Sui Zo Râ Lé Hkûm Tô É Hkyô
17
Haû Yhûmsîng Garai gi, Mosheq lé, 2 “Arun eq yhâng é yùqzô pé lé le, Isira-elaq byù bànshoq bang lé le, dang nyô mù, yhángmòq lé, ‘Haû Yhûmsîng Garai hkunmó hkyô é má, 3 Isira-elaq byu pé mâ é rayùq yùq, no, a nghut jáng, sau, a nghut jáng, bainám lé, xuq tô é wàp má nghut nghut, wàp shinggan má nghut nghut sat pyám mù, 4 haû Yhûmsîng Garaî é sàksé zúm hí má Yhûmsîng Garai lé hkungga dông nhông byi râ matú, zùphpong zúm hkum hí má a yu lé e nghut jáng, haú yùq gi, sui lhoqshun pyâm é mara bò sû nghû râ nghut lhê; yhang gi, sui lhoqshun pyám bê nghut mù, yhâng é a-myû mai chyung hpyit pyâm é hui ra râ nghut lhê. 5 Haû gi, Isira-elaq byu pé yòso má nhông byî é hkungga lé, haû Yhûmsîng Garaî hí má yu lé râ matú nghut lhê. Yhángmòq gi, hkungga haú pé lé, zùphpong zúm hkum, haû Yhûmsîng Garaî é hí, hkyangjong hpô chyáng yu lé mù, zùmhkaû hkungga dông nhông byi ra râ nghut lhê. 6 Hkyangjong hpó gi, hkungga sui lé, zùphpong zúm hkum mâ é Yhûmsîng Garaî é hkungga gyàp má hpyûn gyun mù, Yhûmsîng Garaî é matú namngón shôm dùt râ dông xû lé nyhê pyám ra râ nghut lhê. 7 Yhángmòq gi, yhángmòq eq gùngsho shut hkyô kut nyi é bainám hparà lé, yhángmòq é hkungga haî lé le a nhông byi lo kó sháng gàq. Shî gi, yhángmòq é matú le, jé lô râ pyàt bán pê é matú le, ahtum abyùq hkyô tô é hkunmó nghut ri.’ nghû taí aq.8 Hau htoq agó, yhángmòq lé, ‘Isira-elaq byu pé mâ é nghut nghut, yhángmòq chyáng bíng nyî bang mâ é nghut nghut, myi nyhé hkungga, a nghut jáng, gótû hkungga pé nhông byî é sû gi, 9 Yhûmsîng Garai lé hkungga haû nhông byi râ matú, zùphpong zúm hkum má a yu lé é nghut jáng, haú yùq gi, yhâng é a-myû mai chyung hpyit pyâm é hui ra râ nghut lhê.
10 Isira-elaq byu pé mâ é nghut nghut, yhángmòq chyáng bíng nyî bang mâ é nghut nghut, rayùq yùq sui zô é nghut jáng, Ngò gi, haú yùq lé Ngá é myòqdong lhoqhpyoq shit mù, yhang lé, yhâng é a-myû mai chyung hpyit pyám râ nghut lhê. 11 Hkâsu mù gâ le, gùngshô é kângsoq gi, sui má bo é nghut mù, Ngò gi, haú lé, hkungga gyàp má núngmòq é matú mara hkô htaí hkungga kut râ dông, núngmòq lé byî to bê nghut lhê; sui gi, kângsoq nghut lhê mù, byù rayùq é chyungxê é matú mara hkô htaí hkungga wó kut byî é nghut lhê. 12 Haû mù, Ngò gi, Isira-elaq byu pé lé, “Núngmòq ó yùq le sui ge zo râ a nghut; núngmòq chyáng bíng nyî bang mâ é ó yùq le sui ge zo râ a nghut.” nghû taî é nghut lhê.
13 Isira-elaq byu pé mâ é nghut nghut, yhángmòq chyáng bíng nyî bang mâ é nghut nghut, rayùq yùq sho hô ê mù, ge zô é yòsô zè, a nghut jáng, nghoq wó yu é nghut le gi, hau é sui lé tsan htoq pyám mù, myi-tse nghop pyám ra râ nghut lhê. 14 Hkâsu mù gâ le, gùngsho má dui é jung hkangmó é kângsoq gi, sui má bo é nghut ri. Haû nghut é yánmai, Ngò gi, Isira-elaq byu pé lé, “Gùngsho má dui é jung hkangmó é kângsoq gi, sui má bo é nghut lhê yánmai, núngmòq, haí jung gùngshô é sui le ge zo râ a nghut; sui zo sû ó yùq lé le chyung hpyit pyám ra râ nghut lhê.” nghû taî é nghut lhê.
15 Núngmòq mâ é nghut kôle, núngmòq chyáng lé bíng bang mâ é nghut kôle, rayùq yùq, yhang baú shi tô é, a nghut jáng, yòsô ze èq lâng myha sat tô é gaunyhaú lé zô é sû gi, yhâng é mèbu lé chî pyám luî, gùng lé le chî pyám ra râ nghut lhê; yhang gi, htûngli dông myínhtâng jé shoq a sanséng râ nghut lhê; hau htâng má shèq, yhang sanséng râ nghut lhê. 16 Nghut kôlhang, yhang gi, yhâng é mèbu lé a chî pyâm é htoq agó, gùng le a chî pyâm é nghut jáng, hau é mara wò yù ra râ nghut lhê.’ nghû àq.” ga taî ri.