Dakâm Dang Pé
30
Mosheq gi, Isira-elaq a-myû up pê é ushuq pé lé, “Haû Yhûmsîng Garai hkunmó hkyô le, 2 ‘Byù rayùq yùq, haû Yhûmsîng Garai lé dâkam tô é nghut jáng le, yhûmsing gùng yhûmsîng hkang zìng râ ga dakâm danghtum htûm tô é nghut jáng le, yhang gi, yhâng é dang lé a ge lhoqhpyoq pyâm é za, taî tô é eq rajung za kut ra râ nghut lhê.3 Yhâng wâ yhûm má ru nyi tô ashî nghut é zo-myi zo rayùq yùq, haû Yhûmsîng Garai lé dâkam é hkûn, a nghut jáng, yhânggùng yhang hkang zìng râ ga dakâm danghtum htûm tô é hkûn, 4 yhang dâkam é dang eq dakâm danghtum htûm é lé yhâng wa wó gyô é nghut kôlhang, yhang lé haî a taî é nghut jáng, yhang dâkam é dang pé bànshoq eq yhânggùng yhang hkang zìng râ gâ é dakâm danghtum htûm tô é lhum hkangmó gîng to râ nghut lhê. 5 Nghut kôlhang, yhâng wa haú lé wó gyô é hkûn, yhang lé hkûm pyâm é nghut jáng, yhang dâkam é dang pé eq yhânggùng yhang hkang zìng râ gâ é dakâm danghtum htûm tô é hká lhum le gîng to râ a nghut. Yhâng wâ èq yhang lé hkum pyám bê nghut é yánmai, haû Yhûmsîng Garai gi, yhang lé lhut byi râ nghut lhê.
6 Yhang gi, dâkam é, a nghut jáng, yhânggùng yhang hkang zing pyám râ gâ é dakâm danghtum han htûm tô é htâng má zo-myi ló mù, 7 yhang lâng gi, haú hkyô lé wó gyo kôlhang, yhang lé haî le a taî é nghut jáng, yhang dâkam é dang pé eq yhânggùng yhang hkang zìng râ gâ é dakâm danghtum htûm tô é pé gîng to râ nghut lhê. 8 Nghut kôlhang, yhang lâng gi, haú hkyô lé wó gyô é hkûn, yhang lé hkûm pyâm é nghut jáng, yhâng gùng lé tuî zing tô é dakâm dang eq yhang gùng lé hkang zìng râ ga danghtum han htûm tô é lé, yháng lang èq lhoqhpyoq pyám byi bê nghut mù, haû Yhûmsîng Garai gi, yhang lé lhut byi râ nghut lhê.
9 Chuimó myhí nghut nghut, yhang lâng eq gâng to bê myiwe myhí nghut nghut mai, dâkam tô é, a nghut jáng, yhânggùng yhang hkang zìng râ gâ é dang haî le, gîng to râ nghut lhê.
10 Yhang lâng eq ru nyi tô ashî nghut é myiwe rayùq yùq, dâkam é, a nghut jáng, yhânggùng yhang hkang zing pyám râ ga danghtum htûm tô é hkûn, 11 yhang lâng gi, haú hkyô lé wó gyo kôlhang, yhang lé haî le a taî é htoq agó, a hkûm pyâm é nghut jáng, yhang dâkam é dang pé bànshoq eq yhânggùng yhang hkang zìng râ gâ é dakâm danghtum htûm tô é pé gîng to râ nghut lhê. 12 Nghut kôlhang, yhang lâng gi, haú pé lé wó gyô é hkûn, haú pé lé lhoqhtên pyám byî é nghut jáng, dakâm dang pé eq yhâng nhut mai htoq lo é dakâm danghtum htûm tô é pé hkâ le gîng tô râ a nghut. Haú pé lé yháng lang èq lhoqhtên pyám byi bê nghut mù, haû Yhûmsîng Garai gi, yhang lé lhut byi râ nghut lhê. 13 Yhang dâkam tô é dang, a nghut jáng, yhânggùng yhang hkang zing pyám râ ga dakâm danghtum htûm tô é haî le, yhang lâng lhoqging jáng ging, yhang lâng lhoqhten jáng hten, dùt râ nghut lhê. 14 Nghut kôlhang, yhang lâng gi, haû eq séng luî, ra-nyí htâng ra-nyí yhang lé haî le a gâ é nghut jáng, yhâng é dakâm dang bànshoq eq yhang dakâm danghtum htûm tô é pé yhang chyáng tuî gîng tô é hkyô lé, saî lhoqgîng tô é dông nghut ri. Yhang gi, haú hkyô pé lé wó gyô é hkûn, haî le a taî é dông haú pé lé lhoqgîng tô é nghut ri. 15 Nghut kôle, yhang lâng gi, haú pé lé wó gyô é htâng pé má shèq, haú pé lé lhoqhtên pyâm é nghut jáng, yhang myi lhoqshut é mara wò yù ra râ nghut lhê.’ gâ ri.” ga taî ri.
16 Shí pé gi, yùqgè rayùq eq yhang myî é zùm yàp hkyô eq, îwa rayùq eq yhâng é byìzo yhûm má nyi tô ashî u lé zùm yàp hkyô eq sêng é, haû Yhûmsîng Garai mai Mosheq lé byî é cháng ra târâ pé nghut ri.