tsing râ nghut lhê;
haú ahkyíng má, Ngò gi, núngmòq lé yhûm shut shuî lò râ nghut lhê.
Núngmòq yùq hkangmó é myòq hí má,
Ngò, shúm zung é bang lé dum taû lò nhang é hkûn,
Ngò gi, núngmòq lé, myìdàm htoq mâ é byù bànshoq bâng chyáng,
hkúnggâ é eq hkya-on wàq toq huî é byù dùt nhâng râ nghut lhê.” ga,
haû Yhûmsîng Garai taî ri.