Sàksé Zúm Lé Tsuq Shap Kat É Hkyô
40
Hau htâng, haû Yhûmsîng Garai gi, Mosheq lé, 2 “Nàng gi, sânghî lhôhkyap, sânghî nyí má, zùphpong zúm nghut é sàksé zúm lé tsuq shap aq. 3 Dangshikaq târâ kat tô é sàksé dò lé zúm hau é ahkaû má kat mù, pán-gyang gyâng to aq. 4 Mùkgyàp wàq háng mù, haú má chung é zè pé lé tsing kê to aq. Hau htâng, myi-kok tsûngjang lé wàq háng mù, myibung pé tsing tsung to aq. 5 Haû namngón jung nyhé hîng hkungga gyàp lé, dangshikaq târâ kat tô é sàksé dò hí má tô to mù, sàksé zúm wâng hkum má pán-gyang gyâng to aq.6 Haû myi nyhé hkungga gyàp lé, zùphpong zúm nghut é sàksé zúm wâng hkum hí má tô to aq. 7 Haû lànghkang lé gi, zùphpong zúm eq hkungga gyàp gyoro má tô to mù, wuì kat to aq. 8 Sàksé zúm hau é lhînghkyùq má wam kyâm to luî, wâng hkum má pán-gyang gyâng to aq.
9 Haû namngón xû lé yù mù, sàksé zúm eq haú má jòq é jung hkangmó má bùt àq; zúm haû eq haú mâ é chûngzè bànshoq lé lhoq sân-yúng aq; haû jáng, haú pé gi, chyoiyúng nyî râ nghut lhê. 10 Hau htâng, haû myi nyhé hkungga gyàp eq haú mâ é chûngzè bànshoq lé namngón xû bùt aq; hkungga gyàp haú lé lhoq sân-yúng aq; haû jáng, haû gi, chyoiyúng htâng é hkungga gyàp dùt nyì râ nghut lhê. 11 Haû lànghkang eq hau é tsûng hkyî má namngón xû bùt mù, haú pé lé lhoq sân-yúng aq.
12 Arun eq yhang zo yùqzô pé lé, zùphpong zúm hkum hí má shuî yù mù, yhángmòq lé gùng chi nhâng àq. 13 Hau htâng, Arun lé chyoiyúng mèbu hut byi mù, hkyangjong dông Ngo lé wó dójaú sháng gàq, namngón xû bùt byi luî, yhang lé lhoq sân-yúng byi aq. 14 Yhang zo yùqzô pé lé le shuî yù luî, mèbu hut byi mù, 15 hkyangjông pé dông yhángmòq Ngo lé wó dójaú kó sháng gàq, yhángmòq é yhâng wa lé su kut, yhángmòq lé namngón xû bùt byi aq. Yhángmòq lé namngón xû bùt byî é hkyô gi, jé lô râ yhángmòq é pyàt bán hkangmó má hkyangjong a-myû xoq dùt e ló râ matú nghut lhê.” ga taî ri. 16 Mosheq gi, haû Yhûmsîng Garai mai yhang lé hkunmó hkyô tô é eq rajung za, jung hkangmó lé kut bê nghut ri.
17 Haû mù, í zân nghû râ zàn, sânghî lhôhkyap, sânghî nyí má, sàksé zúm lé wó tsuq shap to bê nghut ri. 18 Mosheq gi, sàksé zúm lé tsuq é hkûn, hkoq pé lé yhâng é jowò má tsing tô to mù, siklong pé lé tu toq luî, sik yang pé lé kyáng mù, zìng pé lé tsing tu xuq tô ri. 19 Hau htâng, yhang gi, haû Yhûmsîng Garai mai yhang lé hkunmó hkyô é eq rajung za, sàksé zúm htoq má zúm lé pyo kat mù, zúm haú lé nghop to bê nghut ri.
20 Yhang gi, dangshikaq târâ dàp é lùqlong lé yù mù, haú lé sàksé dò má kat to luî, sàksé dò má sik yang chyoî mù, jeju dò a-myhî èq nghop tô ri. 21 Hau htâng, yhang gi, haû Yhûmsîng Garai mai yhang lé hkunmó hkyô tô é eq rajung za, sàksé dò haú lé sàksé zúm má wàq wàng mù, pán-gyang gyâng go tô é nghut luî, dangshikaq târâ kat tô é sàksé dò lé kyo tô ri.
22 Mùkgyàp lé le, zùphpong zúm hkaû mâ é pán-gyang shinggan, mautsûng hkyam shut tô to mù, 23 mùk lé, haû Yhûmsîng Garaî é hí, mùkgyàp htoq má kê tô ri; haû gi, Yhûmsîng Garai mai yhang lé hkunmó hkyô tô é eq rajung za nghut ri.
24 Yhang gi, myi-kok tsûngjang lé, zùphpong zúm hkaû mâ é mùkgyàp eq ang ang, sàksé zúm é maupyî hkyam shut tsung to mù, 25 haû Yhûmsîng Garaî é hí má myibung pé tuq tô ri; haû gi, Yhûmsîng Garai mai yhang lé hkunmó hkyô tô é eq rajung za nghut ri.
26 Mosheq gi, hîng hkungga gyàp lé, zùphpong zúm mâ é pán-gyang hí má tô to luî, 27 namngón shôm hkungga lé hau é ahtoq má nyhê ri; haû gi, Yhûmsîng Garai mai yhang lé hkunmó hkyô tô é eq rajung za nghut ri.
28 Hau htâng, yhang gi, sàksé zúm wâng hkum má pán-gyang gyâng tô ri. 29 Myi nyhé hkungga gyàp lé gi, zùphpong zúm nghut é sàksé zúm hkum eq chyâng é má tsung to mù, hau é ahtoq má, myi nyhé hkungga eq gùqzò hkungga lé nhông byî ri; haû gi, Yhûmsîng Garai mai yhang lé hkunmó hkyô tô é eq rajung za nghut ri.
30 Yhang gi, lànghkang lé, zùphpong zúm eq hkungga gyàp é gyoro má tô to mù, chî san chî yúng râ matú haú má wuì kat tô ri. 31 Mosheq le, Arun eq yhang zo yùqzô pé le, yhángmòq é hkyî lòq lé haú má chî akô nghut ri. 32 Yhángmòq gi, haû Yhûmsîng Garai mai Mosheq lé hkunmó hkyô tô é eq rajung za, zùphpong zúm má wang ê hkangmó nghut nghut, hkungga gyàp má chyâng htèp ê hkangmó nghut nghut, haú má chî yu akô nghut ri.
33 Hau htâng, Mosheq gi, sàksé zúm eq hkungga gyàp é lhînghkyùq má wam kyâm lhîng to luî, wâng hkum má pán-gyang gyâng tô ri. Haû mù, Mosheq gi, múzó haú lé lhoqpán bê nghut ri.
Yhûmsîng Garaî É Hpungwup Shingkang
34 Haú hkûn, zùphpong zúm má mhut htup byùq luî, haû Yhûmsîng Garaî é hpungwup shingkang gi, sàksé zúm má byíng zan tô ri. 35 Haû mù, Mosheq gi, zùphpong zúm má mhut htup tô é htoq agó, sàksé zúm má haû Yhûmsîng Garaî é hpungwup shingkang byíng zan tô é yánmai, haú má a wó wang ê nghut ri.
36 Haû gyung htoq é Isira-elaq byu pé bànshoq bang gi, sàksé zúm htoq mai mhut lé lhoqtoq yû jáng shèq, gyung htoq htoq kut akô; 37 nghut kôlhang, mhut lé a lhoqtoq yu é nghut jáng, yhángmòq gi, mhut lé lhoqtoq yu é buìnyì jé shoq, gyung a htoq kut akô nghut ri. 38 Haû mù, Isira-elaq byu pé lhúnglhâng bang gyung sô é ahkyíng bànshoq, yhángmòq lhúnglhâng bâng é myòq hí má, haû Yhûmsîng Garaî é mhut gi, nyí lé sàksé zúm má htup to byi luî, myín lé mhut hkaû má myi duq to byî é nghut ri.