Jì-no A Gyô É Byù Myû Wuì
9
Isira-elaq a-myû ê, gyo aq; nàng gi, Yodan làng gû dàp ló mù, náng htoq je ko luî, wum-o je bò mù, mauhkûng htung shoq wàhkûm wam tô é wà mó pé má nyi é a-myû wuì lé hkat htoq râ za nghut bê. 2 Byù haú bang gi, wum bô kô myhang é Anak byu pé nghut akô! Nàng gi, “Ó yùq wá Anak byu pê é hí má wó yàp râ lhú?” ga yhángmòq eq sêng é hkyô taî é lé wó gyo wó sê tô é nghut lhê. 3 Nghut kôlhang, náng é Garai Gasang nghut é, haû Yhûmsîng Garai gi, gyúng nyi é myi su, náng é hí má gû dàp e ló sû nghut é lé, hkû-nyí hkyak sê to aq; Yhang gi, yhángmòq lé lhoqhtûm pyám luî, náng é hí má yhángmòq lé lhoqnyhum pyám râ nghut lhê. Haû mù, nàng gi, haû Yhûmsîng Garai mai nang lé danghtum htûm tô é eq rajung za, yhángmòq lé hkat htoq mù, hân za sat kyop pyám râ nghut lhê.4 Náng é Garai Gasang nghut é, haû Yhûmsîng Garai mai náng é hí má yhángmòq lé hkat htoq pyâm é htâng má, náng gûng nàng, “Ngò díngmán é yánmai shèq, haû Yhûmsîng Garai gi, shí mau lé sing yù râ matú ngo lé shuî jé é nghut ri.” nghû hkâtaí. A-myû wuì haú bâng é agè ashop hkyo é yánmai shèq, haû Yhûmsîng Garai gi, náng é hí mai yhángmòq lé hkat htoq pyám byî é ru nghut lhê. 5 Nàng, yhángmòq é maumyî lé ló wang sing yù râ gi, nàng díngmán é yánmai le a nghut, náng é i-myìt díng é yánmai le a nghut; náng é Garai Gasang nghut é, haû Yhûmsîng Garai gi, náng é îchyí îwâ pé nghut é Abraham, Isak eq Yakup lé dakâm danghtum htûm tô é lé lhoqdìk râ matú, a-myû wuì shí bâng é agè ashop hkyo é yánmai, náng é hí má yhángmòq lé hkat htoq pyám râ é ru nghut lhê. 6 Haû mù, náng é Garai Gasang nghut é, haû Yhûmsîng Garai mai maumyî gè shî lé sing yù râ matú nang lé byî é gi, nàng díngmán é yánmai a nghut é hkyô lé, sê gyo aq. Hkâsu mù gâ le, nàng gi, myìt htan é a-myû nghut ri.
Hîng No Zo Lhô
7 Haû yòso má, núngmòq é Garai Gasang nghut é, haû Yhûmsîng Garai lé núngmòq hkâsu kut nhikjum lhoqyô é hkyô lé, hkâ-nhám le a tô-myhî pyâm é za myìtbûn nyì àq; núngmòq gi, Egutuq ming mai htoq lo é nyí mai shí má jé shoq, haû Yhûmsîng Garai lé gumlau toq nyî bekô nghut ri. 8 Núngmòq gi, Horep bùm má haû Yhûmsîng Garai lé nhikjum lhoqyo luî, Yhang gi, núngmòq lé lhoqhtûm pyám râ í nhikmó-yo bê nghut ri. 9 Ngò gi, haû Yhûmsîng Garai mai núngmòq eq dangshikaq tô tô é lùqlong pé lé ló yû râ matú bùm shut dòq ló é hkûn, bùm htoq má myi xê nyí myi xê myìn yhang a zo a shuq kut ló nyi nyi é nghut lhê. 10 Núngmòq zùp zîng bum é nyí, bùm htoq má myiduq hkaû mai haû Yhûmsîng Garai taî pyo é hkunmó bànshoq lé, Garai Gasâng é lòqnyhuî èq kâ tap tô é lùqlong í long, haû Yhûmsîng Garai mai ngo lé byî ri.
11 Myi xê nyí myi xê myìn byíng jáng, haû Yhûmsîng Garai gi, ngo lé, dangshikaq lùqlong haû í long byî ri. 12 Hau htâng, haû Yhûmsîng Garai gi, ngo lé, “Shî mai radá dâm gyó ló aq; haî mù gâ le, Egutuq ming mai nàng shuî htoq lo é náng é byu pé gi, myìt gang bo bùm bekô nghut ri. Yhángmòq gi, Ngò, yhángmòq lé hkunmó hkyô tô é mai hân za nghoq ló byùq kômù, yhángmòq é matú hparà lhô saî yù bekô nghut ri.” ga taî kyô ri.
13 Hau htoq agó, haû Yhûmsîng Garai gi, ngo lé, “Byù myû shí bang lé Ngò myàng bê; yhángmòq gi, gè gè yhang, myìt htân bang nghut akô! 14 Haû mù, Ngò gi, yhángmòq lé lhoqhtûm pyám luî, mauhkûng ô mai yhángmòq é myìng lé bùt sut pyám râ matú, Ngo lé baú nyhi to aq. Ngò gi, nang lé, yhángmòq htoq wum je bo é a-myû dùt nhâng mù, yhángmòq htoq myoluq jebe nhâng râ nghut lhê.” ga taî ri.
15 Haû mù, ngò gi, bum má myi ru gyúng nyi ashî u lé, lhîng mù, bùm mai gyó lo é nghut lhê; dangshikaq lùqlong haû í long lé le ngá é lòq mai chung gyó lo é nghut lhê. 16 Ngò wú kat é hkûn, núngmòq gi, núngmòq é Garai Gasang nghut é, haû Yhûmsîng Garai lé mara kut shut bekô nghut é lé myang ri; núngmòq gi, núngmòq é matú hparà lhô saî yu é dông, no zo lhô azòng nyhê yui htoq yû bekô nghut ri. Núngmòq gi, haû Yhûmsîng Garai mai núngmòq lé hkunmó hkyô tô é mai hân za lhing ló byùq bekô nghut ri. 17 Haû mù, ngò gi, lùqlong haû í long lé yù mù, núngmòq é myòq hí má, ngá é lòq èq dú hkyop kat é nghut lhê.
18 Haû mù, ngò gi, haû Yhûmsîng Garaî é myòq hí má núngmòq agè ashop é hkyô kut luî, Yhang lé nhikjum lhoqyó nhang é, núngmòq kut shut é yubàk mara bànshoq é yánmai, hí lhê su yhang, haû Yhûmsîng Garaî é hí má myi xê nyí myi xê myìn a zo a shuq ngóm gòp é nghut lhê. 19 Hkâsu mù gâ le, haû Yhûmsîng Garai gi, núngmòq lé lhoqhtûm pyám râ ga shoq nhikjum yo bê nghut mù, Yhâng é nhikmó-yo hkyô eq nhikjum yô é hkyô lé ngò gyùq luî nghut lhê. Nghut kôlhang, haû Yhûmsîng Garai gi, ngá é dang lé dum gyo byi bê nghut lhê. 20 Haû Yhûmsîng Garai gi, Arun lé lhoqhtûm pyám râ ga shoq nhikjum yô ri; nghut kôlhang, ngò gi, haú dâm le Arun é matú kyûdung byî é nghut lhê. 21 Hau htoq agó, ngò gi, núngmòq é yubàk mara nghut é, núngmòq saî é no zo lhô lé yù mù, myi má nyhé luî, hpuílhup su dùt shoq lhoqhkyop rhîn mhun pyám mù, a-mùn haú lé bùm mai yui gyó nyi é wuìlàng zo má du kat pyâm é nghut lhê.
22 Hau htoq agó, núngmòq gi, Tabera jowò má le, Masa jowò má le, Kibrot Hatawa jowò má le, haû Yhûmsîng Garai lé nhikjum lhoqyo kô é nghut lhê.
23 Haû Yhûmsîng Garai gi, núngmòq lé, “Dòq ê mù, Ngò, núngmòq lé byî to bê maumyî lé ê sing yù keq.” ga taí luî, Kadesha Barine-a mai nhang htoq kat é nghut lhê. Nghut kôlhang, núngmòq gi, núngmòq é Garai Gasang nghut é, haû Yhûmsîng Garaî é hkunmó lé gumlau toq kômù, Yhang lé a lùmjíng kô é htoq agó, Yhâng é jì-no a gyo kó nghut ri. 24 Ngò, núngmòq lé sê é hkûn mai yhang, núngmòq gi, haû Yhûmsîng Garai lé gumlau toq nyî bekô nghut ri.
25 Ngò gi, núngmòq lé lhoqhtûm pyám râ ga haû Yhûmsîng Garai taî é yánmai, haû Yhûmsîng Garaî é hí má myi xê nyí myi xê myìn yhang ngóm gòp é nghut lhê. 26 Ngò, haû Yhûmsîng Garai lé kyûdûng é gi, “Ahko Ahkáng lhúnglháng wó Sû Yhûmsîng Garai ê, Náng é hpungwup a-tsam mó èq hkyi xe yù mù, Náng é wum mó bo é lòq èq Egutuq ming mai shuî htoq lo é, Náng é silî wunlî nghut é, Náng é byu pé lé hkâ lhoqhtûm pyám. 27 Náng é duìnhâng zoshâng Abraham, Isak eq Yakup lé myìtbun aq. Byù myû shí bang myìt htan é hkyô, yhángmòq é agè ashop hkyô eq yhángmòq é yubàk mara lé wú lhaî pyám byi aq. 28 Haû a nghut jáng, ngá-mòq lé Nàng shuî htoq yu é ming bang gi, ‘Haû Yhûmsîng Garai gi, yhángmòq lé danghtum htûm tô é mau má a wó shuî ló é yánmai le, yhángmòq lé a nguì é yánmai le, yòso má sat pyám râ matú yhángmòq lé shuî htoq lo é ru nghut ri myhî-nhung!’ ga taí kôrâ nghut lhê. 29 Nghut kôlhang, byù shí bang gi, Náng é hpungwup a-tsam mó eq Náng é lhâm tô é lòqbú èq shuî htoq lo é, Náng é silî wunlî nghut é, Náng é byu pé ru nghut lhê.” nghu é nghut lhê.