Myi Nyhé Hkungga Gyàp
38
Yhángmòq gi, htángmó gâm sik lé, myi nyhé hkungga gyàp saî akô; hkungga gyàp haû gi, myhâng hpyang sum dúng bò mù, hîng hpyang ngo dúng, làm hpyang ngo dúng nghut luî, a-pyî a-tsûng rawuí wuí za bo ri. 2 Yhángmòq gi, hau é myi chyûn má hkyuî saî tap kô é nghut mù, hkungga gyàp eq hkyuî pé ralhum za dùt byùq bê nghut ri. Hkungga gyàp haú lé gyi shup tô akô. 3 Yhángmòq gi, haú má chûng râ zè nghut é, au pé, gòt zè pé, hkoq mó pé, akó mâ é sho htau dun pé eq myi hpan pé bànshoq lé, gyî èq chyat saî tô akô nghut ri. 4 Yhángmòq gi, hkungga gyàp é rawuí gû jé shoq, hkungga gyàp é ayàm lhînghkyùq má chyoi kat to râ matú, dong dông é gyi zuî long mó saî akô nghut ri. 5 Yhángmòq gi, gán-yang chyoî râ matú, hau é ahtoq mâ é myi chyûn chyûn hkangmó má gyi góng ralhum lhum saî tap akô. 6 Yhángmòq gi, htángmó gâm sik gán-yang pé saí kômù, haú pé má gyi shup tô akô. 7 Yhángmòq gi, hkungga gyàp lé wàq râ matú, hkungga gyàp é í shut mâ é gyi góng pé má sik yang chyoî kômù, hkungga gyàp lé ahkaû má hóng hóng kut luî, sik lông èq saî tô akô nghut ri.Chî San Chî Séng Râ Matú Lànghkang
8 Yhángmòq gi, zùphpong zúm hkum má lé dójaú é myiwe wui é gyi myòqjàm lé yù mù, chî san chî séng râ matú, gyi lànghkang eq hau é zìng lé saî akô nghut ri.
Wâng Hkaû Eq Sêng É Hkyô
9 Yhángmòq gi, wânghkaû lé le saî akô. Wâng hau é maupyî hkyam shut gi, rashô dúng hîng mù, hau é matú, wáng dui tô é nú nhâm é jîhkying èq wòq é pán-gyang le, 10 zìng í xê hkat le, gyi hkoq í xê hkyap le, zìng mâ é ngùn pyîyang pé eq ngùn gòknghe pé le bo ri. 11 Haû eq rajung za, mautsûng hkyam shut mâ é matú, pán-gyang rashô dúng hîng mù, hau é matú, zìng í xê hkat, gyi hkoq í xê hkyap, zìng mâ é ngùn pyîyang pé eq ngùn gòknghe pé le bo ri.
12 Wâng hau é buìwàng hkyam shut gi, ngo xê dúng làm mù, hau é matú, pán-gyang, zìng raxê hkat eq hkoq raxê hkyap, zìng mâ é ngùn pyîyang pé eq ngùn gòknghe pé le bo ri. 13 Wâng hau é buìhtoq hkyam shut le, ngo xê dúng lam ri. 14 Haû wâng hkûm é rahkyam shut gi, raxe ngo dúng hing é pán-gyang, zìng sum hkat eq hkoq sum hkyap bò mù, 15 wâng hkum góhkyam shut le, raxe ngo dúng hing é pán-gyang, zìng sum hkat eq hkoq sum hkyap bo ri. 16 Wânghkaû lhînghkyùq má chung é pán-gyang bànshoq lé gi, wáng dui tô é nú nhâm é jîhkying èq saî é chyat nghut ri. 17 Zìng pê é matú hkoq pé lé gi, gyî èq saî akô. Zìng pé mâ é gòknghe pé eq pyîyang pé lé gi, ngun èq saí kômù, hau é ahpyo pé lé gi, ngun èq shup akô nghut ri; haû mù, wânghkaû mâ é zìng pé bànshoq gi, ngùn pyîyang pé bo é chyat nghut ri.
18 Wâng hkûm é matú pán-gyang gi, rago dàt wòq dàt htaû é byu èq, mauhkûng nyuì nyui é, mê é eq zam zam ne é hkying èq wáng dui tô é nú nhâm é jihkyîng lé wòq tô é, í xê dúng bo é pán-gyang nghut mù, wânghkaû mâ é pán-gyang su myhâng hpyang ngo dúng bo ri. 19 Hau é matú, zìng myi hkat eq gyi hkoq myi hkyap bo ri. Haú pê é gòknghe pé eq pyîyang pé lé gi, ngun èq saî é nghut mù, haú pê é ahpyo pé lé gi, ngun èq shup é nghut ri. 20 Sàksé zúm mâ é sangchyam pé eq wânghkaû lhînghkyùq mâ é sangchyam pé bànshoq gi, gyî èq saî é chyat nghut ri.
Sàksé Zúm Mâ É Chûngzè Pé
21 Mosheq hkyô tô é hkunmó eq rajung za, hkyangjong Arun é yhang zo yùqzo Ihtama shuî-û é a-ô má, Lewiq byu pé mai, haû dangshikaq târâ kat sàksé zúm nghut é sàksé zúm má chûng râ matú hen lajâng tô é chûngzè pé bànshoq gi, a-ô mâ é eq rajung za nghut lhê. 22 (Yudaq up mâ é Hura é yhang shu, Uri é yhang zo yùqzo Bezalela gi, haû Yhûmsîng Garai mai Mosheq lé hkunmó hkyô tô é lhúnglháng lé kut ri; 23 Dan up mâ é Ahisamak é yhang zo yùqzo, kyûng é lòqmú saî é, azòng pé dàt myìt htoq é eq, mauhkûng nyuì nyui é, mê é eq zam zam ne é hkyîng eq nú nhâm é jihkyîng zá dàt htaû é sû Oholi-aba gi, yhang eq rahá mú zui sû nghut ri.) 24 Sân-yúng jowò mâ é múzó má chung é, wàq hê hkungga mâ é hîng gi, sân-yúng jowò mâ é joí má cháng jáng, 340 joí kô bo ri.
25 Shiwa byù hpûng myìng jihpán kat é mai wó yu é ngùn gi, sân-yúng jowò mâ é joí má cháng jáng, 1106 joí kô bo ri. 26 Myìng jihpán má bo é í xê zàn eq í xê zàn ahtoq mâ é byù bànshoq 603550 yùq bo é rajung za, yhángmòq yùq hkangmó gi, sân-yúng jowò mâ é joí má cháng jáng, rayùq rache byî záng ri. 27 Haû sân-yúng jowò eq pán-gyang é matú hkoq pé 100 hkyap saî é má, ngùn 1130 joí chung é nghut mù, hkoq rahkyap gi, ngùn 11 joí chung záng ri. 28 Yhángmòq gi, myìt tô é ngùn hkyuq joí lé, zìng má tap é gòknghe saî é má le, zìng hpyo pé eq haú pê é pyîyang pé má shup é má le chung akô nghut ri.
29 Wàq hê hkungga mai wó yu é gyi gi, 778 joí kô bo ri. 30 Yhángmòq gi, gyi haú pé lé chûng mù, zùphpong zúm é wâng hkûm é matú hkoq pé lé le, gyi hkungga gyàp eq, hau é gyi zuî long mó eq haú mâ é chûngzè pé bànshoq lé le, 31 wânghkaû lhînghkyùq má chûng râ hkoq pé lé le, wàng hkum má chûng râ hkoq pé lé le, sàksé zúm mâ é sangchyam pé bànshoq eq wânghkaû lhînghkyùq mâ é sangchyam bànshoq pé lé le saî akô nghut ri.