3
1 Awaji îgbaan̄ enyi melek Karais ijomo me mkpa. Eya orọ, ìkiweek inu echi òkup me emen inyọn̄ ere Karais osikibe ikweek me agan̄ ubọk ulom unye eyi Awaji. 2 Ìkikaan̄ ulọk, mè ìkikeek ekiket ofolek inu echi òkup me emen inyọn̄, ikakaan̄ ulọk me lek inu echi òkup me linyọn̄ keyi. 3 Mije, enyi mîkwaan̄ itele oka ijo ugwem kinyi, mè iyaka inikaan̄ ayaya ugwem. Awaji onenimọnọ ayaya ugwem ya ilet me emen kè Karais, ogwu òkup melek Awaji. 4 Eya orọ, Karais ore ugwem kinyi. Me mgbọ Karais, ogwu òrere ugwem kinyi ya, môgwube ikom inu, enyi mêgọọk ọmọ si ikana isibi me ujamgbugbo kan̄.
Nteme ofolek oka ugwem mè aya ugwem
5 Mije Karais orebe ugwem kinyi, ìtele otutuuk oka ijo ugwem kinyi cha eyi linyọn̄ keyi. Ìmọnọ oka ugwem cha kubọk inu òkwukwu, eyi ikayakage ìkaan̄ unye me emen kinyi. Ìtele ijeje oyet mè ten̄ten̄ ugwem, mè ugwem barabat, mè ijo ulọk, mè chieen̄ ile, mije, ire enyi ikaan̄ chieen̄ ile me lek inu geelek, ìsibi ibe ke enyi mîmin inu ya igak Awaji. 6 Îre mije inu chi geelek ke unaan̄-ejit Awaji obonikeme ebi kpekisiki ibot inyi Awaji. 7 Me adasi mgbọ, enyi me lek kinyi mîgọọk ikirọ ijo inu chi me emen oka ugwem enyi ekiluk. 8 Ire, mgbọ keyi enyi ekaan̄be ayaya ugwem, ìtele otutuuk ijo ugwem cha. Ìtele unaan̄-ejit, mè uyok-ejit, mè ikekeek ene ijo, mè itutumu ene ifiat, mè ijo otu ikọ geelek. 9 Ikakan̄ ataak ìnyi ebi melek kinyi, mije, enyi mîra iwọọk oka ugwem kinyi eyi òkirọ inyi enyi ekerọ ijo inu cha isan̄a, 10 mè iyaka initap ayaya ugwem eyi Awaji orombe. Awaji ogwu òrorom ugwem ya ìkpọkpọ ikinwene ugwem ya, inyi ikikana ayaya, mè inikup kubọk ugwem kan̄, mè enyi esa me ikeya eriọọn̄ ọmọ ejaan̄ lek. 11 Me emen ayaya ugwem yi, otutuuk ene ìre ìkike, ogwu Ju mè ogwu ikarege ogwu Ju, ogwu efieekbe afi mè ogwu ekafieekge afi, ebi usun̄ mè ebi ekarege usun̄, mè otutuuk ebi ekabologe chieen̄, ìrere ebi ìluk me agan̄ ekigwen Sitia. Otutuuk ife chi ìre ìkike, kpunu esese inu geege òkukup me etete kiban̄, mije, Karais ore inu geelek inyi ema, ọmọ si okup me emen otutuuk kiban̄.
12 Eya orọ, enyi kubọk ebi eyi Awaji, ebi Awaji ogobobe isun̄ esese inyi lek kan̄, ìmun̄ lek kinyi me chieen̄ enenen, ìkikaan̄ njijin mè ata ejit me lek ene. Ìkisiki lek kinyi, mè ìkirọ inu esuuk esuuk, mè ìkikaan̄ ukarajit. 13 Ikakigwat lek ìnaan̄ ejit ìnyi ebi melek kinyi ebi ìrọrọ enyi ilọ. Ire ebi melek kinyi irọ enyi ijo inu, ìtele inyi ema. Ike Awaji otelebe ijo kinyi inyi enyi, enyi si, ìtele ìnyi ebi geelek ìrọrọ enyi ijo inu. 14 Eyi ògagak otutuuk, ìkaan̄ imumechieen̄ me lek ebi melek kinyi, mije, imumechieen̄ okigbaan̄ otutuuk ata ugwem chi ibọp me emen ene, mè ikirọ inyi ene ya iso ifuk ubọk Awaji oweekbe.
15 Ìtele mè esuuk eyi Karais okinyi ene ikup me emen ejit kinyi, mè ikijeen̄ enyi oniin̄ me emen inu geelek enyi ekirọ, mije, Awaji ìgbaan̄ otutuuk kinyi igwen, inyi enyi enere akpalek ge gaalek, mè eluk me esuuk. Ìkinyi Awaji itọn̄ mgbọ geelek. 16 Ìtele mè ikọ kè Karais ikup me emen kinyi òjot òjot. Ìkisa me òjot òjot iriọọn̄-inu ìkijeen̄ ebi melek kinyi inu. Ìkikọt okwa mbuban mè okwa itọn̄ ìnyi Awaji, mè okwa echi òkibene Ekwukwu Mbuban. Ike enyi ekikọt okwa inyi Awaji, ìkitọn̄ ọmọ mgbọ geelek me emen ejit kinyi. 17 Me inu geelek enyi ekirọ, mè ìre me ikọ otu mè ìre me ikwaan̄ irọrọ me ubọk, ìkirọ otutuuk me erieen̄ Okaan̄-ene Jisọs, mè ìkisa me lek erieen̄ kan̄ ìnyi Awaji itọn̄.
Ubọk ògbegbe ibe eluk ugwem me ototun̄ ukan̄ ebi eyi Karais
18 Enyi ebi nwa, ìsiki ibot ìnyi ebi nlom kinyi, mije, ikeya ogbe ibe ogwu òkup me emen Okaan̄-ene irọ.
19 Enyi ebi olom, ìmun̄ ebi nwa kinyi me chieen̄. Ikaluk ugwem ijo ijo melek kiban̄.
20 Enyi nsabọn, ìsiki ibot ìnyi nte kinyi mè nga kinyi me emen inu geelek, mije, irọrọ ikeyi okibele Awaji ejit.
21 Enyi ebi ute, ikatap nsabọn kinyi ijo ejit, inyi ema ekanan̄a me ikeya ìwọ lek me irọrọ inu òtatat.
22 Enyi ebi usun̄, ìkisiki ibot ìnyi ebi nte uwu kinyi me emen inu geelek. Ikakisiki ibot me mgbọ ema ekupbe gaalek, inyi ema ekema enyi. Ire, ìkisa otutuuk ejit kinyi ìsi ikwaan̄ ìnyi ema me oniin̄ òbokinyi Okaan̄-ene umin. 23 Inu geelek enyi ekirọ, ìkisa otutuuk ejit kinyi ìrọ, mije, enyi ekirọ inyi Okaan̄-ene, ìkare ebilene. 24 Ikawuuk ibe ke Okaan̄-ene môkpe enyi mkpukpe ubọk ikwaan̄ kinyi. Enyi mêbọkọ otutuuk ìrot geelek îsun̄be inyi enyi, mije, Okaan̄-ene Karais me lek kan̄ ore nte uwu ya ogwu enyi ekisi ikwaan̄ inyi. 25 Ene geelek òkirọ ijo inu ìkpolọlọ ibọbọkọ mkpukpe ijo inu kan̄, mije, Awaji ìkakilibi ene geege chieen̄, ìkakigobo si ene geege isi.