Gùqzò Hkungga
2
Rayùq yùq, haû Yhûmsîng Garaî chyáng gùqzò hkungga yu lé byî é nghut jáng, yhâng é hkungga gi, je nú é mún nghut ra râ nghut lhê. Yhang gi, haú má tsanlun xû hut kat mù, namngón jung kat luî, 2 Arun é yùqzo hkyangjông pê chyáng yu lé byi ra râ nghut lhê. Haû hkyangjong hpó gi, mún eq xû lé namngón jung bànshoq le mù ra-tsup tsup yû luî, Yhûmsîng Garaî é matú namngón shôm dùt râ matú, bûn nyì gàmbùm dông hkungga gyàp htoq má haú lé nyhê nhông râ nghut lhê. 3 Myìt tô é gùqzò hkungga gi, Arun eq yhâng é yùqzô pê é matú dùt râ nghut lhê; haû gi, Yhûmsîng Garai lé nyhê nhông byî é hkungga pé mâ é chyoiyúng htâng é gàmbùm nghut bê.4 Myibung hkyûng hkaû má nyhîn nyhoq é gùqzò hkungga yu lé byî é nghut jáng, haû gi, je nú é mún lé, múnchi a bo é za tsanlun xû myhik nyhó mù bûng é mùk htû long nghut nghut, múnchi a bo é za bûng luî, tsanlun xû but tô é mùk yhám long nghut nghut dùt râ lhê. 5 Jòqtoq au hpyén má hen yu é gùqzò hkungga nghut jáng, haû gi, múnchi a bo é za, je nú é mún eq xû nyhó mù saî é dùt ra râ nghut lhê. 6 Haú lé lhoqhkyop mù xû hut kat àq; haû gi, gùqzò hkungga nghut bê. 7 Au má chyoq yu é gùqzò hkungga nghut jáng, haû gi, je nú é mún eq tsanlun xû nyhó mù saî é dùt ra râ nghut lhê. 8 Haû su kut saî é gùqzò hkungga lé, haû Yhûmsîng Garaî chyáng yu lé luî, haú lé, hkyangjong hpô é lòq má àp byi aq; yhang gi, haú lé hkungga gyàp má yu ê râ nghut lhê. 9 Yhang gi, gùqzò hkungga haû mai bûn nyì gàmbùm lé yu htoq mù, haû Yhûmsîng Garaî é matú namngón shôm nghut é, myi nyhé hkungga dông, haú lé hkungga gyàp má nyhé râ nghut lhê. 10 Myìt tô é gùqzò hkungga gi, Arun eq yhâng é yùqzô pê é matú dùt râ nghut lhê. Haû gi, Yhûmsîng Garai lé nyhê nhông byî é hkungga pé mâ é chyoiyúng htâng é gàmbùm nghut bê.
11 Haû Yhûmsîng Garaî chyáng lé nhông byî é gùqzò hkungga hkangmó gi, múnchi a bo é chyat saî é nghut râ lhê; hkâsu mù gâ le, haû Yhûmsîng Garaî é matú myi nyhé hkungga nhông byî é hkûn, múnchi nghut nghut, byo-î nghut nghut ge nyhê lhôm é a nghut. 12 Haú pé lé, sânghi myhîng é kyôshi myuishi hkungga dông Yhûmsîng Garai lé wó nhông byî é nghut kôlhang, namngón shôm dông hkungga gyàp má ge nhông byî é a nghut. 13 Nhông byî é gùqzò hkungga bànshoq má xo kat ra râ nghut lhê. Nàng nhông byî é gùqzò hkungga má, náng é Garai Gasâng é dangshikaq xo a kat é hkâkut; nàng nhông byî é hkungga bànshoq má xo kat ra râ nghut lhê.
14 Sânghi myhîng é kyôshi myuishi mâ é gùqzò hkungga lé, haû Yhûmsîng Garaî chyáng lé nhông byî é nghut jáng, gùqnhâm sik lé myi má nyhîn kyuq mù, gùqshin htûng yù luî, nhông byi ra râ nghut lhê. 15 Haú má xû hut kat mù, namngón jung kat àq; haû gi, gùqzò hkungga nghut bê. 16 Haû hkyangjong hpó gi, Yhûmsîng Garaî é matú myi nyhé hkungga dông, xû eq htûng yu é gùqshin mâ é bûn nyì gàmbùm lé, namngón jung bànshoq le mù rahá nyhê nhông byi ra râ nghut lhê.